ஆறுமுகநேரி:
ஆத்தூர் அருகே உள்ள முக்காணி மற்றும் பழையகாயலில் தி.மு.க. சார்பில் ஊராட்சி சபை கூட்டம் நடைபெற்றது. கூட்டத்திற்கு தெற்கு மாவட்ட பொறுப்பாளர் அனிதா ராதாகிருஷ்ணன் எம்.எல்.ஏ. தலைமை தாங்கினார். கிளைச் செயலாளர் நட்டார் முன்னிலை வகித்தார். இதில் மாநில மகளிர் அணி செயலாளர் கனிமொழி எம்.பி. கலந்து கொண்டார். கூட்டத்தில் கலந்து கொண்ட பொதுமக்கள் கோரிக்கை மனுக்களை அளித்தனர். மேலும் தங்கள் பகுதியில் உள்ள பல்வேறு குறைபாடுகளையும் எடுத்து கூறினர். பின்னர் கனிமொழி எம்.பி. பேசியதாவது:-
தமிழகத்தில் உள்ளாட்சி தேர்தல் நடத்தப்படாததால் மக்களின் அடிப்படை வசதிகள் உள்ளிட்ட எல்லா திட்டங்களும் முடங்கி போய் உள்ளன. தி.மு.க. ஆட்சியில் 9 ஆயிரம் கோடி விவசாயக் கடன் தள்ளுபடி செய்யப்பட்டது. பெண்களுக்கான 100 நாள் வேலைவாய்ப்பு திட்டம் இப்போது வெறும் 50 நாட்களாக குறைக்கப்பட்டுள்ளது. திருமண உதவி தொகை, கல்வி உதவி தொகை, முதியோர் ஓய்வூதியம் ஆகிய திட்டங்கள் சரிவர நடைபெறவில்லை. இவையனைத்தும் தி.மு.க. மீண்டும் ஆட்சிக்கு வந்ததும் செயல்படுத்தபடும்.
எனவே வருகிற தேர்தல்களில் பொதுமக்கள் தி.மு.க. கூட்டணிக்கு வாக்களிக்க வேண்டுகிறேன். மத்தியில் மீண்டும் மோடி ஆட்சிக்கு வரப் போவதில்லை. மக்களுக்கு பிடிக்காத எந்த திட்டத்திற்கும் தி.மு.க. துணை நிற்காது.
இவ்வாறு கனிமொழி எம்.பி. பேசினார்.
பின்னர் பழையக்காயலில் கிளை செயலாளர் சேவியர் முன்னிலையில் நடந்த கூட்டத்தில், தாமிரபரணி ஆறு பழையக்காயல் மற்றும் புன்னக்காயல் அருகே கடலில் கலக்கும் இடமான சங்குமுகத்தில் தை அமாவாசை மற்றும் ஆடி அமாவாசை தினங்களில் ஆயிரக்கணக்கான பக்தர்கள் புனித நீராடி வழிபடுவார்கள். அங்கு செல்வதற்கான சுமார் 3 கி.மீ தூரப் பாதையில் குறுக்கீடும் ஆற்றின் 2 கிளைகளில் பாலம் அமைத்து தந்து பக்தர்களின் சிரமங்களை போக்க வேண்டும் என்றும் பொதுமக்கள் சார்பில் கோரிக்கை வைக்கப்பட்டது.
இது குறித்து ஆய்வு செய்து தி.மு.க. ஆட்சிக்கு வந்ததும் நிச்சயமாக உங்களின் இந்த கோரிக்கை நிறைவேற்றி தரப்படும் என்று கனிமொழி எம்.பி. தெரிவித்தார். #kanimozhi #pmmodi #dmk
