நீங்கள் தேடியது "Land Measuring Work"

சென்னை:

தி.மு.க. தலைமைக் கழகம் வெளியிட்டுள்ள அறிக்கையில் கூறி இருப்பதாவது:-

“சென்னை-சேலம் எட்டு வழி பசுமை விரைவுச்சாலை” அமைக்கும் திட்டத்தை காஞ்சிபுரம், திருவண்ணாமலை, கிருஷ்ணகிரி, தர்மபுரி, சேலம் ஆகிய ஐந்து மாவட்டங்களின் விவசாயிகளும் பொதுமக்களும் சமூக ஆர்வலர்களும் மிகக்கடுமையாக எதிர்த்து வருகிறார்கள்.

இந்த பசுமை விரைவு சாலை திட்டத்தால் மிக மோசமாக பாதிக்கப்படும் மக்களின் எண்ணங்களை பிரதிபலிக்கும் வகையிலும், விளை நிலங்கள், பசுமையான மலைகள், நீர் ஆதாரங்கள் போன்றவற்றிற்கு ஏற்படும் கடும் பாதிப்பை தடுத்து நிறுத்தும் வகையிலும் ஒருங்கிணைந்த சேலம் மாவட்ட கழகத்தின் சார்பில் இன்றைய தினம் மாபெரும் கண்டன ஆர்ப்பாட்டத்தை வெற்றிகரமாக நடத்தியிருக்கிறார்கள்.

ஒருங்கிணைந்த திருவண்ணாமலை மாவட்டத்தின் சார்பில் திருவண்ணாமலை தெற்கு மாவட்டக் கழகச் செயலாளர் எ.வ.வேலு, எம்.எல்.ஏ., தலைமையில், திருவண்ணாமலை வடக்கு மாவட்டக் கழகச் செயலாளர் சிவானாந்தம் முன்னிலையில் வருகின்ற 25-ந் தேதி “மாபெரும் கண்டன ஆர்ப்பாட்டம்” திருவண்ணாமலை கோட்டாட்சியர் அலுவலகம் முன்பு நடைபெறும்.

இவ்வாறு அதில் கூறப்பட்டுள்ளது. #ChennaiSalemGreenExpressWay

சேலம்:

சேலம்-சென்னை இடையே 10 ஆயிரம் கோடி செலவில் 8 வழி சாலை பசுமை சாலை அமைக்க மத்திய அரசு முடிவு செய்துள்ளது.

இதற்காக சேலம், தர்மபுரி, கிருஷ்ணகிரி, திருவண்ணாமலை, காஞ்சிபுரம் ஆகிய 5 மாவட்டங்களில் 7 ஆயிரத்து 500 ஏக்கர் விவசாய நிலங்கள் கையகப்படுத்தப்பட உள்ளன. மேலும் ஆயிரத்திற்கும் மேற்பட்ட வீடுகள், பள்ளிக்கூடங்கள், கோவில்கள், மலைகள் உடைக்கப்பட உள்ளன.

இதனால் பாதிக்கப்படும் மக்கள் நில அளவீடு செய்யும் பணியில் ஈடுபட்டுள்ள அதிகாரிகளை முற்றுகையிட்டு தொடர் போராட்டத்தில் ஈடுபடுவதுடன் கண்ணீர் விட்டு கதறி வருகிறார்கள். 5 மாவட்டங்களிலும் பதட்டமான சூழல் நிலவி வருகிறது.

இதற்கிடையே அந்த பகுதியில் முகாமிட்டுள்ள உளவுத்துறை போலீசார் போராட்டத்திற்கு தூண்டுபவர்களை கைது செய்து வருகிறார்கள். சேலத்தில் ஏற்கனவே போராட்டத்தை தூண்டியதாக சமூக ஆர்வலர் பியுஷ்மானுஷ், நடிகர் மன்சூர் அலிகான், கல்லூரி மாணவி வளர்மதி, தி.மு.க.வை சேர்ந்த முத்துக்குமார், நாம் தமிழர் கட்சி ஒருங்கிணைப்பாளர் முத்துக்குமார் ஆகியோர் கைது செய்யப்பட்டு சேலம் மத்திய சிறையில் அடைக்கப்பட்டனர்.

இதையடுத்து நில அளவீடு பணி நடைபெறும் பகுதியில் பாதிக்கப்படும் விவசாயிகள் மற்றும் பொதுமக்கள் வேறு நபர்கள் ஆதரவின்றி தனியாக போராடி வருகிறார்கள்.

சேலம் மாவட்டத்தில் நில அளவீடு பணி கடந்த 18-ந் தேதி தொடங்கியது. சேலம் மாவட்ட எல்லையான மஞ்சவாடி கணவாயில் தொடங்கி ஆச்சாங்குட்டபட்டி, குப்பனூர் உள்பட பல கிராமங்களில் நில அளவீடு பணி முடிந்தது.

சேலம் மாவட்டத்தில் 8 வழிச்சாலை திட்டத்திற்கு 18 கிராமங்களில் 20 கி.மீ. தூரத்திற்கு நிலம் கையகப்படுத்தும் பணி இதுவரை முடிந்துள்ளது. இன்னும் 16 கி.மீ. தூரத்திற்கு நிலம் எடுக்கப்படும் என்று அதிகாரிகள் தெரிவித்தனர்.

5-வது நாளான இன்று சேலம் உடையாப்பட்டி, எருமாபாளையம் ஆகிய பகுதிகளில் நில அளவீடு நடக்கிறது. இந்த பகுதியிலும் பாதிக்கப்படும் விவசாயிகள் மற்றும் பொதுமக்கள் எதிர்ப்பு தெரிவிப்பார்கள் என்பதால் அந்த பகுதிகளில் கூடுதல் போலீசார் பாதுகாப்புக்கு குவிக்கப்பட்டு உள்ளனர். #ChennaiSalemGreenExpressWay