திருச்சியில் மறுசுழற்சி எந்திரம் பழுதானதால் அகற்றப்படாத காய்கறி கழிவுகள் - கூடுதல் வாகனங்கள் இயக்கப்படுவதாக அதிகாரிகள் விளக்கம்

திருச்சி :

திருச்சி மாநகரின் மையப்பகுதியில் காந்தி மார்க்கெட் அமைந்துள்ளது. இங்கு காய்கறி மொத்த மற்றும் சில்லறை விற்பனை நடந்து வருகிறது. மத்திய மாவட்டங்களுக்கு இந்த மார்க்கெட்டில் இருந்து காய்கறிகள் அனுப்பி வைக்கப்படுகிறது. இதன் அருகாமையில் கிழக்கு புலிவார் ரோடு பகுதியில் வாழைக்காய் மண்டியான ஏலம் மையமும் இயங்கி வருகின்றது.

இந்த காய்கறி மார்க்கெட் மற்றும் வாழைக்காய் ஏலம் மையத்தில் இருந்து வெளியேற்றப்படும் கழிவுகள் தஞ்சாவூர் மெயின் ரோடு தர்பார் மேடு பகுதியில் கொட்டப்படுகிறது. ஏற்கனவே சாலை ஆக்கிரமிப்புகளால் குறுகிப் போய் உள்ள மேற்கண்ட சாலையில் கழிவுகள் கொட்டப்படுவதால் மேலும் போக்குவரத்துக்கு கடுமையான இடையூறு ஏற்படுகிறது. அது மட்டுமல்லாமல் குடிநீர் குழாய்களையும் சாலையில் அடுக்கி வைத்திருக்கிறார்கள்.

இதுபற்றி அப்பகுதியைச் சேர்ந்த குடியிருப்புவாசி ஒருவர் கூறும் போது, திருச்சி காந்தி மார்க்கெட் 7 ஏக்கர் பரப்பளவில் அமைந்துள்ளது. தினமும் 20 முதல் 30 டன் காய்கறி கழிவுகள் வெளியேற்றப்படுகிறது. இதனை பொதுமக்கள் மற்றும் போக்குவரத்துக்கு இடையூறு இல்லாமல் தடை இன்றி மறுசுழற்சி செய்து அப்புறப்படுத்த எடுக்க வேண்டும்.

அதிக அளவில் குப்பை வெளியேறும் பகுதியில் சிறிய அளவிலான குப்பைத் தொட்டிகள் வைப்பதால் எந்த பிரயோஜனமும் இல்லை. சிறிது நேரத்திலேயே இந்த குப்பைத்தொட்டிகள் நிரம்பி விடுவதால் திறந்த வெளியில் கழிவுகளை கொட்டி செல்கிறார்கள். இதனால் சாலைகளை பெரிதும் ஆக்கிரமித்து போக்குவரத்துக்கு இடையூறு ஏற்படுகிறது என தெரிவித்தார்.

மாநகராட்சி அதிகாரிகள் தரப்பில் கேட்டபோது, மறுசுழற்சி செய்ய கழிவுகளை துண்டாக்கும் எந்திரம் பழுதடைந்துள்ளது. அதனை சரி செய்ய கொடுத்திருக்கின்றோம். இதனால் காய்கறி கழிவுகளை உடனுக்குடன் அப்புறப்படுத்த கூடுதல் வாகனங்கள் இயக்கப்படுகிறது என்றனர்.