கதம்பம்

கவிஞர் வாலி ஒரு அறிஞரைப் பார்க்கப் போயிருந்தார். அவர் கேட்டார்,

"வாலி என்று ஏன் பெயர் வைத்திருக்கிறாய்?"

வாலி சொன்னார்,"ராமாயணத்திலே,வாலி யாரோடு சேர்கிறானோ, அவருடைய பலத்தில் பாதி, அவனுக்கு வந்து விடுமாம். அதுபோல அறிஞர்களுடன் பழகும்போது, அவர்களது அறிவில் பாதி எனக்கு வந்து விடுமல்லவா? அதனால் தான் நான் அந்தப் பெயரை தேர்ந்தெடுத்தேன்" என்றார்.

உடனே அறிஞர் கிண்டலாக ,"அப்படியும் உனக்கு அறிவு வந்ததாகத் தெரியவில்லையே?" என்றார்.

வாலி சிரித்துக் கொண்டே,"நான் இன்னும் எந்த அறிவாளியையும் சந்திக்கவில்லையே!" என்றாராம்.

-சந்திரன் வீராசாமி

இமயமலை.. ,அதே மேகங்கள் தான்,அதே பனி உருகல் தான்.அந்த மலையிலிருந்து பல்வேறு வகையான நதிகள் பெருக்கெடுத்து ஓடுகின்றன. ஆனால் கங்கை நதி மட்டும் எப்படி மாறுபடுகிறது?. .

கங்கை உற்பத்தியாகின்ற இடம் என்று சொல்லப்படுகிற கங்கோத்ரியை எல்லோரும் பார்வையிடலாம்.ஆனால் உண்மையான கங்கோத்ரி அதுவல்ல. அது உற்பத்தியாகும் இடத்தை நம்முடைய பருவுடலை கொண்டு அங்கே சென்று பார்வையிடமுடியாது. உன்னுடைய ஆத்மா உடலை கொண்டு மட்டும் உள்ளே நுழைந்து நீண்ட தூரம் சென்று ஒருவர் தரிசிக்கமுடியும்.அங்கே தான் இயற்கையான இரசாயன மாற்றம் நிகழ்கிறது.

இந்துக்களின் கோயில்கள் அனைத்துமே நீரை ஆதாரமாக கொண்டவை.நீண்ட ஆறுகளும் குளங்களும் பசுஞ் சோலைகளும் இருந்தால் தான் ஒரு இந்து ஆலயத்தை நிர்மானிக்க முடியும். ஏனெனில் இந்து ஆலயங்கள் குளிர்ச்சியை ஆதரமாக கொண்டவை. சமணர்களின் ஆலயங்கள் பசுமையில்லா குன்றுகளின் மேல் அமைந்துள்ளன. ஏனெனில் சமணரகளின் ஆலயங்கள்வெப்பத்தை ஆதாரமாக கொண்டவை.

கங்கை நதி நீரை போலவே தண்ணீரை செயற்கை முறையில் உருவாக்க விஞ்ஞானிகள் போராடிப்பார்த்தார்கள் முடியவில்லை. யாராவது இரசாயனத்தை கலக்கிறார்களா என்றால் அதுவும் சாத்தியமில்லை. கங்கை நதி நீர் முற்றிலுமே ரசாயன தொழிற்சாலையாக இருக்கிறது. மற்ற தண்ணீரை ஒரு வாரம் வைத்திருந்தால் நாறிவிடுகிறது. ஆனால் கங்கை நதி நீர் எத்தனை நாள் வைத்திருந்தாலும் கெட்டுப்போகாமல் அப்படியே இருக்கிறது.

கங்கை நதி நீரில் இரசாயன மூலக்கூறுகளும் ஆன்மீக வளர்ச்சிக்கான மூலக்கூறுகளும் இயற்கையாக அமைந்துள்ளது. கங்கையில் குளித்தவுடன் மனித உடலிலுள்ள நீரும் மாற்றமடைகிறது. அவனுடைய உடலும் மனமும் ஒரு குறிப்பிட்ட நேரத்திற்கு ஆன்மீக பாதையில் திரும்புகிறது. உடனடியாக புனிதத்தலத்தில் பிரவேசித்து வணங்குவது ஒரு மிகப்பெரிய ஆன்மீக அனுபவமாகும். புறத்தை கொண்டு அகத்தை நாடும் மிகச்சிறந்த வழி இதுவாகும். அதனால் தான் சிவனின் தலையில் கங்கையை இந்துக்கள் அமைத்து கொண்டார்கள்.

-ஓஷோ

சாமி மாதிரி வந்து, நல்ல நேரத்தில் உதவி செஞ்சீங்க!

இப்படி சொல்பவர்கள் முன்பாக, சாமி ஆனது, மனித சட்டை தாங்கி அடிக்கடி வருவதால் தான், அவர்கள் இப்படி சொல்கிறார்கள்! கொடுத்து வைத்தவர்கள் இவர்கள்!

சாமியோ தவத்தாலும் அறிய முடியாதவன்! சாமிய மாதிரி ஒருத்தரைப் பார்க்கலாம்! சாமியப் பாக்க முடியாது! அவனை உணரலாம்! அவன் தன்மையை உணரலாம்!

அது என்ன தன்மை?

சாமியிடம் மிக மிக இயல்பான தன்மை ஒன்று உண்டு! அது உயிர்கள் மீது கருணை கொள்வது!

நன்றாகச் சிந்தித்தால், உயிர்களின் உருவநிலைக்கு அவன் அளித்த கருணையே காரணம்!

உயிர்களின் இயக்கநிலைக்கு அவன் கருணையே காரணம்!

உயிர்களின் ஞானநிலைக்கு அவன் கருணையே காரணம்!

சாமி இவ்வாறு கருணை செய்வது ஏன்?

உடல், கருவிகள், உலகம் போன்றவற்றால், உயிர் இச்சைநிலை அடைகிறது!

இந்த இச்சையையும், உயிரின் வினைக்கேற்பவே சாமி கூட்டி வைக்கிறான்!

