நீங்கள் தேடியது "மகள் கைது"

தாம்பரம்:

தாம்பரம் சானடோரியம், துர்கா நகரில் வசித்து வருபவர் சதாசிவம். இவரது மனைவி பூபதி (வயது 60).

இவர்களது மகள் நந்தினி. இவர் திருமணம் ஆகி அதே தெருவில் உள்ள வீட்டில் தனியாக குடும்பத்துடன் வசித்து வருகிறார்.

கடந்த 7-ந்தேதி காலை பூபதி மட்டும் வீட்டில் இருந்தார். திடீரென அவர் எரியும் தீயுடன் வீட்டில் இருந்து வெளியே ஓடி வந்தார்.

அக்கம் பக்கத்தினர் அவரை மீட்டு கீழ்ப்பாக்கம் அரசு ஆஸ்பத்திரியில் சேர்த்தனர். அங்கு அன்று மாலை பூபதி பரிதாபமாக இறந்தார்.

குடும்பத் தகராறில் அவர் தீக்குளித்து தற்கொலை செய்ததாக முதலில் கூறப்பட்டது. இது குறித்து குரோம்பேட்டை போலீசார் வழக்குப்பதிவு செய்து விசாரணை நடத்தினர்.

இதில் கள்ளக்காதலை கண்டித்த தகராறில் மகள் நந்தினியே மண்எண்ணையை ஊற்றி பூபதியை தீ வைத்து எரித்து கொன்றிருப்பது தெரிந்தது.

இதையடுத்து நந்தினியை போலீசார் கைது செய்தனர். அவர் போலீசில் அளித்துள்ள வாக்குமூலத்தில் கூறி இருப்பதாவது:-

எனக்கும் அதே பகுதியில் வசிக்கும் ஒருவருக்கும் கள்ளக்காதல் ஏற்பட்டது. இதனை அறிந்த தாய் பூபதி என்னை கண்டித்தார். இதனால் எங்களுக்குள் அடிக்கடி தகராறு ஏற்பட்டு வந்தது.

தாயின் கண்டிப்பால் கள்ளக்காதலனுடன் ஒன்றாக சேர முடியாமல் போகுமோ என்று நினைத்தேன்.

கடந்த 7-ந்தேதி பெற்றோர் வீட்டுக்கு சென்ற போது தாய் பூபதி மட்டும் இருந்தார். அப்போதும் எங்களுக்குள் மோதல் ஏற்பட்டது. பின்னர் நான் அங்கிருந்து எனது வீட்டுக்கு சென்று விட்டேன். தாய் மீது கோபத்தில் இருந்தேன்.

தாய் பூபதி வழக்கமாக காலையில் தூக்க மாத்திரை சாப்பிட்டு விட்டு தூங்குவது வழக்கம். எனவே தூக்கத்தில் இருக்கும் அவரை மண்எண்ணை ஊற்றி எரித்து கொலை செய்ய முடிவு செய்தேன்.

அதன்படி சிறிது நேரம் கழித்து மீண்டும் தாய் வீட்டுக்கு சென்றேன். அங்கு தாய் பூபதி தூங்கிக் கொண்டு இருந்தார். அவர் மீது மண் எண்ணையை ஊற்றி தீ வைத்து விட்டு அருகில் உள்ள எனது வீட்டுக்கு ஓடி வந்து விட்டேன். இதனை வேறு யாரும் கவனிக்கவில்லை.

சிறிது நேரத்தில் தீயின் வெப்பத்தால் எழுந்த தாய் பூபதி எரியும் தீயுடன் வீட்டில் இருந்து வெளியே ஓடி வந்தார். அக்கம் பக்கத்தினர் தீயை அணைத்தனர்.

அப்போது நானும் எதுவும் தெரியாதது போல் தீயை அணைத்து தாயை ஆஸ்பத்திரிக்கு அழைத்து சென்றேன். அங்கு அவர் இறந்துவிட்டார்.

எனவே நான் தப்பித்து விட்டதாக நினைத்து இருந்தேன். போலீசார் விசாரித்து என்னை கைது செய்துவிட்டனர்.

இவ்வாறு நந்தினி கூறி உள்ளார்.

இந்த கொலையில் நந்தினியின் கள்ளக்காதலனுக்கும் தொடர்பு இருக்கலாம் என்று போலீசார் சந்தேகிக்கிறார்கள். இதையடுத்து அவரை பிடித்து விசாரணை நடத்தி வருகின்றனர். அவர் அரசியல் கட்சியில் முக்கிய பிரமுகராக உள்ளார் என்பது குறிப்பிடத்தக்கது.

