நீங்கள் தேடியது "குழந்தை விற்பனை"

சென்னை

சென்னை புழல் காவாங்கரையை கே.எஸ். நகரைச் சேர்ந்தவர் யாஸ்மின். இவருக்கும் மோகன் என்பவருக்கும் கடந்த 11 ஆண்டுக்கு முன்பு திருமணம் நடந்தது. இவர்களுக்கு 10 வயதில் மகள் உள்ளார்.

இந்த நிலையில் யாஸ்மின் 2-வதாக கர்ப்பம் ஆனார். 5 மாத கர்ப்பிணியாக இருந்தபோது கணவர் மோகன் பிரிந்து சென்று விட்டார்.

இதனால் 2-வது குழந்தையை பெற்று வளர்க்க முடியாதே என எண்ணிய யாஸ்மின் கருக்கலைப்பு செய்ய முடிவு செய்தார். இதற்காக ஜெயகீதா என்பவரின் உதவியை நாடினார்.

அப்போது ஜெயகீதா குழந்தையை பெற்ற பிறகு அதனை நான் விற்பனை செய்து தருகிறேன் என கூறியுள்ளார். இதனை நம்பி யாஸ்மின் கடந்த 21-ந்தேதி வண்ணாரப்பேட்டையில் உள்ள ஆஸ்பத்திரியில் ஆண் குழந்தையை பெற்றெடுத்தார்.

பின்னர் 5 நாட்கள் கழித்து ஜெயகீதாவின் உதவியுடன் குழந்தையை புரசைவாக்கத்தில் வைத்து விற்பனை செய்தார்.

இதற்காக ஜெயகீதா கவரில் போட்டு கொடுத்த பணத்துடன் யாஸ்மின் சென்றபோது அவரை பின் தொடர்ந்த மர்ம நபர்கள் புளியந்தோப்பில் வைத்து வழிப்பறி செய்து பணத்தை பறித்துச் சென்று விட்டதாக தகவல் வெளியானது.

இது தொடர்பாக யாஸ்மின் வேப்பேரி போலீசில் புகார் அளித்து இருந்தார். அவர் மீது சந்தேகம் எழுந்ததால் போலீசார் தீவிரமாக விசாரணை நடத்தினர்.

இதில் துப்பு துலங்கியது. குழந்தை விற்பனை செய்யப்பட்டது தொடர்பாக இடைத்தரகராக செயல்பட்ட ஜெயகீதா, தனம், லதா, ஆரோக்கிய மேரி ஆகியோரை பிடித்து போலீசார் விசாரணை நடத்தினர். அப்போது குழந்தை ரூ.2½ லட்சத்துக்கு விற்பனை செய்யப்பட்டது தெரிய வந்தது.

விற்பனை செய்யப்பட்ட யாஸ்மினின் குழந்தை சென்னை மூலக்கொத்தளத்தில் இருப்பதும் கண்டு பிடிக்கப்பட்டது.

இதையடுத்து கீழ்ப்பாக்கம் துணை கமி‌ஷனர் கார்த்திகேயன் மேற்பார்வையில் வேப்பேரி போலீசார் தீவிர விசாரணை நடத்தி குழந்தையை மீட்டனர்.

இதில் ஆயிரம் விளக்கு பகுதியை சேர்ந்த சிவக்குமார் மற்றும் அவரது மனைவி ஸ்ரீதேவி ஆகியோர் யாஸ்மினிடம் குழந்தையை விலைக்கு வாங்கியது தெரிய வந்தது. பின்னர் ஸ்ரீதேவியின் தாய் வீடான மூல கொத்தளத்துக்கு சென்று தங்கியதும் கண்டு பிடிக்கப்பட்டது.

ஸ்ரீதேவியின் கணவர் சிவக்குமாரும், இடைத்தரகரான ஆரோக்கிய மேரியும் ஒரே அலுவலகத்தில் பணிபுரிந்து வந்துள்ளனர். சிவகுமாருக்கு கடந்த 13 வருடங்களாக குழந்தை இல்லை. இதனை அறிந்து கொண்டு யாஸ்மினின் குழந்தையை ஆரோக்கியமேரி மூலமாக ஜெயகீதா விலைக்கு வாங்கி கொடுத்ததும் தெரியவந்தது.

