நீங்கள் தேடியது "நாராயணசாமி"

மதுரை:

மதுரை வந்த புதுச்சேரி முதல்வர் நாராயணசாமி மதுரை மீனாட்சி அம்மன் கோவிலில் இன்று தரிசனம் செய்தார். பின்னர் அவர் நிருபர்களிடம் கூறியதாவது:-

தமிழகம் மற்றும் புதுச்சேரியில் மோடி ஆட்சி அவலம் குறித்து பிரசாரம் செய்துள்ளோம். தேர்தல் முடிவுகள் தி.மு.க.- காங்கிரஸ் கூட்டணிக்கு சாதகமாக இருக்கும்.

தமிழகத்தில் மு.க.ஸ்டாலின் தலைமையிலும், மத்தியில் ராகுல்காந்தி தலைமையிலும் விரைவில் புதிய ஆட்சி மலரும்.

தமிழகத்தில் நடந்து முடிந்த 18 சட்டமன்ற தொகுதி இடைத்தேர்தல், புதுவை தட்டாஞ்சாவடி சட்டமன்ற இடைத்தேர்தலிலும் தி.மு.க. வெற்றி பெறும்.

தமிழகத்தை மோடி புறக்கணித்து வருகிறார். தமிழக அரசு கஜா புயல் நிதியாக ரூ.15 ஆயிரம் கோடி நிதி கேட்டது. ஆனால் மத்திய அரசு ரூ.500 கோடி மட்டுமே கொடுத்தது.

தமிழகத்தின் வளர்ச்சி பாதிக்கப்பட்டுள்ளது. தமிழகம், புதுவையில் பானி புயல் கரையை கடக்கும் என அறிவிக்கப்பட்டுள்ளது. அதனை எதிர்கொள்ள புதுவை அரசு தயாராக உள்ளது.

டி.டி.வி.தினகரனின் ஆதரவு எம்.எல்.ஏ.க்கள் 3 பேரை தகுதி நீக்கம் செய்வதன் மூலம் ஆளுங்கட்சிக்கு தோல்வி பயம் வந்துள்ளது. எதிர்க்கட்சியின் பலத்தை உடைக்க அ.தி.மு.க. அரசு இந்த நடவடிக்கையை எடுத்துள்ளது. ஜனநாயக நாட்டில் சபாநாயகரின் இந்த செயல் எல்லை மீறியது.

18 எம்.எல்.ஏ.க்களை தகுதி நீக்கம் செய்தது ஜனநாயக படுகொலையாகும். சபாநாயகர் தன்னிச்சையாக செயல்பட்டு வருகிறார். பிரதமர் மோடி தென் மாநிலங்களை புறக்கணித்ததால் தான் ராகுல் காந்தி வயநாட்டில் போட்டியிடுகிறார்.

வடமாநிலங்களில் காங்கிரஸ் கட்சியின் செல்வாக்கு அதிகரித்து உள்ளது என்பதை சில மாதங்களுக்கு முன்பு நடந்த 5 மாநிலங்களின் சட்டமன்ற தேர்தல் முடிவுகள் காட்டுகிறது.

இவ்வாறு அவர் கூறினார்.

பேட்டியின் போது மாநில பொதுக்குழு உறுப்பினர் பி.ஜே.காமராஜ், செய்யது பாபு மற்றும் கட்சி நிர்வாகிகள் உடன் இருந்தனர். #narayanasamy #mkstalin #rahulgandhi

புதுச்சேரி:

வங்கக்கடலில் குறைந்த காற்றழுத்த தாழ்வு மண்டலம் உருவாகி உள்ளது. இந்த தாழ்வு மண்டலம் 2 நாட்களில் புயலாக மாறி புதுவை, தமிழக கடலோரத்தில் கரையை கடக்கும் என வானிலை மையம் எச்சரிக்கை விடுத்துள்ளது.

