நீங்கள் தேடியது "புதுவை"

சேதராப்பட்டு:

காஞ்சிபுரம் மாவட்டம் சித்திரைபாக்கம் கிராமம் கன்னியகோவில் தெருவை சேர்ந்தவர் முருகன் (வயது 52). கூலித்தொழிலாளி.

இவர், நேற்று புதுவை அருகே தமிழக பகுதியான கோட்டக்கரையில் நடை பெற்ற உறவினரின் துக்க நிகழ்ச்சிக்கு (கரும காரியம்) மகனுடன் மோட்டார் சைக்கிளில் வந்தார்.

ஆலங்குப்பம் என்ற இடத்தில் வந்த போது சாலையில் மாடு ஒன்று குறுக்கே பாய்ந்தது. இதையடுத்து மாடு மீது மோதாமல் இருக்க மோட்டார் சைக்கிளை வலது புறமாக திருப்பினார். அப்போது மோட்டார் சைக்கிள் தாறுமாறாக ஓடி சாலையோரத்தில் இருந்த ஆலமரத்தில் மோதியது.

இதில் தூக்கி வீசப்பட்ட முருகன் பலத்த காயம் அடைந்தார். அவரது மகனுக்கும் லேசான சிராய்ப்பு காயம் ஏற்பட்டது. உடனடியாக அக்கம் பக்கத்தினர் முருகனை மீட்டு ஜிப்மர் ஆஸ்பத்திரியில் சேர்த்தனர். அங்கு தீவிர சிகிச்சை அளித்தும் பலனின்றி முருகன் பரிதாபமாக இறந்து போனார்.

இது குறித்து முருகனின் மனைவி வீரம்மாள் கொடுத்த புகாரின் பேரில் ஆரோவில் போலீசார் வழக்குபதிவு செய்து விசாரணை நடத்தி வருகிறார்கள்.

சேதராப்பட்டு:

புதுவையை அடுத்த திருச்சிற்றம்பலம் பட்டானூர் கிராமத்தை சேர்ந்தவர் அருள்தாஸ் (வயது 30). தச்சு தொழிலாளி. இன்று காலை தனது மனைவி ஐஸ்வர்யா மற்றும் மகன்கள் அகஸ்டின், ருத்ரன், வரதன் ஆகியோருடன் மோட்டார் சைக்கிளில் மெயின் ரோட்டில் உள்ள பள்ளிக்கு வந்து கொண்டிருந்தார்.

பூத்துறை சாலையில் ஒரு வளைவில் திரும்பியபோது செஞ்சி ஆட்டு சந்தையில் இருந்து ஆடுகளை ஏற்றிக் கொண்டு சுல்தான் பேட்டைக்கு வந்த ஆம்னி வேன் ஒன்று எதிர்பாராத விதமாக மோட்டார் சைக்கிள் மீது மோதியது.

இதில் தூக்கி வீசப்பட்ட அருள்தாஸ், அவரது மனைவி ஐஸ்வர்யா மற்றும் 3 குழந்தைகள் உள்பட 5 பேரும் படுகாயம் அடைந்தனர்.

இதனை பார்த்ததும் ஆம்னி வேனை ஓட்டி வந்த சுல்தான்பேட்டையை சேர்ந்த ரகமத்துல்லா பயந்து வேனை அங்கேயே நிறுத்தி விட்டு தப்பி ஓடி விட்டார். இதையடுத்து அந்த வழியாக சென்றவர்கள் காயம் அடைந்த 5 பேரையும் மீட்டு 108 ஆம்புலன் வேன் மூலம் ஜிப்மர் ஆஸ்பத்திரியில் சேர்த்தனர்.

மேலும் ஆத்திரம் அடைந்த பொதுமக்கள் விபத்து ஏற்படுத்திய ஆம்னி வேனின் 4 டயர்களையும் கத்தியால் குத்தி பஞ்சராக்கினர்.

இந்த விபத்து குறித்து ஆரோவில் போலீசார் வழக்குபதிவு செய்து விசாரணை நடத்தி வருகிறார்கள்.

