நீங்கள் தேடியது "மண்சரிவு"

ஏற்காடு:

சேலம் மாவட்டம் ஏற்காடு பகுதியில் நேற்று மாலை 5 மணி முதல் இன்று காலை 7 மணி வரை விடிய விடிய கனமழை பெய்தது.

இதன் காரணமாக ஏற்காடு சாலை பகுதியில் பல இடங்களில் மண் சரிவு ஏற்பட்டுள்ளது. மலை உச்சிகளில் இருந்து சிறிய சிறிய பாறைகள் பெயர்ந்து கொண்டை ஊசி வளைவுகளில் ஆங்காங்கே விழுந்துள்ளன.

ஏற்காடு அடிவாரத்தில் உள்ள குப்பனூர் செல்லும் சாலையிலும் மண் சரிந்துள்ளது. மழை நீர் ஏற்காடு அடிவாரம் பகுதியில் உள்ள விளைநிலங்களிலும் புகுந்தது. இதனால் பயிர்கள் மூழ்கி உள்ளது.

மேலும் மலைகளில் ஆங்காங்கே திடீர் நீருற்று ஏற்பட்டு, தண்ணீர் சாலைகளில் சேறும், சகதியுமாக பாய்ந்தோடுகின்றன. இதையடுத்து ஏற்காடு செல்லும் பாதைகளில் போக்குவரத்துக்கு தடை செய்யப்பட்டுள்ளது. இதனால் சுற்றுலா பயணிகள் ஏற்காடுட்டுக்கு செல்ல முடியாமலும், ஏற்காடு பகுதியில் இருந்து கீழே வர முடியாமலும் தவித்து வருகின்றனர்.

இதை அறிந்த மாவட்ட கலெக்டர் கார்மேகம், சாலையை சீரமைக்க போர்க்கால அடிப்படையில் நடவடிக்கை எடுக்குமாறு அதிகாரிகளுக்கு உத்தரவிட்டுள்ளார். இதனைத் தொடர்ந்து சாலையை சீரமைக்கும் பணியினை நெடுஞ்சாலைத்துறையினர் மேற்கொண்டு வருகின்றனர். இருப்பினும் தொடர்ந்து மழை பெய்து வருவதால் சாலையை சீரமைக்கும் பணி சிறிது கால தாமதமாகவே நடைபெற்று வருகிறது.

போலீசார், வருவாய்த் துறையினர், வனத்துறையினர் முகாமிட்டு மண் சரிவை அகற்றும் பணியில் ஈடுபட்டுள்ளனர். மின் ஊழியர்களும், மின் பாதையில் விழுந்த மரம், செடி, கொடிகளை அப்புறப்படுத்தி வருகின்றனர்.

ஏற்காடு பகுதியில் கடந்த சில வாரங்களுக்கு முன்பு பிரதான சாலையில் மண் சரிவு ஏற்பட்டது என்பது குறிப்பிடத்தக்கது.

மேட்டுப்பாளையம்:

கோவை மேட்டுப்பாளையத்தில் இருந்து பழமை வாய்ந்த யுனெஸ்கோ அந்தஸ்து பெற்ற மலை ரெயில் ஊட்டிக்கு இயக்கப்பட்டு வருகிறது. இதில் பயணம் செய்ய சுற்றுலா பயணிகள் அதிகம் ஆர்வம் காட்டி வருகிறார்கள்.

இந்நிலையில் கோவை, நீலகிரி மாவட்டங்களில் கடந்த சில நாட்களாக இரவு நேரங்களில் கனமழை பெய்து வருகிறது. இன்று காலை வழக்கம்போல் மேட்டுப்பாளையத்தில் இருந்து 7.10 மணிக்கு மலைரெயில் 150 பயணிகளுடன் புறப்பட்டது.

இதனிடையே கல்லாறு-அடர்லி ரெயில் நிலையங்களுக்கு இடையே 2 இடங்களில் தண்டவாளத்தில் மண்சரிவும், அடர்லி- ஹில்குரோவ் ரெயில் நிலையங்களுக்கு இடையே ஒரு இடத்திலும் மண்சரிவு ஏற்பட்டு ராட்சத மற்றும் பெரிய கற்கள் தண்டவாளத்தில் விழுந்துள்ளதாக தகவல் கிடைத்தது.

