ஆரணி ஆற்றங்கரையை பலப்படுத்த கால்வாயில் மணல் அள்ள எதிர்ப்பு

பொன்னேரி:

பொன்னேரி மற்றும் அதன் சுற்றுவட்டார பகுதிகளில் மழைவெள்ள முன்எச்சரிக்கை நடவடிக்கையாக ஆரணி ஆற்றங்கரையை பலப்படுத்தும் பணிகள் தீவிரமாக நடைபெற்று வருகிறது. இதற்காக பொன்னேரி அடுத்த கூடுவாஞ்சேரி கால்வாயில் மண் எடுத்து ஆரணி ஆற்றங்கரையை பலப்படுத்தும் பணிகளை நீர்வளத் துறை அதிகாரிகள் தொடங்கினர். இதற்கு அப்பகுதி மக்கள் கடும் எதிர்ப்பு தெரிவித்து வருகிறார்கள்.

கிராமமக்கள் சுமார் 50-க்கும் மேற்பட்டோர் கால்வாயில் மணல் அள்ள எதிர்ப்பு தெரிவித்து அங்கிருந்த அதிகாரிகளை முற்றுகையிட்டு கடும் வாக்குவாதம் செய்தனர். இதனால் அப்பகுதியில் பரபரப்பு ஏற்பட்டது.

இதுகுறித்து கிராமமக்கள் கூறும்போது, கால்வாயில் மண் எடுப்பதால் ஆழம் அதிகரித்து உயிர் பலி ஏற்படும். மேலும் கால்வாயின் கரையை பலப்படுத்த வேண்டும் என்றனர். அவர்களிடம் பொன்னேரி வட்டாட்சியர் மதிவாணன் மற்றும் நீர்வளத்துறை உதவி பொறியாளர் செந்தில்குமார் உள்ளிட்ட அதிகாரிகள் பேச்சு வார்த்தை நடத்தி கலைந்து போகச்செய்தனர். பொன்னேரி இன்ஸ்பெக்டர் குணசேகரன் தலைமையில் போலீசார் பாதுகாப்பு பணியில் ஈடுபட்டனர்.