உலக கோப்பைச்செய்திகள்

12-வது உலகக்கோப்பை கிரிக்கெட் போட்டி இங்கிலாந்து மற்றும் வேல்ஸ் நாடுகளில் நடைபெற்று வருகிறது. கடந்த 30-ந்தேதி தொடங்கிய இந்தப் போட்டியில் 10 நாடுகள் பங்கேற்று விளையாடி வருகின்றன. ‘ரவுண்டு ராபின்’ முறையில் ஒவ்வொரு அணியும், மற்ற அணியுடன் தலா 1 முறை மோத வேண்டும். அதன்படி ஒவ்வொரு அணிக்கும் 9 ஆட்டம் இருக்கும். லீக் முடிவில் புள்ளிகள் அடிப்படையில் முதல் 4 இடங்களை பிடிக்கும் அணிகளுடன் அரை இறுதிக்கு தகுதிபெறும்.

விராட் கோலி தலைமையிலான இந்திய அணி உலகக்கோப்பை போட்டியில் வெற்றியுடன் கணக்கை தொடங்கியது. முதல் ஆட்டத்தில் தென்ஆப்பிரிக்காவை 6 விக்கெட் வித்தியாசத்தில் வீழ்த்தியது.

இந்திய அணி 2-வது ஆட்டத்தில் ஆஸ்திரேலியாவை நாளை (9-ந்தேதி) எதிர்கொள்கிறது. லண்டன் ஓவல் மைதானத்தில் இந்திய நேரப்படி மாலை 3 மணிக்கு இந்தப் போட்டி தொடங்குகிறது.

தென்ஆப்பிரிக்காவை தோற்கடித்தது போல இந்திய அணி ஆஸ்திரேலியாவை வீழ்த்தி 2-வது வெற்றியை பெறுமா? என்று ரசிகர்கள் ஆவலுடன் எதிர்நோக்கி உள்ளனர். இந்திய அணி தனது அதிரடியை நீட்டித்துக் கொள்ளவும் ஆர்வத்தில் உள்ளது. அதே நேரத்தில் ஆஸ்திரேலியா இந்த தொடரில் சிறப்பாக ஆடி வருவதால் சவாலாக இருக்கும்.

தென்ஆப்பிரிக்காவுக்கு எதிரான ஆட்டத்தில் பந்து வீச்சு முக்கிய பங்கு வகித்தது. சுழற்பந்து வீரர் யசுவேந்திர சாஹலும், வேகப்பந்து வீச்சாளர் பும்ராவும் நேர்த்தியாக பந்து வீசி விக்கெட்டுகளை வீழ்த்தினார்கள். இதேபோல புவனேஷ்வர் குமாரும், குல்தீப் யாதவும் நல்ல நிலையில் உள்ளனர்.

ரோகித் சர்மா சதம் அடித்து சிறப்பான இன்னிங்சை வெளிப்படுத்தினார். அதிரடி பேட்ஸ்மேனான அவர் மீதான எதிர்பார்ப்பு நாளைய ஆட்டத்திலும் இருக்கிறது. இதேபோல டோனி, ஹர்திக் பாண்டியா ஆகியோரும் திறமையான ஆட்டத்தை வெளிப்படுத்தினார்கள். கேப்டன் விராட் கோலி, லோகேஷ் ராகுல், தவான், கேதர் ஜாதவ் போன்ற பேட்ஸ்மேன்களும் முத்திரை பதிக்க கூடியவர்கள்.

நாளைய போட்டிக்கான இந்திய அணியில் மாற்றம் எதுவும் இருக்காது என்றே எதிர்பார்க்கப்படுகிறது. ஒருவேளை ஆடுகளத் தன்மையை பொறுத்து மாற்றம் செய்யப்படலாம்.

ஆஸ்திரேலிய அணி தான் மோதிய 2 ஆட்டத்திலும் வென்று மிகவும் நல்ல நிலையில் இருக்கிறது. தொடக்க ஆட்டத்தில் ஆப்கானிஸ்தானை 7 விக்கெட் வித்தியாசத்திலும், 2-வது போட்டியில் வெஸ்ட் இண்டீஸை 15 ரன் வித்தியாசத்தில் வீழ்த்தியது.

இந்தியாவை வீழ்த்தி அந்த அணி ‘ஹாட்ரிக்‘ வெற்றி பெறும் ஆர்வத்துடன் இருக்கிறது. பேட்டிங் மற்றும் பந்து வீச்சில் ஆஸ்திரேலிய அணி சம பலத்துடன் திகழ்கிறது.



பேட்டிங்கில் கேப்டன் ஆரோன் பிஞ்ச், டேவிட் வார்னர், ஸ்டீவ் ஸ்மித் ஆகியோரும் பந்து வீச்சில் ஸ்டார்க், கம்மின்ஸ், ஆடம் ஜம்பா ஆகியோரும் நல்ல நிலையில் உள்ளனர். வெஸ்ட் இண்டீஸ்க்கு எதிராக பந்து வீச்சாளரான நாதன் கவுல்டர் அதிரடியான ஆட்டத்தை வெளிப்படுத்தி இருந்தார்.

