நீங்கள் தேடியது "குலதெய்வம்"

ஆன்மிக ரீதியாக ஒரு குடும்பத்துக்கு மூன்று தெய்வ அம்சங்கள் பாதுகாப்பாக இருந்து அருள்புரிவதாக ஐதீகம். அதாவது, ஊருக்குள் இருக்கும் மூல தெய்வம். அடுத்தது குலதெய்வம். பிறகு காவல் தெய்வம். அந்த அடிப்படையில் குலதெய்வ வழிபாடு ஒவ்வொரு குடும்பத்துக்கும் அவசியம். வருடம் ஒரு முறையாவது குடும்பத்தோடு சென்று குலதெய்வத்தை வழிபட்டால், நம்முடைய குலம் தழைத்து, வரும் சந்ததியினருக்கு சந்தோஷமான வாழ்க்கை கிடைக்கும்.

குல தெய்வம் பற்றி எதுவுமே அறிய இயலாத நிலையில் இருப்பவர்கள், வளர்பிறை வெள்ளிக்கிழமை அதிகாலை பிரம்ம முகூர்த்தத்தில் குளித்துவிட்டு, அவரவர்கள் வழக்கப்படி நெற்றியில் திருநீறு அல்லது திருமண் இட்டுக்கொள்ள வேண்டும். பின்னர் வீட்டின் தலைவாசல் நிலையைக் கழுவி மஞ்சள் பூசி, குங்குமம், சந்தனம் இட்டு புதுத்துணி சாத்தி, வெற்றிலை, பாக்கு, பழம் வைத்து, பொங்கல் இட்டு நிலை படிக்கு பூஜை செய்து வழிபட வேண்டும். அதன்மூலம் குடும்பத்தின் குலதெய்வம் பற்றிய தகவல் விரைவில் தெரியவரும் என்பது ஆன்மிக சான்றோர்களின் அறிவுரையாகும்.

குல தெய்வ வழிபாடு எவ்வளவு முக்கியமானது என்பதை, மறைந்த காஞ்சி சந்திரசேகரேந்திர சரஸ்வதி சாமிகள் குறிப்பிட்டுள்ளார்.

“ஒரு குடும்பத்தின் முன்னோர்கள் வணங்கி வந்த தெய்வமே ‘குலதெய்வம்’ ஆகும். முன்னோர்கள் என்றால், தந்தைவழி பாட்டன்- பாட்டி ஆகியோரை கணக்கில் கொள்ள வேண்டும். ஒரு குடும்பத்தில் உள்ள தந்தை வழி பாட்டன் வரிசையில், கச்சிதமான ஒழுங்குமுறை இருப்பதை காண முடியும். அதை ‘கோத்திரம்’ (உட்பிரிவு) என்று சொல்வார்கள். மற்ற கோத்திரத்தில் பிறந்த பெண்கள்தான் ஒரு குடும்பத்தில் வாழ்ந்த முன்னோர்களின் வாழ்க்கைத் துணையாக இருந்திருப்பார்கள். ஒரே கோத்திரத்தில் பெண் சம்பந்தம் ஏற்படாமல் வாழ்க்கை பாதையை அவர்கள் அமைத்துக்கொண்டிருப்பார்கள். அதனால், பரம்பரையானது சங்கிலி போல ஒரே சகோதரத்துவ தொடர்ச்சியாக அமைந்து இருக்கும். இது ஒரு முக்கியமான சமூக உளவியல் ஒழுங்குமுறை சார்ந்த விஷயமாகும்.

அவர்கள் அனைவருமே கோத்திர வழி மாறாதபடி, குலதெய்வம் என்னும் தெய்வ சக்தியை வழி வழியாக பிரார்த்தனை செய்திருப்பார்கள். தலைமுடி எடுப்பது, காது குத்துவது போன்ற நேர்த்திக்கடன்கள் நிறைவேற்றப்பட்டிருக்கும். இந்த உலகத்தில் ஆயிரம் கோவில்கள் இருந்தாலும், குலதெய்வக் கோவிலுக்கு சின்ன வயதிலேயே அனைவரையும், தாய்- தந்தையர் அழைத்துச் சென்று வழிபடக் கற்றுக் கொடுத்திருப்பார்கள். அதன்படி குல தெய்வ கோவிலில் நிற்கும்போது, குறிப்பிட்ட ஒருவரது பரம்பரை வரிசையில் அவர் நிற்பதாக ஐதீகம். அந்த வரிசை முறையிலான தொடர்பை வேறு எந்த விதத்திலும் அமைத்துக்கொள்ள இயலாது.”

ஆன்மிக ரீதியில் ஒருவருக்கு தனிப்பட்ட முறையில், குலதெய்வம், இஷ்ட தெய்வம், வழிபடு தெய்வம், மந்திரத்திற்குரிய தெய்வம் என்று தெய்வங்கள் இருக்கலாம். பல்வேறு தெய்வங்களை வழிபட்டு வந்தாலும், அந்த தெய்வங்களில் மிகவும் வலிமையானதாக இருப்பது, அவரது குலதெய்வம் மட்டுமே. காரணம், பாரம்பரியமாக அதற்கு முன்னோர்கள் வழிபாடுகளை செய்து வந்துள்ளதால் குலம் காக்கும் தெய்வமாக அது போற்றப்படுகிறது.

தனது அருளை மட்டுமல்லாது, மற்ற தெய்வ வழிபாடுகளின் பலன்களையும் அளிக்கும் சக்தி குலதெய்வத்திற்கு மட்டுமே உண்டு என்று சான்றோர்கள் குறிப்பிடு கின்றனர். ‘நாள் செய்யாததை கோள் செய்யும்’ என்றும், ‘கோள் செய்யாததை குலதெய்வம் செய்யும்’ என்றும் சொல்வார்கள்.

ஒரு குடும்பத்தின் முன்னோர்களில் தெய்வமாக மாறிய புண்ணிய ஆன்மாக்கள், சம்பந்தப்பட்ட குலத்தை சார்ந்தவர்களைக் காக்கும் வல்லமை பெற்றவை என்பது ஆன்மிக ரகசியமாகும். அவை, ஒருவரது பூர்வ கர்ம வினைகளையும் கூட அகற்றி விடும் சக்தி பெற்றவை. குல தெய்வங்கள் தெரியாதவர்கள், எந்த தெய்வத்தையும், எந்த ஆலயத்திலும் சென்று வழிபட்டுக் கொள்ளலாம். ஆனால் அதன் மூலம் பூர்வ ஜென்ம கர்மாக்களின் தாக்கத்தை ஓரளவுக்குதான் நிவர்த்தி செய்ய முடியும். அதுவே குலதெய்வ வழிபாடு என்றால், நம்முடைய கர்மாக்கள் முற்றிலும் நிவர்த்தியாகிவிடும் என்பதுதான் அதன் சிறப்பு அம்சம்.

