மத்தியப்பிரதேசம்

மத்திய பிரதேசம் மாநிலத்தில் கமல்நாத் தலைமையிலான ஆட்சியை பண பலத்தால் பா.ஜ.க. கலைத்தது என்று காங்கிரஸ் தலைவர் ராகுல் காந்தி குற்றம்சாட்டி உள்ளார். 2018 சட்டசபை தேர்தலுக்கு பின் ஆட்சியமைத்த காங்கிரஸ் கட்சியின் முதல்வராக கமல் நாத் தேர்வு செய்யப்பட்டார்.

பிறகு 2020 மார்ச் மாதம் ஜோதிராதித்ய சிந்தியாவுக்கு ஆதரவான பல்வேறு சட்டமன்ற உறுப்பினர்கள் ஆட்சியை கவிழ்க்க காரணமாக செயல்பட்டனர். இதன் காரணமாக மத்திய பிரதேச மாநிலத்தில் சிவராஜ் சிங் சவுகான் முதலமைச்சராக பதவியேற்றார். பிறகு சட்டமன்ற உறுப்பினர்கள் மற்றும் சிந்தியா ஆகியோர் பா.ஜ.க. கட்சியில் இணைந்தனர்.

மத்திய பிரதேச மாநிலத்தின் ராய்பூரை அடுத்த பார்வானியில் நடைபெற்ற பிராசார கூட்டத்தில் கலந்து கொண்டு பேசிய ராகுல் காந்தி, "கடந்த சட்டசபை தேர்தலின் போது, விவசாய கடன்களை தள்ளுபடி செய்வதாக வாக்குறுதி அளித்திருந்தோம். அதன்படி 25 லட்சம் விவசாயிகள் பெற்றிருந்த கடன்களை தள்ளுபடி செய்தோம்."

"ஆனால் பா.ஜ.க. மற்றும் அதன் தொழிலதிபர்கள் அடங்கிய சகாக்கள் உங்களது அரசாங்கத்தை சட்டசபை உறுப்பினர்களுக்கு பணம் கொடுத்து திருடி விட்டது. விவசாயிகள் மற்றும் தொழிலாளர்களின் கைகளில் பணம் கிடைத்தால், அவர்கள் அதனை கிராமங்கள் மற்றும் நகரங்களில் செலவிடுவர். இதன் காரணமாக உள்ளூர் பொருளாதாரம் வலுப்பெறும். இதே நிலை சத்தீஸ்கரில் வெற்றிகரமாக எட்டப்பட்டது," என்று தெரிவித்தார்.

பிரதமர் மோடி மத்திய பிரதேச மாநிலம் சட்னாவில் நடைபெற்ற தேர்தல் பிரசார பேரணியில் கலந்து கொண்டு பேசினார். அப்போது அவர் கூறியதாவது:-

என்னுடைய அரசு ஏழை மக்களுக்காக 4 கோடி கான்கிரீட் வீடுகளை உருவாக்கியுள்ளது. ஆனால், எனக்காக அதில் ஒரு வீடு கூட இல்லை. உங்களுடைய ஒரு வாக்கு பா.ஜனதா மீண்டும் மத்திய பிரதேசத்தில் ஆட்சி அமைக்க உதவும். உங்களுடைய வாக்கு டெல்லியில் மோடியை வலுப்படுத்தவும், மத்திய பிரதேச ஆட்சியில் இருந்து ஊழல் காங்கிரசை பல மைல் தூரத்திற்கு விரட்டவும் உதவும். இதன் அர்த்தம் என்னவெனில், ஒரு வாக்கில் மூன்று அதிசயங்கள். இது மூன்று சக்திகளை (Trishakti) போன்றது.

