பொன்னேரி:
தி.மு.க. எம்.பி.யும், முன்னாள் மத்திய மந்திரியுமான ஆ.ராசா கடந்த 6-ந் தேதி வேப்பேரி, பெரியார் திடலில் நடந்த நிகழ்ச்சியில் கலந்துகொண்டார்.
அப்போது அவர் இந்துக்கள் குறித்து சர்ச்சையை ஏற்படுத்தும் வகையில் பேசியதாக குற்றச்சாட்டு எழுந்துள்ளது. இங்கு பல்வேறு இந்து அமைப்பினர் மற்றும் பா.ஜனதா கட்சியினர் எதிர்ப்பு தெரிவித்து வருகிறார்கள்.
ஆ.ராசா மீது போலீசார் சட்டப்படி நடவடிக்கை எடுக்க வேண்டும் என்று கோரிக்கை விடுத்து வருகிறார்கள்.
மேலும் இது தொடர்பாக பா.ஜனதா சார்பில் போலீஸ் டி.ஜி.பி. அலுவலகத்திலும் புகார் மனு அளிக்கப்பட்டது.
இந்த நிலையில் இந்துக்கள் குறித்து சர்ச்சைக் குரிய வகையில் பேசிய ஆ.ராசா மீது நடவடிக்கை எடுக்க கோரி பா.ஜனதா சார்பில் மீஞ்சூர், சோழவரம் போலீஸ் நிலையங்களில் புகார் செய்யப்பட்டு உள்ளது. அதில், 'இந்துக்களின் மனம் புண்படும் வகையிலும் இந்து மக்களின் ஒற்றுமையை சீர்குலைக்கும் வகையிலும் சர்ச்சைக்குரிய வகையில் ஆ.ராசா பேசி உள்ளார். இந்துமத நம்பிக்கையை இழிவுபடுத்தி வரும் ஆ.ராசா மீது சட்டப்படி கைது நடவடிக்கை மேற்கொள்ள வேண்டும்' என்று கூறப்பட்டு உள்ளது.