இதற்கிடையே ஜெகன் என்பவர் தனது மனைவி சந்தியாவுடன் வேப்பேரி போலீஸ் நிலையத்தில் ஆஜரானார். அவர் குழந்தை விற்கப்பட்டதாக வெளியான செய்தியையும் யாஸ்மின் வழிப்பறி நடைபெற்றதாக கூறியதையும் அறிந்தேன்.

யாஸ்மின் என்னிடம் பணத்தை கொடுத்து இருந்தார். பின்னர் அவரே வாங்கி சென்று விட்டார் என கூறினார். இதுவும் இந்த வழக்கு விசாரணைக்கு உதவும் வகையில் அமைந்து இருந்தது.

இதனைத் தொடர்ந்து தாய் யாஸ்மினை பிடித்து போலீசார் விசாரணை நடத்தினர். அப்போது அவர் குழந்தையை பிரிய மனமின்றி அதுபோன்று நாடகம் ஆடியதாக தெரிவித்தார்.

இதன் பிறகே குழந்தை விற்பனை விவகாரம் முடிவுக்கு வந்தது. யாஸ்மினையும் குழந்தையையும் அமைந்தகரையில் உள்ள காப்பகத்தில் தங்க வைத்தனர்.

குழந்தை விற்பனை சட்ட விரோதம் என்பதால் இடைதரகர்களாக செயல்பட்ட தனம், ஜெயகீதாவை போலீசார் கைது செய்தனர்.

இதன் பின்னணியில் உள்ள மற்றவர்களையும் கைது செய்ய நடவடிக்கை எடுக்கப்பட்டு வருகிறது.

மேலும் போலீசார் நடத்திய விசாரணையில் யாஸ்மின் அளித்த வழிப்பறி புகார் பொய்யானது என்பது உறுதியானது. யாஸ்மின் பயணித்த ஓலா ஆட்டோ டிரைவரை கண்டுபிடித்து விசாரித்ததில் அப்படி ஒரு சம்பவம் நடக்கவில்லை என்றும், தனக்கு சவாரி கட்டணமாக ரூ.110 கொடுத்தாகவும் அவர் தெரிவித்தார்.

குழந்தையை விலைக்கு வாங்கிய தம்பதிகள் ரூ.3½ லட்சம் பணத்தை கொடுத்ததும், இதில் இடைத்தரகர்கள் ரூ.1 லட்சத்தை பங்கு போட்டு கொண்டதும் விசாரணையில் அம்பலமாகி இருக்கிறது.

மும்பை:

மகாராஷ்டிரா மாநிலம் அகமத் நகர் மாவட்டத்தில் உள்ள டோம்பிவ்லி நகரைச் சேர்ந்த ஒரு பெண்ணுக்கு கடந்த செப்டம்பர் மாதம் ஆண் குழந்தை பிறந்தது.

அவரது குடும்பம் ஏற்கனவே வறுமையில் வாடியது. எனவே இந்த குழந்தையை வளர்க்க வழி இல்லாமல் தவித்தார். எனவே குழந்தையை விற்று விட முடிவு செய்தார்.

இதற்காக அந்த பகுதியைச் சேர்ந்த 3 பெண்கள் உதவி செய்தனர். அந்த குழந்தையை முலுண்ட் நகரைச் சேர்ந்த ஒருவர் வாங்குவதற்கு முன் வந்தார். அவரை அந்த பெண்கள் குழந்தையின் தாயிடம் அழைத்து வந்தனர்.

பேரம் பேசி ரூ.1 லட்சத்து 78 ஆயிரத்துக்கு அந்த நபர் குழந்தையை வாங்கினார். பின்னர் தனது வீட்டுக்கு குழந்தையை எடுத்து சென்று விட்டார்.

இந்த தகவல் போலீசுக்கு தெரிய வந்தது. அவர்கள் விசாரணை நடத்தியதில் குழந்தை விற்பனை செய்யப்பட்டது உறுதியானது.