இதனையடுத்து கல்லாறு அருகே ரெயில் நிறுத்தப்பட்டது. மண்சரிவை சீரமைக்கும் பணியில் ரெயில்வே ஊழியர்கள் மின்னல் வேகத்தில் ஈடுபட்டனர். மேற்கண்ட 3 இடங்களிலும் தண்டவாளத்தில் விழுந்த ராட்சத பாறையை அகற்றினர்.

நடுவழியில் சுமார் 2.15 நிமிடம் மலை ரெயில் நின்றதால் பயணிகள் அவதியடைந்தனர். தண்டவாளம் முழுவதும் சீரமைக்கப்பட்டு 9.45 மணிக்கு ரெயில் புறப்பட்டுச்சென்றது. இதனால் பயணிகள் நிம்மதியடைந்தனர்.

ஊட்டி:

நீலகிரி மாவட்டம் ஊட்டி கோடப்பமந்து அம்பேத்கர் காலனியில் 100-க்கும் மேற்பட்ட குடும்பத்தினர் வசித்து வருகின்றனர். அப்பகுதி மக்கள் எளிதில் நடந்து செல்லும் வகையிலும், வீடுகள் பாதுகாப்பாக இருக்கும் வகையிலும் நகராட்சி மூலம் நடைபாதை, தடுப்புச்சுவர் உள்ளிட்ட வசதிகள் செய்து கொடுக்கப்பட்டு உள்ளன. ஊட்டியில் தென்மேற்கு பருவமழை தீவிரமாக பெய்து வருகிறது. இதனால் ஊட்டி-கூடலூர் சாலை, ஊட்டி-இத்தலார் சாலை போன்ற முக்கிய இடங்களில் மண் சரிவு ஏற்பட்டு உள்ளது. இந்த நிலையில் கோடப்பமந்து அம்பேத்கர் காலனியில் குடியிருப்பு பகுதிகளில் 4 இடங்களில் மண் சரிவு ஏற்பட்டு உள்ளது. இதனால் மேற்பகுதியில் உள்ள வீடுகள் அந்தரத்தில் தொங்கியபடி காட்சி அளிக் கிறது. அப்பகுதி வழியாக பொதுமக்கள் நடந்து செல்ல அச்சம் அடைந்து உள்ளனர். மேலும் மண்சரிவு ஏற்பட்ட பகுதியில் விரிசல்களும் காணப்படுகின்றன.

அதே பகுதியில் ராணி என்பவருக்கு சொந்தமான வீட்டின் பக்கவாட்டு சுவர் திடீரென மழைக்கு இடிந்து விழுந்தது. அப்போது வீட்டில் யாரும் இல்லாததால் உயிர் சேதம் ஏதும் ஏற்படவில்லை. தொடர் மழையால் ஊட்டி தாலுகாவுக்கு உட்பட்ட அனுமாபுரம், இந்திராநகர், ஊட்டி எல்க்ஹில், அம்பேத்கர் காலனியில் 2 வீடுகள், ஊட்டி எல்க்ஹில் குமரன் நகரில் 1 வீடு, நஞ்சநாடு கவர்னர்சோலையில் 1 வீடு, உல்லத்தில் 1 வீடு உள்பட கடந்த 4 நாட்களில் மொத்தம் 23 வீடுகள் சேதமடைந்து உள்ளன.

இதுகுறித்து தகவல் அறிந்த ஊட்டி வருவாய்த்துறையினர் சம்பவ இடத்திற்கு சென்று மழையால் சேதமடைந்த வீடுகளை பார்வையிட்டனர். சேதமடைந்த வீடுகளை சீரமைப்பதற்காக உடனடியாக ஒரு வீட்டிற்கு ரூ.4 ஆயிரத்து 100 உதவித்தொகையை வருவாய்த்துறை மூலம் வழங்கப்பட்டது. நேற்று முன்தினம் நள்ளிரவில் ஊட்டி அருகே தலைகுந்தா, ஊட்டி-மஞ்சூர் சாலை லவ்டேல் பகுதியில் இரண்டு மரங்கள் முறிந்து விழுந்தன. தகவல் அறிந்த தீயணைப்பு வீரர்கள் சம்பவ இடத்திற்கு சென்று மரத்தை வெட்டி அகற்றினார்கள்.