இப்படி உண்டான இச்சையால், உயிர் அடையும் துன்பத்தில் இருந்து விடுபடவே, சாமி உயிர்கள் மீது கருணை கொள்கிறான்!

உயிர்கள் இரண்டு நிலையில் துன்புறும்! ஒன்று இச்சை! இது மனப் பசி! இரண்டு வயிற்றுப் பசி!

இது இரண்டையும் தீர்த்து வைப்பவன் சாமியே!

இரண்டையும் தீர்க்க அவனைப் போல நம்மால் முடியாது! இருப்பினும், வயிற்றுப் பசியை, நம்மால் இயன்ற மட்டும் தீர்க்க முடியும்! இதை மனிதநேயம் என்கிறார் #வள்ளலார்!

இந்த சீவ காருண்யச் செயலை, அதாவது உயிர்களின் வயிற்றுப் பசியை, சாமியைப் போல் கருணையோடு நீக்கும் எந்த உயிரும் #இறைத்தன்மையை அடையும் என்பது #அப்பர் வாக்கு!

அன்னம் பாலிக்கும் தில்லைச் சிற்றம்பலம்

பொன்னம் பாலிக்கும் மேலும் இப்பூமிசை

என் அன்பு ஆலிக்குமாறு கண்டு இன்புற

இன்னம் பாலிக்குமோ இப்பிறவியே -தேவாரம் 5:01

பசியை நீக்கும் எவ்வுயிரும் பிறவுயிர்களால் சாமி என்றே அழைக்கப்படும்!

பசிப்பிணி தீர்க்க வாருங்கள் சாமிகளே! இதற்கு பெயர் பிரசாதம் அல்ல! #அமுதூட்டல் அதாவது அன்னம் பாலித்தல்!

உணவைப் பரிமாறும் போது, நன்றாகப் பாருங்கள்! அத்திருக் கூட்டத்திலே சாமியும், அடியார்களும் சரிசமமாய் அமர்ந்து இருப்பார்கள்!

அத்திருக்கூட்டத்தில் கண்டேன் சாமியை!

-சொக்கலிங்கம் முருகன்

'காதலினால் சாகாமலிருத்தல் கூடும்.

கவலை போம்...

அதனாலே மரணம் பொய்யாம்...' என்கிறார் பாரதி.

மரணத்தையே பொய்யாகச் செய்கிற அந்தக் காதலைத் தூண்டுவது ஒரு ஹார்மோன்.

காதல் கண்களை மறைக்க, அதில் நீங்கள் கரைந்து உருகவும், காதல் காணாமல் போகும் போது, உயிரை மாய்த்துக் கொள்ளவோ, உயிரை எடுக்கவோ துணியவும் காரணம் காதல் அல்ல... காதலுக்குக் காரணமான ஹார்மோன்.

ஆமாம்...

அது மட்டுமல்ல... நீங்கள் யார் என்பதை உங்கள் ஹார்மோன்கள் தீர்மானிக்கின்றன.

அட... இதென்ன புதுக்கதை?

ஹார்மோன்கள் என்பவை உடலை இயக்கும் ஒருவித ரசாயனங்கள்தானே... அவை எப்படி நமது ஆளுமையைத் தீர்மானிக்கும் என்கிறீர்களா? அது அப்படித்தான்!

அமைதி, ஆத்திரம், கோபம், குரூரம், காதல், காமம், பயம், பதற்றம்... இப்படி மனித வாழ்க்கையில் மாறி மாறிக் கிளர்ந்தெழுகிற அத்தனை உணர்ச்சிகளின் பின்னணியிலும் இருப்பவை ஹார்மோன்களின் விளையாட்டே...

காதலில் ஈடுபடும்போது செரட்டோனின் என்கிற ஹார்மோன் உச்சத்தில் இருக்கும்.

காதலனோ, காதலியோ பக்கத்தில் இருக்கும் போது, மிதக்கிற மாதிரியான ஒரு உணர்வைப் பெறுவதும் இதனால்தான்.

ஆக்சிடோசின் என இன்னொரு ஹார்மோன் உண்டு. அன்பு செலுத்துவதில் அதன் பங்கும் பெரியது. ஆனால், இது வெறும் காதலுக்கு மட்டுமின்றி, பாசத்துக்கும் காரணமானது. குறிப்பாக அம்மாவுக்கும் குழந்தைக்குமான நெருக்கத்தின் போது இது ஊற்றெடுக்கும்.

பிறந்த குழந்தையை அணைத்தபடி தாய்ப்பால் கொடுக்கும் அம்மாவுக்கும், பால் குடிக்கிற குழந்தைக்கும் இந்த ஆக்சிடோசின் அளவு கடந்து சுரக்கும்.

அதனால்தான் குழந்தைகளுக்கு அம்மா எப்போதும் கொஞ்சம் ஸ்பெஷலாகவே இருக்கிறாள். சுருக்கமாகச் சொன்னால், ஸ்பரிசத்தினால் அதிகமாகிற ஹார்மோன் இது.

அடிக்கடி தொட்டுக் கொள்ளாத, முத்தமிடாத கணவன் - மனைவியிடையே இந்த ஹார்மோன் சுரப்பு குறைவாகத்தான் இருக்கும்.

தவிர பெண்களுக்கு இந்த ஹார்மோன் சுரப்பு அதிகம். அதனால்தான் அவள் எப்போதும் கணவன் என்கிற ஒரே ஆணுடன் மட்டுமே தொடர்பு வைத்துக் கொள்ள விரும்புவாள்.

பெண்ணை ஒரே ஆணுடன் உறவு கொள்ளச் செய்கிற மாதிரி, ஆணுக்கு பல காதல்களில், உறவுகளில் நாட்டத்தை ஏற்படுத்தவும் டெஸ்ட்டோஸ்டீரான் என்கிற ஹார்மோனே காரணம்.

இந்த ஹார்மோன் பெண்களுக்கும் இருக்கும். அது அளவு கூடும்போது, அவளுக்கும் பாலியல் ஆர்வம் அதிகரிக்கும் என்கிறது விஞ்ஞானம்.