புதுச்சேரி:

சென்னை விமான நிலையத்தில் புதுவை முதல்-அமைச்சர் நாராயண சாமி நிருபர்களிடம் கூறியதாவது:-

‘நீட்’ தேர்வை தொடர்ந்து புதுவை மாநில அரசு சார்பில் எதிர்த்து வருகிறோம்.

உச்சநீதிமன்ற தீர்ப்பின் அடிப்படையில் நீட் தேர்வை எழுத வேண்டும் என்று மத்திய அரசு வலியுறுத்தியது காரணமாக கடந்த ஆண்டு அனிதா என்ற மாணவி இறந்துவிட்டார்.

இந்த ஆண்டு பிரதீபா என்ற மாணவி இறந்த சம்பவம் மிகவும் வருந்தகூடியது.

ஜதராபாத் மற்றும் டெல்லியில் மாணவர்கள் தற்கொலை முயற்சி செய்து உள்ளனர்.

பிளஸ்-2 தேர்வு எழுதி தேர்ச்சி பெற்ற மாணவ-மாணவிகளுக்கு மீண்டும் தேர்வு வைக்க வேண்டிய அவசியமில்லை. நீட் தேர்வில் புதுவை மாநிலத்திற்கு விலக்கு அளிக்க வேண்டும் என்று சட்டமன்றத்தில் தீர்மானம் நிறைவேற்றப்பட்டுள்ளது.

இதற்கான கோப்பு மத்திய அரசுக்கு அனுப்பப்பட்டது. ஆனால் அந்த கோப்பு தூங்கி கொண்டு இருக்கிறது.

நீட் தேர்வினால் மாணவ-மாணவிகள் மன உளச்சலில் இருக்கிறார்கள். மாணவர்கள் பிளஸ்-2 தேர்வில் அதிகமான மதிப்பெண்கள் பெற்றால் மருத்துவத்தில் இடம் கிடைக்கும். ஆனால் நீட் தேர்வு என்ற போர்வையில் மருத்துவம் படிக்க கூடிய வாய்ப்பு தடுக்கப்படுவதால் தற்கொலை செய்து கொள்கிறார்கள்.

தற்கொலை செய்வதை மாணவ-மாணவிகள் தவிர்க்க வேண்டும். நீட் தேர்வை எதிர்க்க பாரதீய ஜனதா கட்சி ஆட்சி செய்யாத மாநில முதல்வர்களுக்கு தி.மு.க. செயல் தலைவர் ஸ்டாலின் கடிதம் எழுதி ஒரு அணியை உருவாக்கி உள்ளார். அதில் எனக்கு உடன்பாடு உண்டு.

புதுவை மாநிலத்தில் அரசு இடத்தை பிளஸ்-2 மதிப்பெண்கள் அடிப்படையில் மருத்துவ இடங்களை பெற்று வந்தனர். ஸ்டாலின் கோரிக்கை ஏற்று உச்சநீதிமன்றம் செல்வதாக இருந்தாலும் பிரதமரை சந்திக்க இருந்தாலும் தயாராக இருக்கிறேன்.

நீட் தேர்வை ரத்து செய்ய பிரதமரிடம் வலியுறுத்துவோம்.

இவ்வாறு நாராயணசாமி கூறினார்.

புதுச்சேரி:

ஏ.டி.எம். மோசடி வழக்கில் லாஸ்பேட்டை காந்தி நகர் டேனியல் சுந்தர்சிங் இன்று கைது செய்யப்பட்டார். இந்த நிலையில் டேனியல் சுந்தர்சிங் மனைவிஆனந்தி உருளையன் பேட்டையில் உள்ள சி.பி.சி.ஐ.டி. அலுவலகத்தில் போலீசாரிடம் வாக்குவாதத்தில் ஈடுபட்டார். எனது கணவர் அப்பாவி, அவரை விடுவிக்க வேண்டும், இல்லை என்றால் குடும்பத்தோடு தற்கொலை செய்வேன் என்று கூறினார்.

