கபிஸ்தலம் அருகே பெட்ரோல் பங்கில் ஊழியர் தூக்குபோட்டு தற்கொலை

கபிஸ்தலம்:

தஞ்சை மாவட்டம் கபிஸ்தலம் அருகே உள்ள கணபதி அக்ரஹாரம் பகுதியில் ஒரு பெட்ரோல் பங்க் செயல்பட்டு வருகிறது. நேற்று இந்த பெட்ரோல் பங்கில் பெட்ரோல் இருப்பு இல்லாததால் அரியலூர் மாவட்டம் வெங்கனூர் வடக்கு தெருவை சேர்ந்த சொக்கலிங்கம் மகன் திருமூர்த்தி (வயது 25). என்பவர் மட்டும் பணியில் இருந்தார்.

அவர் நள்ளிரவு பெட்ரோல் பங்கில் உள்ள ஒரு அறையில் மின் விசிறியில் தூக்குபோட்டு தற்கொலை செய்து கொண்டார்.

இந்த நிலையில் இன்று காலை அந்த பெட்ரோல் பங்குக்கு சென்ற பொதுமக்கள் பங்க் ஊழியர் தூக்கில் பிணமாக தொங்குவதை கண்டு அதிர்ச்சி அடைந்தனர். இது பற்றி கபிஸ்தலம் போலீஸ் நிலையத்துக்கு தகவல் தெரிவித்தனர். அதன்பேரில் இன்ஸ்பெக்டர் ரமேஷ், சப்-இன்ஸ்பெக்டர் மோகன் ராஜ் மற்றும் போலீசார் சம்பவ இடத்துக்கு விரைந்து சென்று திருமூர்த்தி உடலை மீட்டு பிரேத பரிசோதனைக்கு அனுப்பி வைத்தனர்.

மேலும் இது தொடர்பாக வழக்குபதிவு செய்து திருமூர்த்தி எதற்காக தற்கொலை செய்து கொண்டார்? என்பது தொடர்பாக விசாரணை நடத்தி வருகின்றனர்.

இந்த சம்பவம் கணபதி அக்ரஹாரம் பகுதியில் பரபரப்பை ஏற்படுத்தியுள்ளது.