கன்னியாகுமரி

கன்னியாகுமரி மாவட்டத்தில், தொகுதியின் காங்கிரஸ் எம்.பி விஜய் வசந்த் இன்று பல்வேறு திட்டங்களை தொடங்கி வைத்தார்.

அதன்படி, கன்னியாகுமரி மாவட்டம், அகத்தீஸ்வரம் வட்டத்தில் உள்ள மருங்கூர் பேரூராட்சி பொது மக்கள் மற்றும் பெற்றோர்களின் கோரிக்கையை ஏற்று அங்கன்வாடி கட்டிடம் ஒன்று கட்ட முடிவு செய்யப்பட்டது. 

பாராளுமன்ற உறுப்பினர் தொகுதி மேம்பாட்டு நிதியிலிருந்து ரூ.14.5 லட்சம் செலவில் கட்டப்பட்ட அங்கன்வாடி கட்டிடத்தை விஜய் வசந்த் இன்று திறந்து வைத்தார்.

இதேபோல், மகளிருக்கு பொருளாதார சுதந்திரம் வழங்குவதில் மிக சிறப்பாக செயலாற்றி வரும் மகளிர் சுய உதவி குழுக்களை ஊக்குவிக்கும் வகையில், தேரூர் பேரூராட்சி சங்கரன்புதூரில் மகளிர் சுய உதவி கட்டிடம் கட்ட முடிவு செய்யப்பட்டது. 

கட்டிடம் கட்ட பாராளுமன்ற உறுப்பினர் தொகுதி மேம்பாட்டு நிதியிலிருந்து ரூ.5 லட்சம் ஒதுக்கீடு செய்யப்பட்டது. இந்நிலையில், கட்டிட பணிகள் நிறைவுபெற்ற நிலையில், விஜய் வசந்த் எம்.பி இன்று திறந்து வைத்தார்.

மேலும், பாராளுமன்ற உறுப்பினர் தொகுதி மேம்பாட்டு நிதியிலிருந்து பீமநகரி ஊராட்சி அண்ணாநகரில் ரூ.9,50,000 தொகை ஒதுக்கீடு செய்து அலங்கார தரை கற்கள் பதித்து அந்த சாலையை மக்கள் பயன்பாட்டிற்காக விஜய் வசந்த் எம்.பி இன்று திறந்து வைத்தார். 

அது போல் 60000 லிட்டர் குடிநீர் மேல்நிலை நீர் தேக்க தொட்டி ரூ.14 லட்சம் செலவில் திறந்து வைத்தார். 

மேலும், சென்னை - நாகர்கோவில் தினசரி வந்தே பாரத் ரெயில் சேவை நேற்று துவங்கி வைக்கப்பட்டது. ரெயில் நாகர்கோவில் வந்தடைந்தபோது உற்சாக வரவேற்பளித்ததாக விஜய் வசந்த் எம்பி எக்ஸ் பக்கத்தில் தெரிவித்துள்ளார்.

கன்னியாகுமரி:

கன்னியாகுமரி மாவட்டம் மயிலாடி பேரூராட்சிக்கு உட்பட்ட காமராஜ் நகரில் மேல்நிலை நீர் தேக்க தொட்டி தேவை என்று பொதுமக்கள் கோரிக்கை வைத்திருந்தனர்.

மக்களின் கோரிக்கையை ஏற்று பாராளுமன்ற உறுப்பினர் தொகுதி மேம்பாட்டு நதியிலிருந்து ரூ. 20 லட்சம் ஒதுக்கீடு செய்யப்பட்டது.

பின்னர் மேல்நிலை நீர் தேக்க தொட்டியை மக்கள் பயன்பாட்டிற்கு பாரளுமன்ற உறுப்பினர் விஜய் வசந்த் இன்று திறந்து வைத்தார்.

இந்த நிகழ்ச்சியில் காங்கிரஸ் கட்சி நிர்வாகிகள் மற்றும் பொதுமக்கள் கலந்து கொண்டனர்.

கன்னியாகுமரி:

ம.தி.மு.க. முதன்மைச் செயலாளர் துரை வைகோ கன்னியாகுமரியில் இன்று நிருபர்களுக்கு பேட்டி அளித்தார். அப்போது அவர் கூறியதாவது:-

தமிழக பள்ளிக் கல்வித்துறைக்கு, ஒன்றிய அரசு கொடுக்க வேண்டிய நிதியை கொடுக்க மறுப்பதால் தமிழகத்தில் 15 ஆயிரத்துக்கும் மேற்பட்ட ஆசிரியர்களுக்கு சம்பளம் கொடுக்க முடியாத சூழல் உள்ளது. கொரோனா காலகட்டத்தில் விடுபட்ட மாணவர்களை மீண்டும் பள்ளிக்கு கொண்டு வந்தது, காலை உணவு திட்டம், ஸ்மார்ட் கிளாஸ் என அனைத்து திட்டமும் தமிழக அரசால் சிறப்பாக செயல் படுத்தப்பட்டு இந்தியாவுக்கு முன் உதாரணமாக இருந்து வருகிறது.

