அனைத்து மாநில தேர்தல் ஆணையர்கள் கூட்டம் - சத்யபிரதா சாகு டெல்லி பயணம்

2024 ஜூன் மாதம், 17-வது பாராளுமன்றத்தின் காலம் நிறைவடைகிறது.

மொத்தம் உள்ள 543 இடங்களுக்கான தேர்தல் இவ்வருடம் மே இறுதிக்குள் நடைபெற உள்ளது. இதில் தமிழ்நாட்டின் 39 பாராளுமன்ற தொகுதிகளும், புதுச்சேரியின் 1 தொகுதியும் அடங்கும்.

இது குறித்து ஆலோசிக்க அனைத்து மாநில தலைமை தேர்தல் அதிகாரிகளுடன் இந்திய தேர்தல் ஆணையம் ஆலோசனை நடத்த போகிறது. இதற்காக தமிழ்நாட்டின் தலைமை தேர்தல் அதிகாரி சத்யபிரதா சாகு டெல்லி பயணம் மேற்கொண்டுள்ளார். இதில் அனைத்து மாநில தலைமை தேர்தல் அதிகாரிகளும் கலந்து கொள்கின்றனர்.

பாராளுமன்ற தேர்தல் தொடர்பாகவும், தேர்தல் பாதுகாப்பு மற்றும் வாக்காளர் இறுதி பட்டியல் குறித்தும் விவாதித்து முடிவு எடுக்க நடைபெறும் இந்த ஆலோசனை கூட்டம், 2 நாட்கள் நடைபெற உள்ளது.

தமிழ்நாட்டில் காலியாக உள்ள சட்டசபை தொகுதிகளுக்கும், பாராளுமன்றத்திற்கும் தேர்தல் அறிவிக்கப்பட்டால் அதற்கு ஆணையம் தயாராக உள்ளதாக சில தினங்களுக்கு முன் சத்யபிரதா சாகு தெரிவித்திருந்தது குறிப்பிடத்தக்கது.