டெஸ்ட்ரோஸ்டீரான் அளவு கூடும்போது, அன்புக்கும் அரவணைப்புக்கும் காரணமான ஆக்சிடோசின் அளவை அது குறைத்து விடும்.

அதனால்தான் ஆண்களால் ஒரு உறவை சுலபமாக முறித்துக் கொண்டு, இன்னொன்றுக்குத் தாவ முடிகிறது.

ஆணுக்கும் பெண்ணுக்கும் பொதுவான டோபமைன் என்கிற ஹார்மோன் சந்தோஷத்துக்குக் காரணமானது. டோப் என்றால் போதை என அர்த்தம்.

காதலோ, காமமோ எதிலும் ஒருவித போதை நிலைக்குக் கொண்டு போவதில் இந்த ஹார்மோனுக்கு முக்கிய இடமுண்டு. அடுத்தவரின் மேல் ஈர்ப்பையும் உண்டாக்கக் கூடியது.

பெண்களுக்கு ஈஸ்ட்ரோஜென், புரோஜெஸ்டிரான் என இரண்டு முக்கியமான ஹார்மோன்கள் இருக்கும்.

இந்த இரண்டும் அவர்களுக்கு மாதம் முழுக்க ஏறுவதும், இறங்குவதுமாக நிலையற்று இருக்கும்.

ஈஸ்ட்ரோஜென் என்பதுதான் அவர்கள் பெண்மையை உணரச் செய்வது. ஆணையும் பெண்ணையும் இணைப்பதிலிருந்து, இருவரையும் ஆழமாக நெருங்கச் செய்வது,

பாலியல் ஆர்வத்தைத் தருவது, பெண்ணுக்கு முடியழகைத் தருவது, அழகான உடல் வளைவைத் தருவது என எல்லாம் ஈஸ்ட்ரோஜெனால் வருவதே.

ஒரு பெண் மன அழுத்தத்தில் இருக்கும் போது அவளுக்கு இந்த ஹார்மோனின் அளவு குறைவாக இருக்கலாம்.

மாதவிலக்கான 15 நாட்களுக்குப் பிறகு புரோஜெஸ்டிரான் சுரப்பு குறையும். அந்த நாட்களில் அவர்களுக்கு சரியான தூக்கம் இருக்காது. பாதித் தூக்கத்தில் விழித்துக் கொள்வதும், மறுபடி தூக்கத்துக்குள் போக முடியாமலும் படபடப்புடன் இருக்கவெல்லாம் இதுவே காரணம்.

கார்ட்டிசால் என்கிற ஹார்மோன், அவசர காலத்து நடவடிக்கைகளின் போது ஊற்றெடுக்கக் கூடியது.

உதாரணத்துக்கு யாருடனாவது சண்டையிடும் போது... ஓட வேண்டியிருக்கையில்... பிரச்னைகளை எதிர்கொள்வதில்... இப்படி உடனடி ஆற்றலுக்கு உதவக் கூடியது இது.

வாசோப்ரெசின் என்கிற ஹார்மோனை வாஞ்சையானது என்றே சொல்லலாம். ஆண்களுக்குக் காதல் உணர்வைக் கொடுத்து, குடும்பத்தைப் பாதுகாக்கும், காப்பாற்றும் பொறுப்பையும் கொடுக்கக்கூடியது.

புரோலாக்டின் என இன்னொன்று...

குழந்தை பெற்ற ஒரு பெண், ஏதோ ஒரு கூட்டத்தில் தன் குழந்தை இல்லாமல் நின்று கொண்டிருப்பாள்.

வேறு யாருடைய குழந்தையோ பசியால் அழும். அந்த அழுகைச் சத்தம் கேட்டதும், கூட்டத்தில் நிற்கிற அந்தத் தாய்க்கு அவளையும் அறியாமல் பால் சுரந்து, உடைகள் நனையும்.

இந்த ஹார்மோனின் அளவுகடந்த சுரப்பினால்தான் குழந்தை பெற்ற பெண்களுக்கு இயல்பாகவே செக்ஸ் ஆர்வம் குறையும்.

இன்னும் இப்படி அட்ரீனலின், எபிநெர்ஃபின், நார்எபிநெஃப்ரைன் என வேறு சில ஹார்மோன்களும் ஆண், பெண் உடலில் உண்டு.

ஒவ்வொன்றுக்கும் ஒவ்வொரு குணாதிசயம் உண்டு. சரி... இப்போது எதற்கு ஹார்மோன் புராணம் என்கிறீர்களா? உங்கள் துணையின் நடவடிக்கைகளில் ஏற்படுகிற திடீர் மாற்றங்களின் பின்னணியில் இப்படி சில ஹார்மோன்களின் வேலைகள் கூட காரணமாக இருக்கலாம்.

உங்கள் உணர்வுகளைப் பிரதிபலிப்பது, எண்ணங்களின் எழுச்சி, துணையுடனான உங்கள் நெருக்கத்தைத் தீர்மானிப்பது என எல்லாவற்றிலும் ஹார்மோன்களின் திருவிளையாடல் இருக்கும்.

பெண்ணுக்கு மீசை, தாடியை வளரச் செய்வதன் பின்னணியிலும், ஆணுக்கு அதை வளரவிடாமல் செய்வதன் பின்னணியிலும்கூட ஹார்மோன்களே நிற்கின்றன.

'நீயெல்லாம் ஒரு ஆம்பிளையா/ பொம்பிளையா...?' என துணையின் மேல் நெருப்பு வார்த்தைகளைக் கக்குவது சுலபம்.

அப்படி வசை பாடச் செய்த பிரச்சனையின் பின் மறைந்து நிற்கிற ஹார்மோன் கோளாறுகளைப் பற்றியும் அறிந்து வைத்திருப்பது நலம்.

தினமும் உங்கள் துணையைக் கட்டி அணையுங்கள். முடிந்தபோதெல்லாம் முத்தமிடுங்கள். 'ஐ லவ் யூ' சொல்லுங்கள்.

