கந்தர்வகோட்டையில் லாரி மீது அரசு பஸ் மோதி விபத்து: கிளீனர் பலி

கந்தர்வகோட்டை:

புதுக்கோட்டையில் இருந்து மன்னார்குடிக்கு ஜல்லிக்கற்கள் ஏற்றிக்க்கொண்டு ஒரு லாரி புறப்பட்டு வந்தது. லாரியில் கிளீனராக மன்னார்குடியை சேர்ந்த துரைசாமி மகன் ஜீவா (வயது 24) என்பவர் இருந்தார்.

லாரி இன்று அதிகாலை 4 மணி அளவில் கந்தர்வகோட்டை தாலுகா அலுவலகம் அருகே வந்தது. அப்போது லாரியில் திடீரென பழுது ஏற்பட்டது. உடனே டிரைவர் லாரியை சாலை ஓரமாக நிறுத்தினார்.

கிளீனர் ஜீவா லாரியின் சக்கரத்தை கழட்டிக் கொண்டு இருந்தார். அப்போது திருச்செந்தூரில் இருந்து தஞ்சாவூர் சென்ற அரசு பஸ் எதிர்பாராத விதமாக லாரியின் பின்புறத்தில் மோதியது.

இதில் ஜீவா சம்பவ இடத்திலேயே உடல் நசுங்கி பலியானார். இந்த விபத்தில் பஸ்சில் வந்த சிலருக்கும் காயம் ஏற்பட்டது. தகவல் அறிந்த கந்தர்வகோட்டை போலீசார் சம்பவ இடத்திற்கு விரைந்து காயம் அடைந்த பயணிகளை மீட்டு புதுக்கோட்டை மருத்துவ கல்லூரி மருத்துவமனைக்கு அனுப்பி வைத்தனர்.

விபத்தில் பலியான ஜீவா உடலை கைப்பற்றி பிரேத பரிசோதனைக்கு புதுக்கோட்டைக்கு அனுப்பி வைத்தனர். இது தொடர்பாக போலீசார் வழக்கு பதிவு செய்து அரசு பஸ் டிரைவரிடம் விசாரணை நடத்தி வருகின்றனர்.