லண்டனில் நேற்று பெய்த மழையால் இந்திய வீரர்களின் பயிற்சி பாதிக்கப்பட்டது. இந்த வார இறுதி வரை மழை வாய்ப்பு இருப்பதால் நாளைய ஆட்டம் பாதிக்குமா? என்ற அச்சமும் இருக்கிறது. பாகிஸ்தான் - இலங்கை அணிகள் கார்டிப் மைதானத்தில் நேற்று மோத இருந்த ஆட்டம் ஒரு பந்து கூட வீசப்படவில்லை. மழையால் ரத்து செய்யப்பட்டது.

இந்திய அணி கடைசியாக ஆஸ்திரேலியாவிடம் மோதிய ஆட்டத்தில் 35 ரன்னில் தோற்று இருந்தது. இதனால் ஆஸ்திரேலியாவை வீழ்த்த இந்திய வீரர்கள் அனைவரும் முழு திறமையை பயன்படுத்த வேண்டும். உலகக்கோப்பை போட்டியிலும் ஆஸ்திரேலியா 8-3 என்ற அளவில் முன்னிலையில் இருக்கிறது.

இங்கிலாந்தில் நடைபெற்று வரும் 12-வது 50 ஓவர் உலகக்கோப்பை தொடருக்கு 10-வது அணியாக தகுதிச் சுற்றில் சிறப்பாக விளையாடியதன் மூலம் ஆப்கானிஸ்தான் அணி தகுதி பெற்றது. அந்த அணியின் விக்கெட் கீப்பராகவும், அதிரடி தொடக்க பேட்ஸ்மேன் ஆகவும் விளையாடி வருபவர் முகமது ஷேசாத்.

ஆப்கானிஸ்தான் அணி சர்வதேச அரங்கில் காலடி எடுத்து வைக்க இவரது ஆட்டம் முக்கியமானதாக இருந்தது என்றால் அது மிகையாகாது. இவர் உலகக்கோப்பைக்கான ஆப்கானிஸ்தான் அணியில் இடம்பிடித்துள்ளார். ஆஸ்திரேலியா மற்றும் இலங்கை அணிகளுக்கு இடையிலான ஆட்டத்தில் ஆப்கானிஸ்தான் தோல்வியடைந்தது.

இந்த இரண்டு ஆட்டங்களிலும் ஷேசாத் விளையாடினார். அவரது மூட்டு பகுதியில் காயம் ஏற்பட்டதாக தெரிகிறது. இதனால் ஐசிசி-யிடம் மாற்றும் வீரரை தேர்வு செய்ய ஆப்கானிஸ்தான் வேண்டுகோள் வைத்தது. இதை ஏற்ற ஐசிசி டெக்னிக்கல் கமிட்டில் ஒப்புதல் வழங்கியது. அதன்படி இக்ராம் அலி கில்-ஐ மாற்று வீரராக ஆப்கானிஸ்தான் தேர்வு செய்துள்ளது.



இந்நிலையில், நியூசிலாந்துக்கு எதிரான 3-வது போட்டிக்கான பயிற்சியில் ஷேசாத் கலந்து கொண்டு, தான் உடற்தகுதியுடன் உள்ளதாக தெரிவித்துள்ளார். இதனால் ஆப்கானிஸ்தான் என்ன முடிவு எடுக்கப்போகிறது என்று தெரியவில்லை.

ஆப்கானிஸ்தான் அணியின் கேப்டனாக இருந்த அஸ்கர் ஆப்கன் அதிரடியாக நீக்கப்பட்டு, குல்பதின் நைப் கேப்டனாக நியமிக்கப்பட்டுள்ளார். இதற்கு மூத்த வீரர்கள் கடும் விமர்சனம் செய்தனர். மேலும், ஷேசாத் வீரர்கள் அறையில் மோதலில் ஈடுபட்டதாகவும் கூறப்படுகிறது.

வெஸ்ட் இண்டீஸ்க்கு எதிரான நேற்றைய ஆட்டத்தில் ஆஸ்திரேலியா விக்கெட்டுகளை இழந்து திணறியபோது 8-வது வரிசையில் களம் இறங்கிய ஆல் ரவுண்டர் நாதன் கவுல்டர் நைல் அதிரடியாக விளையாடினார். அவர் 60 பந்தில் 92 ரன் குவித்தார். இவர் 92 ரன்கள் குவித்ததே ஆஸ்திரேலியா 15 ரன் வித்தியாசத்தில் வெற்றி பெற முக்கிய காரணமாக அமைந்தது.

கவுல்டர் நைல் அடித்த 92 ரன்களே உலகக்கோப்பை போட்டிகளில் 8-வது வரிசை வீரரின் அதிகபட்ச ஸ்கோராகும். இதற்கு முன்பு 2003-ம் ஆண்டு உலகக்கோப்பையில் ஜிம்பாப்வேயின் ஹீத் ஸ்ட்ரீக் 8-வது வரிசையில் 72 ரன் எடுத்து இருந்தார். அந்த சாதனையை நாதன் கவுல்டர் நைல் முறியடித்துள்ளார்.

