உலக டெஸ்ட் சாம்பியன்ஷிப்: புள்ளிப்பட்டியலில் முன்னேற்றம் கண்ட தென் ஆப்பிரிக்கா

துபாய்:

வங்கதேசம், தென் ஆப்பிரிக்கா அணிகளுக்கு இடையிலான முதல் டெஸ்ட் போட்டி டாக்காவில் நடைபெற்றது. இதில் தென் ஆப்பிரிக்கா அணி 7 விக்கெட் வித்தியாசத்தில் வெற்றி பெற்றது. அத்துடன் டெஸ்ட் தொடரில் 1-0 என முன்னிலை பெற்றுள்ளது.

இந்நிலையில், இந்த டெஸ்ட் தொடருக்கு பிறகு உலக டெஸ்ட் சாம்பியன்ஷிப் புள்ளிப்பட்டியலை ஐ.சி.சி வெளியிட்டது.

இதில் 12 போட்டிகளில் விளையாடியுள்ள இந்தியா 8 போட்டிகளில் வெற்றி, 3 போட்டிகளில் தோல்வி என 68.06 சதவீதத்துடன் புள்ளிப் பட்டியலில் தொடர்ந்து முதல் இடத்தில் நீடிக்கிறது. ஆஸ்திரேலியா 2-வது இடத்திலும், இலங்கை 3-வது இடத்திலும் நீடிக்கிறது.

வங்கதேசத்துக்கு எதிரான முதல் டெஸ்டில் வென்றதை தொடர்ந்து தென் ஆப்பிரிக்கா 6-வது இடத்திலிருந்து 4-வது இடத்துக்கு முன்னேறியது.

இங்கிலாந்து 5-வது இடத்திலும், நியூசிலாந்து 6-வது இடத்திலும் உள்ளன.

வங்கதேசம், பாகிஸ்தான், வெஸ்ட் இண்டீஸ் ஆகியவை 7, 8, 9-ம் இடத்தில் உள்ளன.