இதையடுத்து குழந்தை வாங்கியவரை கைது செய்து குழந்தையை மீட்டனர். குழந்தையின் தாய், விற்பதற்கு உதவிய 3 பெண்கள், மேலும் ஒருவர் என 6 பேரை போலீசார் கைது செய்தனர். அவர்கள் மீது குழந்தை பராமரிப்பு பாதுகாப்பு சட்டத்தின்படி வழக்குப்பதிவு செய்யப்பட்டுள்ளது.

நாமக்கல்:

நாமக்கல் மாவட்டம் ராசிபுரத்தில் சட்ட விரோதமாக நடந்த குழந்தைகள் விற்பனை சம்பவம் தொடர்பாக காட்டுக்கொட்டாய் பகுதியை சேர்ந்த விருப்ப ஓய்வு பெற்ற நர்சு உதவியாளர் அமுதா என்கிற அமுதவள்ளி (வயது 50), அவரது கணவர் ரவிச்சந்திரன், கொல்லிமலை ஆம்புலன்ஸ் டிரைவர் முருகேசன் மற்றும் இடைத்தரகர்களாக செயல்பட்ட ஈரோட்டை சேர்ந்த பர்வீன், ஹசீனா, அருள்சாமி, லீலா, செல்வி மற்றும் சேலம் எஸ்.கொல்லப்பட்டியைச் சேர்ந்த சாந்தி ஆகிய 9 பேர் கைது செய்யப்பட்டு சேலம் மத்திய சிறையில் அடைக்கப்பட்டனர்.

தமிழகம் முழுவதும் பெரும் பரபரப்பை ஏற்படுத்திய இந்த சம்பவம் தொடர்பாக சி.பி.சி.ஐ.டி. போலீசார் விசாரணை நடத்தி வருகின்றனர்.

கைதான நர்சு அமுதவள்ளி மற்றும் இடைத்தரகர்களை காவலில் எடுத்து சி.பி.சி.ஐ.டி. போலீசார் விசாரணை மேற்கொண்டனர்.

விசாரணையில் நாமக்கல் மாவட்டம் கொல்லிமலை பகுதியில் ஏராளமான குழந்தைகள் விற்பனை செய்யப்பட்ட விவரம் தெரிய வந்தது. இதுவரை 30 குழந்தைகள் வரை லட்சக்கணக்கான ரூபாய்க்கு விற்கப்பட்டதாக சி.பி.சி.ஐடி. போலீசார் தெரிவித்தனர்.

மேலும் பல குழந்தைகள் விற்கப்பட்டிருக்கலாம் என்ற சந்தேகமும் எழுந்துள்ளது.

இந்த சம்பவத்தில் இன்னும் பல இடைத்தரகர்களுக்கு தொடர்பு இருப்பது கண்டுபிடிக்கப்பட்டுள்ளது. அவர்களை தேடி பிடிக்கும் பணியில் போலீசார் ஈடுபட்டு வருகின்றனர்.

இந்த நிலையில் பெங்களூருவைச் சேர்ந்த ரேகா (வயது 40) என்ற பெண்ணுக்கு குழந்தை விற்பனையில் தொடர்பு இருப்பது தெரியவந்தது. இவர் கமி‌ஷன் அடிப்படையில் இடைத்தரகர் போல் செயல்பட்டு வந்தார்.

இதையடுத்து சி.பி.சி.ஐ.டி. துணை போலீஸ் சூப்பிரண்டு கிருஷ்ணன் தலைமையிலான போலீசார் பெங்களூரு விரைந்து சென்று ரேகாவை கைது செய்தனர். பின்னர் அவரை போலீசார் நாமக்கல் அழைத்து வந்து விசாரணை நடத்தி வருகின்றனர்.