பின்னர் ஆனந்தி நிருபர்களிடம் கூறியதாவது:-

நான் திருமணம் செய்து கொள்வதற்கு முன்பு டேனியல் சுந்தர்சிங் புதுவை கொசக்கடை வீதியில் துணிக் கடை வைத்துள்ளார்.

எனக்கும், அவருக்கும் திருமணமாகி 2 குழந்தைகள் இருக்கிறது. துணிக்கடையில் கிடைக்கும் வருமானமே போதுமானது.

கடந்த 2014-ம் ஆண்டு சந்துருஜி எனது கணவருடன் தொடர்பு கொண்டு பேசினார். எனக்கு பொருட்கள் வாங்க ஸ்வைப்பிங் மி‌ஷன் தேவைப்படுகிறது. அதற்கான கமி‌ஷன் தொகையை நான் செலுத்தி விடுகிறேன் என்று கூறினார்.

பின்னர் நண்பர்கள் 2 பேர் எங்கள் வீட்டுக்கு வந்தனர். அவர்கள் ஸ்வைப்பிங் மிஷினை கேட்டு வந்தனர். அவர்கள் முகவரியை வாங்கி வைத்து விட்டு ஸ்வைப்பிங் மிஷினை கொடுத்து அனுப்பினர்.

கடந்த 2 ஆண்டுகளாக ரூ.58 லட்சம் வரை ஸ்வைப் பிங் செய்துள்ளனர். இதனால் எனது கணவருக்கு சந்தேகம் ஏற்பட்டது. எனது கணவர் கணக்கில் வந்த ரூ. 58 லட்சத்தையும் சந்துருஜியிடம் கொடுத்து விட்டார்.

அப்போது அவர்கள் 8 சதவீதம் கமி‌ஷன் கொடுப்பதாக கூறினார்கள். அதை அவர் ஏற்கவில்லை. நீங்கள சட்ட விரோதமாக ஏதோ செய்கிறீர்கள். அதனால் எனது ஸ்வைப்பிங் மிஷினை கொடுத்து விடுமாறு கேட்டுள்ளார். அதற்கு சந்துருஜியும்,அவரது ஆட்களும் எனது கணவரை கழுத்தில் கத்தி வைத்து மிரட்டினர்.

சில நாட்கள் கழித்து ஸ்வைப்பிங் மிஷின் கொரியரில் எங்கள் வீட்டுக்கு வந்தது. அதனை எனது கணவர் சம்பந்தப்பட்ட வங்கியில் சரண்டர் செய்துள்ளார். அப்போது உங்கள் ரூ. 58 லட்சம் வரை ஸ்வைப்பிங் செய்யப்பட்டதால் அதற்கான வரி ரூ. 12 லட்சம் செலுத்தி உள்ளோம். அதற்கான ரசீது எங்களிடம் இருக்கிறது.

இந்த நிலையில் நேற்று சி.பி.சி.ஐ.டி. போலீசார் எங்கள் வீட்டுக்கு வந்தனர். அவர்கள் உங்கள் கணவர் ஏ.டி.எம். பண மோசடியில் சிக்கி உள்ளார். அவரை விடுவிக்க வேண்டுமானால் பணம் தர வேண்டும்.

இதையடுத்து நானும், எனது உறவினர்களும் சேர்ந்து நகைகளை அடகு வைத்து ரூ. 95 ஆயிரம் கொடுத்தோம். அதற்கான ரசீது எங்களிடம் இருக்கிறது. ஆனால், இன்று சி.பி.சி.ஐ.டி. போலீசார் எனது கணவரை குற்றவாளியாக சேர்த்துள்ளனர். நாங்கள் கொடுத்த ரூ. 95 ஆயிரத்துக்கு பதிலாக ரூ. 75 ஆயிரம் மீட்டதாக கூறி இருந்தனர்.