மத்திய அமைச்சரிடம் கோரிக்கை வைத்தால். தேசிய கல்விக் கொள்கையில் இணைந்தால் மட்டுமே நிதி அளிக்கப்படும் என்கிறார். இதனால் கடும் நிதி நெருக்கடி ஏற்பட்டு அரசு உதவி பெறும் பள்ளிகளும் கூட கடுமையாக பாதிக்கப்படுகிறது. மாற்றாந்தாய் மனப்பான்மையோடு ஒன்றிய அரசு செயல்படுகிறது. கல்வியில் எக்காரணம் கொண்டும் அரசியல் இருக்கக் கூடாது.

பழனியில் முருகன் மாநாடு நடத்தியதை தனிப்பட்ட முறையில் நான் வரவேற்கிறேன். முருகன் தமிழ் கடவுள் மட்டும் கிடையாது. இதில் தமிழ் கலாச்சாரமும் ஒன்றிணைந்து இருக்கிறது. எல்லா அரசியல் கட்சிகளும் இஸ்லாமியர்களின் நோன்பு நிகழ்ச்சிகளில் கலந்து கொள்கிறோம், கிறிஸ்மஸ் நிகழ்ச்சியில் கேக் வெட்டி கொண்டாடுகிறோம்.

முருகர் என்பது தமிழ் கலாச்சாரத்தோடு சேர்ந்தது அதை ஒரு மதமாக நான் பார்க்கவில்லை. அந்த நிகழ்ச்சியில் துறை சார்ந்த அமைச்சர் கலந்து கொண்டதில் எந்த தவறும் கிடையாது. ஒரு குறிப்பிட்ட இயக்கம் இந்து மதத்தை சொந்தம் கொண்டாடி வருகின்ற இந்த வேளையில் அதை உடைப்பதற்கான புரிதலாக கூட நான் இதை பார்க்கிறேன்.

முன்னாள் முதலமைச்சர் கருணாநிதியின் நாணயம் வெளியிட்டது மத்திய அரசு. அதில் மத்திய அமைச்சர் கலந்து கொண்டது புரோட்டா கால். தொடர்ந்து மத்திய அரசினை நாங்கள் எதிர்த்து வருகிறோம். தமிழகத்தில் ஒருபோதும் தி.மு.க. தலைமையிலான கூட்டணி மாறாது. கூட்டணி மாற்றம் என்ற நிலையை தி.மு.க. தலைமை ஒருபோதும் எடுக்காது.

அண்ணாமலை அவருடைய அரசியல் அறிவை வளர்க்க படிப்பு சம்பந்தமாக வெளிநாடு சென்றுள்ளார். அதனை வரவேற்கிறேன். நாங்கள் தி.மு.க. கூட்டணியில் இருக்கிறோம். தி.மு.க. மீது எங்களுக்கு நம்பிக்கை இருக்கிறது. அப்படி இருக்க நாங்கள் ஏன் விஜய் கட்சியுடன் கூட்டணி வைக்க வேண்டும். அந்த சிந்தனை ஒருபோதும் கிடையாது.

இவ்வாறு அவர் கூறினார்.

நாகர்கோவில்:

வங்கக்கடலில் உருவான புயல் சின்னம் காரணமாக குமரி மாவட்டத்தில் கனமழை பெய்யும் என்று வானிலை மையம் எச்சரிக்கை விடுத்துள்ளது. இந்த நிலையில் மாவட்டம் முழுவதும் பரவலாக மழை பெய்து வருகிறது. நேற்று இரவும் மாவட்டம் முழுவதும் விட்டுவிட்டு மழை பெய்து கொண்டே இருந்தது. நாகர்கோவிலில் இன்று காலையில் வானத்தில் கருமேகங்கள் திரண்டு மப்பும் மந்தாரமாக காணப்பட்டது. திடீரென மழை வெளுத்து வாங்கியது. காலை 7.30 மணிக்கு பெய்ய தொடங்கிய மழை ஒரு மணி நேரத்துக்கு மேலாக இடைவிடாது கொட்டி தீர்த்தது. காலை நேரத்தில் பெய்த மழையின் காரணமாக பள்ளி சென்ற மாணவ-மாணவிகள் பரிதவிப்பிற்கு ஆளானார்கள். மாணவிகள் குடை பிடித்தவாறு பள்ளிக்கு சென்றனர். சில மாணவ-மாணவிகள் மழையில் நனைந்தவாரே பள்ளிக்கு வரும் நிலை ஏற்பட்டது. மழையின் காரணமாக ரோடுகளிலும் வெள்ளம் கரைபுரண்டு ஓடியது.

