ஆவின் ஊதா அரை லிட்டர் பால் பாக்கெட்டில் 130 மில்லி அளவு குறைவு: பொதுமக்கள், கடைக்காரர்கள் அதிர்ச்சி

சென்னை:

சென்னையில் ஒரு சில பகுதிகளில் வினியோகம் செய்யப்பட்ட ஆவின் 'டிலைட்' ஊதா நிற பாக்கெட்டுகளில் 100 கிராம் எடை குறைவாக இருந்து உள்ளது. 520 கிராம் இருக்க வேண்டிய பால் பாக்கெட்டின் எடை 415 கிராம் இருந்ததால் அதிர்ச்சி அடைந்தனர்.

மாதவரம், கொடுங்கையூர், மூலக்கடை பகுதியில் வினியோகம் செய்யப்பட்ட பாலில் அளவு குறைவாக இருப்பதாக பால் முகவர்கள் கண்டுபிடித்தனர்.

அரை லிட்டர் பாக்கெட்டில் 130 கிராம் எடை குறைவுடன் இருந்தது. பால் அளவை குறைப்பதற்கான காரணம் என்ன? எந்த ஒரு பொருளையும் அதில் குறிப்பிட்ட அளவில்தான் பாக்கெட்டில் அடைத்து விற்பனை செய்யப்பட்டு வருகிறது.

ஆனால் ஆவின் பால் பாக்கெட்டில் எதற்காக பால் அளவை குறைக்கிறார்கள். இதனால் ஏழை மக்கள் பாதிக்கப்படுகிறார்கள். அவர்கள் அதனை விற்பனை செய்யும் மளிகைக்கடை, பெட்டிக்கடைகளில் தகராறு செய்கின்றனர். ஆவின் விற்பனை மையங்களிலும் எடை குறைந்த பால் பாக்கெட்டுகள் விற்பனை செய்யப்பட்டது.

இதுகுறித்து தமிழ்நாடு பால் முகவர்கள் தொழிலாளர்கள் நல சங்க மாநில தலைவர் பொன்னுசாமி கூறுகையில், கடந்த சில மாதங்களுக்கு முன்பு சென்னை, கோவை, வேலூர் மாவட்டங்களில் எடை அளவு குறைவான ஆவின் பால், தயிர் வினியோகம் செய்யப்பட்டது. தற்போது மீண்டும் சென்னையில் ஒரு சில பகுதிகளில் இன்று ஊதா நிற பால் பாக்கெட்டுகளில் பால் அளவு குறைக்கப்பட்டு வினியோகம் செய்து உள்ளதாக புகார் வந்துள்ளது. எடை அளவை குறைத்து மோசடி செய்வதை வன்மையாக கண்டிக்கிறோம் என்றார்.