இது திட்டமிட்ட சதி. ஏடி.எம். மோசடிக்கும், எனது கணவருக்கும் எந்த தொடர்பும் இல்லை. முக்கிய குற்றவாளியான சந்துருஜியை கைது செய்யாமல் எந்த தொடர்பும் இல்லாத எனது கணவரை கைது செய்து இருக்கிறார்கள்.

இதனால் எனது கணவரை விடுதலை செய்ய வேண்டும். இல்லையென்றால் எனது கணவருடன் நாங்கள் தற்கொலை செய்து கொள்வோம்.

இவ்வாறு அவர் கூறினார்.

புதுச்சேரி:

புதுவை லாஸ்பேட்டை அசோக் நகர் செண்பக ராமன் வீதியை சேர்ந்தவர் ஆறுமுகம் (வயது 55). ஆசாரி தொழில் செய்து வந்தார். இவரது மனைவி சரஸ்வதி (47).

இவர்களுக்கு மகாலட்சுமி, தமிழ்செல்வி என்ற மகள்கள் உள்ளனர். அவர்கள் இருவருக்கும் திருமணமாகி தனித்தனி இடங்களில் வசித்து வருகிறார்கள்.

ஆறுமுகம்- சரஸ்வதி மட்டும் இந்த வீட்டில் வசித்து வந்தனர். சமீப காலமாக ஆறுமுகம் வேலைக்கு செல்வதில்லை. சரஸ்வதி லாஸ்பேட்டையில் உள்ள கல்வித்துறை சமையல் கூடத்தில் வேலை பார்த்து வந்தார். மேலும் வீட்டு வேலைகளுக்கும் சென்று வருவார்.

ஆறுமுகம் வேலைக்கு செல்லாத அதே நேரத்தில் அடிக்கடி குடித்து விட்டு வந்து வீட்டில் தகராறு செய்வது வாடிக்கையாக இருந்து வந்தது.

நேற்று இரவு கணவன் - மனைவி இருவரும் வீட்டில் தூங்கினார்கள். நள்ளிரவு நேரத்தில் அவர்களுக்குள் தகராறு ஏற்பட்டது. இதில், ஆத்திரம் அடைந்த ஆறுமுகம் உருட்டுக்கட்டையால் மனைவி சரஸ்வதியை கடுமையாக தாக்கினார்.

தலையின் பின்பக்கம் சரமாரியாக அடி விழுந்தது. இதில், அவரது மண்டை உடைந்து ரத்தம் கொட்டியது. அந்த இடத்திலேயே மயங்கி விழுந்த அவர் சிறிது நேரத்தில் உயிர் இழந்தார்.

மனைவி இறந்து விட்டதை அறிந்த ஆறுமுகம் வீட்டில் இருந்து வெளியேறி விட்டார். இந்த கொலை நடந்தது யாருக்கும் தெரியாது.

இன்று காலை சரஸ்வதியின் மகள் தாய் வீட்டுக்கு வந்தார். அப்போது வீட்டின் கதவு திறந்து கிடந்தது. உள்ளே சென்று பார்த்த போது சரஸ்வதி பிணமாக கிடந்தார்.

இதுபற்றி லாஸ்பேட்டை புறக்காவல் நிலைய போலீசுக்கு தகவல் கொடுத்தார். இன்ஸ்பெக்டர் நாகராஜ், சப்-இன்ஸ்பெக்டர் ஜாகிர் உசேன் ஆகியோர் விரைந்து வந்து பிணத்தை கைப்பற்றி விசாரணை நடத்தினார்கள்.

சீனியர் போலீஸ் சூப்பிரண்டு அபூர்வா குப்தா, சூப்பிரண்டு ரச்சனாசிங் ஆகியோர் சம்பவ இடத்தை பார்வையிட்டனர். தலைமறைவாகி விட்ட ஆறுமுகத்தை போலீசார் தேடி வருகிறார்கள்.

பெண் அடித்து கொலை செய்யப்பட்ட சம்பவம் லாஸ்பேட்டை பகுதியில் பரபரப்பை ஏற்படுத்தியது.