உடனே உங்கள் ஹைபோதலாமஸ் பகுதியிலிருந்து சிக்னல் கிடைத்து, ஆக்சிடோசின் சுரக்கும்.

அது உங்கள் இருவருக்கும் இடையில் பிணைப்பைக் கூட்டும். ஆறுதலான, இதமான ஒரு உணர்வைத் தரும். காதல் கூடும்.

- பொன்.தங்கராஜ்

இவ்வுலகில் பிறந்த மக்கள் அனைவரும் ஓரு குலம் தான். ஆனால் அனைவரும் ஒன்றுபோல் இருப்பதில்லை. ஏன் ஒரு தாய் வயிற்றில் பிறந்தவர்கள் கூட ஒரே மாதிரி இருப்பதில்லை. உடல் தோற்றம், குணநலன்கள் முதல் பழக்க வழக்கம, வாழ்க்கை முறை வரை அனைத்திலும் ஒவ்வொருவரும் மாறுபட்டே இருப்பார்கள்.

அவரவர் செய்த கர்மவினைகளுக்கு ஏற்பவே பிறவி அமைகிறது. ஒருவர் எந்த ராசியில் பிறந்திருக்கிறாரோ அதற்கேற்பவே அவரது வாழ்க்கை அமைந்திருக்கும்.

மேஷ ராசியில் பிறந்தவர்களின் வாழ்க்கை எப்படி இருக்கும் என்பதை பற்றி ஆராய்வோம்...

மேஷ ராசி அன்பர்கள் சுறுசுறுப்பானவர்கள். இவர்கள் எப்பொழுதும் தைரியம், தன்னம்பிக்கை, விடாமுயற்சி, எந்த விஷயத்தையும் பயமில்லாமல் அணுகுவது போன்ற இயற்கையான குணங்களை பெற்றவர்கள்.

சற்று, முன் கோபம் கொண்டவர்கள். கோவம் வந்தால் மூக்கு அல்லது முகம் சிவக்கக் கூடிய நபர்கள். எளிதில் உணர்ச்சிவசப்படக் கூடியவர்கள். சாகச பயணங்கள் செல்வது விளையாட்டு போன்ற விஷயங்கள் இவர்களுக்கு மிகவும் பிடிக்கும்.

நம்பிக்கையான நபர்களாகவே இருப்பார்கள் தொழில் மற்றும் நட்பு வட்டத்தில். மந்தமாக செயல்படுபவர்களை கண்டால் இவர்களுக்கு பிடிக்காது. வேகம், சீக்கிரம், அவசரம் இதுபோன்ற வார்த்தைகளை இவர்கள் அதிகம் உபயோகிப்பதை காணலாம்.

காரமான உணவுகளை அதிகம் விரும்பி சாப்பிடக் கூடியவர்கள். பெரும்பாலும் உஷ்ணமான உடல் அமைப்பை கொண்டவர்கள். நல்ல வலுவான ஆரோக்கியமான உடலமைப்பு பெற்றவர்கள்.

கல்வி மற்றும் தொழில் அமைப்பு:

விஞ்ஞானம், இயந்திரங்களை பழுது பார்க்கக்கூடிய துறை, விமான போக்குவரத்து, கட்டுமானத்துறை, விவசாயம், கனரக பொறியியல் துறை, கணினித்துறை, மருத்துவர், அறுவை சிகிச்சை துறை, ராணுவம், காவல்துறை, விளையாட்டு போன்ற துறைகளில் இவர்களுக்கு கல்வி கற்றாலும் தொழில் அமைந்தாலும் சிறப்பாகவே இருக்கும்

திருமண வாழ்க்கை:

துலா ராசி அல்லது லக்கினத்தை சார்ந்தவர்கள் பொருத்தமான வாழ்க்கை துணையாக அமைவது முடிகிறது. அது மட்டுமில்லாமல் சுக்கிரனின் தன்மை கொண்ட ரிஷபம், மகரம், தனுசு போன்ற ராசிகளும் நன்றாகவே பொருந்தும்.

மேலும் இவர்கள் நட்சத்திர அமைப்பை பொறுத்து தாரா பலன் பார்த்து திருமணம் செய்வது சிறப்பான மணவாழ்க்கை ஏற்படுத்தி தரும். பெரும்பாலும் இவர்களுடைய மண வாழ்க்கை தோல்வி அடைவதில்லை. மோசமான ஜாதக அமைப்புகள், கடுமையான தோஷங்கள் இருந்தால் மட்டுமே மணவாழ்க்கை தோல்வி அடைவதை நாம் காண முடிகிறது.

ஆரோக்கியம்:

உஷ்ண தேகம் அமைப்பை கொண்ட இவர்களுக்கு அது சார்ந்த நோய்கள் வரக்கூடிய வாய்ப்பு உள்ளது. கொப்புளங்கள், கழிவு உறுப்புகளில் கட்டிகள், மூலம், உடல் சூடால் ஏற்படக்கூடிய தலைவலி மற்றும் குடல் பகுதிகளில் அல்சர் போன்ற நோய்கள் வரக்கூடிய வாய்ப்புகள் இவர்களுக்கு இருக்கும். நரம்பு சார்ந்த பிரச்சனைகளான வெரிகோஸ் வெயின், நரம்பு தளர்வு இது போன்ற விஷயங்கள் நடுத்தர வயதில் ஏற்பட வாய்ப்புள்ளது.

செவ்வாய் கடகத்தில் நீச்சம் அடைவதால் மன பலம் சற்று குறைவு, அதனாலே இவர்களுக்கு வியாதிகள் வரும், திருமண வாழ்க்கை அல்லது தொழிலில் ஏற்படும் மனக்குழப்பத்தை சமாளிக்க தெரியாமலேயே பல வியாதிகளை இவர்கள் சமாளிக்கவேண்டிய சூழல் ஏற்படும்.

நோய் தாக்குதலில் இருந்து இவர்கள் மீண்டு வர வைத்தீஸ்வரன் கோவில் முத்துக்குமாரசுவாமியை அந்த கோவில் குளத்தில் குளித்துஇவர்களுடைய ஜென்ம நட்சத்திரம் அன்று வழிபடுவது மிகச் சிறப்பு.

