அம்மா எங்கே இருக்கிறாள்?

Published On 2023-05-17 12:14 GMT | Update On 2023-05-17 12:14 GMT

தமிழகத்தில் ஆயிரக்கணக்கான ஆலயங்கள் இருக்கின்றன. எல்லா ஆலயங்களிலும் புனிதனும், சக்தியும் இருக்கத் தான் செய்கின்றன.
மேல்மருவத்தூர் ஆலயம் மற்ற ஆலயங்களிலிருந்து பெரிதும் வேறுபடுகிறது. அதை மருவத்தூர் மண்ணை மிதித்து, மருவத்தூர் அன்னையை தொழுவார்கள் மனப்பூர்வமாக உணர்ந்துகொள்கிறார்கள்.

அம்மா, அம்மா என்று வினாடிக்கொரு முறை நினைத்து வழிபடுகிறோமே - அந்த அன்னை ஆதிபராசக்தி எங்கே இருக்கிறாள்? எந்தெந்த வடிவங்களில் இருக்கிறாள்? அந்த சக்தி தெய்வத்தின் நிதர்சனமான " திவ்ய " தரிசனம் எல்லோருக்கும் கிடைக்குமா? அந்தத் தரிசனம் எப்போது கிடைக்கும் ?- என்று மனிதமனம் சிந்தனை வலையைப் பின்னிய நேரத்தில் 10 பக்க கட்டுரை இயல்பாகக் கிடைத்தது.

மச்ச புராணத்தில் 108 சக்தித்தலங்களில் 108 வித , விதமான பெயர்களோடு வித, விதமான வெவ்வெறு வடிவங்களில் துடிப்போடு ஆதிபராசக்தி துலங்கி அருள் பாலிக்கிறாள் என்று நூல்களில் படித்து அறிகிறோம். அதில் 72- வது தலமான "சித்தவனம் -" என்பது தான் "மேல்மருவத்தூர்" என்று ஆன்மிக அறிஞர்கள் கூறுகிறார்கள்.

"அன்னை இல்லாத இடம் ஏது? அவள் தூணிலும் இருக்கிறாள் துரும்பிலும் இருக்கிறாள்!!" என்று படிக்காத பாமரன் பட்டென்று கூறிவிடுகிறான்.

எதையுமே ஆராய்ச்சி செய்து பார்க்கும் படித்த மேதாவிகள் தான் புராணங்களிலும், தத்துவங்களிலும் அன்னையைத் தேடுகிறார்கள்!

எது எப்படி இருப்பினும், பராசக்தியை தேடுகின்ற பக்தனின் முயற்சிகள் எல்லாமே பராசக்தியால் அங்கீகரிக்கப்பட்டவை தான்!