செய்திகள் (Tamil News)
கேன் வில்லியம்சன் அபார சதம் - வெஸ்ட் இண்டீசுக்கு 292 ரன்களை இலக்காக நிர்ணயித்துள்ளது நியூசிலாந்து
உலகக்கோப்பை கிரிக்கெட்டில் மான்செஸ்டரில் நடந்த போட்டியில் கேன் வில்லியம்சனின் அபார சதத்தால் வெஸ்ட் இண்டீசுக்கு 292 ரன்களை இலக்காக நிர்ணயித்துள்ளது நியூசிலாந்து.
மான்செஸ்டர்:
உலகக்கோப்பை தொடரின் 29-வது லீக் ஆட்டம் மான்செஸ்டரில் இன்று மாலை 6 மணிக்கு தொடங்கியது. இதில் வெஸ்ட் இண்டீஸ்- நியூசிலாந்து அணிகள் மோதின. டாஸ் வென்ற வெஸ்ட் இண்டீஸ் அணி கேப்டன் ஹோல்டர் பந்துவீச்சை தேர்வு செய்துள்ளார்.
இதையடுத்து, நியூசிலாந்து அணியின் மார்டின் கப்தில், காலின் மன்ரோ தொடக்க ஆட்டக்காரர்களாக இறங்கினர்.
வெஸ்ட் இண்டீஸ் அணியின் ஷெல்டன் காட்ரெல் முதல் ஓவரிலேயே இருவரையும் பெவிலியனுக்கு அனுப்பி அதிர்ச்சி வைத்தியம் அளித்தார்.
அடுத்து இறங்கிய கேப்டன் கேன் வில்லியம்சனுடன் ராஸ் டெய்லர் ஜோடி சேர்ந்தார். இந்த ஜோடி நிதானமாகவும், பொறுப்புடனும் ஆடியது.
டெய்லர் அரை சதமடித்து அசத்தினார்.
160 ரன்கள் ஜோடி சேர்த்த நிலையில், டெய்லரை கெயில் அவுட்டாக்கினார். டெய்லர் 69 ரன்னில் அவுட்டானார். அடுத்து வந்த வீரர்கள் நிலைத்து நிற்கவில்லை.
ஒருபுறம் விக்கெட்டுகள் வீழ்ந்தாலும், கேன் வில்லியம்சன் சிறப்பாக விளையாடி சதமடித்தார். அவர் 148 ரன்கள் எடுத்த நிலையில் காட்ரெல் அவரை வெளியேற்றினார்.
இறுதியில், நியூசிலாந்து அணி நிர்ணயிக்கப்பட்ட 50 ஓவரில் 8 விக்கெட் இழப்புக்கு 291 ரன்களை எடுத்துள்ளது.
வெஸ்ட் இண்டீஸ் சார்பில் காட்ரெல் 4 விக்கெட்டும், பிராத்வெயிட் 2 விக்கெட்டும் வீழ்த்தினர். இதையடுத்து, 292 ரன்களை எடுத்தால் வெற்றி என்ற இலக்குடன் வெஸ்ட் இண்டீஸ் களமிறங்க உள்ளது.