படப்பை அருகே ராட்சத பேனர் விழுந்து மின் கம்பிகள் சேதம்

படப்பை:

காஞ்சிபுரம் மாவட்டம் படப்பை அடுத்த கரசங்கால் பஸ் நிறுத்தம் பகுதியில் சுமார் 40 அடி உயரமுள்ள 20 அடி அகலமுள்ள ராட்சத விளம்பர பேனர் வைக்கப்பட்டிருந்தது. இந்த நிலையில் நேற்று மாலை படப்பை கரசங்கால் உள்ளிட்ட பகுதியில் காற்று வீசி மழை பெய்ய தொடங்கியது.

பின்னர் திடீரென சூறாவளி காற்று வீசியது. இதில் பஸ் நிறுத்தம் அருகே இருந்த ராட்சத பேனர் மின் கம்பிகள் மீது விழுந்தது. இதில் மின்கம்பி அறுந்து விழுந்தது. மின்சாரம் துண்டிக்கப்பட்டு இருந்ததால் அங்கு சேதம் ஏற்படவில்லை.

அங்கு 5 மணி நேரத்திற்கு மேலாக மின்சாரம் இல்லாததால் பொதுமக்கள் கடும் அவதியடைந்தனர். மின்துறை ஊழியர்கள் மின் கம்பிகளை சரிசெய்யும் முயற்சியில் ஈடுபட்டனர்.