இந்த நிலையில் 260 குழந்தைகள் இதுவரை விற்பனை செய்யப்பட்டுள்ளதாக தகவல் வெளியாகி உள்ளன. நாமக்கல் மாவட்டத்தில் கடந்த 4 ஆண்டுகளில் 4 ஆயிரத்து 300 குழந்தைகள் பிறந்திருப்பதும் இதில் 260 குழந்தைகளின் நிலை என்ன என்பது தெரியவில்லை என்றும் சுகாதாரத்துறை அதிகாரிகள் அறிக்கை கொடுத்துள்ளதாக தெரிய வந்துள்ளது.

இதனால் அந்த 260 குழந்தைகளும் விற்பனை செய்யப்பட்டதா? அல்லது அவர்கள் வேறு இடத்திற்கு குடிபெயர்ந்து விட்டார்களா? என்பது குறித்து சி.பி.சி.ஐ.டி. போலீசார் விசாரணை நடத்தி வருகின்றனர்.

நாமக்கல்:

நாமக்கல் மாவட்டம் ராசிபுரத்தில் குழந்தைகள் விற்பனை தொடர்பாக ஆடியோ ஒன்று சமூக வலைதளங்களில் வெளியானது.

இதையடுத்து ராசிபுரத்தை சேர்ந்த விருப்ப ஓய்வுபெற்ற அரசு மருத்துவமனை செவிலியர் அமுதவள்ளி, அவரது கணவர் ரவிச்சந்திரன் மற்றும் இந்த குழந்தை விற்பனைக்கு உடந்தையாக இருந்த ஆம்புலன்ஸ் டிரைவர் முருகேசன் மற்றும் இடைத்தரகர்களாக செயல்பட்ட பர்வீன், நிஷா, லீலா, அருள்மணி, செல்வி என 8 பேரை ராசிபுரம் போலீசார் கைது செய்தனர்.

விசாரணையில் அவர்கள் மொத்தம் 30 குழந்தைகள் வரை விற்பனை செய்தது தெரியவந்தது.

மேலும் இந்த கும்பலுடன் சேர்ந்து சேலம் கொல்லப்பட்டி அரசு ஆரம்ப சுகாதார நிலையத்தில் பணிபுரியும் உதவி செவிலியர் சாந்தி சேலம் பகுதியில் குழந்தைகளை வாங்கி விற்பனை செய்தது தெரியவந்தது. இதைத் தொடர்ந்து அவரை போலீசார் கைது செய்து நாமக்கல் குற்றவியல் நீதிமன்றத்தில் ஆஜர்படுத்தி சிறையில் அடைத்தனர்.

இந்த வழக்கில் கைதாகி சேலம் மத்திய சிறையில் உள்ள இடைத்தரகர்களான அருள்சாமி, லீலா, செல்வி ஆகியோர் நாமக்கல் மாவட்ட முதன்மை அமர்வு நீதிமன்றத்தில் ஜாமீன் கேட்டு வழக்கறிஞர்கள் மூலம் மனு தாக்கல் செய்தனர்.

இந்த மனு நீதிபதி இளவழகன் முன்னிலையில் இன்று விசாரணைக்கு வந்தது. மனுவை விசாரித்த நீதிபதி, 3 பேரின் ஜாமீன் மனுவை தள்ளுபடி செய்து உத்தரவிட்டார்.

இதில் லீலா ஏற்கனவே ஜாமீன் கேட்டு மனு தாக்கல் செய்திருந்தார். அந்த மனு தள்ளுபடி செய்யப்பட்டது. தற்போது 2-வது முறையாக அவரது மனு தள்ளுபடி ஆகி உள்ளது குறிப்பிடத்தக்கது.

நாமக்கல்:

நாமக்கல் மாவட்டம் ராசிபுரத்தில் குழந்தை கடத்தல் சம்பவம் தொடர்பாக போலீசார் தீவிர விசாரணை மேற்கொண்டு வருகின்றனர்.