நாங்கள் ஆட்சிக்கு வந்த பிறகு, அரசு திட்டத்தின் மூலம் பயனடைய காங்கிரஸ் கட்சியால் உருவாக்கப்பட்ட 10 கோடி போலி பயனாளர்கள் நீக்கப்பட்டுள்ளனர். இதன் காரணமாக அரசு 2.75 லட்சம் கோடி ரூபாயை சேமித்துள்ளது. அரசின் நடவடிக்கைகளால் அவர்கள் பெரிதும் பாதிக்கப்பட்டுள்ளதால், தற்போது என்னை வசைபாடுகிறார்கள்.

இப்போது நான் எங்கு சென்றாலும், அயோத்தியில் ராமர் கோவில் கட்டப்படுவது பற்றி பேசப்படுகிறது. நாடு முழுவதும் மகிழ்ச்சி அலை வீசுகிறது. நாம் புதிய பாராளுமன்ற கட்டடம் கட்டியுள்ள நிலையில், 30 ஆயிரம் பஞ்சாயத்து கட்டடங்கள் கட்டப்பட்டுள்ளது.

ஏழை மக்களுக்கு லட்சக்கணக்கான வீடுகள் கட்டிக் கொடுத்ததில் பா.ஜனதாவின் டபுள்-என்ஜின் ஆட்சி நடைபெறும் மாநிலங்களில் மத்திய பிரதேசமும் ஒன்று என்பதில் நான் மகிழ்ச்சி அடைகிறேன். சட்னாவில் ஏழை மக்கள் 1.32 லட்சம் வீடுகளை பெற்றுள்ளனர்.

போபால்:

மத்திய பிரதேசம் மாநிலத்தில் வரும் 17-ம் தேதி சட்டசபை தேர்தல் நடைபெற உள்ளது. அங்கு ஆளும் கட்சியான பா.ஜ.க., காங்கிரஸ் மற்றும் ஆம் ஆத்மி இடையே ஆட்சியை கைப்பற்ற கடும் போட்டி நிலவுகிறது.

இந்நிலையில், மத்திய பிரதேசம் தலைநகர் போபாலில் ஆம் ஆத்மி கட்சி சார்பில் நடைபெற்ற தேர்தல் பிரசார கூட்டத்தில் டெல்லி முதல் மந்திரி அரவிந்த் கெஜ்ரிவால் மற்றும் பஞ்சாப் முதல் மந்திரி பகவந்த் மான் ஆகியோர் பேரணியாக சென்று வாக்கு கேட்டனர். அப்போது அரவிந்த் கெஜ்ரிவால் பேசியதாவது:

75 ஆண்டுகளில் காங்கிரஸ் மற்றும் பாஜ.க ஆகிய கட்சிகளால் சாதிக்க முடியாததை ஆம் ஆத்மி கட்சி 5 ஆண்டுகளில் சாதித்துள்ளது.

டெல்லி மக்களுக்கு மின்சாரம் கூட இலவசமாக வழங்கப்படுகிறது.

சுதந்திரத்திற்குப் பிறகு பா.ஜ.க. மற்றும் காங்கிரஸ் என 2 கட்சிகள் மட்டுமே இருந்தன. இரு கட்சிகளின் தலைவர்களும் தங்கள் கஜானாவை நிரப்புவதைத் தவிர வேறு எதையும் செய்யவில்லை. அவர்கள் ஏதாவது செய்திருந்தால் நாங்கள் ஆம் ஆத்மியை உருவாக்க வேண்டிய அவசியமே இருந்திருக்காது என குறிப்பிட்டார்.

போபால்:

சத்தீஸ்கரில் நடைபெற்ற தேர்தல் பிரசார கூட்டத்தில் பேசிய பிரதமர் மோடி, அடுத்த 5 ஆண்டுகளுக்கு இலவச ரேஷன் பொருள்கள் வழஙகும் திட்டம் நீட்டிக்கப்படுகிறது என்றார்.

ஆனால், நடத்தை விதிகளை மீறியதற்காக பிரதமர் மோடி மீது தேர்தல் ஆணையத்தில் புகார் அளிக்கப்படும் என காங்கிரஸ் கட்சி தெரிவித்தது.

