நீங்கள் தேடியது "சிறுவன் கடத்தல்"

ஸ்ரீபெரும்புதூர்:

ஸ்ரீபெரும்புதூரை அடுத்த பாலூர் அருகே உள்ள சேந்தமங்கலம் பொன்னியம்மன் கோவிலை சேர்ந்தவர் குருபிரசாத். இவரது மனைவி முருகம்மாள். இவர்களது 5 வயது மகன் குமரகுரு.

குருபிரசாத்துக்கு மது பழக்கம் உள்ளது. இவர் மகன் குமரகுருவுடன் ஓரகடம் அருகே உள்ள டாஸ்மாக் மதுக்கடைக்கு சென்றார். அங்கு மகன் குமரகுருவை கடையின் வெளியே விட்டு விட்டு குருபிரசாத் மது குடிக்க சென்றார்.

இந்த நிலையில் மகனுடன் வெளியே சென்ற கணவர் குருபிரசாத் வீடு திரும்பாததால் மனைவி முருகம்மாள் அதிர்ச்சி அடைந்தார்.

அவர் கணவரை தேடியபோது மதுக்கடை பாரில் குடிபோதையில் கணவர் குருபிரசாத் மயங்கி கிடப்பது தெரிந்தது. மகன் குமரகுருவை காணவில்லை. அவன் மாயமாகி இருந்தான்.

இது குறித்து முருகம்மாள் ஓரகடம் போலீசில் புகார் செய்தார். கூடுதல் போலீஸ் சூப்பிரண்டு ராஜேஷ்கன்னா உத்தரவின்படி இன்ஸ்பெக்டர் நடராஜன் விசாரணை நடத்தினார்.

மதுக்கடை அருகே உள்ள மற்றொரு கடையில் பொருத்தப்பட்டிருந்த கண்காணிப்பு கேமிராவை போலீசார் ஆய்வு செய்தனர். இதில் வேஷ்டி, சட்டை அணிந்த மர்ம வாலிபர் ஒருவர் சிறுவன் குமரகுருவுக்கு பிஸ்கெட் வாங்கி கொடுத்த படி அழைத்து செல்வது பதிவாகி இருந்தது. அவர் குமரகுருவை கடத்தி செல்வது தெரிந்தது.

அவரை பிடிக்க 2 தனிப்படை அமைக்கப்பட்டுள்ளது. சென்னை, காஞ்சீபுரம், ஸ்ரீபெரும்புதூர் உள்ளிட்ட பகுதிகளில் தேடுதல் வேட்டையை போலீசார் தீவிரப்படுத்தி உள்ளனர்.

ராமநாதபுரம்:

ராமநாதபுரம் மாவட்டம் ஆர்.எஸ்.மங்கலம் அருகே உள்ள பூவாணி கிராமத்தைச் சேர்ந்தவர் திருவாசகம், விவசாயி. இவருடைய மகன் விக்னேஸ்வரன் (வயது 4).

நேற்று விக்னேஸ்வரன் விளையாடிக் கொண்டிருந்தான். சிறிது நேரம் கழித்து வீட்டில் உள்ளவர்கள் வெளியே வந்து பார்த்த போது சிறுவனை காணவில்லை. அக்கம் பக்கம் தேடியும் விக்னேஸ்வரனை கண்டு பிடிக்க முடியவில்லை.

எனவே அவனை யாராவது கடத்திச் சென்றிருக்கலாமா? என்ற சந்தேகம் எழுந்துள்ளது. இது குறித்து ஆர்.எஸ்.மங்கலம் போலீசில் புகார் செய்யப்பட்டது. இன்ஸ்பெக்டர் ராணிமுத்து வழக்குப்பதிவு செய்து மாயமான சிறுவன் விக்னேஸ்வரனை தேடி வருகிறார்.

இதேபோல் ராமநாதபுரம் குயவன் குடியைச் சேர்ந்தவர் செந்தில் பிரசாத். இவருடைய மகள் பிரதீபா (19), கீழக்கரை தனியார் கல்லூரியில் படித்து வந்த இவர், கடந்த 21-ந் தேதி வீட்டில் இருந்து மாயமானார். அவரை பல இடங்களில் தேடியும் தகவல் கிடைக்காததால் கேணிக்கரை போலீசில் புகார் செய்யப்பட்டது. இன்ஸ்பெக்டர் செந்தில் குமரன் வழக்குப்பதிவு செய்து விசாரணை நடத்தி வருகிறார்.

கீழக்கரை அருகே உள்ள நல்லிருக்கை கோகுல் நகரைச் சேர்ந்தவர் பாலு மகள் பிரதீபா (21), ஒன்றிய தொடக்கப்பள்ளியில் வேலை பார்த்து வந்தார்.

கடந்த 23-ந் தேதி வீட்டில் இருந்த அவர் திடீரென மாயமாகி விட்டார். இது குறித்து பாலு கொடுத்த புகாரின் பேரில் திருஉத்தரகோசமங்கை போலீஸ் இன்ஸ்பெக்டர் யமுனா வழக்குப்பதிவு செய்து மாயமான பிரதீபாவை தேடி வருகிறார்.