திருச்சி,
திருச்சியை அடுத்துள்ள இனாம்குளத்தூர் பட்டிக்காட்டான் தெரு பகுதியைச் சேர்ந்தவர் ஹவுஸ் முகமது (வயது 47). இவரது மகளுக்கும், இனாம்குளத்தூர் தெற்கு தெரு பகுதியைச் சேர்ந்த ஷேக் மொய்தீன் (22) என்ற இளைஞருக்கும் இடையே காதல் மலர்ந்தது. பின்னர் இருவரும் திருமணம் செய்து கொள்ள விருப்பம் தெரிவித்துள்ளனர்.இந்த காதல் விவகாரம் ஹவுஸ் முகமதுவிற்கு தெரிய வந்தது. அதைத் தொடர்ந்து அவர் தனது மகளை கடுமையாக கண்டித்தார். மேலும் ஷேக் மொய்தீனிடம் தனது மகளுடனான காதலை கைவிடுமாறு வற்புறுத்தி உள்ளார்.இது ஷேக் மொய்தீனை ஏமாற்றம் அடைய செய்தது. இதனால் ஆத்திரமடைந்த அவர் தனது சகோதரர் ஷேக் முகமது, தந்தை ராஜா முகமது ஆகியோருடன் சென்று இனாம்குளத்தூர் பஜார் பகுதியில் ஒரு மளிகை கடை முன்பு நின்று கொண்டிருந்த ஹவுஸ் முகமதுவை சரமாரியாக தாக்கி கொலை மிரட்டல் விடுத்து விட்டு தப்பி சென்றதாக கூறப்படுகிறது.இதில் படுகாயம் அடைந்த ஹவுஸ் முகமது திருச்சி அரசு மருத்துவக் கல்லூரி மருத்துவமனையில் சிகிச்சைக்காக சேர்க்கப்பட்டார். இதுகுறித்து இனாம்குளத்தூர் போலீசார் காதலன் சேக் மொய்தீன், அவரது சகோதரர் ஷேக் முகமது, தந்தை ராஜா முகமது ஆகிய 3 பேர் மீது வழக்கு பதிவு செய்து விசாரணை நடத்தி வருகின்றனர்.