இந்நிலையில், மத்திய பிரதேசம் மாநிலத்தின் குணா தொகுதியில் நடைபெற்ற தேர்தல் பிரசார கூட்டத்தில் பிரதமர் நரேந்திர மோடி பங்கேற்றார். அப்போது அவர் பேசியதாவது:

அடுத்த 5 ஆண்டுகளுக்கு இலவச ரேஷன் தருவதாக அறிவித்து குற்றம் இழைத்துள்ளதால் மோடி மீது தேர்தல் ஆணையத்தில் சென்று புகார் அளிக்கப் போவதாக காங்கிரஸ் அறிவித்துள்ளது.

காங்கிரசைக் கண்டு நான் பயப்பட வேண்டுமா? என்னைத் தடுக்க நீங்கள் உலகில் எந்த நீதிமன்றத்திற்கும் செல்லலாம்.

நான் மக்கள் மன்றத்தில் முடிவுகளை எடுக்கிறேன் என்று அவர்களுக்குச் சொல்ல விரும்புகிறேன் என தெரிவித்தார்.

இந்தூர்:

மத்திய பிரதேசத்தில் வரும் 25-ம் தேதி சட்டசபை தேர்தல் நடைபெற உள்ளது. இதற்காக ஆளும் பா.ஜ.க., காங்கிரஸ் உள்ளிட்ட அரசியல் கட்சிகள் வாக்கு சேகரிப்பில் ஈடுபட்டு வருகின்றன.

இந்நிலையில், மத்திய பிரதேசத்தின் இந்தூர் நகரில் காங்கிரஸ் கட்சி சார்பில் பேரணி நடைபெற்றது. அந்தப் பேரணியில் காங்கிரஸ் கட்சியின் பொதுச் செயலாளர் பிரியங்கா காந்தி கலந்துகொண்டார். இந்த பேரணி காங்கிரஸ் கட்சியின் சமூக ஊடகத்தில் நேரலையாக ஒளிபரப்பப்பட்டது.

அப்போது, கட்சியின் மூத்த தலைவர் ஒருவர் பிரியங்கா காந்திக்கு பூங்கொத்து கொடுத்துள்ளார்.

ஆனால், அதனை வாங்கிப் பார்த்த பிரியங்கா காந்திக்கு அதிர்ச்சி ஏற்பட்டது. பூங்கொத்தில் ஒரு பூவை கூட காணவில்லை. அது காலியாக இருந்தது. இதனைப் பார்த்த அவர் மேடையிலேயே சிரித்துவிட்டார். அவருடன் மற்றவர்களும் சேர்ந்து சிரித்தனர்.

இதுதொடர்பாக வெளியான வீடியோவில், காங்கிரஸ் தலைவர்கள் பலர் ஒருவர் பின் ஒருவராக சென்று பிரியங்கா காந்திக்கு வாழ்த்துகளைத் தெரிவிக்கின்றனர். அவர்களை புன்னகையோடு வரவேற்று, அவர் திருப்பி அனுப்புகிறார். சிலர் அவருக்கு ரோஜாக்களை வழங்கினர். வேறு சிலர் அவருடன் ஒன்றாக நின்று புகைப்படங்கள் எடுத்துக்கொண்டனர்.

அப்போது ஒருவர், பூங்கொத்து கொண்டு வந்து கொடுக்கிறார். அதனைப் பார்த்த பிரியங்கா, இதில் பூக்கள் எங்கே? என அவரிடம் கேட்கிறார். சிரித்துக்கொண்டே அவர் பின்னால் சென்று மறைகிறார். இதனை கவனித்த கட்சி தொண்டர்கள் இடையே சிறிது சலசலப்பு ஏற்பட்டது.

