கருணாநிதி உடல்நிலை குறித்த வதந்திகளை நம்ப வேண்டாம் - ஆ.ராசா

சென்னை:

இரத்த அழுத்தம் காரணமாக காவிரி மருத்துவமனையில் தீவிர சிகிச்சை பிரிவில் சிகிச்சை பெற்று வந்த கருணாநிதியின் உடல்நிலை குறித்து பல்வேறு வதந்திகள் பரபரப்பட்டு வந்தது. காவிரி மருத்துவமனைக்கு கருணாநிதியின் உறவினர்கள் அனைவரும் விரைந்தது மற்றும் போலீசாரின் திடீர் பாதுகாப்பு ஏற்பாடுகளால் தமிழகத்தில் பரபரப்பு ஏற்பட்டது.

இதற்கிடையே, கருணாநிதியின் உடல்நிலை குறித்து காவேரி மருத்துவமனை அறிக்கை வெளியிட்டுள்ளது. கருணாநிதியின் உடல்நிலையில் தற்காலிக பின்னடைவு ஏற்பட்டதாகவும் சிகிச்சை பிறகு அவரது உடல்நிலை சீராகி வருவதாகவும் அந்த அறிக்கையில் குறிப்பிடப்பட்டுள்ளது. 

இந்நிலையில், மருத்துவமனைக்கு வெளியே செய்தியாளர்களை சந்தித்து பேசிய திமுக கொள்கை பரப்பு செயலாளர் ஆ.ராசா, 'கருணாநிதியின் உடல்நிலையில் சிறிது நேரம் தற்காலிக பின்னடைவு ஏற்பட்டது மருத்துவர்களின் தீவிர சிகிச்சையின் காரணமாக அவர் உடல்நிலை சீராகி வருகிறது. தற்போது தீவிர சிகிச்சை பிரிவில் அவருக்கு தீவிர சிகிச்சை அளிக்கப்பட்டு வருகிறது. எனவே, தி.மு.க தொண்டர்கள் மற்றும் பொதுமக்கள் வதந்திகளை நம்ப வேண்டாம்' என அவர் தெரிவித்தார். #DMK #Karunanidhi #KauveryHospital #GetWellKarunanidhi