நீங்கள் தேடியது "சோகம்"

திண்டிவனம்:

திண்டிவனம் அருகே உள்ள சேந்தமங்கலம் பகுதியை சேர்ந்தவர் குமார் (வயது 40). இவருடைய மனைவி முருகவேணி (30). இந்த தம்பதிக்கு 3 மகன்கள் உள்ளனர். முதல் மகன் திண்டிவனம் அருகே உள்ள ஆரணியில் பள்ளி விடுதியில் தங்கி படித்து வருகிறார்.

2-வது மகன் பிரசாந்த் (11). இவர் ஆவனிப்பூர் பகுதியில் உள்ள அரசு பள்ளியில் 6-ம் வகுப்பு படித்து வந்தார். 3-வது மகன் பிரதாப் (9). சேந்தமங்கலம் அரசு பள்ளியில் 4-ம் வகுப்பு படித்து வந்தார்.

இந்த நிலையில் குமார் சென்னையில் தங்கி கூலிதொழிலாளியாக வேலை பார்த்து வருகிறார். இதனால் முருகவேணி தன் மகன்களான பிரசாந்த் மற்றும் பிரதாப் ஆகியோருடன் சேந்தமங்கலத்தில் வசித்து வருகிறார்.

முருகவேணி வயல்வேலைக்கு செல்வது வழக்கம். இதனால் நேற்று வழக்கம் போல் வயல்வேலைக்கு சென்றார். அப்போது தன்னுடைய 2 மகன்களையும் அழைத்து கொண்டு சென்றார்.

வயலுக்கு சென்ற பின் மாடுகளை பார்த்து கொள்ளுங்கள் என்று மகன்களிடம் கூறிவிட்டு வயலில் இறங்கி வேலை செய்வதற்கு முருகவேணி சென்றுவிட்டதாக கூறப்படுகிறது.

பின்னர் வேலை முடிந்து திரும்பி வந்தபோது பிரசாந்த் மற்றும் பிரதாப் ஆகியோரை காணவில்லை. மாடுகள் மட்டும் தனியாக மேய்ந்து கொண்டிருந்தது. இதை பார்த்து முருகவேணி அதிர்ச்சியடைந்தார். உடனே இது குறித்து கணவர் குமாருக்கு தகவல் கொடுத்தார். குமாரும் சேந்தமங்கலம் விரைந்து வந்து மனைவியுடன் சேர்ந்து மகன்களை தேடி பார்த்தார்.

ஆனால் 2 பேரும் எங்கு சென்றார்கள் என்று தெரியவில்லை. இதைத் தொடர்ந்து ஒலக்கூர் போலீசில் தகவல் கொடுக்கப்பட்டது. அதன்பேரில் போலீசாரும் விசாரணை நடத்தி வந்தனர்.

இந்த நிலையில் இன்று காலை சேந்தமங்கலம் பகுதியில் உள்ள ஏரியில் அண்ணன் தம்பியான பிரசாந்த், பிரதாப் ஆகியோர் பிணமாக மிதந்தனர்.

இதை அந்த வழியாக சென்றவர்கள் பார்த்து அதிர்ச்சியடைந்தனர். பின்னர் இது குறித்து குமாருக்கும், போலீசாருக்கும் தகவல் கொடுத்தனர். போலீசார் சம்பவ இடத்திற்கு விரைந்து வந்து 2 பேரின் உடல்களையும் ஏரியில் இருந்து மீட்டனர்.

மேலும் குமாரும், முருகவேணியும் மகன்கள் இறந்து கிடப்பதை பார்த்து கதறி அழுதனர். ஒரே சமயத்தில் 2 மகன்களையும் பறிகொடுத்து விட்டேனே என்று கண்ணீர் விட்டனர். உடனே அக்கம் பக்கத்தினர் அவர்களுக்கு ஆறுதல் கூறினர். இதைத் தொடர்ந்து பிரசாந்த் மற்றும் பிரதாப் ஆகியோர் உடல் பிரேத பரிசோதனைக்காக முண்டியம்பாக்கம் அரசு மருத்துவமனைக்கு அனுப்பி வைக்கப்பட்டது.