மத்திய பிரதேசத்தில் வருகிற 17-ந்தேதி ஒரே கட்டமாக 230 தொகுதிகளுக்கு தேர்தல் நடைபெற இருக்கிறது. இன்னும் இரண்டு வாரங்களே உள்ள நிலையில் பிரசாரம் சூடு பிடித்துள்ளது. மத்திய பிரதேச மாநிலத்தில் காங்கிரஸ்- பா.ஜனதா இடையே நேரடி போட்டி நிலவுகிறது. இருந்தபோதிலும் பகுஜன் சமாஜ், சமாஜ்வாடி, ஆம் ஆத்மி கட்சிகளும் களத்தில் உள்ளன.

பா.ஜனதாவிடம் இருந்து ஆட்சியை கைப்பற்ற நினைக்கும் காங்கிரஸ் கட்சியில் போட்டியிட சீட் கிடைக்காத தலைவர்களில் சிலர், காங்கிரஸ் வேட்பாளர்களை எதிர்த்து போட்டியிட முடிவு செய்தனர். சில தலைவர்கள் சுயேட்சையாக போட்டியிடுகின்றனர். சில தலைவர்கள் சமாஜ்வாடி, பகுஜன் சமா, ஆம் ஆத்மி கட்சிகளில் இணைந்து போட்டியிடுகின்றனர்.

இவ்வாறு சொந்த கட்சி வேட்பாளர்களை எதிர்த்து போட்யிடும் 39 தலைவர்களை காங்கிரஸ் கட்சி, கமல்நாத்தின் நேரடி உத்தரவின்பேரில் கட்சியில் இருந்து அதிரடியாக நீக்கியுள்ளது.

இதில் முன்னாள் எம்.பி. பிரேம்சந்த் குட்டு (அலோட்), முன்னாள் எம்.எல்.ஏ.-க்கள் அந்தர் சிங் தர்பார் (மோவ்), யாத்வேந்த்ர சிங் (நகோட்) ஆகியோர் அடங்குவர். மேலும், மாநில கட்சி செய்தி தொடர்பாளர் அஜய் சிங் யாதவ் (கர்காபுர்), நசிர் இஸ்லாம் (போபால் வடக்கு), அமிர் அக்யீல் (போபால் வடக்கு) ஆகியோரும் நீக்கப்பட்டுள்ளனர்.

போபால்:

மத்திய பிரதேசத்தில் வரும் 17-ம் தேதி சட்டசபை தேர்தல் நடைபெறுகிறது. இதற்காக மொத்தமுள்ள 230 தொகுதிகளுக்கும் வேட்பாளர்கள் அறிவிக்கப்பட்டு தீவிர பிரசாரத்தில் ஈடுபட்டு வருகின்றனர்.

ஆளும் கட்சியான பா.ஜ.க.வுக்கும், ஆட்சியைக் கைப்பற்ற காங்கிரசுக்கும் இடையே கடும் போட்டி நிலவுகிறது.

இந்நிலையில், மத்திய பிரதேசத்தின் கரேலி பகுதியில் காங்கிரஸ் சார்பில் நடந்த தேர்தல் பிரசார கூட்டத்தில் காங்கிரஸ் முன்னாள் முதல் மந்திரி கமல்நாத் கலந்து கொண்டார். அப்போது அவர் பேசியதாவது:

நான் எங்கு சென்றாலும் மக்கள் சிவராஜ் சிங்குக்கு அன்பான பிரியாவிடை கொடுக்க முடிவு செய்திருப்பதைக் காண்கிறேன்.

சிவராஜ் சிங் 22,000 அறிவிப்புகள் வெளியிட்டுள்ளார்.

கடந்த 5 மாதங்களில் அவரது அறிவிப்பு மெஷின் இரட்டிப்பு வேகத்தில் இயங்கியது.

ஆனால் அறிவிப்பு மெஷினின் பேட்டரி விரைவில் தீர்ந்துவிடும் என தெரிவித்தார்.

