உவரி அருகே முடிதிருத்தும் தொழிலாளி கொலையில் வாலிபருக்கு வலைவீச்சு

திசையன்விளை:

உவரி அருகே கூடு தாழையை சேர்ந்தவர் தர்மராஜ். மாற்றுத்திறனாளி. இவரது மகன் ஜெனால்டு (வயது 24). முடிதிருத்தும் தொழிலாளி. அதே ஊரை சேர்ந்த லிகோரி. கூலி தொழிலாளி. இவரது மகன் ராணா சங்கா (21). இருவரது குடும்பத்துக்கும் இடையே முன்விரோதம் இருந்ததாக கூறப்படுகிறது. இந்நிலையில் இருவரது குடும்பத்திற்கும் இடையே நேற்று முன்தினம் இரவு தகராறு ஏற்பட்டது. 

இதில் ஆத்திரமடைந்த லிகோரி, அவரது மகன் ராணா சங்கா ஆகியோர் தர்மராஜ் ஊன்று கோலாக பயன்படுத்தும் கம்பை பிடுங்கி ஜெனால்டை சரமாரியாக அடித்தனர். இதில் படுகாயம் அடைந்த ஜெனால்டு  நெல்லை அரசு ஆஸ்பத்திரியில் அனுமதிக்கப்பட்டார். அங்கு சிகிச்சை பலனின்றி பரிதாபமாக அவர் உயிரிழந்தார். 

இதுகுறித்து உவரி போலீசார் வழக்குப்பதிவு செய்து லிகோரியை கைது செய்தனர். மேலும் அவரது மகன் ராணா சங்காவை போலீசார் தேடி வருகின்றனர். தொழிலாளி அடித்து கொலை செய்யப்பட்ட சம்பவம் அந்த பகுதியில் பரபரப்பை ஏற்படுத்தியுள்ளது.