நீங்கள் தேடியது "slug 121996"

முத்துப்பேட்டை:

முத்துப்பேட்டை போலீசார் நேற்று கோவிலூர் கிழக்கு கடற்கரை சாலையில் வாகன சோதனையில் ஈடுபட்டிருந்தனர். அப்போது அந்த வழியாக மணல் ஏற்றி வந்த லாரியை மறித்து சோதனை செய்தனர். அப்போது அனுமதியின்றி மணல் ஏற்றி வந்தது தெரியவந்தது. இதுகுறித்து முத்துப்பேட்டை போலீசார் வழக்குப்பதிவு செய்து லாரி டிரைவர் அதிராம்பட்டினம் செட்டித்தெருவை சேர்ந்த ராமநாதன் (வயது 39) என்பவரை கைது செய்தனர். மேலும் மணல் கடத்தலுக்கு பயன்படுத்திய லாரியை பறிமுதல் செய்தனர். 

கரூர்:

கரூர் மின்னாம்பள்ளி வன்னியம்மன் கோவில் தெரு அருகே நேற்று முன்தினம் வாங்கல் போலீஸ் சப்-இன்ஸ்பெக்டர் ரகுபதி மற்றும் போலீசார் வாகன சோதனையில் ஈடுபட்டிருந்தனர். அப்போது அந்த வழியாக வந்த ஒரு லாரியை நிறுத்தி சோதனையிட்டபோது, மணல் கடத்தி வந்தது தெரிய வந்தது.

இதையடுத்து போலீசார் வழக்குப்பதிவு செய்து அந்த லாரி டிரைவர், கிருஷ்ணராயபுரம் அருகே பழைய ஜெயங்கொண்டம் பகுதியை சேர்ந்த ஞானவேலை (வயது 24) கைது செய்தனர். மேலும் மணலுடன் லாரியை பறிமுதல் செய்தனர். 

கடலூர் மாவட்டம் விருத்தாசலம் அருகே உள்ள மணவாளநல்லூரில் மணிமுக்தாறு செல்கிறது. இங்கு கடந்த ஒரு மாதத்துக்கு முன்பு அரசு சார்பில் மாட்டு வண்டி மணல் குவாரி திறக்கப்பட்டது.

இதைத்தொடர்ந்து கடலூர், விழுப்புரம், சேலம் மாவட்டங்களை சேர்ந்த மாட்டு வண்டி தொழிலாளர்கள் தினமும் 1000-க்கும் மேற்பட்டோர் இந்த மணல் குவாரிகளில் பணம் கட்டி மாட்டு வண்டிகளில் மணலை ஏற்றி சென்று வந்தனர்.

இன்று அதிகாலை ஆயிரத்துக்கும் மேற்பட்ட மாட்டு வண்டி தொழிலாளர்கள் மணல் அள்ளி செல்ல மணல் குவாரிக்கு சென்றனர். பின்னர் குவாரியில் மணல் அள்ளி முடித்ததும் குவாரி ஊழியர்களிடம் பணம் கட்ட சென்றனர்.

அப்போது அங்கிருந்த ஊழியர்களிடம் ஒரு மாட்டு வண்டிக்கு ரூ.100 வீதம் கொடுத்தனர். அதை அங்கிருந்த ஊழியர்கள் ஏற்க மறுத்து ஏ.டி.எம். கார்டு மூலம்தான் பணம் கட்ட வேண்டும் என்றனர்.

இதைகேட்டதும் மாட்டு வண்டி தொழிலாளர்கள் அதிர்ச்சி அடைந்தனர். பின்னர் அவர்கள் அங்கிருந்த ஊழியர்களிடம் வாக்குவாதத்தில் ஈடுபட்டனர். இதனால் அங்கு பெரும் பரபரப்பு ஏற்பட்டது.

பின்னர் மாட்டு வண்டி தொழிலாளர்கள் மணல் அள்ளிய மாட்டு வண்டிகளை மணல் குவாரி அருகே வரிசையாக நிறுத்தினர். சுமார் 2 கிலோ மீட்டர் தூரத்துக்கு மாட்டு வண்டிகள் அணிவகுத்து நின்றன.