இந்த புயலுக்கு பாணி என பெயர் சூட்டப்பட்டுள்ளது. புயலின் காரணமாக கடல் சீற்றமாக காணப்படும். இன்று முதல் கடலில் 40 முதல் 55 கி.மீட்டர் வரை காற்று வீசும் என்பதால் மீனவர்கள் கடலுக்கு செல்ல வேண்டாம் என அறிவுறுத்தப்பட்டுள்ளது.

இதனால் மீனவர்கள் யாரும் கடலுக்கு மீன்பிடிக்க செல்லவில்லை. புயலின் காரணமாக தமிழகம், புதுவைக்கு உச்சக்கட்ட பாதிப்பு ஏற்படும் என ரெட் அலர்ட் எச்சரிக்கை விடுக்கப்பட்டுள்ளது.

புயலை எதிர்கொள்ள முன்னெச்சரிக்கை நடவடிக்கைகள் குறித்து தலைமை செயலகத்தில் உள்ள கருத்தரங்கு அறையில் முதல்-அமைச்சர் நாராயணசாமி தலைமையில் ஆலோசனை கூட்டம் நடந்தது.

இந்த கூட்டத்தில் அமைச்சர்கள் நமச்சிவாயம், ஷாஜகான், கந்தசாமி, கமலக்கண்ணன், தலைமை செயலாளர் அஸ்வினிகுமார் மற்றும் துறை செயலர்கள், அதிகாரிகள் கலந்து கொண்டனர்.

கூட்டத்துக்கு பின் முதல்- அமைச்சர் நாராயணசாமி நிருபர்களிடம் கூறியதாவது:-

வருகிற 29, 30-ந்தேதி, மே 1-ந் தேதி வடகிழக்கு பகுதியில் பாணி என்ற புயல் அடிக்க ஆரம்பித்து புதுவை, தமிழக கடலோரத்தில் வடக்கு பகுதியில் 90 முதல் 100 கி.மீ. வேகத்தில் காற்று வீசும்.

புதுவையில் 20 செ.மீ. வரை மழை பொழியும் என வானிலை மையம் தெரிவித்துள்ளது. உச்சகட்டமான புயல் என்பதால் ரெட் அலர்ட் எச்சரிக்கையும் அறிவித்துள்ளனர்.

ஏற்கனவே தலைமை செயலாளர், மாவட்ட கலெக்டர் ஆகியோர் அதிகாரிகளை அழைத்து பேசி புயலை எதிர்கொள்ளவது குறித்து கூட்டம் நடத்தி உள்ளனர்.

தற்போது நானும், அமைச்சர்களும் அதிகாரிகள் எந்தெந்த நிலையில் தயாராக உள்ளார்கள் என்பதை அறிந்துகொள்ள கூட்டம் நடத்தி உள்ளோம். புயல் அடிக்கும் சமயத்தில் தாழ்வான பகுதியில் உள்ள மக்களை பாதுகாப்பான இடத்திற்கு கொண்டு செல்வது, அவர்களுக்கு குடிநீர், உணவுக்கு ஏற்பாடு செய்து குடிசை வீடுகள் பாதிக்கப்படாமல் இருக்க எடுக்க வேண்டிய ஏற்பாடுகள்,

மீனவர்கள் கடலுக்கு செல்லாமல் இருக்க எச்சரிக்கை அறிவிப்பு செய்வது, புயல் வரும் போது மின்சாரம் தடை பட்டால் மின்கம்பிகள் அறுந்து விழாமல் தடுக்கவும், அறுந்து விழும் பகுதியில் மின்சாரத்தை தடை செய்யவும் ஏற்பாடுகள் குறித்து விவாதிக்கப்பட்டது.

பொதுப்பணித்துறை தாழ்வான பகுதியில் தண்ணீரை அகற்றுவது. உள்ளாட்சித்துறை தேங்கிய நீரை வெளியேற்றுவது. வருவாய்த்துறை சார்பில் நிவாரண உதவிகளை செய்வது. உயிர் சேதம் இல்லாமல் பார்த்துக் கொள்வது.

