ஜம்மு-காஷ்மீர் மாநிலத்தின் கிஷ்த்வார் மாவட்டத்தில் நேற்று மாலை கிராம பாதுகாப்பு குழுவைச் சேர்ந்த இருவரை பயங்கரவாதிகள் கடத்திச் சென்று கொலை செய்துள்ளனர். ஜெய்ஷ்-இ-முகமது அமைப்பின் காஷ்மீர் டைகர்ஸ் என தங்களை அழைத்துக் கொள்ளும் குழு இந்த கொலைக்கு பொறுப்பேற்றுள்ளது. கண்கள் தோண்டப்பட்ட நிலையில் இறந்தவர்களின் உடல் படங்களை பயங்கரவாத குரூப் வெளியிட்டுள்ளது.
கொலை செய்யப்பட்டவர்கள் நசீர் அகமது, குல்தீப் யாதவ் என அடையாளம் காணப்பட்டுள்ளது. இருவரும் ஒஹ்லி குந்த்வாரா கிராமத்தை சேர்ந்தவர்கள். உடல்கள் இன்னும் கைப்பற்றப்படவில்லை. போலீசார் உடல்களை தேடும் பணியில் ஈடுபட்டு வருகின்றனர்.
இருவரும் தங்களுடைய கால்நடைகளை மேய்ச்சலுக்கு காட்டுப்பகுதிக்கு கொண்டு செல்லும்போது பயங்கரவாதிகளால் கடத்தப்பட்டுள்ளனர்.
இருவர் பயங்கரவாதிகளால் கொடூரமாக கொல்லப்பட்டதற்கு அம்மாநில துணைநிலை ஆளுநர் கடும் கண்டனம் தெரிவித்துள்ளார்.
இத்தகைய காட்டுமிராண்டித்தனமான வன்முறைச் செயல்கள் ஜம்மு-காஷ்மீரில் நீண்டகால அமைதியை அடைவதில் குறிப்பிடத்தக்க தடையாக உள்ளது என முதல்வர் உமல் அப்துல்லா கண்டனம் தெரிவித்துள்ளார்.
சந்தேகப்படும்படி யாராக நடமாடினால் அது தொடர்பாக தகவல் தெரிவிக்கும்படி கிராம மக்களுக்கு ராணுவம் வேண்டுகோள் விடுத்துள்ளது.