மத்திய பிரதேசம், சத்தீஸ்கர் உள்ளிட்ட ஐந்து மாநிலங்களில் சட்டசபை தேர்தல் நடைபெற இருக்கிறது. மத்திய பிரதேசத்தில் மீண்டும் ஆட்சியை பிடிக்க பா.ஜனதா நினைக்கிறது. அதேவேளையில் சத்தீஸ்கரில் ஆட்சியை தக்கவைத்துக் கொள்ள காங்கிரஸ் விரும்புகிறது.

தேர்தல் நடைபெறும் மாநிலங்களுக்கு தேசிய தலைவர்கள் படையெடுத்த வண்ணம் உள்ளனர். அந்த வகையில் மத்திய உள்துறை அமைச்சர் அமித் ஷா மத்திய பிரதேசத்தில் இன்று முதல் மூன்று நாட்கள் பயணம் மேற்கொண்டு தீவிர தேர்தல் பிரசாரத்தில் ஈடுபட இருக்கிறார்.

ஜபால்புர், சிந்த்வாரா, போபால், சத்தார்புர், ரெவா, ஷஹ்டோல், உஜ்ஜைன், இந்தூர், குவாலியர் மாவட்டங்களுக்கு பயணம் மேற்கொள்ளும் அமித் ஷா பல்வேறு பேரணியில் கலந்து கொண்டு பேசுகிறார்.

இன்று மதியம் ஜபால்புரில் உள்ள பா.ஜனதா கட்சி அலுவலகத்தில் நடைபெறும் கூட்டத்தில் பேசுகிறார். மாலை 4 மணிக்கு சிந்த்வாரா மாவட்டத்தில் நடைபெறும் பொதுக்கூட்டத்தில் கலந்து கொண்டு பேசுகிறார்.

மத்திய பிரதேச மாநிலத்தில் நவம்பர் 17-ந்தேதி தேர்தல் நடைபெற இருக்கிறது, வாக்கு எண்ணிக்கை டிசம்பர் 3-ந்தேதி நடைபெறும்.

காங்கிரஸ் கட்சியின் முன்னாள் தலைவரும், மக்களவை எம்.பி.யுமான ராகுல் காந்தி, சத்தீஸ்கர் மாநிலத்தில் நான்கு தொகுதிகளில் நடைபெறும் பேரணியில் கலந்த கொள்ள இருக்கிறார். இன்றும், நாளையும் சத்தீஸ்கரில் கட்சி நிகழ்ச்சிகளிலும் கலந்து கொள்கிறார்.

இன்று ராய்ப்பூர் வரும் ராகுல் காந்தி மதியம் ஒரு மணிக்கு பானுபிரதாப்பூர் தொகுதிக்கு உட்பட்ட பகுதியில் நடைபெறும் பேரணியில் கலந்து கொண்டு பேசுகிறார். அதன்பின் மதியம் 2.40 மணிக்கு கொண்டகான் தொகுதிக்கு உட்பட்ட பகுதியில் பேரணியில் கலந்து கொண்டு பேசுகிறார். அதேபோல் நாளை இரண்டு இடங்களில் பேசுகிறார்.

90 தொகுதிகளை கொண்ட சத்தீஸ்கரில் வருகிற 7-ந்தேதி (நவம்பர்) 20 தொகுதிகளுக்கு முதற்கட்டமாக தேர்தல் நடைபெற இருக்கிறது. மீதமுள்ள 70 தொகுதிகளுக்கு நவம்பர் 17-ந்தேதி தேர்தல் நடைபெற இருக்கிறது.

மத்திய பிரதேச மாநிலத்தின் நர்மதா நதிக்கரையை அடுத்து உள்ள நகரம் நர்மதாபுரம்.

நர்மதாபுரத்தில் உள்ள குடியிருப்பு பகுதி ஒன்றில் ஒரு பாம்பு நுழைந்தது. அது அப்பகுதியில் உள்ள பைப்லைன் ஒன்றில் நுழைந்து விட்டதால், அதனை விரட்ட அங்குள்ள குடியிருப்புவாசிகள் முயன்றனர். ஆனால், உள்ளே சென்ற பாம்பு வெளியே வராததால், பூச்சிகொல்லி மருந்தை நீரில் கலந்து அந்த பைப்லைனில் உள்ளே செலுத்தினர்.

