நீங்கள் தேடியது "ஜாமீன்"

இஸ்லாமாபாத்:

அல்-அஜீதா இரும்பாலை முறைகேடு வழக்கில் பாகிஸ்தான் முன்னாள் பிரதமர் நவாஸ் செரீப்புக்கு 7 ஆண்டுகள் சிறை தண்டனை விதிக்கப்பட்டது. அதைத் தொடர்ந்து அவர் லாகூரில் உள்ள கோட்லக்பத் சிறையில் அடைக்கப்பட்டுள்ளார்.

அங்கு அவருக்கு திடீரென உடல் நலக்குறைவு ஏற்பட்டது. எனவே டாக்டர்கள் குழு அவரை பரிசோதனை நடத்தியது. அப்போது அவருக்கு இருதயநோய், நீரிழிவு மற்றும் உயர் ரத்த அழுத்தம் இருப்பது தெரியவந்தது.

அதைத்தொடர்ந்து சிறையில் வைத்து அவருக்கு சிகிச்சை அளிக்கப்பட்டது. ஆனால் குணமாகாமல் தொடர்ந்து அவர் அவதிப்பட்டு வருகிறார். எனவே அவரை ஆஸ்பத்திரியில் அனுமதித்து உயர்தர சிகிச்சை அளிக்க டாக்டர்கள் குழு பரிந்துரை செய்தது.

இந்த நிலையில் நவாஸ் செரீப் வக்கீல் கவாஜா ஹாரீஸ் இஸ்லாமாபாத் ஐகோர்ட்டில் ஜாமீன் கேட்டு மனு தாக்கல் செய்துள்ளார். அதில், முன்னாள் பிரதமர் நவாஸ்செரீப்புக்கு விதிக்கப்பட்டுள்ள சிறை தண்டனையை நிறுத்தி வைக்குமாறு ஏற்கனவே மனுக்கள் தாக்கல் செய்யப்பட்டுள்ளது.

இந்த மனு மீதான விசாரணை வருகிற பிப்ரவரி 18-ந்தேதி நடைபெற உள்ளது. எனினும் “நவாஸ்செரீப்பின் உடல்நிலை மிகவும் மோசம் அடைந்துள்ளதால் அவருக்கு உடனடியாக சிகிச்சை தேவைப்படுகிறது. எனவே அவருக்கு ஜாமீன் வழங்க வேண்டும்” என்று கூறப்பட்டுள்ளது.

பேரையூர்:

உசிலம்பட்டி அருகே எழுமலையை அடுத்துள்ள பெருமாள்பட்டியைச் சேர்ந்தவர் பால்ராஜ். இவரது மனைவி பாண்டியம்மாள் (வயது 54).

கடந்த சில நாட்களுக்கு முன்பு இவர் சட்ட விரோதமாக மது விற்பனை செய்ததாக போலீசார் கைது செய்தனர்.

தொடர்ந்து திருமங்கலம் போலீஸ் நிலைய காவலில் அடைக்கப்பட்டு இருந்த பாண்டியம்மாளை நேற்று போலீசார் ஜாமீனில் விடுவித்தனர்.

இதனையடுத்து பாண்டியம்மாள் வீட்டுக்கு செல்வதற்காக திருமங்கலம்- கப்பலூர் இடையே உள்ள 4 வழிச்சாலையில் நடந்து சென்றார்.

அப்போது அவர் ரோட்டை கடக்க முயன்ற போது விருதுநகரில் இருந்து மதுரை நோக்கி வந்த கார் எதிர்பாராத விதமாக அவர் மீது மோதியது.

இதில் தூக்கி வீசப்பட்ட பாண்டியம்மாள் ரத்த வெள்ளத்தில் சம்பவ இடத்திலேயே பலியானார். இது குறித்து திருமங்கலம் நகர் போலீசார் வழக்குப்பதிவு செய்து கார் டிரைவர் சேலம் மாவட்டம், ஆத்தூர், அரியமுத்து பகுதியைச் சேர்ந்த மாரிமுத்து என்பவரை கைது செய்தனர்.

திருப்பத்தூர்:

வேலூர் மாவட்டம், திருப்பத்தூர் ஜெயா நகர் பகுதியை சேர்ந்தவர் மனோகரன் (வயது 65). ரெயில்வே போலீஸ் சப்-இன்ஸ்பெக்டராக பணியாற்றி ஓய்வு பெற்றிருந்தார். இவரது மகன் ராஜ்குமார் (37). இவர் வேலைக்கு செல்லாமல் ஊதாரித்தனமாக சுற்றிக் கொண்டு அடிக்கடி தனது தந்தை மனோகரனிடம் குடிக்க பணம் கேட்டு தகராறு செய்து வந்தார்.

இந்நிலையில், கடந்த ஏப்ரல் மாதம் 15-ந் தேதி ராஜ்குமார் தனது தந்தையிடம் குடிக்க பணம் கேட்டு தகராறு செய்துள்ளார். அப்போது மனோகரன் பணம் தர மறுத்ததால் ஆத்திரமடைந்த ராஜ்குமார் தனது தந்தையை கத்தியால் கழுத்தை அறுத்து கொடூரமாக கொலை செய்தார்.

பின்னர் திருப்பத்தூர் டவுன் போலீசில் சரணடைந்தார். அவர் மீது போலீசார் கொலை வழக்குப்பதிந்து கைது செய்து வேலூர் சிறையில் அடைத்தனர். இந்நிலையில், கடந்த மாதம் ராஜ்குமார் ஜாமீனில் வெளியேவந்தார்.

அவரது வீட்டின் எதிரே உள்ள காசி என்பவரது வீட்டில் கல்லூரி மாணவர்கள் சிலர் தங்கி படித்து வருகின்றனர்.

நேற்று அவர்கள் வெளியில் சென்ற நேரத்தில் ராஜ்குமார் அவர்களது அறைக்குள் சென்று தூக்குப்போட்டு தற்கொலை செய்து கொண்டார். பின்னர், மாலையில் மாணவர்கள் அறைக்கு வந்து பார்த்தபோது ராஜ்குமார் தூக்கில் பிணமாக தொங்கியதை பார்த்து அதிர்ச்சி அடைந்தனர்.

இதுகுறித்து திருப்பத்தூர் டவுன் போலீசுக்கு தகவல் தெரிவித்தனர். சப்-இன்ஸ்பெக்டர் அமர்நாத் மற்றும் போலீசார் சம்பவ இடத்திற்கு சென்று பிணத்தை கைப்பற்றி பிரேத பரிசோதனைக்காக திருப்பத்தூர் அரசு ஆஸ்பத்திரிக்கு அனுப்பி வைத்தனர். மேலும் வழக்குபதிவு செய்து விசாரித்து வருகின்றனர்.

இறந்த ராஜ்குமார் வேலூர் மத்திய சிறையில் சைக்கோ போல் செயல்பட்டு வந்ததால் அவரை கீழ்ப்பாக்கம் அரசு ஆஸ்பத்திரிக்கு அனுப்பி வைத்தனர். இதற்கிடையே, ஜாமீனில் வெளிவந்த ராஜ்குமார் திருப்பத்தூர் பகுதிகளில் சைக்கோ போல் சுற்றித்திரிந்து கொண்டிருந்தாராம்.

தற்போது தனது வீட்டின் எதிரே உள்ள ஒரு வீட்டில் அவர் தூக்குபோட்டு தற்கொலை செய்து கொண்ட சம்பவம் அப்பகுதியில் பெரும் பரபரப்பை ஏற்படுத்தி உள்ளது.