ஒட்டு மொத்தமாக ஒரு நாள் போட்டிகளில் 8-வது வரிசை வீரர்களில் அதிக ரன் எடுத்தவர்கள் பட்டியலில் இங்கிலாந்தின் கிறிஸ் வோக்ஸ் 95 ரன்னுடன் முதலிடத்தில் உள்ளார். இந்த ரன்னை அவர் 2016-ம் ஆண்டு இலங்கைக்கு எதிராக அடித்தார்.

நாட்டிங்காம்:

12-வது உலகக்கோப்பை கிரிக்கெட் போட்டியில் நேற்று நாட்டிங்காமில் நடந்த ‘லீக்’ ஆட்டத்தில் வெஸ்ட் இண்டீசை 15 ரன் வித்தியாசத்தில் ஆஸ்திரேலியா வீழ்த்தியது.

முதலில் பேட்டிங் செய்த ஆஸ்திரேலியா 79 ரன்னுக்கு 5 விக்கெட்டை இழந்து தடுமாறியது. அதன்பின் சுமித் - அலெக்ஸ் கேரி ஜோடி சிறப்பாக விளையாடியது. கேரி 45 ரன்னிலும், சுமித் 73 ரன்னிலும் அவுட் ஆனார்கள். 8-வது வீரராக களம் இறங்கிய நாதன் கவுல்டர் - நைல் அதிரடியாக விளையாடினர். அவர் 60 பந்தில் 92 ரன் எடுத்தார். இதில் 8 பவுண்டரி, 4 சிக்சர்கள் அடங்கும்.

ஆஸ்திரேலியா 49 ஓவரில் 288 ரன்னுக்கு ஆல்-அவுட் ஆனது. பின்னர் இலக்கை நோக்கி வெஸ்ட் இண்டீஸ் அணி பேட்டிங் செய்தது. அந்த அணியால் 50 ஓவரில் 9 விக்கெட்டுக்கு 273 ரன்னே எடுத்தது. இதனால் 15 ரன்னில் வெற்றி வாய்ப்பை இழந்தது. ஆஸ்திரேலிய தரப்பில் மிட்செல் ஸ்டார்க் 5 விக்கெட் வீழ்த்தினார். ஆஸ்திரேலியா 2-வது வெற்றியை பெற்றது. வெஸ்ட் இண்டீஸ் முதல் தோல்வியை சந்தித்தது.

தோல்வி குறித்து வெஸ்ட் இண்டீஸ் கேப்டன் ஜேசன் ஹோல்டர் கூறியதாவது:-

இந்த தோல்வி உண்மையிலேயே ஏமாற்றம் அளிக்கிறது. போட்டியில் நாங்கள் நல்ல நிலையில்தான் இருந்தோம் என்று நினைத்தேன். அனேகமாக நாங்கள் சிறிது உத்வேகத்தை காட்ட வேண்டிய நேரத்தில் பொறுப்பற்ற சில ஷாட்டுகளை அடித்து அவுட் ஆகிவிட்டோம்.

ஆனாலும் இப்போட்டியில் இருந்து நிறைய நேர்மறை வி‌ஷயங்களை எடுத்து கொள்ள முடியும் என்று நினைக்கிறேன். நாதன் கவுல்டர் நைல் 60 ரன்னில் இருந்தபோது அவரது கேட்சை தவறவிட்டோம்.



அதன்பின் அவர் 30 ரன்கள் சேர்த்து விட்டார். இதுதான் ஆட்டத்தின் போக்கை மாற்றி விட்டது. பேட்ஸ்மேன்கள் தங்கள் பொறுப்புகளை உணர்ந்து விளையாட வேண்டியது அவசியம். இன்னும் போட்டிகள் இருக்கின்றன. நாங்கள் இன்னும் நிலையான ஆட்டத்தை வெளிப்படுத்த வேண்டும்.

இவ்வாறு அவர் கூறினார்.

ஆஸ்திரேலியா தனது அடுத்த ஆட்டத்தில் வருகிற 9-ந்தேதி இந்தியாவுடன் மோதுகிறது. வெஸ்ட்இண்டீஸ் அணி 10-ந்தேதி தென் ஆப்பிரிக்காவை எதிர்கொள்கிறது.

பாகிஸ்தான் - இலங்கை அணிகள் மோதும் உலகக்கோப்பை தொடரின் 11-வது லீக் ஆட்டம் பிரிஸ்டோலில் இந்திய நேரப்படி மதியம் 3 மணிக்கு தொடங்க இருந்தது.

இதற்கான டாஸ் 2.30 மணிக்கு சுண்ட வேண்டும். ஆனால் பிரிஸ்டோலில் மழை பெய்து வருவதால் டாஸ் சுண்டப்படவில்லை. இதனால் போட்டி தொடங்குவதில் தாமதம் ஏற்பட்டுள்ளது.