இளநீர், கொப்பரைத் தேங்காய், தேங்காய் பால் போன்ற உணவுகளை அடிக்கடி சேர்த்துக் கொள்வது இவர்களுக்கு மிகவும் நல்லது.

அதிர்ஷ்டம் பெருக செய்ய வேண்டியது:

கிழக்கு வாசல் வீடுகளில் குடி இருக்கலாம், சஷ்டி விரதம் இருப்பது, செவ்வரளி மலர்களால் முருகனை வழிபடுவது, யோக பயிற்சிகளை கற்றுக்கொண்டு செய்வது, பவள மோதிரம் அணிவது, தொழில் தடை மற்றும் பிரச்சனைகள் ஏற்பட்டால் அஷ்டமி திதியில் சண்முகருக்கு நல்லெண்ணெய் தீபம் போட்டு வழிபடவும். பணக்கஷ்டம் ஏற்பட்டால் கோசாலைகள் சென்று கோமாதாவிற்கு உணவு கொடுப்பது சிறப்பு.

-ஜோதிடர் ஹரிசுதன்

இந்தியாவை பிரிட்டிஷ் கிழக்கிந்திய கம்பெனி ஆட்சி செய்த காலத்தில் விஜய் சிங் ரத்தோர் என்பவர் ராஜஸ்தான் மார்வார் இராச்சியத்தின் அரசனாக இருந்தார்.

ஒரு முறை இவர் விக்டோரியா ராணியின் அழைப்பின் பேரில் இங்கிலாந்து சென்றார். ஒரு நாள் சாதரண உடையில் லண்டன் வீதியில் இருந்த ரோல்ஸ் ராய்ஸ் கார் ஷோவ்ரூமுக்குச் சென்று கார்களின் விலைகளை விசாரிக்க நினைத்தார்.

அப்பொழுது அங்கிருந்த ஊழியர்கள் இவர் ஒரு மன்னர் என்பதை அறியாமல் இவருக்கு அனுமதி மறுத்தனர்..

இதனால் கோபமுற்ற விஜய் சிங் ரத்தோர் தனது ஓட்டல் அறைக்கு சென்று அரச உடையை அணிந்து கொண்டு மீண்டும் ரோல்ஸ் ராய்ஸ் ஷோரூமுக்கு சென்றார். அப்போது அதே ஊழியர்கள் அவருக்கு உபசாரம் செய்து வரவேற்பு அளித்தனர்.

ராஜா விஜய் சிங் 6 ரோல்ஸ் ராய்ஸ் கார்களை முழுதொகையும் செலுத்தி வாங்கினார். ராஜஸ்தான் திரும்பிய பிறகு, ஜோத்பூர் நகரின் குப்பைகளை சுத்தம் செய்ய இந்த கார்களையே பயன்படுத்துமாறு நகராட்சிக்கு உத்தரவிட்டார். அதுமட்டுமின்றி அதனை புகைப்படம் எடுக்கவைத்து அவற்றை லண்டன் செய்தித் தாள்களுக்கு அனுப்பி வைத்தார்.

உலகின் தலைசிறந்த கார்களாகக் கருதப்படும் ரோல்ஸ் ராய்ஸ் கார்கள் ஒரு காலனி நாடான இந்தியாவில் நகரக் கழிவு வாகனமாக பயன்படுத்தப்படும் செய்தி பரவியதால் ரோல்ஸ் ராய்ஸ் நிறுவனத்தினர் ஆடிப்போயினர்.

நிறுவனத்தின் தலைமை அதிகாரிகள் லண்டனில் இருந்து விரைந்து சென்று ராஜாவிடம் மன்னிப்பு கேட்டுக்கொண்ட பின்னர் அந்த கார்களை திருப்பி வாங்கிக்கொண்டு அவற்றுக்கு பதிலாக வேறு கார்களையும் வழங்கிவிட்டுச் சென்றனராம்.

-பி.சுந்தர்

ஒருகுடும்பத்தில் கணவனும் மனைவியும் பேசும் மொழிகள் வெவ்வேறானவை! என்னே ஒரு விசித்திரம்!!

நைஜீரியாவின் தென்பகுதியில் உள்ள ஒரு பிராந்தியம் தான் உபாங். இங்கு ஆண்களும் பெண்களும் வெவ்வேறு மொழிகளைப் பேசுகின்றனர்!

எடுத்துக்காட்டாக, சேனைக்கிழங்கினைப் பெண்கள் மொழியில் '' இருய் '' என்கின்றனர். இதுவே ஆண்கள் மொழியில் '' இடொங் '' என்கின்றனர். இப்படி ஒவ்வொன்றையும் பெண்கள் ஒருவிதமாகவும் ஆண்கள் வேறுவிதமாகவும் கூறுகின்றனர்.

கடவுள் பூமியைப் படைத்தபோது, இரு இனத்தவருக்கும் இரண்டு மொழிகளைப் பகிர்ந்து கொள்ள விரும்பினார். அந்த விருப்பத்தைக் கடவுள் உபாங்கில் இருந்து தொடங்கியதாக, மொழியை ஓர் ஆசீர்வாதமாகப் பார்க்கும் இந்த பழங்குடியினர் தெரிவிக்கின்றனர்.

பெண்களின் மொழியை குழந்தைகள் முதலில் கற்கின்றனர். 10 வயதில் சிறுவர்கள் ஆண்களின் மொழியை கற்பர். பத்துவயதைக் கடந்த ஒரு ஆண்குழந்தை பெண்கள் மொழியைப் பேசினால் அது குறையுள்ள குழந்தையாகவே கருதப்படும்; அதேபோல பத்துவயதைக் கடந்த பெண்குழந்தை, ஆண்கள் மொழி பேசினால் அதுவும் குறையுள்ள குழந்தையாகவே கருதப்படும்.''