பொதுவாக, குறிப்பிட்ட ஒரு பரம்பரையில் வழிகாட்டியாய் வாழ்ந்து, மறைந்த முன்னோர்கள் அல்லது கன்னியாக இருந்து மறைந்த பெண்களை தங்கள் வீட்டுத் தெய்வமாக விரதம் இருந்து வழிபடுவது தமிழர் கிராமிய பண்பாடாக இன்றும் உள்ளது. பெரும்பாலும், பெண் வடிவமாகவே இருக்கும் அவற்றை வீட்டுச் சாமி, குடும்பத் தெய்வம், கன்னித் தெய்வம், குல சாமி என்று பல்வேறு பெயர்களால் அழைப்பார்கள். அந்த நிலையில் குலதெய்வம் என்பது ஒருவரது நலன்களில் அக்கறை காட்டும் இறை சக்தியாக இருந்து வருகிறது. குலதெய்வ தோஷம் இருந்தால், மற்ற தெய்வங்களின் அருள் கிடைக்காது. குல தெய்வத்தின் அனுக்கிரகம் இல்லை என்றால், ஒருவர் எவ்வளவு சக்தி வாய்ந்த ஹோமம் அல்லது யாகம் செய்தாலும், ஆலயங்களுக்கு சென்றாலும் எதிர்பார்த்த பலனை பெற முடியாது.

உலகில் எத்தனையோ கடவுள் உருவங்கள் உள்ளன. ஒவ்வொருவருக்கும் ஏதாவது ஒரு கடவுள் பிடிக்கும். சிலர் ஒன்றுக்கும் மேற்பட்ட கடவுள்களை விரதம் இருந்து மனதார வழிபடுவார்கள்.

சமீப காலமாக விரதம் இருந்து சீரடி சாய்பாபாவை இஷ்ட தெய்வமாக ஏற்று வழிபடுபவர்கள் எண்ணிக்கையும், சித்தர்களின் ஜீவசமாதிகளை தேடிச் சென்று வழிபடுபவர்கள் எண்ணிக்கையும் அதிகரித்தப்படி உள்ளது. அது போல பரிகாரத்தலங்களை புற்றீசல் போல மொய்க்கும் பக்தர்களையும் காணலாம்.

இறை வழிபாடு இப்படி பல கோணங்களில் இருந்தாலும், நாம் நமது குலதெய்வத்தை மட்டும் எந்த விதத்திலும் மறந்து விடக் கூடாது. ஏனெனில் நம் குலத்தை காத்து, பாதுகாப்புடன் வாழ வைப்பதே நமது குலதெய்வம்தான்.

குலதெய்வத்தை நினைக்காமல், பூஜிக்காமல் நாம் தொடங்கும் எந்த ஒரு செயலும் முழுமை பெறாது. குலதெய்வ வழிபாட்டை மறந்து விட்டால் திருமண தடை, குழந்தை பாக்கியம் கிடைக்காமல் இருப்பது, கடன், நோய், குடும்பத்துக்குள் பிரச்சினை என்று குழப்பமும், மன அமைதியின்மையும் ஏற்பட்டு விடும். இத்தகைய பிரச்சினைகளில் இருந்து நாம் விடுபட வேண்டுமானால், ஆண்டுக்கு ஒரு தடவையாவது குலதெய்வ வழிபாட்டை செய்ய வேண்டும். குலதெய்வத்துக்கு உரிய படையல் போட்டு திருப்தி ஏற்படுத்த வேண்டும்.

குலதெய்வம் மகிழ்ச்சி அடைந்தால், உங்கள் குலமே செழிக்கும். தினம், தினம் குலதெய்வத்தை வணங்குபவர்களுக்கு எந்த குறையும் வராது குதூகலம்தான் வரும். பூர்வீக ஊரில் இருப்பவர்களுக்கு குலதெய்வத்தை வழிபட எந்த சிக்கலும் இருக்காது. ஆனால் ஊரை விட்டு வெளியேறி நகரங்களில் குடியேறி விட்டவர்களுக்கு, குல தெய்வ வழிபாடு செய்வது என்பது அரிதான ஒன்றாகும்.

அப்படிப்பட்டவர்களுக்காகவே ஆண்டுக்கு ஒரு தடவை பங்குனி உத்திரம் தினத்தன்று ‘‘குலதெய்வ வழிபாடு’’ செய்யும் பழக்கம் உருவாக்கப்பட்டுள்ளது. இந்த ஆண்டு குல தெய்வ வழிபாட்டுக்குரிய பங்குனி உத்திரம் 9-ந்தேதி (ஞாயிறு) வருகிறது.

அன்று குலதெய்வம் இருக்கும் ஆலயத்தில் நீங்கள் இருக்குமாறு பார்த்துக் கொள்ளுங்கள். அது உங்களை மேன்மைப்படுத்தும். நீங்கள் எத்தனை கடவுள்களை வணங்கினாலும் சரி.... குல தெய்வத்தை வழிபடாவிட்டால் குண்டுமணி அளவுக்கு கூட பிரயோஜனம் இல்லை. ஆகையால் குலதெய்வத்தை அவசியம் வழிபடுங்கள்.

யார் ஒருவர் குலதெய்வத்தை விடாமல், விரதம் இருந்து ஐதீகத்துடன் வழிபாடு செய்து வருகிறாரோ, அவரை எந்த கிரகமும் நெருங்கி தொல்லை கொடுக்காது. அதுதான் குல தெய்வ வழிபாட்டின் மகிமை.

குலதெய்வ வழிபாட்டை எவர் ஒருவர் ஒழுங்காக செய்து கொண்டு வருகிறார்களோ அவர்களை எந்த கிரகமும் ஒன்றும் செய்து விடமுடியாது என்பது ஐதீகம் மேலும் வரும் வினைகள் யாவுமே நல்வினையாக மாறும்.