கொல்லிமலையில் அதிக அளவில் குழந்தைகள் விற்கப்பட்டதாக புகார் எழுந்துள்ளது. மேலும் 20 குழந்தைகள் மாயமானதாக திடீர் தகவல் பரவியது. குழந்தைகளின் பெற்றோர்களிடம் பிறப்பு சான்றிதழ் மட்டும் இருப்பதாகவும், குழந்தைகள் அவர்களிடம் இல்லை என்பதும் தெரிய வந்துள்ளது. இந்த குழந்தைகள் விற்பனை செய்யப்பட்டு இருக்கலாம் என்ற சந்தேகம் எழுந்துள்ளது. இது தொடர்பாக நாமக்கல் மாவட்ட சுகாதார பணிகள் இணை இயக்குனர் ரமேஷ்குமார் கூறியதாவது:-

அரசு மருத்துவமனைகள், ஆரம்ப சுகாதார நிலையங்களில் பிறந்த குழந்தைகளின் விவரங்களை அதிகாரிகள் ஆய்வு செய்து வருகின்றனர். பதிவேட்டில் உள்ளபடி பிறந்த குழந்தைகள் அங்கு உள்ளார்களா? என்பது தொடர்பாக சரிபார்க்கும் பணி நடந்து வருகிறது. பெற்றோர்களிடமும் விசாரணை நடத்தப்பட்டு வருகிறது.

20 குழந்தைகள் மாயமானதாக இதுவரை எந்த தகவலும் இல்லை. இது சம்பந்தமான கணக்கு எடுக்கும் பணி முடிந்தபிறகு தான் இதுபற்றி தெரியவரும்.

கொல்லிமலையை சேர்ந்தவர்கள் வெளியூர்களில் குழந்தை பிறந்து இருந்தால் பிறப்பு சான்றிதழ் கொண்டு ஆய்வு மேற்கொள்ளப்பட்டு வருகிறது.

இவ்வாறு அவர் கூறினார். #RasipuramNurse

ராசிபுரம்:

நாமக்கல் மாவட்டத்தில் குழந்தை விற்பனை சம்பவம் விசுவரூபம் எடுத்துள்ளது.

இதுதொடர்பாக போலீசார் இதுவரை நர்சு அமுதவள்ளி, அவரது கணவர் ரவிச்சந்திரன் மற்றும் ஆம்புலன்ஸ் டிரைவர் முருகேசன், ஈரோடு நர்சு பர்வீன் ஆகியோரை கைது செய்துள்ளனர்.

இந்த சம்பவத்தில் பல இடைத்தரகர்கள் சம்பந்தப்பட்டு இருக்கலாம் என்று போலீசார் சந்தேகிக்கின்றனர்.

இந்த நிலையில் குழந்தை விற்பனை சம்பவத்தில் தொடர்புடைய ஈரோடு, திருச்செங்கோடு மற்றும் குமாரபாளையம் பகுதியைச் சேர்ந்த 3 பெண்கள் உள்பட 4 பேரை போலீசார் அதிரடியாக கைது செய்துள்ளனர். இதில் ஒரு பெண்ணின் பெயர் ஹசினா என்பது ஆகும்.

கைதான 4 பேரும் செயற்கை கருத்தரிப்பு மையங்களுக்கு புரோக்கர்களாக செயல்பட்டு வந்தவர்கள் என்பது தெரியவந்துள்ளது. அவர்களிடம் போலீஸ் அதிகாரிகள் தொடர்ந்து விசாரணை நடத்தி வருகின்றனர்.
மேலும் கைதான அமுதவள்ளி மற்றும் அவரது கணவர் ரவிச்சந்திரன் ஆகியோரின் செல்போன்களில் உள்ள எண்களை ஆய்வு செய்து அதில் குழந்தை விற்பனை செய்யும் இடைத்தரகர்கள் யாராவது உள்ளார்களா? என்ற கோணத்தில் தனிப்படை போலீசார் விசாரணை நடத்தி வருகின்றனர்.

இச்சம்பவத்தில் குழந்தை பெற்று தர பெண்கள் பயன்படுத்தப்பட்டார்களா? என்பது குறித்தும் பெண்களின் கரு முட்டைகளை விற்பனை செய்தார்களா? என்பது குறித்தும் விசாரணை நடந்து வருகிறது. இதனால் இந்த சம்பவத்தில் அடுத்தடுத்து திடுக்கிடும் தகவல்கள் வெளியாகலாம் என்று எதிர்பார்க்கப்படுகிறது. #RasipuramNurse

ராசிபுரம்:

நாமக்கல் மாவட்டம் ராசிபுரத்தில் விருப்ப ஓய்வு பெற்ற நர்ஸ் ஒருவர் குழந்தைகளை வாங்கி விற்பனை செய்து வருவதாக கூறப்படுகிறது.

