வேடசந்தூர்:
திண்டுக்கல் மாவட்டம் வேடசந்தூர் பெரியகடை வீதியில் செல்போன் கடை, நகை பாலீஷ் போடும் கடை, ஜவுளிக்கடை, பாத்திரக்கடை, நகைக்கடை ஆகிய 5 கடைகளின் பூட்டுகள் உடைக்கப்பட்டு இருந்தது. இதைப் பார்த்து அப்பகுதி மக்கள் வேடசந்தூர் போலீசார் தகவல் தெரிவித்தனர்.
மேலும் கடை உரிமையாளர்களுக்கும் தகவல் தெரிவிக்கப்பட்டது. போலீசார் அங்கு விசாரணை நடத்தியபோது, நகை பாலீஷ் கடையில் இருந்த ரூ.14 ஆயிரம், செல்போன் கடையில் இருந்த ரூ.8000 ஆகியவை திருடு போயிருந்தது.
மேலும் மற்ற 3 கடைகளில் பணம் கிடைக்காததால் கொள்ளையர்கள் ஏமாற்றமடைந்துள்ளனர். மேலும் அங்கிருந்த கூட்டுறவு வங்கி நகை கடையின் பூட்டை உடைத்தும் கொள்ளையடிக்க முயன்றுள்ளனர். அப்போது வங்கி காவலாளி கூச்சலிடவே கொள்ளையர்கள் தப்பி ஓடி விட்டனர். இதே போல் சீத்தமரம் நால்ரோட்டில் அடுத்தடுத்து 2 கடைகளிலும் கொள்ளையடிக்கப் பட்டுள்ளது.
சம்பவம் குறித்து தகவல் அறிந்ததும் மாவட்ட எஸ்.பி. பாஸ்கரன் நேரடியாக வந்து விசாரணை நடத்தினார். மோப்பநாய் வரவழைக்கப்பட்டும் கைரேகை நிபுணர்களை கொண்டும் சோதனை நடத்தப்பட்டது.
மேலும் கொள்ளை நடந்த இடத்தில் பொருத்தப்பட்டிருந்த சி.சி.டி.வி. கேமராக்கள் உதவியுடனும் கொள்ளையர்களை தேடி வருகின்றனர். அடுத்தடுத்து கடைகளில் கொள்ளை நடந்த சம்பவம் வேடசந்தூர் பகுதியில் பரபரப்பை ஏற்படுத்தியுள்ளது.