குல தெய்வத்திற்கு அப்படி ஒரு சக்தி இருக்கிறது. குல தெய்வத்தின் அருள் இல்லை என்றால் அந்த வீட்டில் எப்படிப்பட்ட மகானை வைத்து வழிபட்டாலும் அந்த வீட்டில் விமோசனம் கிடைப்பதில்லை என்கிறார்கள்.

பாரம்பரிய வழக்கத்தை மீறாமல், மாற்றாமல் வணங்கவேண்டியது முக்கியம். குலதெய்வம் என்னவென்று தெரியாதவர்கள் காலபைரவர் சந்நதியில் வியாழக்கிழமை அன்று குருஓரையின் போது அர்ச்சனை செய்து தனக்கு குலதெய்வத்தை காட்டும்படி வேண்டலாம். அர்ச்சனை முடிந்தவுடன் பசுவிற்கு அகத்திக்கீரையை உணவாகக் கொடுக்கலாம்.

அடிப்படையில் இந்துமதம் பற்றற்ற தன்மையை போதிக்கிறது. அதாவது அனைத்தையும் துறந்து தியானம், தவம் மூலம் இறை நிலையை அடைவது. ஆனால் இந்த குலதெய்வம் மனிதன் லௌகீக வாழ்க்கைக்கு தேவையான பலன்களையே அளிக்கிறது. அப்படியானால் குலதெய்வமும் இறை நிலையும் வேறு வேறா? இல்லை. இதற்கு அருமையான விளக்கத்தை பகவான் கீதையில் சொல்கிறார்.

யார் என்னை எப்படி வழிபடுகிறார்களோ அவர்களை அப்படியே நான் வழிநடத்துகிறேன். செயல்களின் பயனை விரும்புபவர்கள் இங்கே தேவதைகளை வழிபடுகிறார்கள். அதாவது இறைவனை லட்சியமாகக் கொள்வதும் உலக இன்பங்களை ஒதுக்கிவிட்டு இறை நெறியில் செல்வதும் எல்லோராலும் முடியாது.

உலகம் மற்றும் அதன் இன்பங்கள் வேண்டும் என்று நினைப்பவர்களுக்காக இறைவன் தேவதைகளைப் படைத்துள்ளார் அல்லது அவரே அப்படி அவதரிக்கிறார். வேத காலத்தில் இந்திரன், வருணன் முதலிய தேவர்கள் வழிபட்டனர். இக்காலத்தில் உள்ள தேவதைகள் தான் குலதெய்வங்கள். எனவே விரதம் இருந்து குலதேவதை ஒருவர் முறையாக வழிபட்டாலே உலக இன்பங்களைப் பெற்றுக்கொண்டே இறைநிலை அடையும் வாய்ப்பு உள்ளது.

குலதெய்வம் வழிபாட்டின் மூலம் மணமாகாதவர்களுக்கு திருமணம் அமைவது, குழந்தை வரம் பெறுவது, தீராத நோய்களுக்கு பரிகாரம் பெறுவது, கல்வி, தொழில் விருத்தி கிடைப்பது, வழக்குகளில் நீதி கிடைப்பது முதலிய பயன்கள் பெறப்படுகிறது.

தமிழக மக்களின் வழிபாட்டில் மிக முக்கிய பங்கு வகிப்பது சாஸ்தா வழிபாடாகும். குடும்பம் மற்றும் குல விருத்திக்காக இவ்விழா கொண்டாடப்படுகிறது. சாதி, சமய வேறுபாடின்றி குலதெய்வமான சாஸ்தா கோவில்களுக்கு பங்குனி உத்திர திருநாளில் குடும்பத்தோடு சென்று வழிபடுகிறார்கள். இந்த வழிபாடு பரம்பரையாக தொடர்கிறது.

பக்தர்கள் குலதெய்வ வழிபாட்டில் ஈடுபட பல இடங்களில் சாஸ்தாவும், ஐயனாரும் அவதரித்தனர். கலியுகத்தில் ஐயப்பன் அவதாரம் எடுத்து கேரள மாநிலம் பந்தள மன்னர் அரண்மனையில் வாழ்ந்து, பின்னர் அரக்கனை வதம் பண்ணி சாஸ்தாவாக உருவானதாக வரலாறு.

சாஸ்தாவின் அம்சமாக கருதப்படும் ஐயப்பன் எங்கிருந்தார். அவர் எந்த பகுதியில் திரிந்தார். இளவயதில் தமிழகத்தில் திருநெல்வேலி மாவட்டம் மேற்குதொடர்ச்சி மலையடிவாரத்தில் உள்ள காரையாரில் அவர் வீர விளையாட்டுகளை கற்றதாக கூறப்படுகிறது. அதன் காரணமாக அங்கு முதன் முதலில் சாஸ்தா கோயில் எழுந்ததாகவும், அக்கோயிலே சொரிமுத்து ஐயனார் கோயில் என்று, அதுவே ஐயப்பனின் மூல ஆதாரம் எனவும் அழைக்கிறார்கள். இக்கோயில் 2 ஆயிரம் ஆண்டுகள் பழமை வாய்ந்ததாகவும் கருதப்படுகிறது. சாதி, சமய வேறுபாடின்றி குலம் மற்றும் குடும்பத்தை காக்க அவதரித்த தெய்வமாக இவர்கருதப்படுகிறார்.

திருவனந்தபுரம் மகாராஜாவுக்கு எதிராக போர் மூண்டபோது அவர்களுக்கு உதவச்சென்ற இடத்தில் சிங்கம்பட்டி ஜமீன்தார் இறந்தார். அதற்கு பரிகாரமாக என்ன வேண்டும் என மகாராஜா கேட்டபோது “சுள்ளி ஒடிக்க கொஞ்சம் காடு வேண்டும்” என்று ஜமீன்தாருடன் சென்றவர்கள் சொன்னார்கள். உடனே மகாராஜா 80 ஆயிரம் ஏக்கர் வனப்பகுதியை பரிசாக கொடுத்தார். அதில் சொரிமுத்து ஐயனார் கோயிலும் அடங்கும். தற்போது இக்கோயிலை சிங்கம்பட்டி ஜமீன் வாரிசான முருகதாஸ் தீர்த்தபதி ராஜா நிர்வகித்து வருகிறார்.