-வீரமணி வீராசாமி

அண்டார்டிகா என நீங்கள் மேப்பில் பார்ப்பது அண்டார்டிக் பனிப்பாறையைத்தான். இது சுமார் ஐந்து கிமி கிலோமீட்டர் தடிமன் கொண்டதாக இருக்கும். பனிப்பாறையை ஐந்து கிமி கீழே துளைத்து சென்று ஆராய்ந்தால் தான் அண்டர்டிகாவின் நிலப்பரப்பே கண்ணில் தென்படும். எந்த மனிதனும் அதை பார்த்தது கூட கிடையாது என்பது மட்டுமல்ல, அதன் நிலபரப்பில் 90% இன்னும் ஆராய்ச்சி செய்யபடவே இல்லை

காரணம் அண்டார்டிகா என்பது பரப்பளவில் ஒட்டுமொத்த ஐரோப்பாவை விட சற்று பெரிய கண்டம். அதன் மேலே பறந்தபடி விமானங்கள் ரேடாரை கீழே அனுப்பும். ரேடார் அலைகள் பனிக்கட்டியைத் துளைத்து, நிலத்தை அடைந்து எதிரொலிப்பதன் மூலம், அந்த பகுதியின் நில அமைப்பு பற்றிய தகவல்களைப் பெற முடியும். இப்படி 10% நிலபரப்பு மட்டுமே ஆராய்ச்சி செய்யப்பட்டுள்ளது. இன்னும் 90% நிலபரப்பு ஆராயபடவே இல்லை அண்டார்டிகாவின் பனிக்கட்டியை முழுவதும் அகற்றினால், கீழே ஏராளமான எரிமலைகள், ஆறுகள், ஏரிகள் காணப்படும். அண்டார்டிகாவின் பனிக்கட்டியின் கீழே உலகின் மிகப்பெரிய மலைத்தொடர்களில் ஒன்றான டிரான்ஸ்டென்டிக் மலைகள் அமைந்துள்ளன. இவை ஹிமாலய மலைகளை விட உயரமானவை. அண்டார்டிகாவின் ஒரு பகுதியான மேற்கு அண்டார்டிக் எரிமலை மற்றும் பிளவு மண்டலம் என்பது பசிபிக் தீவளையத்தின் ஒரு பகுதியாகும். அதனால் அன்டார்டிகாவின் பனிக்கு கீழே எரிமலைகளின் சூட்டால், பனிக்கட்டி உருகி, ஆறுகள் உருவாகி, பனிப்பாறைக்கு கீழே ஆறுகள் ஓடி, கடலில் நீரை சேர்க்கின்றன என்பது வியப்பான தகவலாகும். இதேபோல அண்டார்டிகாவின் பனிப்பாறைக்கு அடியே திரவடிவில் நீர் இருக்கும் மிகப்பெரும் ஏரிகளும் உள்ளன.

அண்டார்டிகாவின் பனிப்பாறைக்கு அடியில் திரவ நிலையில் நீர் நிரம்பிய மிகப்பெரிய ஏரிகள் பல கண்டுபிடிக்கப்பட்டுள்ளன. இவற்றில் மிகவும் பிரபலமானது லேக் வோஸ்டாக் (Lake Vostak). மதிப்பீடுகளின்படி, இது சுமார் 15,690 சதுர கிலோமீட்டர் பரப்பளவைக் கொண்டிருக்கும். இது ஒரு சிறிய நாட்டின் அளவுக்கு சமம். இது பல லட்சம் ஆண்டுகளாக பனிக்கட்டியின் கீழ் உள்ளது.

ஐந்து கிமி பனிப்பாறைக்கு கீழே பல லட்சம் ஆண்டுகளாக இருப்பதால், இங்கே உயிர்கள் ஏதேனும் இருக்குமா என்பதே சந்தேகமாக இருந்தது. அத்தனை கிமி ஆழத்துக்கு சூரிய வெளிச்சம் போகாது. சூரிய ஒளிச்செர்க்கை நடைபெறாது. ஆனால் ரஷ்ய நாட்டு விஞ்ஞானிகள் அங்கே சில நுண்ணுயிரிகள் வசிப்பதை உறுதி செய்தனர்.

அதன்பின் பனியால் மூடப்பட்ட அண்டர்டிகாவின் எராபஸ் மலையில், குகைகள் இருப்பதும், அது எரிமலை என்பதால், குகைக்குள் நல்ல வெப்பம் இருப்பதும், 25 டிகிரி செல்சியஸ் வெப்பத்தில், குகை ஜம் என உயிர்கள் வாழ தகுதியாக இருப்பதும், அங்கே திரவ வடிவில் நீர் இருப்பதும் தெரிய வந்தது. ஒளிசேர்க்கை தேவைப்படாத கெமோசிந்தசிஸ் மூலம் உயிர்கள் உருவாகலாம்

ஆக, நாம் வாழும் பூமிக்கு அடியிலேயே முற்றிலும் புதிய வகையிலான உயிர்கள் வாழகூடும் என்பதே வியப்பளிக்கிறது. அண்டார்டிகா போல பல கிரகங்கள், நிலவுகளில் பனியால் மூடப்ட்ட திரவநிலை சமுத்திரங்கள், ஏரிகள் உள்ளன. அங்கேயும் இதுபோல மிக புதிய வகை உயிர்கள் வாழலாம். பூமியும் வானமும் இடையே எத்தனை அதிசயங்கள், விந்தைகள்.

- நியாண்டர் செல்வன்

சீனத்துறவி லாவோட் சூ தன் சீடர்களோடு போய்க் கொண்டிருந்தபோது ஒரு காட்டு வழியாகப் போனார். ஒரு பெரிய அரண்மனை வேலை நடந்து கொண்டிருந்தது.

நூற்றுக்கணக்கானோர் மரங்களை வெட்டி கொண்டிருந்தனர். காடு முழுக்க வெட்டியாகிவிட்டது. ஒரு பிரம்மாண்டமான மரம் மட்டும் அப்படியே இருந்தது. ஆயிரம் பேர் அதன் நிழலில் உட்காரலாம். அவ்வளவு பிரம்மாண்டமான மரம்.

