மகாராஷ்டிரா மாநிலம் மும்பையில் நேற்று அதிகாலை 1 மணி முதல் பலத்த மழை பெய்தது. விடிய விடிய மும்பை மற்றும் அதை சுற்றி உள்ள பகுதிகளில் இடைவிடாமல் மழை கொட்டி தீர்த்தது. பேய் மழை காரணமாக மும்பையில் தாழ்வான பகுதிகள் தண்ணீரில் தத்தளித்தன. குறிப்பாக மும்பை கிழக்கு, மேற்கு புறநகர் பகுதிகள் வெள்ளக்காடாக மாறின.
இந்நிலையில் மும்பைக்கு கனமழைக்கான ரெட் அலர்ட் இந்திய வானிலை ஆய்வு மையம் விடுத்துள்ளது. நகரின் சில பகுதிகளில் கனமழை பெய்து வருகிறது.
கனமழை காரணமாக புனே, மும்பையில் உள்ள பள்ளிகளுக்கு இன்றும் விடுமுறை அறிவிக்கப்பட்டுள்ளது. ராய்காட் மற்றும் நவி மும்பையில் உள்ள பள்ளிகள் மற்றும் கல்லூரிகளுக்கு இன்று விடுமுறை அளிக்கப்பட்டுள்ளது.
மும்பையில் பெய்து வரும் கனமழையால் கிங்ஸ் சர்க்கிள் பகுதியில் உள்ள சாலைகளில் தண்ணீர் தேங்கியுள்ளது. பல பகுதிகளில் தண்ணீர் தேங்கியுள்ளதாலும், மழை தொடர்ந்து பெய்வதாலும் அங்கு மக்களின் இயல்பு வாழ்க்கை பாதிக்கப்பட்டுள்ளது.
மும்பையில் சில இடங்களில் ஜூலை 12 வரை கனமழை பெய்யும் என்று இந்திய வானிலை ஆய்வு மையம் தெரிவித்துள்ளது.