காரையாரை தொடர்ந்து நெல்லை, தூத்துக்குடி, குமரி மாவட்டங்களில் சாஸ்தா என்றும், மதுரை, விருதுநகர், திருச்சி, சேலம், தஞ்சை மாவட்டங்களில் ஐயனார் என்றும் பல கோயில்கள் உருவாயின. இங்குள்ள சாஸ்தா, ஐயனார் ராஜாவாகவும், காவல் தெய்வமாக விளங்கும் சங்கிலிபூதத்தார், கருப்பண்ணன், கருப்பன் மற்றும் கருப்பசாமி ஆகியோர் சேனாதிபதியாகவும் அழைக்கப்படுகின்றனர். சங்கலிபூதத்தார் ஆழி எனவும் அழைக்கப்படுகிறார். சாஸ்தா கோயில் முன்பு இந்த ஆழி மிக பிரமாண்டமாக உருட்டும் விழியுடனும், முறுக்கிய மீசையுடனும் பிரமாண்டமான தோற்றத்துடன் நம்மை பயமுறுத்தும்.

சாஸ்தா கோயில் எது என்று முன்னோர்கள் தனது வாரிசுதாரர்களுக்கு சொல்லாமல் விட்டதால், தாங்களுக்கு எந்த சாஸ்தா என்றே தெரியாதவர்கள் உலகின் முதல் சாஸ்தாவாக கருதப்படும் காரையார் சொரிமுத்து ஐயனார் கோயிலை மூலசாஸ்தா என்றும், குலதெய்வம் என்றும் கருதி வழிபடுகின்றனர். இங்கு வந்து சென்றாலே குலதெய்வ வழிபாடு பூர்த்தியாகிவிடும் என்பது ஆன்றோர்களில் வாக்கு.

இங்கு பங்குனி உத்திரதிருவிழா மட்டுமில்லாமல், ஆடி அமாவாசை, தை அமாவாசை திருநாளும் விமர்சையாக நடக்கும். பங்குனி உத்திரத்தன்றும், ஆடி அமாவாசையன்றும் லட்சகணக்கான பக்தர்கள் குடும்பம் குடும்பமாக வந்து முகாமிட்டு வழிபடுவர். இதுமட்டுமல்ல திருமணம் முடிந்த புதுமண தம்பதிகள், குழந்தைகளுக்கு முடிஎடுத்து காதணி விழா, தொழில் மற்றும் குடும்ப விருத்திக்காக கிடா விருந்து உள்ளிட்ட நேர்த்திகடன் பூஜையும் சாஸ்தாவிற்கு நடத்துகின்றனர்.

திருமணம் உள்ளிட்ட சுபநிகழ்ச்சிகளுக்கு முதல் பத்திரிக்கையும், அழைப்பும் சாஸ்தாவிற்குதான். ஆடிமாதத்தில் அடிக்கும் சாரலில் நனைந்த படி, வாடையில்வாடியே படியே குழந்தைகளை தோளில் சுமந்து கொண்டு பல கிலோ மீட்டர் நடந்து வந்தே சொரிமுத்து ஐயனாரை வணங்கி நிற்போர் பலர். இப்படி சாஸ்தா வழிபாடு தொடர்ந்தது.

தற்போது நமது குல தெய்வ சாஸ்தா எது என்று கண்டுபிடித்து, அதை எப்படியாவது வணங்க வேண்டும் என்று மக்களிடையே ஒரு எதிர்பார்ப்பு வந்துள்ளது. எனவே தான் அனைவரும் தங்கள் குலதெய்வமான சாஸ்தாவை தேடி அலைகிறார்கள். பிரசன்னம் பார்க்கிறார்கள். அவர் சொல்லும் அங்க அடையாளங்களை வைத்து சாஸ்தாவை கண்டுபிடித்து வணங்குகிறார்கள்.

சரி கண்டுபிடிக்க முடியவில்லை. விட்டுவிடுவோம் என முடங்கி விடாமல் தேடிக்கொண்டிருப்பவர்கள் பலர். அதுவரை அவர்கள் பக்கத்தில் உள்ள சாஸ்தா கோயிலுக்கு சென்று வணங்கி வருவார். தங்களுக்கு ஒத்துக்கொண்டபடி சாஸ்தா கிடைத்து விட்டால் அவரை தேடி ஓடோடி செல்கிறார்கள். அந்த அளவுக்கு குலதெய்வம் மீது ஒரு வகையான ஈர்ப்பு. ஒருவர் குலதெய்வம் யார் என தெரியாமல் நெல்லையப்பர் கோயிலில் உள்ள காவல் தெய்வமான சங்கிலிபூதத்தாரை 25 ஆண்டுகளாக வணங்கி வந்துள்ளார். அவரும் குடும்ப கஷ்டங்களில் பல இன்னல்களுக்கு ஆளாகி சிலரிடம் முறையிட, நீங்கள் குலதெய்வத்தை வழிபடுங்கள் என்று கூறியுள்ளனர். சங்கிலிபூதத்தாரை நான் வழிபடுகிறேன் என்று கூற, சங்கிலிபூதத்தார் குலதெய்வம் இல்லை. காவல் தெய்வம் என்று அவர்கள் கூற, அவருக்கும் குலதெய்வம் தெரியவந்தது.

நெல்லை மாவட்டத்தில் சேரன்மகாதேவி செங்கொடி சாஸ்தா, சேரன்மகா தேவியிலிருந்து களக்காடு செல்லும் வழியில் பூதத்தான் குடியிருப்பு பொன்பெருமாள் சாஸ்தா, கல்லிடைக்குறிச்சி மலையன்குளம் பாடக மகாலிங்க சாஸ்தா, பிரான்சேரி வீரியபெருமாள் கரையடி மாடசாமி சாஸ்தா, பாளை சாந்திநகர் நடுகாடுடையார் சாஸ்தா, சீவலப்பேரி அருகே மலை உச்சியிலிருக்கும் மறுகால்தலை பூலுடையார் சாஸ்தா, ஆலங்குளம் ஆண்டிபட்டி ஆனைமலை சாஸ்தா, ஏர்வாடி வடுகச்சிமதில் பூலியுடையார் சாஸ்தா, நாங்குநேரி சிறுமளஞ்சி பெருவேம்புடையார் சாஸ்தா, களக்காடு பெருவுடையார் சாஸ்தா, களக்காடு படலையார்குளம் வென்னியுடையார் சாஸ்தா, பத்தமடை மகாலிங்க சாஸ்தா, நளன்குடி மயிலேறும் சாஸ்தா, பேரூர் நரி சாஸ்தா என ஆயிரத்திற்கும் அதிகமான சாஸ்தா கோயில்கள் அமைந்துள்ளன.

