நீங்கள் தேடியது "டிரைவர் கண்டக்டர் மீது தாக்குதல்"

காடையாம்பட்டி:

சேலத்தில் இருந்து தர்மபுரிக்கு தனியார் பஸ் ஒன்று இன்று காலை சென்றது. இந்த பஸ்சை தர்மபுரி மாவட்டம் நல்லம் பள்ளி பகுதியை சேர்ந்த மாதையன் மகன் பாக்கியராஜ் என்பவர் ஓட்டினார். காலை 9 மணிக்கு தீவட்டிபட்டி பஸ் நிறுத்தத்தில் நின்று சென்றது. அதே நேரத்தில் தீவட்டிப்பட்டி சமத்துவபுரம் பகுதியை சேர்ந்த சேட்டு மகன் மாதேஷ் (வயது 23) என்பவர் மினிவேனை ஓட்டிச் சென்றார்.  

தளவாய்பட்டி  ஆஞ்சநேயர் கோவில் அருகில் செல்லும்போது மினிவேன், தனியார் பஸ்சை முந்திச் செல்ல முயன்றதாக தெரிகிறது. 

இது தொடர்பாக இருவருக்கும் இடையே வாய் தகராறு ஏற்பட்டது. அப்போது ஆத்திரம் அடைந்த டிரைவர் பாக்கியராஜ், மாதேஸ்சை தாக்கியதாக தெரிகிறது.

பின்னர், தனியார் பஸ் தர்மபுரிக்கு சென்று பயணிகளை இறக்கி விட்டு விட்டு திரும்ப சேலத்தை நோக்கி வந்து கொண்டிருந்தது. இந்த நிலையில் தன்னை அடித்த சம்பவம் குறித்து மாதேஷ் தனது உறவினர்களிடம் கூறினார். இதனால் பதிலுக்கு பதில் அவரை தாக்குவதற்காக மாதேஷ் மற்றும் அவரது தந்தை சேட்டு மற்றும் உறவினர்கள் தீவட்டிப்பட்டி பஸ் நிறுத்தத்தில் காத்திருந்தனர்.

தனியார் பஸ் தீவட்டிப்பட்டி பஸ் நிறுத்தத்தில் வந்தபோது பஸ்சை தடுத்து நிறுத்தி, பஸ்சுக்குள் ஏறி பாக்கியராஜ் மற்றும் கண்டக்டர் கோபி ஆகியோரை அடித்து உதைத்ததாக கூறப்படுகிறது. 

இந்த சம்பவம் குறித்து தீவட்டிபட்டி போலீசார் இரு தரப்பினரையும் அழைத்து விசாரணை நடத்தி வருகின்றனர்.

திருச்சி:

திருச்சி மாவட்டம் மண்ணச்ச நல்லூர் அருகே தாளக்குடியை சேர்ந்தவர் ஜெகன்மோகன் (வயது 40). இவர் துவாக்குடி அரசு போக்குவரத்து பணிமனையில் டிரைவராக பணியாற்றி வருகிறார். அதே டெப்போவில் கண்டக்டராக பணிபுரிந்து வருபவர் பழனியப்பன். இவர்கள் இருவரும் நேற்று இரவு 11.30 மணியளவில் சத்திரம் பேருந்து நிலையத்தில் இருந்து பயணிகளை ஏற்றிக் கொண்டு துவாக்குடி நோக்கி சென்று கொண்டிருந்தனர். அப்போது கல்யாணி கவரிங் பேருந்து நிறுத்தம் அருகே சென்ற போது அவ்வழியாக சென்ற மற்றொரு பைக், பஸ்ஸில் மோதுவது போல் சென்றதாக கூறப்படுகிறது. இதனிடையே ஓட்டுனர் பஸ்சை தொடர்ந்து ஓட்டி சென்றுள்ளார். 

இதனால் ஆத்திரமடைந்த பைக்கில் வந்த வாலிபர் காந்தி மார்க்கெட் ஆர்ச் பகுதியில் சென்றுகொண்டிருந்த பஸ்சை மறித்து தகராறில் ஈடுபட்டார். மேலும் தனது நண்பர்களுக்கு போன் செய்து அவர்களை வரவழைத்துள்ளார். பின்னர் அவர்கள் பேருந்து ஓட்டுநர் மற்றும் நடத்துனரிடம் தகராறில் ஈடுபட்டனர். இதில் ஆத்திரமடைந்த அவர்கள் இருவரையும் தாக்கியுள்ளனர்.

இது குறித்து பஸ் டிரைவர் ஜெகன் மோகன் காந்தி மார்க்கெட் காவல் நிலையத்திற்கு தகவல் அளித்தார். அதன் பேரில் சம்பவ இடத்திற்கு போலீசார் விரைந்து சென்று தகராறில் ஈடுபட்டவர்களை தடுத்து நிறுத்தினர். பின்னர் மோதலில் ஈடுபட்ட மதுரை ரோடு கல்யாண சுந்தர புரத்தை சேர்ந்த ஆறுமுகம் மகன் கவியரசர் என்ற பழனிசாமி (25), அவரது நண்பர்கள் மணிகண்டன் (20), சரவணன் (26), சதீஷ்குமார் (29) மற்றும் ரவிக்குமார் (25) ஆகிய 5 பேர் மீது வழக்கு பதிவு செய்து கைது செய்தனர். இவர்கள் அனைவரும் காந்தி மார்க்கெட் வெங் காயமண்டியில் தொழிலாளர்களாக பணிபுரிந்து வருகின்றனர்.