ஏரியில் குளிக்க சென்றபோது 2 பேரும் கால் தவறி உள்ளே விழுந்து நீரில் மூழ்கி இறந்திருக்கலாம் என்று தெரிகிறது. மேலும் இது குறித்து போலீசார் விசாரணை நடத்தி வருகின்றனர்.

ஏரியில் மூழ்கி அண்ணன் - தம்பி பலியான சம்பவம் அப்பகுதியில் சோகத்தை ஏற்படுத்தி உள்ளது. 

மதுரை:

மதுரை கே.புதூர் லூர்து நகர் 8-வது தெருவைச் சேர்ந்தவர் ராஜா. இவரது மனைவி தங்கம் (வயது 36). இவர்களது மகள் ரோகிணி (17). இவர் அதே பகுதியில் உள்ள தனியார் பள்ளியில் பிளஸ்-2 படித்து வந்தார்.

நேற்று விடுமுறை தினம் என்பதால் ரோகிணி காலையில் அதிக நேரம் தூங்கிக் கொண்டிருந்தார். இதனை அவரது தாயார் தங்கம் கண்டித்ததாக தெரிகிறது.

இதனால் விரக்தியுடன் காணப்பட்ட ரோகிணி மதியம் வீட்டில் யாரும் இல்லாத நேரத்தில் தனியறையில் தூக்குப்போட்டு தற்கொலை செய்து கொண்டார்.

இதை பார்த்த தங்கம் அதிர்ச்சி அடைந்தார். தான் கண்டித்ததால் மகள் தற்கொலை செய்து கொண்டாள் என்ற எண்ணத்தில் அவரும் உயிரை மாய்த்துக் கொள்ள முடிவு செய்தார்.

அதன்படி வீட்டில் இருந்த ஆசிட்டில் கண்ணாடி துகள்களை போட்டு குடித்தார். உயிருக்கு போராடிய அவரை அக்கம், பக்கத்தினர் மீட்டு மதுரை அரசு ஆஸ்பத்திரியில் சேர்த்தனர். ஆனால் அங்கு சிகிச்சை பலனின்றி தங்கம் பரிதாபமாக இறந்தார்.

இந்த சம்பவம் குறித்து கே.புதூர் போலீசார் வழக்குப்பதிவு செய்து விசாரணை நடத்தி வருகின்றனர்.

மகள் தற்கொலை செய்து கொண்டதால் தாயும் உயிரை மாய்த்துக் கொண்டது அந்தப்பகுதியில் சோகத்தை ஏற்படுத்தியது.

வேட்டவலம்:

திருவண்ணாமலை மாவட்டம் வேட்டவலம் அடுத்த சு.பொலக்குணம் கிராமத்தில் கிணறு ஆழப்படுத்தும் பணியில் கெங்கனந்தல் பகுதியைச் சேர்ந்த கூலி தொழிலாளிகள் சீத்தாராமன், தங்கராஜ், குமார் ஆகியோர் ஈடுபட்டனர். அப்போது ஏற்பட்ட வெடி விபத்தில் சீத்தாராமன் உள்பட 3 பேரும் சம்பவ இடத்திலேயே இறந்தனர்.

வெடி விபத்தில் சீத்தாராமன் இறந்ததால் அவருடைய தாய் சரோஜா (வயது 66) மனமுடைந்த நிலையில் இருந்து வந்தார். மனவேதனை தாங்க முடியாமல் வி‌ஷம் குடித்து வீட்டில் மயங்கி கிடந்தார்.

சரோஜாவை உறவினர்கள் மீட்டு திருவண்ணாமலை அரசு மருத்துவமனைக்கு கொண்டு சென்றனர். பின்னர் மேல் சிகிச்சைக்காக புதுச்சேரி மருத்துவமனைக்கு கொண்டு சென்றனர். ஆனால் அவர் வழியிலேயே பரிதாபமாக உயிரிழந்தார்.

இந்த சம்பவம் குறித்து வேட்டவலம் போலீசார் விசாரணை நடத்தி வருகின்றனர். ஏற்கனவே இறந்தவர்களின் சோகத்தை மறப்பதற்குள் சரோஜா வி‌ஷம் குடித்து தற்கொலை செய்து கொண்ட சம்பவம் கெங்கனந்தல் கிராம மக்களை பெரும் சோகத்தில் ஆழ்த்தியுள்ளது.