தூத்துக்குடி மாவட்டத்தில் வல்லநாடு மணக்கரை புங்கமுடையார் சாஸ்தா, செய்துங்கநல்லூர் சுந்தரபாண்டிய சாஸ்தா, ஆழிகுடி குருந்துடையார் சாஸ்தா, ஆதிச்சநல்லூர் பொய்சொல்லா மெய்யன் சாஸ்தா, மலையரசி தீரன் தம்பிரான் சாஸ்தா, திருச்செந்தூர் அம்மன்புரம் மேலபுதுக்குடி அருஞ்சுனை காத்த ஐயனார், குரும்பூர் தேரிகுடியிருப்பு கற்குவேல் ஐயனார், சாத்தான்குளம் மருதமலை ஐயனார், கடம்பாகுளம் பூலுடையார் சாஸ்தா என ஐநூறுக்கும் மேற்பட்ட சாஸ்தா கோயில்கள் தூத்துக்குடி மாவட்டத்திலும் உள்ளன. தவிர குமரி, விருதுநகர், மதுரை ஆகிய தென்மாவட்டங்களிலும் பலஆயிரத்திற்கும் மேற்பட்ட சாஸ்தா, ஐயனார் கோயில்கள் உருவாயின.

இதே போல் பல்வேறு சாஸ்தா வரலாறுகள் பல கூறியபடியே தென் பகுதியில் அருள்பாலித்து வருகின்றன. சிறந்த தமிழ் பெயர்களை சுமந்த வண்ணமாகவும் பல சாஸ்தா காணப்படுகின்றன. இராஜவல்லிபுரத்தில் நல்லதம்பி சாஸ்தா, குலசேகரநத்தத்தில் ஸ்ரீ கரும்புளி சாஸ்தா, முத்தாலங்குறிச்சி பூந்தலை உடையார் சாஸ்தா, பொந்தன்பொழி மருதமுடையார் சாஸ்தா, ஆழிகுடி குருந்துடையார் சாஸ்தா, இருப்பபுரம் பெரும்படை சாஸ்தா மிகவும் பிரசித்தி பெற்றவையாகும்.
சாஸ்தாவை வணங்க பங்குனி உத்திரத்தினை முன்னிட்டு பக்தர்கள் கடந்த காலங்களில் மாட்டு வண்டி கட்டி செல்வர்.

அவர்கள் தங்கள் குழந்தைகளோடு வண்டியின் அடிவாரத்தில் தொட்டில் கட்டி பாய் விரித்து படுத்த படியே வானத்தை அன்னாந்து பார்த்து நிற்பர். மேகங்கள் திரளவேண்டும். மழை பொழிய வேண்டும், விவசாயம் செழிக்க வேண்டும் ஐயனே வேண்டிய வரம்வேண்டும் என சாஸ்தாவை வேண்டி நிற்பர். இரவு முழுவதும் வேடிக்கை பார்த்தபடியே, குழந்தைகளை ராட்டினத்தில் ஆட விட்டு மகிழ்வர். சர்பத், சேவியா பாயசத்தினை கண்ணாடி டம்ளரில் வாங்கி குடிப்பர். வகைவகையாக திண்பண்டங்களை வாங்கி கொடுத்து பெருமை படுவர். பெண் குழந்தைகளை கூட்டிச்சென்று பாசி மணிகள் வாங்கி கொடுத்து வளையல் உள்பட பொருள்களை டிசைன் டிசைனாக மணிக்கணக்கில் பார்த்து தேர்வு செய்வர்.

இரவு முழுவதும் ஐயப்பன் வில்லுபாட்டை கேட்ட படியே ராத்திரி சாமக்கொடையை ரசித்துக்கொண்டே இருப்பர். சில இடங்களில் வன்னிராஜன் போன்ற காவல் தெய்வங்கள் வேட்டைக்கு செல்லும் நிகழ்ச்சி விமர்சையாக நடைபெறும். அதிகாலை சிலர் காவல்தெய்வங்களுக்கு கிடாய் வெட்டி, அதை தங்களது மாட்டு வண்டி கூரையில்போட்ட படி, அங்கு விற்கும் ஏணி மிட்டாய் (சீனி மிட்டாய்), காரச்சேவு, மிக்சர் போன்றவற்றை ஓலைப்பெட்டியில் வாங்கி வந்து உறவினர்களுக்கு கொடுத்து மகிழ்வர். எத்தனை ஆனந்தம். குடும்பமே குதுகலிக்கும். பௌர்ணமி வெளிச்சத்தில் அக்கம் பக்கத்தில் வந்த உறவு காரர் கும்பலில் நல்லபெண் மாப்பிள்ளை இருக்கிறார்களா என ஒருஅலசு அலசி விடுவார்கள். பெண் மாப்பிள்ளை பிடித்திருந்தால் திருமணத்துக்கு அச்சாரமும் இட்டு கொள்வார்கள்.

மொத்தத்தில் சாஸ்தா என்னும் குலதெய்வ வழிபாடு மட்டும் இல்லையென்றால் உறவுகள் மேலும் வலுப்பட மற்றுமொரு திருவிழா கிடைக்குமா? என்பது கூட சந்தேகமே. இந்த விழா என்றும் உறவுகள் மேன்படும் விழாவாக அமையவேண்டும் என்பது தான் அனைவரின் விருப்பமாகும்.

பங்குனி உத்திரம் அன்று குல தெய்வ வழிபாடுகளும் நடைபெறும். அன்றைய தினம் குலதெய்வ வழிபாடு செய்வது மிக முக்கியமானதாகும். ஒவ்வொருவரும் அவர்கள் விரும்பும் பல கடவுள்களை வணங்கினாலும், குல தெய்வ வழிபாடு தான் முக்கியம். குல தெய்வத்தை வழிபடாமல், வேறு எந்த தெய்வத்தை நாடிச்சென்று வணங்கினாலும், குலதெய்வம் அணுக்கிரகம் இல்லையென்றால் புண்ணியம் இல்லை.

