தேர்தல் தோல்வியின் எதிரொலி: ஸ்மிருதி இரானிக்கு பதில் அமைச்சரான அன்னபூர்ணா தேவி

2019 ஆண்டு பாராளுமன்ற தேர்தலில் ராகுல்காந்தி, கேரள மாநிலம் வயநாடு மற்றும் உத்திரபிரதேச மாநிலம் அமேதி ஆகிய தொக்குகளில் நின்றார். இதில் வயநாடு தொகுதியில் வெற்றி பெற்றார். ஆனால் அமேதி தொகுதியில் பாஜக வேட்பாளர் ஸ்மிருதி இரானியிடம் ராகுல்காந்தி தோல்வியை தழுவினார்.

அதன் பின்னர் ஸ்மிருதி இரானி மோடியின் அமைச்சரவையில் மகளிர் மற்றும் குழந்தைகள் மேம்பாட்டு துறை அமைச்சராக 5 ஆண்டுகள் பதவி வகித்தார்.

இந்நிலையில் இந்தாண்டு நடந்த பாராளுமன்ற தேர்தலில் அமேதி தொகுதியில் மீண்டும் ஸ்மிருதி இரானி பாஜக வேட்பாளராக களமிறக்கப்பட்டார். அந்த தொகுதியில் காங்கிரஸ் கட்சியின் மூத்த தலைவரான கிஷோரிலால் சர்மா போட்டியிட்டார்.

இந்த தேர்தலில் காங்கிரஸ் கட்சி சார்பில் போட்டியிட்ட கிஷோரிலால் சர்மா அமோக வெற்றி பெற்றார். அவர் தன்னை எதிர்த்து போட்டியிட்ட ஸ்மிருதி ரானியை 1.67 இலட்சம் வாக்குகள் வித்தியாசத்தில் தோற்கடித்தார்.

இதனையடுத்து, தேர்தலில் தோல்வியடைந்த ஸ்மிருதி இரானிக்கு மீண்டும் அமைச்சரவையில் இடம் வழங்கப்படவில்லை.

இந்நிலையில், ஸ்மிருதி இரானி வகித்து வந்த மகளிர் மற்றும் குழந்தைகள் மேம்பாட்டு துறை தற்போது பாஜக எம்.பி. அன்னபூர்ணா தேவிக்கு ஒதுக்கப்பட்டுள்ளது.