மரங்கள் பெயர்ந்து விழுந்தால் அவற்றை அகற்றுவது, விவசாயம் பாதிக்கப்பட்டால் அவர்களுக்கு நிவாரணம் வழங்குவது குறித்து கூட்டத்தில் கலந்து ஆலோசிக்கப்பட்டது.

பொதுப்பணித்துறை அமைச்சர் நமச்சிவாயம் இன்று மாலை துறை அதிகாரிகளை அழைத்து ஆலோசனை நடத்த உள்ளார். பேரிடர் மேலாண்மைத்துறை அமைச்சர் ஷாஜகான் நாளை காலை துறை அதிகாரிகளை அழைத்து கூட்டம் நடத்த உள்ளார்.

பொதுப்பணி, உள்ளாட்சி, மின்துறை உள்ளிட்ட அரசு துறைகளில் கட்டுப்பாட்டு அறைகள் திறக்கப்பட்டு அதிகாரிகள் களப்பணியில் ஈடுபட வேண்டும் என வலியுறுத்தி உள்ளோம்.

கஜா புயல் வந்தபோது மாவட்ட கலெக்டர் கேசவன் தலைமையில் அதிகாரிகள் சிறப்பாக பணியாற்றினர். இதில் பெற்ற அனுபவத்தை கொண்டு புதுவையில் பாணி புயல் வரும்போது அதை எதிர்கொள்ள அதிகாரிகள் தயாராக இருப்பார்கள்.

நானும், அமைச்சர்களும் களப்பணியில் இறங்கி மக்களுக்கு உதவி செய்ய தயாராக உள்ளோம். அனைவரும் ஒரு அணியாக நின்று பாணி புயலை எதிர் கொள்ள புதுவை அரசு தயாராக உள்ளது.

இவ்வாறு அவர் கூறினார். #narayanasamy #CycloneFani #imd

புதுச்சேரி:

புதுவை பாராளுமன்ற தொகுதி என்ஆர்.காங்கிரஸ் வேட்பாளர் நாராயணசாமியை ஆதரித்து உப்பளம் தொகுதியில் அ.தி.மு.க. சட்டமன்ற கட்சி தலைவர் அன்பழகன் எம்.எல்.ஏ. வீதி, வீதியாக, வீடு, வீடாக சென்று வாக்கு சேகரித்து வருகிறார்.

உப்பளம் நேதாஜி நகர் 2 பகுதியில் தேசமுத்துமாரியம்மன் கோவில் அருகில் இருந்து இன்று அன்பழகன் பிரசாரத்தை தொடங்கினார். வீடு, வீடாக சென்று நோட்டீஸ் கொடுத்த என்.ஆர்.காங்கிரஸ் வேட்பாளர் டாக்டர் நாராயணசாமிக்கு ஜக்கு சின்னத்தில் வாக்களிக்கும்படி கேட்டுக்கொண்டார். முன்னதாக வில்லியனூரில் நடந்த பிரசாரத்தில் அன்பழகன் எம்.எல்.ஏ. பேசியதாவது:-

எனது தரம் பற்றி முதல்- அமைச்சர் நாராயணசாமி பேசியுள்ளார். தேர்தல் அறிவிப்பு வெளியான நாளில் இருந்து முதல்-அமைச்சரின் பேச்சு அநாகரீகத்தின் உச்சத்தில் உள்ளது. எங்களை சகட்டுமேனிக்கு வசை பாடியதோடு, அ.தி. மு.க.வினருக்கு சூடு, சொரணை இல்லையா? என கேட்டு அம்மா பேசிய வீடியோவை காண்பித்தார்.