குல தெய்வ வழிபாடுதான் ஒருவருக் 100 சதவீத பலன்களை தர வல்லது. அந்த குல தெய்வம்தான் ஒவ்வொருவரையும், அவரது குலத்தையே பாதுகாக்கும். . ஒருவரது குல தெய்வத்தை வைத்து, அவரது பாரம்பரிய சிறப்பையும் உணர்ந்து கொள்ள முடியும்.

தற்போது பணி நிமித்தமாக வெளியூர்களில் இருப்பவர்கள், வருடத்துக்கு ஒரு முறையாவது தங்களது குல தெய்வ கோவிலுக்கு சென்று வணக்கி வந்தால் மிகவும் சிறந்தது. அதுவும் பங் குனி உத்திரத்தினம் அன்று வணங் கினால் புண்ணிய பலன்கள் கிடைக்கும் என்பது நம்பிக்கை.

குல தெய்வ வழிபாடு குறித்து, ஐம்பெரும் காப்பியங்களில் ஒன்றான சிலப்பதிகாரத்தில் சொல்லப்பட்டுள்ளது. குடும்பத்தில் மகிழ்ச்சி நிலவவும், நோய்கள் நீங்கவும், பிள்ளை வரம் கிடைக்கவும், இயற்கை செழிக்கவும் மக்கள் குல தெய்வத்தையே பெரிதும் நம்புவதுண்டு.

குல தெய்வ வழிபாட்டில் சைவ வழிபாடு, அசைவ வழிபாடு என இரு வகை உண்டு. பெரும்பாலும் அசைவ வழிபாடே அதிகம் நடை பெறுகிறது. ஆனால் நமக்கு எந்த வகை வழிபாடு உகந்ததோ அதையே பின்பற்றலாம்.

ஒவ்வொரு மாத பவுர்ணமிக்கும் ஒரு சிறப்பு உண்டு. அந்த வகையில் பங்குனி பவுர்ணமி, குடும்ப ஒற்றுமையை வலுப்படுத்தும் சிறப்பு பவுர்ணமியாகும். எனவே இந்த நாளில் குல தெய்வத்தை தேடிச் சென்று வழிபட வேண்டியது மிக, மிக அவசியமாகும்.

மற்ற நாட்களில் குல தெய்வத்தை வழிபடுவதை விட பங்குனி உத்திரம் அன்று வழிபடுவதுதான் நூறு சதவீத பலனை பெற்றுத் தரும். பங்குனி உத்திர திருநாளில் குலதெய்வ கோவிலுக்கு சென்று வழிபாடு செய்தால் நம் குலம் சிறப்பதோடு, குடும்பமும் செழிப்பு அடைந்து மேன்மை பெறும். குல தெய்வங்கள் மனம் மகிழ்ந்து நம்மை ஆசீர்வதிப்பதால், குடும்பங்கள் பல்வேறு துன்பங்கள், துயரங்கள், இடையூறுகளில் இருந்து காக்கப்படும்.

அண்ணன் - தம்பி குடும்பத் தினர் எல்லோரும் ஒற்றுமையாக நின்று படையல் போட்டு வழி பாடு செய்யும்போது குல தெய் வங்கள் மட்டுமின்றி மறைந்த மூதாதையர்களும் மிகுந்த மகிழ்ச்சி அடைவார்கள். இத னால் பித்ருக்களின் பரிபூரண ஆசிகள் எளிதாக வந்து சேரும். இது குடும்பத்தில் அமைதியும் ஆனந்தமும் தவழச் செய்யும்.

எனவே குல தெய்வ வழிபாடு என்பது முக்கியம். பங்குனி உத்திரம் அன்று அவரவர்களுடைய குல தெய்வக் கோவிலுக்குச் சென்று வருவது நல்லது.
கோவிலுக்கு செல்ல முடியாதவர்கள், தங்களது வீட்டிலேயே குல தெய்வ படத்தை அலங்கரித்து, பாரம்பரிய, வழக்கமான படையலை வைத்து மனம் உருக வழிபாடு செய்யுங்கள்.

நிச்சயமாக உங்கள் குல தெய்வத்தின் அருளாசி உங்கள் குடும்பத்துக்கு கிடைக்கும். குலதெய்வ வழிபாட்டை எவர் ஒருவர் ஒழுங்காக செய்து கொண்டு வருகிறார்களோ அவர்களை எந்த கிரக தாக்குதலுக்கு ஆளாக மாட்டார்கள், அதுபோல வினைகள் யாவுமே நல்வினையாக மாறும். குல தெய்வத்திற்கு அப்படி ஒரு சக்தி இருக்கிறது.

சாஸ்தா அவதரித்த பங்குனி உத்திர திருவிழா இன்று கொண்டாடப்படுகிறது. இதையொட்டி தென்மாவட்ட மக்கள் தங்களின் குலதெய்வமான சாஸ்தா கோவில்களுக்கு சென்று வழிபாடு நடத்தினார்கள். நாட்டின் பல்வேறு பகுதிகளில் இருந்தாலும் பங்குனி உத்திர நாளில் தென்மாவட்டங்களுக்கு வந்து வழிபடுவதை மக்கள் வழக்கமாக கொண்டுள்ளனர்.

இதற்காக தென் மாவட்டங்களில் உள்ள சாஸ்தா கோவில்களில் அன்று அதிகாலை 5 மணியில் இருந்து நள்ளிரவு 12 மணி வரை சாஸ்தாவுக்கு சிறப்பு அபிஷேகம் மற்றும் அலங்கார தீபாராதனைகள் நடந்தன.


திரளான பக்தர்கள் பொங்கலிட்டு வழிபட்டனர். நள்ளிரவு 12 மணிக்கு பிறகு கருப்பசாமி மற்றும் பரிவார தெய்வங்களுக்கு பொங்கலிட்டு கிடா வெட்டி அசைவ படப்பு போட்டு வழிபாடு நடத்துவார்கள்.