தன் சீடர்களை அனுப்பி காடு முழுவதும் மொட்டையடித்த பின் அந்த ஒரு மரத்தை மட்டும் யாரும் வெட்டாமல் விட்டு வைத்திருக்கும் காரணத்தைத் தெரிந்துவரச் சொன்னார்.

அவர்களும் போய், "இந்த மரத்தை மட்டும் ஏன் விட்டு வைத்திருக்கிறீர்கள்?" என்று கேட்டார்கள்.

அருமையான பதில் வந்தது. 'அதுவா? இது பிரயோசனமில்லாத மரம், ஒவ்வொரு கிளையிலும் ஏகப்பட்ட முண்டு முடிச்சு. என்ன செய்வது இதை வைத்துக்கொண்டு? நேராயிருந்தாலாவது தூண்கள் செய்யலாம். அதுவுமில்லை. தட்டுமுட்டுச் சாமான்கள் செய்யலாம் என்றாலும் முடியாது. வெட்டி எரிக்கலாம் என்றாலோ கிளப்புகிற புகையின் விஷத்தில் கண்கெட்டுப் போகும். எந்தப் பிரயோசனமும் இல்லை. அதனால்தான்" என்றார்கள்.

திரும்பிப் போய்ச் சொன்னார்கள். லாவோட் சூ சிரித்தார்.

"இந்த மரத்தைப் போலத்தான் இருக்க வேண்டும். பிழைத்திருக்க வேண்டுமானால் இந்த மரத்தைப் போலத்தான் இருக்கவேண்டும். எந்தப் பிரயோசனமும் இல்லாமல் இருக்கவேண்டும். யாரும் எந்தத் தீங்கும் செய்யமாட்டார்கள்.நேராக இருந்தால் வெட்டி எடுத்துப்போய்த் தூணோ தட்டுமுட்டுச் சாமானோ செய்துவிடுவார்கள். அழகாக இருந்தால் சந்தையில் விற்கப்படும் பண்டமாகிப் போவாய். இந்த மரத்தைப்போல பிரயோசனம் இல்லாமல் இருந்து விடு. யாரும் எந்தத் தொந்தரவும் செய்ய மாட்டார்கள். செளகரியத்துக்கு வளரலாம். ஆயிரக்கணக்கானோர் உன் நிழலில் இளைப்பாறலாம்" என்றார்.

-ஓஷோ

அழகிய கொடைக்கானலை கண்டுபிடித்தவர்கள் ஆங்கிலேயர்கள்..

1800 களில் கோடை வெப்பத்தை தாங்க முடியாத ஆங்கிலேயர்கள் குளிரான பகுதியை கண்டுபிடிப்பதற்காக வார்ட் என்ற ஆங்கிலேயரை தமிழ்நாட்டின் தென்பகுதிக்கு அனுப்பி வைத்தனர். அவர் பழனி மலைத் தொடரின் பெயரிடப்படாத ஒரு பகுதியை கண்டறிந்தார்...

இதற்கு முன்பே இங்கு பல நூறு ஆண்டுகளாக பளியர் இன மக்கள் வாழ்ந்து வந்தனர். அவர்கள் மலைப்பகுதிகளில் விளையும் கிழங்கு மற்றும் காய்கறிகளை கீழே உள்ள பெரியகுளம் பகுதிக்கு வந்து விற்று விட்டு செல்வார்கள்...

அது ஒரு ஒத்தையடி பாதை. அந்தப் பாதையின் வழியாக 1821 ஆம் ஆண்டு தனது ஆய்வை தொடங்கினார் வார்ட். பெரிய குளத்தில் இருந்து கும்பக்கரை வழியாக ஏழு கிலோ மீட்டர் தொலைவுக்கு மேலே சென்றவுடன் வெல்லக்கவி என்ற கிராமம் வந்தது. அதுதான் ஆங்கிலேயர்கள் கால் பதித்த இன்றைய கொடைக்கானலின் முதல் பகுதி.

அங்கிருந்து டால்பின் நோஸ் என்கிற ஒரு பகுதி உள்ளது. அந்த வழியாக அவர் சென்ற இடம்தான் இன்றைய கொடைக்கானல். அந்தக் குளிர் அவருக்கு மிகவும் பிடித்துப் போக அங்கேயே தங்கி விட்டார். அவர் தங்கியது மட்டுமல்லாமல் இந்த சூழல் மிகவும் அழகாக இருக்கிறது என்று பிற ஆங்கிலேயர்களையும் அந்த பகுதிக்கு அழைத்தார்...

அவர் 1825 ஆம் ஆண்டுகளில் கட்டிய முதல் கட்டிடம் இன்றும் கொடைக்கானலில் உள்ளது. இந்த செய்தி பல ஆங்கிலேயர்களுக்கு தெரியவே அவர்களும் அங்கு வந்து தங்கத் தொடங்கினர். கொடைக்கானல் மலையின் பூர்வ குடிகளை தவிர்த்து சமவெளி பகுதியில் இருந்து மக்கள் முதல் முதலாக குடியேறிய ஆண்டு 1845 மே 26.

அப்போதைய மதுரை ஆட்சியர் லேவிங்ஸ் தன் நண்பர் ஜான் டேவ் உடன் இணைந்து உருவாக்கிய ஏரியே இன்றைய கொடைக்கானலின் நட்சத்திர ஏரி.

1860 ஆம் ஆண்டு தான் முதன் முதலில் கொடைக்கானல் என்ற பெயர் அரசிதழில் இடம்பெற்றது.

கொடைக்கானலை மூன்று வகையாகப் பிரிப்பார்கள் கீழ்மலை நடுமலை மேல்மலை கீழ்மலை என்பது இன்றைய பெருமாள் மலை என்பது தரையில் இருந்து சுமார் 3000 அடி உயரம் கொண்டது நடுமலை என்பது இன்றைய கொடைக்கானல் சுமார் 4500 முதல் 5000 அடி உயரம் கொண்டது மேல்மலை என்பது பூம்பாறை மன்னவனூரை அடுத்த கிளாவரை என்கிற பகுதி கிளாவரையை தாண்டியவுடன் மூனார் பகுதி வந்துவிடும் கிளாவரை தரையில் இருந்து சுமார் 6500 அடி உயரம் கொண்டது இது மிகவும் குளிர்ச்சியான பகுதி...