இதில் மயங்கிய அந்த பாம்பு உள்ளேயே சுருண்டு கிடந்தது. இதை கண்டு செய்வதறியாது திகைத்த மக்கள் அப்பகுதியில் உள்ள காவல்நிலையத்திற்கு தகவல் தெரிவித்தனர்.

அதுல் சர்மா (Atul Sharma) எனும் கான்ஸ்டபிள் அங்கு விரைந்து வந்தார். அவர் அந்த பாம்பின் நிலையை சிறிது நேரம் கூர்ந்து கவனித்தார்.

பிறகு மெதுவாக அதை கையில் பிடித்து அதன் வாயில் தன் வாயை வைத்து வேகமாக ஊதினார். அவ்வப்போது நீரையும் அதன் மேல் தெளித்தார். சுற்றி நின்று அவரது நடவடிக்கைகளை மக்கள் பார்த்து கொண்டிருக்கும் போதே அந்த பாம்பு மெதுவாக நகர ஆரம்பித்தது. விஷத்தன்மையற்றதாக கூறப்படும் அந்த பாம்பு, சிறிது நேரத்தில் அங்கிருந்து ஊர்ந்து சென்றது.

இதை கண்ட அப்பகுதி மக்கள் அதுல் சர்மாவை மிகவும் பாராட்டினர்.

இது குறித்து பேசும் போது, இந்த வித்தையை "டிஸ்கவரி" சேனலை பார்த்து கற்று கொண்டதாகவும், இது போல் எண்ணற்ற பாம்புகளை தாம் காப்பாற்றியுள்ளதாகவும், அதுல் தெரிவித்தார்.

அதுல் இவ்வாறு கூறினாலும், கால்நடை மருத்துவர்கள் அவர் கடைபிடித்த "சிபிஆர்" (Cardiopulmonary Resucitation) எனப்படும் இந்த முறையில் பாம்பை உயிர் பெற செய்ய முடியாது என்றும் இச்சம்பவத்தில் அப்பாம்பிற்கு தானாகவே நினைவு திரும்பியிருக்கலாம் என்றும் தெரிவித்தனர்.

தமிழ் திரையுலக சூப்பர் ஸ்டார் ரஜினிகாந்த் நடித்து 2007ல் வெளிவந்த "சிவாஜி" திரைப்படத்தில் இந்த சிகிச்சை முறையை கையாண்டு நடிகர் ரகுவரன் உயிர் மீட்கும் காட்சிகள் பிரபலமாக பேசப்பட்டது. சில நாட்களுக்கு முன் ஒரு குரங்கு இதே முறையில் காப்பாற்றப்பட்டதாகவும் செய்திகள் வெளியாகின.

தற்போது அதுலின் இந்த நடவடிக்கை அங்குள்ளவர்களால் படமாக்கப்பட்டு சமூக வலைதளங்களில் வைரலாகி வருகிறது.

போபால்:

மத்திய பிரதேசத்தில் அடுத்த மாதம் (நவம்பர்) 17-ந்தேதி சட்டசபை தேர்தல் நடைபெறுகிறது. இதற்காக மொத்தமுள்ள 230 தொகுதிகளுக்கும் காங்கிரஸ் கட்சி வேட்பாளர்களை அறிவித்து இருந்தது.

ஆனால் சில தொகுதிகளில் அறிவிக்கப்பட்ட வேட்பாளர்களுக்கு தொண்டர்கள் கடும் எதிர்ப்பு தெரிவித்தனர். இது தொடர்பாக மாநில காங்கிரஸ் தலைவர் கமல்நாத் வீட்டு முன் அவர்கள் போராட்டத்தில் இறங்கினர்.