ஆண் குழந்தைகளை 4 லட்ச ரூபாய்க்கும், பெண் குழந்தைகளை 3 லட்ச ரூபாய்க்கும் விற்பதாக தெரிகிறது.

குழந்தைகளின் அழகான தோற்றம், கலர் ஆகியவற்றை வைத்து விலை நிர்ணயம் செய்யப்பட்டு விற்பனை செய்யப்படுவதாக தெரிகிறது.

பல்வேறு தொண்டு நிறுவனங்களுடன் தொடர்பு வைத்துக் கொண்டு அவர்கள் மூலம் குழந்தைகள் இருப்பதை அறிந்து, குழந்தை இல்லாத தம்பதிகளுக்கு விற்று வந்ததாக கூறப்படுகிறது.

சமீபத்தில் சேலம் மாவட்டம் ஓமலூரைச் சேர்ந்த குழந்தை பாக்கியம் இல்லாத ஒருவரிடம் ஓய்வு பெற்ற நர்ஸ் பேசிய ஆடியோ வாட்ஸ்-அப்பில் வெளியாகி பரபரப்பை ஏற்படுத்தி உள்ளது.

அதில் அந்த நர்ஸ், நான் கடந்த 30 ஆண்டுகளாக குழந்தைகளை வாங்கி கொடுத்து வருகிறேன். இதனால் நர்ஸ் வேலையில் இருந்து விருப்ப ஓய்வு பெற்றுள்ளேன். முன் பணமாக ரூ.30 ஆயிரம் கொடுத்தால் தான் குழந்தையை முன்பதிவு செய்துகொள்ள முடியும்.

குழந்தை வந்ததும் நேரில் வந்து பார்த்து எடுத்துச் செல்லலாம். குழந்தைக்கு பிறப்பு சான்றிதழ் வேண்டும் என்றாலும் ரூ.70 ஆயிரம் கொடுத்து வாங்கி கொடுக்கிறேன் என அவர் கூறுகிறார்.

இந்த ஆடியோ பேச்சு ராசிபுரம் பகுதியில் வைரலாக பரவி வருகிறது.

இதையடுத்து ராசிபுரம் மகளிர் போலீசார் ஓய்வு பெற்ற நர்சிடம் தற்போது அதிரடி விசாரணை நடத்தி வருகின்றனர். குழந்தைகளை வாங்கி, விற்றது உண்மையா? அல்லது தொண்டு நிறுவனம் நடத்தி வருகிறீர்களா? என்பது குறித்து போலீசார் அவரிடம் விசாரணை மேற்கொண்டு வருகின்றனர்.
 
இச்சம்பவம் ராசிபுரம் பகுதியில் பரபரப்பை ஏற்படுத்தி உள்ளது. #RasipuramNurse

சேலம்:

சேலம் மாவட்டம் மேச்சேரியை சேர்ந்தவர் ராணி (வயது 37). இவருக்கும் பெங்களூரை சேர்ந்த தியாகராஜன் என்பவருக்கும் கடந்த 20 ஆண்டுகளுக்கு முன்பு திருமணம் நடந்தது. இவர்களுக்கு 3 மகள்கள் உள்ள நிலையில் கருத்து வேறுபாடு காரணமாக இருவரும் பிரிந்து வாழ்ந்து வந்தனர்.

இதற்கிடையே கடந்த ஆண்டு மேட்டூரில் கிராம உதவியாளர் பணிக்கு ராணி விண்ணப்பிக்க சென்ற போது புதுச்சாம்பள்ளி பகுதியை சேர்ந்த பாலு என்வருடன் பழக்கம் ஏற்பட்டது.