பின்னர் தேர்தலில் வெற்றி பெற்றவுடன் புதுவையில் உள்ள பேயை ஓட, ஓட விரட்டி அடிப்பேன் என கவர்னரை வசைபாடினார். தேர்தலுக்குப்பிறகு ஆட்சி மாற்றம் என்ற மக்கள் எண்ணத்தை கூறினால் எங்களை உள்ளே பிடித்து போடுவேன் என அதிகார மமதையில் மிரட்டினார். முன்னாள் முதல்-அமைச்சர் என்று பாராமல் ரங்கசாமி பதவி வெறி பிடித்து அலைகிறார் என கூறியதொல்லாம் தரம் உயர்ந்த வார்த்தைகளா? எங்களை உள்ளே பிடித்து போடுவோம் என்று கூறியவருக்கு, எங்கள் கட்சித்தலைமை நினைத்தால் நீங்கள் கோட்டக்குப்பம் தாண்ட முடியாது என உங்கள் பாணியில் பதில் கூறியதில் என்ன தவறு இருக்கிறது? நான் ஒரு சாதராண எம்.எல்.ஏ. நீங்கள் மாநில முதல்-அமைச்சர்.

கடந்த 3 ஆண்டு ஆட்சியில் உங்கள் சட்டமன்ற மற்றும் பொது இடத்தின் பேச்சுகளை நீங்களே சீர்தூக்கி பாருங்கள். நம் இருவரில் உங்கள் தரம் என்ன என்பது உங்களுக்கே புரியும். முதல்அமைச்சருக்கு பேச்சில் நாகரீகமும், பண்பும் இருக்க வேண்டும்.

மோடி படத்தை ஏன் போடவில்லை? மோடிதான் பிரதமர் என ஏன் கூறவில்லை? என நமச்சிவாயம் கேட்கிறார். மோடி படத்தை நாங்கள் போடவில்லையா? இந்த நாட்டை உலக நாடுகள் வரிசையில் தலை நிமிர வைக்கவும் எல்லை தாண்டிய பயங்கரவாதம், தீவிரவாதத்தை தடுத்து நிறுத்த மோடியால் மட்டுமே முடியும்.

தமிழக முதல்-அமைச்சரும், புதுவை மக்கள் முதல்வர் ரங்கசாமியும் தொடர்ந்து மோடியை பற்றி பேசி வருவது உங்களுக்கு கேட்கவில்லையா? நீங்கள் ஏன் முதல்-அமைச்சருடன் பிரசாரத்துக்கு செல்லாமல் தனியாக வாக்கு சேகரிக்க செல்கிறீர்கள்? நாராயணசாமி வந்தால் ஓட்டு விழாது என்பதுதான் காரணமா? இவை அனைத்தையும் மக்கள் புரிந்துகொண்டு என்ஆர்.காங்கிரஸ் வேட்பாளர் இளைஞர் டாக்டர் நாராயணசாமிக்கு ஜக்கு சின்னத்தில் வாக்களிக்க வேண்டும்.

இவ்வாறு அவர் பேசினார்.

புதுச்சேரி:

புதுவை பாராளுமன்ற தொகுதி காங்கிரஸ் வேட்பாளர் வைத்திலிங்கத்தை ஆதரித்து கதிர்காமம் தொகுதியில் முதல்-அமைச்சர் நாராயணசாமி இன்று திறந்த ஜீப்பில் வீதி, வீதியாக சென்று வாக்கு சேகரித்தார்.

கதிர்காமம் கதிர்வேல் சுவாமி கோவிலில் இருந்து பிரச்சாரத்தை தொடங்கினார். பிரச்சாரத்தின்போது முதல்-அமைச்சர் நாராயணசாமி பேசியதாவது:-

மத்தியில் ஆளும் நரேந்திர மோடி ஆட்சியில் மக்களுக்கு எந்த பயனும் கிடைக்கவில்லை. அவர் மக்களுக்கு கொடுத்த வாக்குறுதிகள் நிறைவேற்றப்படவில்லை. வேலை வாய்ப்புகள் இல்லை. விலைவாசி குறைக்கவில்லை. தொழிற்சாலைகள் கொண்டு வருவேன், விவசாயத்தை மேம்படுத்துவேன், அரசு ஊழியர் சம்பளம் உயர்த்துவேன் என மோடி கூறினார். இதில் ஒன்றைக்கூட அவர் நிறைவேற்றவில்லை.