இதைத்தொடர்ந்து 4 தொகுதிகளுக்கு ஏற்கனவே அறிவிக்கப்பட்ட வேட்பாளர்களை மாற்றி விட்டு புதிதாக வேட்பாளர்கள் அறிவிக்கப்பட்டு உள்ளனர். அதன்படி சுமாலி, பிபாரியா, பாட்நகர், ஜவோரா ஆகிய சட்டசபை தொகுதிகளுக்கு புதிய வேட்பாளர்கள் அறிவிக்கப்பட்டு உள்ளனர்.

மத்திய பிரதேசத்தில் வேட்புமனு தாக்கல் செய்வதற்கான கடைசி நாள் வருகிற 30-ந்தேதி என்பது குறிப்பிடத்தக்கது.

போபால்:

230 தொகுதிகளை கொண்ட மத்திய பிரதேச சட்டசபைக்கு நவம்பர் 17-ந் தேதி தேர்தல் நடக்கிறது. அங்கு ஆளும் பா.ஜனதாவுக்கும், எதிர்கட்சியான காங்கிரசுக்கும் இடையே ஆட்சியை கைப்பற்ற கடும் போட்டி நிலவுகிறது.

இந்த நிலையில் தேர்தல் பிரசாரத்தின்போது மத்திய பிரதேச போக்குவரத்து மற்றும் வருவாய்த்துறை மந்திரி கோவிந்த் சிங் ராஜ்புத் ஓட்டு போடும் வாக்காளர்களுக்கு பணம் வழங்கப்படும் என்று அறிவித்துள்ளார். தனது கட்சிக்கு ஆதரவாக அதிக பட்ச வாக்குகளை பெறும் வாக்குசாவடிக்கு ரூ.25 லட்சம் பரிசு தொகை வழங்கப்படும் என்று அவர் கூறியுள்ளார்.

அவரது இந்த பேச்சின் வீடியோ சமூக வலைதளத்தில் வைரலானது.

இது தொடர்பாக மத்திய பிரதேச மந்திரி கோவிந்த் சிங் ராஜ்புத் மீது காங்கிரஸ் தேர்தல் கமிஷனில் புகார் அளித்தது. விசாரணையில் அவர் தேர்தல் நடத்தை விதிமுறையை மீறியது கண்டறியப்பட்டது.

இதையடுத்து தேர்தல் நடத்தை விதிமுறைகளை மீறியதாக மத்தியபிரதேச பா.ஜனதா மந்திரி கோவிந்த் சிங் ராஜ்புத் மீது வழக்கு பதிவு செய்யப்பட்டுள்ளது.

சத்தீஸ்கர், மத்தியபிரதேசம், மிசோரம், ராஜஸ்தான், தெலுங்கானா ஆகிய 5 மாநிலங்களில் சட்டசபை தேர்தல் அறிவிக்கப்பட்டு ஏற்பாடுகள் நடந்து வருகின்றன. வேட்பாளர்கள் அறிவிக்கப்பட்டு வரும் நிலையில் மனுதாக்கல் மற்றும் பிரசாரம் சூடு பிடித்துள்ளது. சத்தீஸ்கர் மாநிலத்தில் முதல் கட்ட மனுதாக்கல் கடந்த 13-ந்தேதி நடந்தது. இந்நிலையில் இன்று அந்த மாநிலத்தில் 2-வது கட்ட 70 தொகுதிகளுக்கான வேட்பு மனு தாக்கல் தொடங்கி நடந்து வருகிறது.

அதுபோல மத்திய பிரதேசத்தில் இன்று (சனிக்கிழமை) மனுதாக்கல் தொடங்கியது. அந்த மாநிலத்தில் உள்ள 230 தொகுதிகளுக்கும் வருகிற 17-ந்தேதி ஒரே கட்டமாக ஓட்டுப்பதிவு நடத்தப்பட உள்ளது. இதனால் அந்த மாநிலத்தில் இன்று வேட்புமனு தாக்கலுக்கு பிறகு பிரசாரம் உச்சக்கட்ட பரபரப்பை ஏற்படுத்த உள்ளது.