அப்போது தான் கப்பலில் வேலை பார்ப்பதாக பாலு கூறியதால் அதனை நம்பிய ராணி அவருடன் நெருங்கி பழகினார். பின்னர் இருவரும் திருமணம் செய்து கொண்டனர். கடந்த மே மாதம் ராணிக்கு சேலம் அரசு ஆஸ்பத்திரியில் பெண் குழந்தை பிறந்தது.

அதற்கு ராணியின் உறவினர்கள் எதிர்ப்பு தெரிவித்ததால் ராமேஸ்வரத்தை சேர்ந்த பாலு என்ற டாக்டரிடம் ரூ. 50 ஆயிரம் வாங்கி விட்டு குழந்தையை கொடுத்தார் . இதற்கு சேலம் அரசு ஆஸ்பத்திரி ஒப்பந்த ஊழியர் ஜெயா என்பவர் உதவினார்.

இந்த நிலையில் குழந்தை தனக்கு வேண்டும் என்றும் அதனை மீட்டு தருமாறும் கடந்த 2 நாட்களுக்கு முன்பு ராணி அரசு ஆஸ்பத்திரிக்கு வந்து கதறினார். உடனே சம்பவம் குறித்து விசாரிக்க அதிகாரிகள் உத்தரவிட்டனர். அப்போது மேச்சேரி பகுதியில் வைத்து குழந்தையை டாக்டரிடம் ஒப்படைத்தது தெரிய வந்தது.

மேலும் குழந்தையை வாங்கி சென்ற அந்த டாக்டரை அதிகாரிகள் தொடர்பு கொண்டு கேட்ட போது தனக்கு குழந்தை இல்லாததால் அந்த குழந்தையை வளர்க்க ஆசைப்பட்டு வாங்கி சென்றதாக கூறினார்.

மேலும் ராணி விரும்பினால் அதனை அவரிடம் ஒப்படைக்க தயாராக உள்ளதாகவும் இன்று குழந்தையை ஒப்படைக்க மேச்சேரி வருவதாகவும் கூறி உள்ளார். ஆனால் அவர் வருவாரா? என்ற சந்தேகம் ஏற்பட்டுள்ளது.

டாக்டர் பாலுவுக்கு திருமணமாகி 5 ஆண்டுகள் ஆன நிலையில் அவரது மனைவிக்கு குழந்தை இல்லாததால் வயிற்று பகுதியில் துணியை கட்டி தான் கர்ப்பமாக இருப்பதாக அவரது மனைவி ஏமாற்றி வந்தார். மேலும் சில நாட்களுக்கு முன்பு வளைகாப்பும் நடத்தியதாக கூறப்படுகிறது.

இந்தநிலையில் தனது மனைவி குழந்தையை பெற்றதாக உறவினர்களிடம் கூறுவதற்காக சேலத்திற்கு வந்து இந்த குழந்தையை வாங்கி சென்றுள்ளார். தற்போது ராணி குழந்தையை கேட்பதால் என்ன செய்வதென்று டாக்டர் தம்பதியினர் பரிதவித்து வருகின்றனர்.

மேலும் கப்பலில் வேலை பார்ப்பதாக கூறி ராணியை ஏமாற்றி 2-வது திருமணம் செய்து கர்ப்பமாக்கிய பாலு ஏற்கனவே 3 பெண்களை திருமணம் செய்ததாக கூறப்படுகிறது. அதில் 3 மனைவிகளும் பிரிந்து சென்றதால் 4-வதாக ராணியை திருமணம் செய்துள்ளார்.

முதல் மனைவி ஈரோட்டிலும், 2-வது மனைவி கோபி செட்டி பாளையத்திலும், 3-வது மனைவி மேட்டூரிலும், 4-வதாக திருமணம் செய்த ராணி மேச்சேரியில் வசித்து வந்துள்ளனர். இதனால் மேலும் பல பெண்களை இது போல ஏமாற்றி இருக்கலாம் என்ற கோணத்தில் போலீசார் விசாரணை நடத்தி வருகிறார்கள். விசாரணை முடிவில் மேலும் பல திடுக்கிடும் தகவல்கள் வெளியாகும் என தெரிகிறது.