பெருந்துறை:
சென்னை நாவலூர் நட்சத்திரா அபார்ட்மெண்ட் பகுதியை சேர்ந்தவர் வின்சென்ட் (வயது 71). இவரது மனைவி புஷ்பா (57), மகன் ரிச்சர்டு (30).
கடந்த 3 மாதத்துக்கு முன்பு தான் ரிச்சர்டுக்கும் கோவை சரவணம்பட்டியை சேர்ந்த மரிய ஏஞ்சல் என்பவருக்கும் திருமணம் நடந்தது. கடந்த சில நாட்களாக ஏஞ்சல் மட்டும் சரவணம்பட்டியில் இருந்தார்.
ரிச்சர்டு தனது தந்தை- தாயுடன் சென்னையில் இருந்ததாக தெரிகிறது. இந்த நிலையில் சரவணம்பட்டியில் குடும்ப நிகழ்ச்சி ஒன்று நடப்பதாக இருந்தது.
இதில் கலந்து கொள்வதற்காக வின்சென்ட், புஷ்பா, ரிச்சர்டு ஆகிய 3 பேரும் காரில் சென்னையில் இருந்து புறப்பட்டு வந்து கொண்டிருந்தனர்.
காரை ரிச்சர்டு ஓட்டி வந்தார். காரின் முன் பகுதியில் வின்சென்ட்டும், பின் சீட்டில் புஷ்பாவும் அமர்ந்திருந்தனர்.
இன்று காலை அவர்கள் வந்த கார் சேலம்-கோவை தேசிய நெடுஞ்சாலையில் ஈரோடு மாவட்டம் பெருந்துறை அருகே வந்தது. பெருந்துறை அடுத்த சோளிபாளையம் பிரிவு அருகே வந்தபோது ரோட்டின் இடது பக்கமாக ஒரு லாரி நின்றது.
திடீரென நிலைதடுமாறி ஓடிய கார் அந்த லாரியின் பின்பக்கத்தில் பயங்கரமாக மோதியது. இதில் காரின் பாதி பாகம் லாரியின் பின் பகுதிக்குள் புகுந்து சேதம் அடைந்தது.
இந்த விபத்தில் காரின் முன் சீட்டில் இருந்த வின்சென்ட், பின் சீட்டில் இருந்த புஷ்பா ஆகிய 2 பேரும் உடல் நசுங்கி அதே இடத்தில் பரிதாபமாக இறந்தனர்.
ரிச்சர்டு பலத்த காயம் அடைந்தார். விபத்து நடந்ததும் அக்கம் பக்கத்தினர் சம்பவ இடத்துக்கு ஓடி வந்து மீட்பு பணியில் ஈடுபட்டனர்.
இது பற்றி பெருந்துறை போலீஸ் நிலையத்துக்கும், தீயணைப்பு நிலையத்துக்கும் தகவல் தெரிவிக்கப்பட்டது. போலீசாரும், தீயணைப்பு வீரர்களும் சம்பவ இடத்துக்கு விரைந்து வந்து மீட்பு பணியில் ஈடுபட்டனர்.
காரின் பாகத்தை வெட்டி எடுத்து இடிபாடுக்குள் சிக்கி இருந்த வின்சென்ட், புஷ்பா ஆகியோரின் உடல்களை மீட்டனர். காயம் அடைந்த ரிச்சர்டும் மீட்கப்பட்டு சிகிச்சைக்காக பெருந்துறையில் உள்ள ஒரு தனியார் ஆஸ்பத்திரிக்கு அனுப்பி வைக்கப்பட்டார்.
தனது கண் முன்னே தந்தையையும், தாயையும் இழந்த ரிச்சர்டு கண்ணீர் விட்டு கதறி அழுதது பார்க்க பரிதாபமாக இருந்தது. இந்த விபத்து பெருந்துறை பகுதியில் இன்று காலை பரபரப்பை ஏற்படுத்தியது. #Tamilnews