சென்னை:

புளியந்தோப்பு போகிபாளையத்தை சேர்ந்தவர் பிரகாஷ். இவரது மனைவி துர்காதேவி. இந்த தம்பதிக்கு அஜய் (வயது 3) என்ற மகனும், 6 மாத பெண் குழந்தையும் உள்ளனர். அஜய் அருகில் உள்ள மாநகராட்சி உருது பள்ளியில் படித்து வருகிறான். அஜயை வழக்கமாக பிரகாஷ் பள்ளியில் விட்டு விட்டு பின்னர் அழைத்து வருவார்.

இந்நிலையில் நேற்று முன்தினம் பள்ளி விடுவதற்கு சற்று முன்கூட்டியே ஆசிரியை மேனகாவிடம் 2 பெண்கள் சென்று தங்களை அஜய் உறவினர்கள் என்று அறிமுகம் செய்து கொண்டனர். மேலும் தங்களுடன் சிறுவனை அனுப்பி வைக்குமாறு கேட்டனர். உடனே ஆசிரியை மேனகா, துர்காதேவிக்கு போன் செய்து விசாரித்தார். தனது கணவர் சார்பில் யாரேனும் வந்திருப்பார்கள் என நம்பி அஜயை அவர்களுடன் அனுப்பி வைக்குமாறு துர்காதேவி கூறினார்.

பள்ளியை விட்டு அஜய் வீட்டுக்கு வராததால் அங்கு சென்று அவனுடைய பெற்றோர் விசாரித்தனர். அப்போது தான் அஜய் கடத்தப்பட்டது தெரியவந்தது. இது குறித்து மாலை 6 மணிக்கு புளியந்தோப்பு போலீசில் புகார் கொடுத்தனர்.


இது குறித்து அஜய் பெற்றோரிடம் போலீசார் விசாரித்தனர். அப்போது அவர்கள், அந்த பெண்களில் ஒருவர் தங்களுக்கு தெரிந்தவர் என்றும், 2013-ம் ஆண்டு வீடு கட்டும் போது கட்டுமான பணியில் அந்த பெண் ஈடுபட்டார் என்றும் தெரிவித்தனர்.

அதை வைத்து அந்த பெண்ணின் முகவரியை போலீசார் கண்டறிந்தனர். மேலும் பூட்டப்பட்டு இருந்த அந்த வீட்டை போலீசார் ரகசியமாக கண்காணித்தனர். நள்ளிரவில் வீட்டுக்கு வந்த அந்த பெண்ணை போலீசார் பிடித்தனர். விசாரணையில் வீட்டின் அருகே நிறுத்திவைக்கப்பட்டு இருந்த ஆட்டோவில் சிறுவன் அஜய் இருப்பது தெரியவந்தது. உடனே சிறுவனை போலீசார் மீட்டனர்.

இது குறித்து போலீஸ் விசாரணையில் கிடைத்த தகவல்கள் வருமாறு:-

சிறுவனை கடத்திய பெண் வியாசர்பாடி கணேசபுரம் பகுதியை சேர்ந்த குட்டியம்மா (38) ஆவார். அவருடன் வந்தவர் ஓட்டேரியில் வசிக்கும் அவரது மகள் ஐஸ்வர்யா (20). ஓட்டேரியில் வசிக்கும் ஒரு பெண் தனது மகளுக்கு குழந்தை இல்லாததால் ஒரு குழந்தையை தத்து எடுக்க விரும்புவதாகவும், அதற்கு பணம் கொடுக்க தயாராக இருப்பதாகவும் குட்டியம்மாவிடம் கூறியுள்ளார். இதனால் குழந்தையை கடத்தி அந்த பெண்ணிடம் கொடுத்தால் தனக்கு பணம் கிடைக்கும் என்றும், அதை வைத்து தனது மகளுக்கு சீர்வரிசை செய்யலாம் என்றும் குட்டியம்மா முடிவு செய்து அஜயை கடத்தி உள்ளார்.

இவ்வாறு போலீசார் கூறினர்.

இதையடுத்து குழந்தை கடத்தலில் ஈடுபட்ட குட்டியம்மா, ஐஸ்வர்யாவை போலீசார் கைது செய்தனர். 6 மணிக்கு சிறுவனின் பெற்றோர் புகார் கொடுத்தனர். நள்ளிரவு 1 மணிக்கு சிறுவனை போலீசார் மீட்டனர். கடத்தப்பட்ட சிறுவனை புகார் தெரிவித்த 7 மணி நேரத்தில் மீட்ட இன்ஸ்பெக்டர் ரவி காலில் விழுந்து துர்காதேவி நன்றி தெரிவித்தார். #BoyRescue

நாகர்கோவில்:

குமரி மாவட்டம் காரங்காடு செருப்பங்கோடு பகுதியைச் சேர்ந்தவர் நிஷா (வயது 28). இவர் மாவட்ட போலீஸ் சூப்பிரண்டு அலுவலகத்தில் புகார் மனு ஒன்று அளித்துள்ளார்.