பின்னர் மாட்டு வண்டி தொழிலாளர்கள் அனைவரும் விருத்தாசலம்- சேலம் தேசிய நெடுஞ்சாலையின் ஓரம் அமர்ந்து தர்ணா போராட்டத்தில் ஈடுபட்டனர். காலை நேரத்தில் போராட்டம் நடத்தியதால் அங்கு அதிகாரிகள் யாரும் வரவில்லை. இதனால் மாட்டு வண்டி தொழிலாளர்கள் தொடர்ந்து போராட்டத்தில் ஈடுபட்டு வருகின்றனர்.

காரையூர்:

காரையூர் அருகே உள்ள கீழத்தானியம் ஆற்றுப்பகுதியில் அனுதியின்றி மணல் அள்ளப்படுவதாக வருவாய்த்துறையினருக்கு தகவல் வந்தது. அதன்பேரில் பொன்னமராவதி தாசில்தார் பாலகிருஷ்ணன், காரையூர் வருவாய் ஆய்வாளர் சாதிக் பாட்சா மற்றும் அதிகாரிகள் கீழத்தானியம் ஆற்றுப்பகுதிகளில் ஆய்வுகள் மேற்கொண்டனர்.

அப்போது சூரப்பட்டியில் அந்த வழியாக வந்த 2 டிராக்டர்களை நிறுத்தி அதிகாரிகள் சோதனை செய்தனர். அப்போது அதில் அனுமதியின்றி மணல் அள்ளி வந்தது தெரியவந்தது. இதையடுத்து அந்த 2 டிராக்டர்களையும் பறிமுதல் செய்து காரையூர் போலீஸ் நிலையத்தில் ஒப்படைத்தனர். 

உடையார்பாளையம்:

உடையார்பாளையம் போலீஸ் சப்-இன்ஸ்பெக்டர் ரவி தலைமையில் போலீசார் தத்தனூர் மாந்தோப்பு பகுதியில் ரோந்து சென்றனர். அப்போது அந்த வழியாக வந்த லாரியை நிறுத்தி போலீசார் சோதனை செய்தனர். அதில், அதே பகுதியில் உள்ள ஓடையில் இருந்து அரசு அனுமதியின்றி மணல் அள்ளி வந்தது கண்டுபிடிக்கப்பட்டது. இது தொடர்பாக போலீசார் வழக்குப்பதிவு செய்து வெண்மான்கொண்டான் கிராமத்தை சேர்ந்த டிரைவர் அன்பழகனை (வயது 40) கைது செய்தனர். மேலும் லாரியை பறிமுதல் செய்தனர். 

விளாத்திகுளம்:

விளாத்திகுளம் தாசில்தார் லெனின் தலைமையிலான அதிகாரிகள் குழுவினர் நேற்று அதிகாலை தூத்துக்குடி- மதுரை நான்கு வழிச்சாலையில் மெட்டில்பட்டி கிராமம் அருகே வாகன தணிக்கையில் ஈடுபட்டிருந்தனர். அப்போது அந்த வழியாக மணல் அள்ளி வந்த 2 லாரிகளை மடக்கி பிடித்தனர்.

விசாரணையில், உரிய ஆவணங்கள் இல்லாததும், திருச்சியில் இருந்து தூத்துக்குடிக்கு மணல் கடத்தி வந்ததும் தெரியவந்தது. இதையடுத்து 2 லாரிகளையும் அதிகாரிகள் பறிமுதல் செய்து, மாசார்பட்டி போலீஸ் நிலையத்துக்கு கொண்டு சென்றனர்.

அருப்புக்கோட்டை:

திருட்டு மணல் தடுப்பு சிறப்பு குழுவில் இடம் பெற்றுள்ள முத்திரைத்தாள் துறை அலுவலர் காசிசெல்வி, காரியாபட்டி தாசில்தார் முத்துகிருஷ்ணன் ஆகியோர் அருப்புக்கோட்டையில் ராமசாமிபுரம் 4 வழிச்சாலையில் வாகன சோதனையில் ஈடுபட்டனர். அப்போது திருச்சுழி பகுதியில் இருந்து போலி அனுமதி சீட்டுடன் மணல் அள்ளி வந்த 3 லாரிகள் சிக்கின. அதனை பறிமுதல் செய்து டவுன் போலீஸ் நிலையத்துக்கு கொண்டு சென்றனர்.

இதுதொடர்பாக லாரி டிரைவர்களான ராஜபாளையம் சத்திரப்பட்டியை சேர்ந்த மோகன், சாமிநாதன், வேல்முருகன் ஆகியோரிடம் விசாரணை நடந்து வருகிறது.