பா.ஜனதாவின் பண மதிப்பிழப்பு நடவடிக்கையால் நாட்டின் பொருளாதாரம் சீர்குலைந்து விட்டது.

காங்கிரஸ் வேட்பாளர் வைத்திலிங்கம் பொது, அரசியல் வாழ்க்கையில் அனுபவம் பெற்றவர். எதிர்கட்சி வேட்பாளருக்கு என்ன அனுபவம் உள்ளது? பணம் இருப்பது மட்டும்தான் அனுபவம். பணம் இருந்தால் என்.ஆர்.காங்கிரசில் சீட் கிடைக்கும். பணம் இல்லாவிட்டால் உழைப்பவர்களுக்கும் சீட் கிடைக்காது. பணம் மட்டும்தான் அவரிடம் உள்ளது. ரங்கசாமி பண அரசியல் செய்கிறார்.

ஆனால் காங்கிரஸ் கட்சியில் பணிபுரிந்து மக்களுக்கு சேவை செய்த வைத்திலிங்கத்தை வேட்பாளராக நிறுத்தியுள்ளது. அவர் வெற்றி பெற்றால் மத்திய அரசிடம் கேட்டு புதுவைக்கு பல புதிய திட்டங்களை கொண்டு வருவார்.

இவ்வாறு அவர் பேசினார்.

பிரச்சாரத்தின்போது துணைத்தலைவர் பெத்த பெருமாள், காங்கிரஸ் சிறப்பு அழைப்பாளர் கே.எஸ்.பி. ரமேஷ், தி.மு.க. தங்கவேலு, இந்தியகம்யூனிஸ்டு நாரா.கலைநாதன், மார்க்சிஸ்டு மாநில செயலாளர் ராஜாங்கம், மதி.மு.க. கபிரியேல் ராஷ்ட்ரிய ஜனதா தளம் சஞ்சீவி மற்றும் கூட்டணி கட்சி தலைவர்கள் உடனிருந்தனர்.

புதுச்சேரி:

புதுவை பாராளுமன்ற தொகுதியில் தி.மு.க. கூட்டணியில் காங்கிரஸ் போட்டியிடுகிறது. காங்கிரஸ் வேட்பாளராக சபாநாயகர் வைத்திலிங்கம் போட்டியிடுகிறார்.

இதற்கான அறிவிப்பை காங்கிரஸ் மேலிடம் முறைப்படி அறிவிக்கா விட்டாலும் வைத்திலிங்கம் சபாநாயகர் பதவியை ராஜினாமா செய்து விட்டு தேர்தல் களத்தில் இறங்கி உள்ளார்.

அவர் கூட்டணி கட்சி தலைவர்களை சந்தித்து ஆதரவு திரட்டி வருகிறார். மேலும் வேட்பு மனுவை இன்று தாக்கல் செய்தார்.

அ.தி.மு.க. கூட்டணியில் புதுவை பாராளுமன்ற தொகுதி என்.ஆர். காங்கிரசுக்கு ஒதுக்கப்பட்டது.

என்.ஆர். காங்கிரஸ் வேட்பாளராக முன்னாள் எம்.எல்.ஏ. கேசவனின் மகன் டாக்டர் நாராயணசாமி போட்டியிடுவார் என்ற தகவல் வெளியாகி இருந்தது, ஆனால், அதிகாரப்பூர்வமாக அறிவிப்பு வெளியிடப்படவில்லை.

இந்த நிலையில் என்.ஆர். காங்கிரஸ், அ.தி.மு.க., பாரதிய ஜனதா, பா.ம.க., தே.மு.தி.க. உள்ளிட்ட கூட்டணி கட்சிகளின் கூட்டம் இன்று காலை ஓட்டல் அண்ணாமலையில் நடந்தது.