குரும்பூர் மேல புதுக்குடி அருஞ்சுனை காத்த அய்யனார் கோவில், தேரிகுடியிருப்பு கற்குவேல் அய்யனார் கோவில், சேரன்மாதேவி அருகே உள்ள பிராஞ்சேரி கரையடி மாடசாமி கோவில் மற்றும் வீரியப்பெருமாள் சாஸ்தா கோவில், அம்பை அருகே உள்ள மெய்யப்ப சாஸ்தா கோவில், கோபாலசமுத்திரம் பசுங்கிளி சாஸ்தா கோவில், படப்பகுறிச்சி குளத்துப்புழை தர்ம சாஸ்தா கோவில், மானூர் கீழப்பிள்ளையார் குளம் திருமேனி அய்யனார் சாஸ்தா கோவில்,

மணக்கரை புங்கமுடையார் சாஸ்தா கோவில், தென்திருப்பேரை கடம்பாகுளம் கரையில் உள்ள பூலுடையார் சாஸ்தா கோவில், நிறைகுளத்து சாஸ்தா, சேதுக்குவாய்த்தான் சூலுடையார் சாஸ்தா கோவில், சீவலப்பேரி மறுகால்தலை பூலுடையார் சாஸ்தா, பாவூர்சத்திரம் அருகே உள்ள கைகொண்டார் சாஸ்தா கோவில்,


கடையம் அருகே உள்ள சூட்சமுடையார் சாஸ்தா கோவில், நரசிங்க நல்லூர் முருகுவுடையார் சாஸ்தா கோவில், பாளையங் கோட்டை சாஸ்தா, செய்துங்கநல்லூர் சுந்தரபாண்டிய சாஸ்தா, டவுன் தடிவீரன் சாஸ்தா, மேகலிங்கசாஸ்தா கோவில், அருணாப்பேரி மேகம்திரை கொண்டஆலங்குளம் அருகே அத்தியூத்து சாஸ்தா கோவில், முத்துக்கிருஷ்ணப்பேரி வன்னியடி சாஸ்தா கோவில் ஆகிய கோவில்களில் சிறப்பு வழிபாடுகள் நடக்கின்றன.

இதேபோல் நெல்லை டவுன் கரும்பனை வீரதர்ம சாஸ்தா, வண்ணார்பேட்டை குட்டத்துறை சாஸ்தா, கோபாலசமுத்திரம் பசுங்கிளி சாஸ்தா, உக்கிரன் கோட்டை அணைத்தலை அய்யனார் தர்மசாஸ்தா, திப்பணம்பட்டி கைகொண்டார் சாஸ்தா, கடையம் ராமநதி அருகே உள்ள சூட்சமுடையார் சாஸ்தா, தலைமலை அய்யனார் உள்ளிட்ட கோவில்களிலும் பங்குனி உத்திர திருவிழா நடைபெற்றது.

குடும்ப சாஸ்தா கோவில் தெரியாதவர்கள் காரையார் சொரிமுத்து அய்யனார் தான் பொதுவான சாஸ்தா என்பதால் பாபநாசம் காரையார் சொரிமுத்து அய்யனார் கோவிலில் வழிபாடு நடத்தினர். இதையொட்டி சொரிமுத்து அய்யனார் கோவிலில் உள்ள மகாலிங்கசாமி, சொரிமுத்து அய்யனார், சங்கிலி பூதத்தாருக்கு சிறப்பு அபிஷேக அலங்கார தீபாராதனை நடைபெற்ற‌து.


இதைத்தொடர்ந்து பட்டவராயன், தளவாய் மாடசாமி, தூசி மாடசாமி, கசமாடசாமி, பேச்சி, பிரம்ம சக்தி, சுடலை மாடசாமி, மொட்டை கருப்பசாமி, கும்பமுனி, சட்டநாதர், பாதா கண்டி அம்மன் உள்ளிட்ட சாமிகளுக்கும் சிறப்பு அபிஷேக அலங்கார தீபாராதனை நடந்த‌து.

செய்துங்கநல்லூர் சுந்தரபாண்டிய சாஸ்தா கோவிலில் பங்குனி உத்திர திருவிழாவை முன்னிட்டு காலையில் கணபதி ஹோமம், நவக்கிரக ஹோமம் உள்பட பல ஹோமங்கள் நடந்தது. பக்தர்கள் செய்துங்கநல்லூர் நம்பி கோவிலில் இருந்து தீர்த்தம் எடுத்து வந்தனர். சாஸ்தாவுக்கு சிறப்பு அபிசேஷம் அலங்காரம் ஆராதனை நடந்தது. பல்லாயிரக்கணக்கானோர் நீண்ட வரிசையில் நின்று பக்தர்கள் சாஸ்தாவை தரிசனம் செய்தனர். மக்கள் பொங்கலிட்டும் வணங்கினர். பக்தர்களுக்கு அன்னதானம் வழங்கப்பட்டது. இன்று இரவு வன்னியராஜா வேட்டைக்கு செல்லுதல் நிகழ்ச்சி நடைபெற உள்ளது.

பங்குனி உத்திர திருவிழாவையொட்டி தமிழ்நாடு அரசு போக்குவரத்து கழகம் சார்பில் நெல்லை புதிய பஸ் நிலையம் உள்ளிட்ட பல்வேறு இடங்களில் இருந்து சாஸ்தா கோவில்களுக்கு சிறப்பு பஸ்கள் இயக்கப்பட்டன. பங்குனி உத்திர திருவிழாவை முன்னிட்டு நெல்லை மாவட்டத்துக்கு இன்று உள்ளூர் விடுமுறை விடப்பட்டிருந்தது. #PanguniUthiram

தீபாவளித் திருநாள் பண்டிகையாகக் கொண்டாடப்பட்டாலும், அந்த நாளில் சில சிறப்பு வழிபாடுகளைச் செய்வது நல்ல பலன்களைத் தரும் என்பது நம்பிக்கை. அந்த பூஜைகள் விபரம் வருமாறு:-

மகாலட்சுமி பூஜை- தீபாவளி திருமகளின் அவதார நாள் என்பதால், அன்று மகாலட்சுமி பூஜை செய்வது சிறப்பானது. மகாலட்சுமி படத்தினை அலங்கரித்துவைத்து, தூப தீப ஆராதனைகள் செய்யுங்கள். சர்க்கரைப் பொங்கல் நிவேதியுங்கள். மகாலட்சுமி துதிகளைச் சொல்லுங் கள். மனதார வேண்டுங்கள. திருமணம் கைகூடும். மங் களங்கள் சேரும். இதன் பயனாக கூடுதலாக லட்சுமி கடாட்சமும் கிட்டும்.

குபேர பூஜை : செல்வத்தின் அதிபதியாக குபேரன் பொறுப்பேற்ற நாள் தீபத் திருநாள். குபேரன் படத்தின் இருபுறமும் விளக்கேற்றி வைத்து, இனிப்பு பலகாரஙகளை நிவேதனம் செய்து வணங்குங்கள். செல்வமகள் உஙகள் இல்லம் தேடி வருவாள்.

