நிலத்தகராறில் பெண் உள்பட 3 பேருக்கு உருட்டு கட்டை அடி

மண்ணச்சநல்லூர்:

சமயபுரம் அருகே சிறுகனூர் போலீஸ் சரகத்திற்குட்பட்ட குமுளூர் சவேரியார் கோவில் தெருவை சேர்ந்தவர் பாண்டியராஜன். இவருக்கும் இவரது உறவினரான மதலை ராஜ்சுக்கும் நிலத்தகராறு இருந்து வந்தது. இந்நிலையில் இரு குடும்பத்தினருக்கும் இடையே மீண்டும் தகராறு ஏற்பட்டது.

இதனால் ஆத்திரமடைந்த மதலைராஜ் மற்றும் அவரது மனைவி சமுத்திரமேரி, மதலை ராஜியின் தம்பி லாசர் அவரது மனைவி சுகிர்தா, லாசரின் மகன்ஜெகன் ஜென்னிஸ் மற்றும் சுதாகர் ,பிரகாஷ், ஜாய் ஆகியோர் உருட்டுக்கட்டை போன்ற ஆயுதங்களுடன்  பாண்டியராஜன் வீட்டிற்குள் சென்று அங்குள்ள பொருட்கள் அடித்து உடைத்து சேதப்படுத்தினர். 

இதை பாண்டியராஜன் அவரது மனைவி சலோமியா மேரி, இவர்களது மகன் லியோ ஆகிய 3 பேர் தட்டிகேட்டனர். இதனால் மேலும் ஆத்திரமடைந்த மதலைராஜ் குடும்பத்தினர் உருட்டுகட்டையால் பாண்டியராஜன், சலோமியாமேரி, லியோ ஆகியோரை சராமாரியாக தாக்கினர். அவர்களது அலறல் சத்தம் கேட்டு அக்கம் பக்கத்தினர் ஓடி வந்தனர். உடனே மதலை ராஜ் குடும்பத்தினர் சென்று விட்டனர். 

இதில் படுகாயம் அடைந்த பாண்டியராஜன் குடும்பத்தினர் சிகிச்சைக்காக ஸ்ரீரங்கம் அரசு மருத்துவமனையில் அனுமதிக்கப்பட்டுள்ளனர். இது குறித்து சிறுகனூர் போலீசார் வழக்குபதிவு செய்து விசாரித்து வருகிறார்கள்.