இந்த கூட்டத்தில் என்.ஆர். காங்கிரஸ் வேட்பாளராக டாக்டர் நாராயணசாமியை என்.ஆர். காங்கிரஸ் தலைவரும், புதுவை முன்னாள் முதல்- அமைச்சருமான ரங்கசாமி அறிமுகப்படுத்தினார். அவருக்கு கூட்டணி கட்சி தலைவர்கள் சால்வை அணிவித்து வாழ்த்து தெரிவித்தனர்.

இதை தொடர்ந்து டாக்டர் நாராயணசாமி புதுவை வழுதாவூர் சாலையில் உள்ள மாவட்ட கலெக்டர் அலுவலகத்துக்கு வந்தார். அங்கு என்.ஆர். காங்கிரஸ் தலைவர் ரங்கசாமி முன்னிலையில் மாவட்ட தேர்தல் அதிகாரி அருணிடம் டாக்டர் நாராயணசாமி வேட்பு மனுவை தாக்கல் செய்தார். #Parliamentelection

புதுச்சேரி:

புதுவை கவர்னர் கிரண்பேடி நாள்தோறும் டுவிட்டர் வலைதளத்தில் சமூக கருத்துகளை பதிவிடுவது வாடிக்கை. இதேபோல கவர்னர் கிரண்பேடி டுவிட்டர் பக்கத்தில், ஜனநாயக கடமையில் ஓட்டளிப்பது முக்கியமான ஒன்று. இது நாட்டின் குடிமகன்கள் அனைவரின் கடமை. ஒவ்வொரு இந்தியனும் உலகிலேயே மிகப்பெரிய ஜனநாயக உரிமையை நிலைநாட்டும் இந்த கடமையை செய்ய வேண்டும் என பதிவிட்டிருந்தார்.

இந்த பதிவை பிரதமர் மோடிக்கும் ஹேஷ்டாக் செய்திருந்தார். கிரண்பேடியின் பதிவை குறிப்பிட்டு பிரதமர் மோடி டுவிட்டர் பக்கத்தில், மக்களின் குரலை வெளிப்படுத்துவதுதான் ஓட்டு. வாக்களிப்பது பற்றிய விழிப்புணர்வை முக்கிய பிரமுகர்கள் விரிவுபடுத்த வேண்டும். உங்கள் குரலை ஓங்கி ஒலியுங்கள் என குறிப்பிட்டிருந்தார்.

இதற்கு கண்டனம் தெரிவித்துள்ள புதுவை முதல்வர் நாராயணசாமியும் டுவிட்டரில் தனது கருத்தை பதிவிட்டுள்ளார்.

அந்த பதிவில், கிரண்பேடி பிரதமர் யார்? பா.ஜனதா பிரதமர் யார்? என்பதை அறிந்துகொள்ள வேண்டும். டுவிட்டர் பதிவுகளை வெளியிடும்போது கவனம் வேண்டும். ஒரு அரசு பதவியில் இருந்துகொண்டு அரசியல் செய்யக்கூடாது. உங்களின் தலைவர் பிரதமர். பா.ஜனதா பிரதமர் வேட்பாளர் அல்ல. இது தேர்தல் நடத்தை விதிமுறைகளை மீறியது ஆகாதா? என குறிப்பிட்டுள்ளார். #Narayanasamy #kiranbedi

புதுச்சேரி:

முதல்-அமைச்சர் நாராயணசாமி இன்று நிருபர்களுக்கு பேட்டி அளித்த போது, அவரிடம் கேட்ட கேள்விகளும், அதற்கு அவர் அளித்த பதில்களும் வருமாறு:-

கேள்வி: தலைமை தேர்தல் அதிகாரியை மாற்றும்படி அ.தி.மு.க., தி.மு.க. கட்சிகள் வலியுறுத்தி வருகிறதே?