கேதார கவுரி பூஜை : பரமசிவன் பார்வதி படத்தை வைத்து வழிபட வேண்டிய பூஜை அர்த்த நாரீஸ்வரர் படத்துக்கு கூடுதல் சிறப்பு. இதனால் தம்பதியர் ஒற்றுமை கூடும். இல்லற வாழ்வு சிறக்கும்.

கோ பூஜை : பசுவின் உடலில் சகல தேவர்களும் இருப்பதாக ஐதீகம். வாழ்வு சிறக்கவும், வம்சம் தழைக்கவும் தீபாவளி தினத்தில் கோ பூஜை செய்வது சிறப்பு.

சத்யபாமா பூஜை : பூமா தேவியின அம்சமான சத்யபாமாவே கிருஷ்ணருடன் சென்று நரகாசுரனை அழித்தாள். எனவே சத்யபாமாவை வீரலட்சுமியாக பாவித்து வழிபடும் பழக்கம் வட இந்தியாவில் உளளது. வாழ்வில் வரும் தடைகள் யாவும் இந்த பூஜை யால் நீங்கும்.

ஹரிஹர பூஜை : கிருஷ்ண பட்ச சதுர்த்தி, சிவனுக்குரிய மாத சிவராத்திரி. அன்று இரவு முழுக்க கண்விழித்து இருந்து மறுநாள் நாரகாசுரனை அழித்தார் கிருஷ்ணர். எனவே சிவ விஷ்ணு வழிபாடு செய்ய ஏற்ற நாளாக தீபாவளி கரு தப்படுகிறது. இந்த வழிபாட்டால் குடும்பத்தில் அமைதி உண்டாகும். ஆனந்தம் பெருகும்.

முன்னோர் வழிபாடு : துலாமாத அமாவாசை தினம் முன்னோர் வழிபாட்டிற்குரிய முக்கியமான தினமாகக் கருதப்படுகிறது. அவரவர் இல்லத்து முன்னோரை நினைத்து இயன்ற அளவு அன்னதானம் செய்வதும், ஆடை தானம் செய்வதும் இல்லத்து இனிமையை இரட்டிப்பாக்கும்.

குலதெய்வ பூஜை : எத்தனை எத்தனை தெய்வங்களை வழிபட்டாலும் குலதெய்வ வழிபாடே முதன்மையானது. வாழ்வில் நாம் அனைத்து பலன்களையும் பெற குலதெய்வத்தின் ஆசி வேண்டும். எந்த ஒரு பூஜை அல்லது பண்டிகையின் போதும் முதலில் அவரவர் வழக்கப்படி குலதெய்வத்தைக் கும்பிட வேண்டும்.  குலதெய்வத்தைக் கும்பிட்ட பின் இயன்ற பூஜை, விரதத்தைக் கடைப்பிடியுங்கள். எல்லா நன்மையும் உங்களைத் தேடிவரும்.

மஞ்சள், மண், சந்தனம், குங்குமம், விபூதி, சாம்பிராணி, அடுப்புக்கரி இவை அனைத்தையும் சிறிதளவு எடுத்து, ஒரு சிகப்பு துணியில் வைத்து முடிச்சு போட்டு வீட்டு வாசற்படி உட்புறம் நிலைப்படியின் மையத்திற்கு மேல் சுவரில் ஆணி அடித்து அதில் முடிந்து வைத்த துணியை ஆணியில் மாட்டி பத்தி சூடம் காண்பித்து வந்தால் ஒரு வாரத்தில் நம்முடைய குலதெய்வம் வீட்டிற்குள் வரும்.

வெட்டிவேர் சிறிதளவு, பச்சை கற்பூரம் சிறிதளவு, ஏலக்காய் சிறிதளவு, பன்னீர் இவை அனைத்தையும் ஒரு கலச செம்பில் போட்டு பன்னீர் எந்த அளவோ அதே அளவு தண்ணீர் ஊற்றி, கலச சொம்பை சுற்றி நூல் சுற்ற தெரிந்தவர்கள் சுற்றலாம். நூல் சுற்ற தெரியாதவர்கள் பட்டு துணியை சுற்றி விடலாம். (துணிக்கடையில் கலசத்திற்கு சுற்றும் பட்டு துணி என்று கேட்டால் கிடைக்கும்).

பூஜையறையில் ஒரு பலகையை வைத்து, அதில் வாழை இலை வைத்து அதில் பச்சரிசி பரப்பி அதன் மேல் கலச செம்பை வைத்து அதன்மேல் வாழைப்பூவை வைத்து (நுனி பகுதி மேல் நோக்கி இருக்க வேண்டும்.) வாழைப்பூவுக்கும் கலசத்திற்கும் இடையில் மாவிலை அல்லது வெற்றிலை சுற்றி வைத்து அதன்மேல் வாழைப்பூவை வைக்கவும்.

வில்வ இலை அல்லது ஊமத்தம் பூ (கிராமங்களில் சிறுவர்கள் ரேடியோ பூ என்று சொல்வார்கள்) அர்ச்சனை செய்யவும். வாழைப்பூ மூன்று நாட்கள் வரை தாங்கும். பூஜை மூன்று நாட்களே போதும். மேலும் தொடர்ந்து செய்ய விரும்புவர்கள் வாழைப்பூவை மட்டும் மாற்றினால் போதுமானது. பூஜை முடிந்ததும் பச்சரிசியை சமையல் செய்தும், வாழைப்பூவை வடை செய்தும் அக்கம் பக்கத்து வீட்டில் உள்ளவர்களுக்கு கொடுக்கலாம். கலசத்தில் உள்ளவற்றை வீட்டில் தெளித்துவிட்டும், குளிக்கும் தண்ணீரில் விட்டு குளித்துவிடவும்.

பூஜைக்குறிய மந்திரம்:-

ஓம் பவாய நம
ஓம் சர்வாய நம
ஓம் ருத்ராய நம
ஓம் பசுபதே நம
ஓம் உக்ராய நம
ஓம் மஹாதேவாய நம
ஓம் பீமாய நம
ஓம் ஈசாய நம

தினமும் 108 தடவை காலையும் மாலையும் கூறி பூஜை செய்து வந்தால், நாம் எண்ணியதை நம் குலதெய்வம் தருவார்கள் என்பது நம்பிக்கை.