கோயம்பேடு மார்க்கெட்டில் 20 நாட்களுக்கு பிறகு தக்காளி விலை குறைய தொடங்கியது

போரூர்:

தமிழகத்தில் தக்காளி விலை கடந்த சில நாட்களாக தொடர்ந்து ஏறுமுகமாகவே இருந்து வந்தது. ஒரு கிலோ தக்காளி ரூ.130 வரை விற்கப்பட்டது.

ஆந்திரா மற்றும் கர்நாடகா மாநிலங்களில் பரவலாக பெய்த மழையால் தக்காளி உற்பத்தி கடுமையாக பாதிக்கப்பட்டது. மேலும் வடமாநிலங்களில் பெய்த கனமழையால் அங்குள்ள வியாபாரிகளும் ஆந்திரா, கர்நாடகா மாநிலங்களில் அதிகளவில் குவிந்து தக்காளியை கொள்முதல் செய்ததால் கோயம்பேடு காய்கறி மார்கெட்டுக்கு வரும் தக்காளியின் வரத்து திடீரென குறைய தொடங்கியது. இதனால் இந்த விலை உயர்வு என்று வியாபாரிகள் தெரிவித்தனர்.

கடந்த 1-ந்தேதி முதல் தக்காளியின் விலை தாறுமாறாக உயரத்தொடங்கியது. கோயம்பேடு மார்கெட்டில் அன்று சில்லரை விற்பனை கடைகளில் ஒரு கிலோ தக்காளி ரூ.120-க்கும், வெளிமார்கெட்டில் உள்ள காய்கறி கடைகளில் ரூ.130-யை கடந்தும் விற்பனை செய்யப்பட்டது. இந்த விலை உயர்வு தொடர்ந்து நீடித்து வந்தது.

சமையலுக்கு தினசரி பயன்படுத்தப்படும் தக்காளி விலை உயர்வு தொடர்ந்து நீடித்து வந்ததால் இல்லத்தரசிகள் பெரிதும் கவலை அடைந்தனர். இதையடுத்து தமிழக அரசின் பண்ணை பசுமை கடைகள் மற்றும் ரேஷன் கடைகளில் தக்காளி ஒரு கிலோ ரூ.60-க்கு விற்பனை செய்யப்பட்டு வருகிறது. எனினும் வெளிமார்கெட்டில் தக்காளியின் விலை குறையாமல் இருந்தது.

இந்த நிலையில் கடந்த 20 நாட்களுக்கு பிறகு தக்காளி விலை சற்று குறைய தொடங்கி உள்ளது. இன்று கோயம்பேடு மார்கெட்டில் உள்ள மொத்த விற்பனை கடைகளில் முதல் ரக தக்காளி ஒரு கிலோ ரூ.90-க்கு விற்கப்படுகிறது.

சில்லரை விற்பனை கடைகளில் ஒரு கிலோ தக்காளி ரூ.100-க்கு விற்பனை செய்யப்பட்டு வருகிறது. கோயம்பேடு மார்க்கெட்டுக்கு இன்று 36 லாரிகளில் தக்காளி விற்பனைக்கு வந்திருந்தன. இனி வரும் நாட்களில் தக்காளியின் வரத்து அதிகரித்து விலை படிப்படியாக குறையும் என்று மொத்த வியாபாரிகள் தெரிவித்து உள்ளனர்.