நாகர்கோவில்:
குமரி மாவட்டத்தில் பல்கலைக்கழகம் அமைக்க வேண்டும், ரப்பர் தொழிற் சாலை, விவசாயக் கல்லூரி, மீன் வளக் கல்லூரி, தகவல் தொழில் நுட்ப பூங்கா அமைக்க வேண்டும் என்பன உள்பட 20 அம்ச கோரிக்கைகளை வலியுறுத்தி காங்கிரஸ் சார்பில் 1 லட்சம் கையெழுத்து இயக்கம் தொடங்கப்பட்டு உள்ளது.
நாகர்கோவில் மார்ஷல் நேசமணி சிலை முன்பு தொடங்கிய இந்த நிகழ்ச்சிக்கு முன்னாள் மாவட்ட தலைவரும், அகில இந்திய போலிங் பூத் காங்கிரஸ் மாநில தலைவருமான ராதாகிருஷ்ணன் தலைமை தாங்கினார். குமரி கிழக்கு மாவட்ட காங்கிரஸ் கலைப்பிரிவு தலைவர் அலெக்ஸ், மாணவர் காங்கிரஸ் ஒருங்கிணைப்பாளர் அப்ஜித், அமைப்பு சாரா தொழிலாளர் பிரிவு மாவட்டத் தலைவர் மனோஜ் ஆகியோர் முன்னிலை வகித்தனர்.
கேரள முன்னாள் முதல்-மந்திரி உம்மன் சாண்டி மகனும், இளைஞர் காங்கிரஸ் வெளிக்கொணர்வு தேசிய தலைவருமான சாண்டி உம்மன் கையெழுத்து இயக்கத்தை தொடங்கி வைத்தார். தொடர்ந்து பஸ் நிலையத்தில் பொது மக்களிடம் கையெழுத்துக்கள் பெறப்பட்டது.
