நீங்கள் தேடியது "முகிலன்"

திண்டுக்கல்:

திண்டுக்கல் பாராளுமன்ற தொகுதியில் நாம்தமிழர் கட்சி வேட்பாளராக நடிகர் மன்சூர்அலிகான் போட்டியிடுகிறார். இவர் இன்று வேட்பு மனுத்தாக்கல் செய்த பின்னர் நிருபர்களிடம் கூறியதாவது:-

மத்தியில் ஆட்சிமாற்றம் வேண்டும் என்பதே நாடு முழுவதும் எதிரொலிக்கும் குரலாக உள்ளது. இதனால் மத்திய அரசுக்கு ஆதரவு அளிக்கும் கட்சிகளுக்கும் தோல்வியே கிடைக்கும். தற்போது மத்திய அரசை குறைகூறும் காங்கிரஸ் அரசும் ஆள்வதற்கு தகுதியற்ற அரசுதான்.

தமிழகத்தில் சீமான் தலைமையிலான எங்களது அணிக்கு இளைஞர்களின் ஆதரவு பெருகி வருகிறது. மாற்றத்தை எங்களிடம் இருந்து கொண்டு வர முயற்சி எடுத்து வருகிறோம். கார்ப்பரேட் நிறுவனங்களை தமிழகத்தில் காலூன்ற வைத்து நீராதாரத்தை மத்திய- மாநில அரசுகள் அழித்துவிட்டன. இதனால் விவசாயத்துக்கு தண்ணீர் பற்றாக்குறை ஏற்பட்டு அவர்கள் போராட வேண்டிய நிலை ஏற்பட்டு உள்ளது.

ஸ்டெர்லைட் ஆலை உள்பட தமிழக மக்களின் ஜீவாதார பிரச்சினைகளுக்காக போராடி வந்தவர் முகிலன். தற்போது அவரை காணவில்லை. உயிரோடு உள்ளாரா? என்று கூட தெரியவில்லை. தொழில் நுட்பவசதி பெருகி உள்ள இந்த காலகட்டத்தில் மாயமான ஒருவரை கண்டுபிடிப்பது எளிதான காரியம்தான்.

ஆனால் போலீசார் அக்கறை காட்டாமல் உள்ளனர். அவரை ஸ்டெர்லைட் ஆலை நிர்வாகத்தினர் கடத்தி கொலை செய்து இருக்கலாமோ? என்ற சந்தேகம் எழுந்து உள்ளது. அவரது உயிருக்கு ஏதாவது நேர்ந்தால் ஸ்டெர்லைட் நிர்வாகம்தான் பொறுப்பு. எனவே போலீசார் இந்த பிரச்சினையில் உரிய நடவடிக்கை எடுத்து உண்மையை வெளிக்கொண்டு வரவேண்டும்.

இவ்வாறு அவர் கூறினார்.  #mansooralikhan #mukilan #sterliteplant

திருச்சி:

ம.தி.மு.க. பொதுச்செயலாளர் வைகோ திருச்சியில் நிருபர்களிடம் கூறியதாவது:-

தி.மு.க. கூட்டணியில் ம.தி.மு.க.வுக்கு இடங்கள் ஒதுக்கீடு தொடர்பான முதல் கட்ட பேச்சுவார்த்தை நடந்துள்ளது. இந்த சூழலில் தொகுதி பங்கீடு குறித்து எந்த கருத்தும் கூற இயலாது. இதே போல திருச்சியில் போட்டியிடுவேனா? என்பது குறித்தும் கூற முடியாது.

மதவாத சக்திகள் திராவிட இயக்கத்தை அழிக்க நினைத்து செயல்பட்டு வருவதால் திராவிட இயக்கத்தை பாதுகாக்க வேண்டும். கலாச்சார படையெடுப்பு நடவடிக்கைகளை எதிர்த்தும், தமிழர் நலன் மற்றும் தமிழக நலனை கருத்தில் கொண்டும் திராவிட இயக்கத்தை காக்க வேண்டியது அவசியமானது.

தமிழர்களின் தன்மானத்துக்கு அறை கூவல் விடும் சூழலில் தி.மு.க.வுக்கு பக்க பலமாக இருந்து செயல்படுவோம் என ஓராண்டுக்கு முன்பே ம.தி.மு.க. முடிவு செய்தது. அதன்படி தி.மு.க. தலைமையிலான கூட்டணியில் ம.தி.மு.க. இடம் பெற்றுள்ளது.

ஸ்டெர்லைட், கூடங்குளம், மணல் கொள்ளை, நியூட்ரினோ உள்ளிட்ட சுற்றுச்சூழல் பாதிப்பு திட்டங்களுக்கு எதிராக போராடிய முகிலன், போலீசாரால் கடத்தப்பட்டாரா? போலீசார் உதவியுடன் கூலிப்படையினர் கடத்தி சென்றனரா? எனத்தெரியவில்லை. அவரது உயிருக்கும் ஆபத்திருக்கலாம் என அஞ்சுகிறோம்.

முகிலன் விவகாரத்தில் எது நடந்தாலும் அதற்கு தமிழக காவல் துறையும் தமிழக அரசும்தான் பொறுப்பு. ஏனெனில் ஸ்டெர்லைட் ஆலை விவகாரம் தொடர்பாக கூடுதல் ஆவணங்கள் இருப்பதாக கடந்த 15-ந்தேதி அறிவித்த நிலையில் அவர் கடத்தப்பட்டுள்ளார்.

முகிலனை மறைத்து வைத்திருந்தாலோ, துன்புறுத்தினாலோ? அதனை கைவிட்டு உடனடியாக நீதிமன்றம் முன் ஒப்படைக்க வேண்டும். இல்லையெனில் மக்கள் மத்தியில் இந்த விவகாரம் எடுத்து செல்லப்படும்.

இவ்வாறு அவர் கூறினார்.