அலுவலகத்தில் புகுந்த பாம்பை கையால் பிடித்த பெண்- வீடியோ வைரல்

பாம்பு என்றால் படையே நடுங்கும் என்பார்கள். ஆனால் இளம்பெண் ஒருவர் அலுவலகத்துக்குள் புகுந்த பாம்பு ஒன்றை எவ்வித அச்சமின்றி வெறுங்கைகளால் லாவகமாக பிடிப்பது தொடர்பான வீடியோ இணையத்தில் வேகமாக பரவி வருகிறது.

சத்தீஸ்கர் மாநிலம் பிலாஸ்பூரில் உள்ள அலுவலகம் ஒன்றினுள் பாம்பு ஒன்று புகுந்தது. இதனால் பதற்றமடைந்த ஊழியர்கள் அந்த ஊரில் பாம்பு பிடிப்பதில் நிபுணத்துவம் பெற்ற இளம்பெண்ணை அழைத்து உள்ளனர். அலுவலகத்துக்குள் புகுந்த பாம்பை அந்த இளம்பெண் எவ்வித சலமின்றி வெறுங்கைகளால் பிடித்து தான் கொண்டு வந்த சாக்கு பையில் போடுகிறார்.

மேலும் 'இது விஷத்தன்மை இல்லாத சாரைப்பாம்பு வகையை சேர்ந்ததுதான், பயப்பட தேவையில்லை' என்கிறார். இதனை அங்கிருந்தவர்கள் வீடியோவாக படம்பிடித்து சமூக வலைத்தளத்தில் பதிவேற்றினர். 'உண்மையான ஹீரோயின்' என அந்த பெண்ணின் வீரதீர சாகசத்தை பாராட்டி கருத்துகளை பதிவிட்டு அதனை பரப்பி வருகிறார்கள்.