மொடக்குறிச்சி:
காவிரியில் தண்ணீர் திறந்து விடுவதில் தமிழகத்திற்கும் கர்நாடகாவிற்கும் உள்ள பிரச்னையினால் கர்நாடக மாநில லாரிகள் தாக்கப்படும் என்ற பயத்தில் கடந்த சில நாளாக லாரிகள் தமிழக எல்லைகளில் நிறுத்தி வைக்கப்பட்டிருந்தது.
கர்நாடக லாரிகள் தமிழர்களால் தாக்கப்படுவதை தவிர்க்கும் பொருட்டு, லாரிகளில் உள்ள எண்கள் போலியாக தமிழக வட்டார போக்குவரத்து அலுவலக எண்கள் அச்சடித்து நெம்பர் பிளேட்களின் மீது தற்காலிகமாக ஒட்டி தாராளமாக வலம் வருகின்றன.
நேற்று மொடக்குறிச்சி அடுத்த எழுமாத்தூர் பகுதியில் உள்ள தனியார் அரிசி ஆலைக்கு அரிசி பாரம் ஏற்றிய கர்நாடக லாரியில் போலி நெம்பர் பிளேட் ஒட்டி லாரி வந்தது.
பூந்துறைசேமூர் பகுதியில் லாரி வந்தபோது, லாரி ஓட்டுனர் வழிதெரியாமல் அரிசி ஆலைக்கு வழி கேட்டபோது, அங்கிருந்தவர்கள் லாரியின் லாரி ஓட்டுனரின் பேச்சை வைத்து, கர்நாடகாவை சேர்ந்தவர் என்பதை தெரிந்து கொண்டனர்.
பின்னர் விசாரித்ததில் ஓட்டுனர் உண்மையை ஒப்புக்கொண்டார். பின்னர் அங்கிருந்தவர்கள் இதுபோல் செய்யவேண்டாம் கர்நாடகாகாரர்களை போல் நாங்கள் உங்களை தாக்க மாட்டோம். கொஞ்ச நாட்களுக்கு தமிழகத்திற்குள் வரும்போது பாதுகாப்புடன் வருமாறும் போலி எண் கொண்ட நெம்பர் பிளேட் பயன்படுத்த வேண்டாம் என்றும் எச்சரித்து அனுப்பினர்.
இதனால் அப்பகுதியில் 30 நிமிட நேரம் பரபரப்பு நிலவியது.