பதில்:- யார் தேர்தல் ஆணையராக இருந்தாலும் எங்களுக்கு கவலையில்லை. தேர்தல் ஆணையம்தான் விதிமுறைகளை கடைபிடிக்க வேண்டும்.

கே:- நாளை முதல் பிளாஸ்டிக் தடை அமலுக்கு வருமா?

ப:- இதுதொடர்பாக சம்பந்தப்பட்ட அமைச்சரிடம் கேள்வி கேளுங்கள்.

கே:- கட்சிதலைமை அறிவுறுத்தினால் பாராளு மன்ற தேர்தலில் போட்டியிடுவீர்களா?

ப:- கட்சித்தலைமை என்ன சொன்னாலும் செய்வேன். இதன்பிறகு தேர்தல் அரசியல் தேவையா? இனிமேல் இளைஞர்களுக்கு வழிவிட வேண்டியதுதான். எனக்கு தனிப்பட்ட எந்த விருப்பமும், வெறுப்பும் கிடையாது. நான் ஒரு சாமியார்.

இவ்வாறு அவர் கூறினார். #narayanasamy #congress #parliamentelection

புதுச்சேரி:

புதுவை அரசின் மகளிர் மற்றும் மேம்பாட்டுத்துறை மூலம் முதியோர், விதவை, கணவரால் கைவிடப்பட்டோருக்கு மாத ஓய்வூதிய தொகை வழங்கப்பட்டு வருகிறது.

நெல்லித்தோப்பு தொகுதியில் புதிதாக 295 பேருக்கு முதியோர், விதவை உதவித்தொகை அளிக்கப்பட உள்ளது. இதற்கான பயனாளிகளுக்கு ஓய்வூதிய அட்டை மற்றும் முதல் மாத உதவித்தொகை வழங்கும் விழா கீர்த்தி மகாலில் நடந்தது. விழாவுக்கு அமைச்சர் கந்தசாமி தலைமை தாங்கினார். முதல்அமைச்சர் நாராயணசாமி பயனாளிகளுக்கு உதவித் தொகையை வழங்கி பேசினார். அவர் பேசியதாவது:-

நான் 29 தொகுதியை ஒரு கண்ணாகவும், நெல்லித் தோப்பு தொகுதியை ஒரு கண்ணாகவும் பாவிப்பேன் என கூறியிருந்தேன். அதன்படி ஒரு கண்ணாக நெல்லித்தோப்பை பார்க்கிறேன். திட்டங்கள் அனைத்தையும் போராடி பெற வேண்டிய நிலையில் அரசு உள்ளது.

முதியோர் பென்‌ஷனையே 2 ஆண்டுக்கு பிறகு புதிதாக தற்போதுதான் வழங்குகிறோம். அதையும் நெல்லித்தோப்பு தொகுதியில்தான் தொடங்கி உள்ளோம். இலவச அரிசி, சென்டாக் கல்வி உதவித்தொகை, மாற்றுத் திறனாளிகளுக்கு நிதி என பல திட்டங்கள் வழங்க வேண்டிய நிலை உள்ளது.

கவர்னருக்கு எதிராக இரவு- பகலாக பனியில் போராடியதன் விளைவாகத்தான் இதற்கு அனுமதி கிடைத்தது. இன்னும் 2 மாதம் பொறுத்திருங்கள்.

இந்த நிலைமை மாறும். போராட்டத்திற்கு பிரதிபலனாக எங்களோடு மக்கள் கைகொடுக்க வேண்டும்.

இவ்வாறு அவர் பேசினார்.

விழாவில் டெல்லி பிரதிநிதி ஜான்குமார், வட்டார காங்கிரஸ் தலைவர் பழனி, மகளிர் மற்றும் குழந்தைகள் மேம்பாட்டுத்துறை இயக்குனர் யஷ்வந்தையா மற்றும் அதிகாரிகள் பலர் கலந்து கொண்டனர். #narayanasamy #congress #kiranbedi