நான் பி.எஸ்.சி. படித்துள்ளேன். ராஜாக்கமங்கலம் பகுதியைச் சேர்ந்த ஆலிவர், அவரது மகள் பவுலின் டோரா ஆகியோர் என்னை தொடர்பு கொண்டனர். இந்திய அரசின் அனுமதி பெற்ற சார் நிறுவனம் கோவையை தலைமையிடமாக கொண்டு செயல்படுவதாகவும், இது ஒரு மத்திய அரசு நிறுவனம் என்றும், அதில் குமரி மாவட்டத்தில் உள்ள ஒரு கிளையில் மேலாளர் பதவி காலியாக இருப்பதாகவும் தெரிவித்தனர். இந்த நிறுவனத்தில் தாங்கள் உயர் பதவி வகித்து வருவதால் தங்களுக்கு ரூ.5 லட்சம் பணம் கொடுத்தால் அந்த கிளை மேலாளர் பதவியை உங்களுக்கு பெற்று தருவதாக ஆசைவார்த்தை கூறினர்.

அதனை நம்பி நான் ரூ.5 லட்சம் பணத்தை அவர்களிடம் கொடுத்தேன். கோட்டாரில் உள்ள ஒரு கிளையில் பணி செய்ய வேண்டும் என்று வேலைக்கான பணி நியமன உத்தரவை வழங்கினார்கள்.

அந்த கிளைக்கு சென்று நான் பணியில் சேர்த்தேன். அப்போது 20 பங்குதாரர்களை சேர்த்துக் கொடுக்க வேண்டும் என்றும், அவர்களிடம் ரூ.500 முதல் ரூ.5000 வரை வசூல் செய்ய வேண்டும் என்றும், நீங்கள் கட்டாயம் ரூ.3 லட்சம் வைப்புத்தொகை வைக்க வேண்டும் என்றும் கூறினார்கள். அவர்களை நம்பி பல்வேறு நபர்களிடம் இருந்து லட்சக்கணக்கில் பணத்தை வாங்கி கொடுத்தேன்.

பணம் கொடுத்த பங்குதாரர்களுக்கு வீடு கட்ட வசதியும், கடன் வசதி உள்ளிட்ட பல்வேறு சலுகைகள் தருவதாகவும் பொய்யான வாக்குறுதிகளை கூறியிருந்தனர். இதுதொடர்பாக கோவையை தலைமையிடமாக கொண்டு செயல்படும் அந்த நிறுவனம் பற்றி விசாரித்தேன். அப்போது அந்த நிறுவனம் பண மோசடியில் ஈடுபட்டு செயல்படாமல் இருப்பதை அறிந்தேன். இதுபற்றி ஆலிவர், பவுலிடோராவிடம் சென்று விசாரித்தேன். ஆனால் அதற்கு அவர்கள் சரியான பதில் அளிக்கவில்லை. இதனால் என்னை நம்பி அந்த நிறுவனத்தில் பணம் கட்டியவர்கள் என்னை நெருக்குகிறார்கள். எனவே மக்களை ஏமாற்றி கோடிக்கணக்கில் பண மோசடி செய்துள்ள அவர்கள் மீது நடவடிக்கை எடுக்க வேண்டும்.

இவ்வாறு அந்த மனுவில் அவர் கூறி உள்ளார்.

நிஷாவின் புகாரை விசாரிக்க மாவட்ட குற்றப்பிரிவு போலீசாருக்கு போலீஸ் சூப்பிரண்டு ஸ்ரீநாத் உத்தரவிட்டார். சப்-இன்ஸ்பெக்டர் முத்துமாரி தலைமையிலான போலீசார் விசாரணை மேற்கொண்டனர். விசாரணையில் நடந்த சம்பவங்கள் உண்மை என்பது தெரியவந்தது.

இதையடுத்து ஆலிவர், பவுலின் டோரா, தினேஷ் மற்றும் பார்த்தசாரதி ஆகிய 4 பேர் மீது மோசடி வழக்குப்பதிவு செய்யப்பட்டது. போலீசார் ஆலிவர், பவுலின் டோரா ஆகிய 2 பேரையும் இன்று கைது செய்தனர்.

போலீசார் நடத்திய தொடர் விசாரணையில் கைது செய்யப்பட்ட 2 பேரும் குமரி மாவட்டத்தில் 15-க்கும் மேற்பட்ட கிளை நிறுவனங்களை தொடங்கி ஏராளமான பொதுமக்களிடம் கோடிக்கணக்கில் பண மோசடி செய்திருப்பது தெரியவந்துள்ளது.

நிஷாவை போல மேலும் பல பெண்கள் ஆலிவர், பவுலின்டோராவிடம் பணம் கொடுத்து ஏமாந்துள்ளனர். அவர்களில் பலர் போலீஸ் நிலையத்தில் புகார் அளித்துள்ளனர். அந்த புகார்கள் தொடர்பாகவும் விசாரணை முடுக்கி விடப்பட்டு உள்ளது.