கொடைக்கானல் சுற்றுலா வருபவர்கள் பெரும்பாலானோர் யாரும் மேல் மலைக்கு செல்வதில்லை

- சச்சின் கார்த்திக் பாண்டி

வெந்து கெட்டது அகத்திக்கீரை வேகாமல் கெட்டது முருங்கைக்கீரைனு ஒரு பழமொழி இருக்கு. இதோட அர்த்தம் என்னன்னா முருங்கைக்கீரையை நல்லா வேக வச்சிதான் சாப்பிடணும். ஆனா அகத்திக்கீரையை ரொம்பவும் வேக விடக்கூடாது. வேகவிட்டா அதோட மருத்துவத்தன்மை மாறிப்போயிரும்.

முருங்கையில பல வகை இருக்கு. பொதுவா எடுத்துக்கிட்டா முருங்கையில வேர்ல இருந்து பூ வரைக்கும் எல்லாமே மருத்துவக்குணம் நிறைஞ்சது. வைட்டமின் ஏ, டி, ஈ, கே மட்டுமில்லாம பி 1, பி 2, பி 6&னு அடுக்கிக்கிட்டே போகலாம்.

முருங்கைக்கீரையில இரும்பு, தாமிரம், சுண்ணாம்புச் சத்தெல்லாம் இருக்கு. பொதுவா முருங்கைக்கீரையை பிரட்டல், பொரியல் செஞ்சி சாப்பிடுவாங்க. பொரியல் செய்யும்போது முட்டையை உடைச்சிவிட்டு நல்லா கிளறி சூட்டோடு சூடா சாப்பிட்டா அதோட பலன் அதிகம்தான்.

முருங்கைக்கீரையைப் பொடியாக அரிஞ்சி, கேரட்டை துருவிப்போட்டு, பசு நெய்யை விட்டு பொரிச்சி, கடைசியாக முட்டையை ஊத்தி கிளறி சாப்பிட்டா தாம்பத்ய உறவுல ஈடுபாடில்லாத ஆம்பிளைங்களுக்கு நல்ல பலன் கிடைக்கும்.

முருங்கைப் பூவை அரைச்சி பால்ல கொதிக்க வச்சி பனங்கல்கண்டு சேர்த்து 48 நாள் (ஒரு மண்டலம்) சாப்பிட்டு வந்தா தாம்பத்ய உறவுல விருப்பம் உண்டாகும்.

முருங்கைப் பூவை காய வச்சி பொடியாக்கி அதுல தேன் சேர்த்து ஒரு மண்டலம் சாப்பிட்டாலும் ஆண்மை கூடும். அதுமட்டுமில்லாம நீர்த்துப்போன விந்து கட்டியாகும். இந்த மாதிரி பொண்ணுங்க சாப்பிட்டா அவங்களுக்கு வரக்கூடிய வெள்ளைப்படுதல் சரியாகுறதோட கர்ப்பப்பை ஸ்ட்ராங்காகும்.

முத்திப்போன முருங்கை விதையை எடுத்து காய வச்சி லேசா நெய்யில வதக்கி பொடியாக்கி பால்ல கலந்து சாப்பிட்டா ஆண்மை கூடுறதோட விந்து எண்ணிக்கையும் அதிகமாகும். அதோட நரம்பெல்லாம் முறுக்கேறி உடம்பு கும்முன்னு ஆகிடுமாம்.

முருங்கைக்காய்ல பிஞ்சுக்காயை எடுத்தீங்கன்னா பச்சப்பாம்பு மாதிரி இருக்கும். அதை பால்ல வேக வச்சி ராத்திரி தூங்கப்போறதுக்கு முன்னாடி சாப்பிட்டா ஆண்மைக்குறை உள்ளவங்களுக்கு நிச்சயமா பலன் கிடைக்கும். இதனால முருங்கைக்காயை வயாகரானுகூட சொல்வாங்க.

-மரிய பெல்சின்

கொத்தவரங்காய், நுரையீரலுக் கென்றே கடவுளால் படைக்கப்பட்ட காய் ஆகும்.

கொத்தவரை நோய் எதிர்ப்பு சக்தியை அதிகரிக்கும் வல்லமை கொண்டது.

இது உடலில் சர்க்கரையின் அளவை சமபடுத்துகிறது.

இது மூட்டு வலியை சரி செய்கிறது.

இது அஜீரண கோளாறுகளை சரி செய்கிறது.

இரத்தத்தில் உள்ள கொழுப்பை குறைக்கிறது.

சிவப்பணுக்களின் எண்ணிக்கையை அதிகரிக்கிறது .

இதய நோய் வராமல் தடுக்கிறது.

ஆஸ்துமா விற்கு நல்ல மாமருந்து.

இது நல்ல வலி நிவாரணி.

இரத்த அழுத்தத்தை குறைக்கிறது.

இரத்த சோகைக்கு நல்ல மருந்து.

கருவில் உள்ள குழந்தையின் ஆரோக்கியத்திற்கு நல்லது.

குழந்தையின் எலும்பு மற்றும் முதுகு தண்டு வளர்ச்சிக்கு நல்லது .

உடல் எடையை குறைக்க சிறந்த மருந்து.

மன அழுத்தத்தை குறைக்கிறது.

நரம்பு மண்டலத்தை சீராக வைக்கிறது.

சரும பிரச்சனையை தீர்க்கிறது.

மலச்சிக்கலை போக்குகிறது .

ரத்த ஓட்டத்தை சீர் செய்கிறது.

சூட்டை குறைக்கிறது.

இதனை சிறுசிறு துண்டுகளாக நறுக்கி மிளகுத்தூள் சேர்த்து கொதிக்க வைத்து அதன்சாற்றை குடிக்க வேண்டும். வேக வைத்த காயையும் சாப்பிட வேண்டும்.

-சித்த மருத்துவர் எஸ்.சிவபெருமாள்.