மீனாட்சிபுரம் சாலை, அசம்புரோடு, கோட்டார் சாலைகளில் தண்ணீர் பெருக்கெடுத்து ஓடியது. தொடர்ந்து விட்டுவிட்டு மழை பெய்து கொண்டே இருந்ததால் அரசு மற்றும் தனியார் அலுவலகங்களுக்கு சென்ற ஊழியர்களும் பரிதவிப்பிற்கு ஆளானார்கள். தக்கலை, குழித்துறை, மார்த்தாண்டம், இரணியல், மயிலாடி, கொட்டாரம், அஞ்சுகிராமம், ஆரல்வாய்மொழி, முள்ளங்கினாவிளை மற்றும் அதன் புறநகர் பகுதிகளிலும் இன்று காலை முதலே விட்டுவிட்டு மழை பெய்து வருவதால் மாவட்டம் முழுவதும் குளுகுளு சீசன் நிலவுகிறது. திற்பரப்பு அருவி பகுதியில் பெய்து வரும் மழையின் காரணமாக அங்கு ரம்யமான சூழல் நிலவுகிறது. அருவியிலும் தண்ணீர் ஆர்ப்பரித்து கொட்டி வருகிறது.

மலையோர பகுதியான பாலமோர், பேச்சிப்பாறை, பெருஞ்சாணி அணைப்பதிலும் மழை பெய்தது. மழை பெய்து வருவதையடுத்து பேச்சிப்பாறை, பெருஞ்சாணி அணைகளுக்கு மிதமான அளவு தண்ணீர் வந்து கொண்டிருக்கிறது. ஏற்கனவே அணைகள் முழு கொள்ளளவு எட்டி உள்ள நிலையில் அணையின் நீர்மட்டத்தை பொதுப்பணித்துறை அதிகாரிகள் கண்காணித்து வருகிறார்கள். பேச்சிப்பாறை அணை நீர்மட்டம் இன்று காலை 43.03 அடியாக இருந்தது. அணைக்கு 657 கன அடி தண்ணீர் வந்து கொண்டிருக்கிறது. அணையில் இருந்து 581 கன அடி தண்ணீர் வெளியேற்றப்படுகிறது. பெருஞ்சாணி அணை நீர்மட்டம் 69.36 அடியாக உள்ளது. அணைக்கு 388 கன அடி தண்ணீர் வந்து கொண்டிருக்கிறது. அணையில் இருந்து 510 கன அடி தண்ணீர் வெளியேற்றப்படுகிறது. சிற்றார்-1 அணை நீர்மட்டம் 13.78 அடியாக உள்ளது. அணைக்கு 140 கன அடி தண்ணீர் வந்து கொண்டிருக்கிறது. அணையில் இருந்து 150 கன அடி தண்ணீர் வெளியேற்றப்படுகிறது.

ஆரோக்கியபுரம் முதல் நீரோடி வரை கடற்கரை கிராமங்களிலும் விட்டு விட்டு மழை பெய்து கொண்டே இருக்கிறது. கடல் சீற்றமாக காணப்படும் என்பதால் மீனவர்கள் கடலுக்கு செல்லக்கூடாது என்று எச்சரிக்கை விடப்பட்டிருந்த நிலையில் கடலுக்கு மீன் பிடித்து சென்ற பெரும்பாலான மீனவர்கள் கரை திரும்பினர். இன்று மாவட்டத்தின் பெரும்பாலான மீனவர்கள் கடலுக்கு மீன் பிடிக்க செல்லவில்லை. இதனால் விசைப்படகுகள், கட்டு மரங்கள் பாதுகாப்பான இடங்களில் நிறுத்தி வைக்கப்பட்டு இருந்தது.

கன்னியாகுமரி:

கன்னியாகுமரி மாவட்டம் அகத்தீஸ்வரத்தில் 1950-ம் ஆண்டு ஏப்ரல் 14-ம் தேதி ஹரிகிருஷ்ண பெருமாள் - தங்கம்மை தம்பதிக்கு மகனாக பிறந்தவர் வசந்தகுமார். இவருக்கு காங்கிரஸ் மூத்த தலைவர் குமரி ஆனந்தன் உள்பட 6 சகோதரர்கள் மற்றும் 2 சகோதரிகள்.

இளம் வயதில் வி.ஜி.பி. நிறுவனத்தில் விற்பனையாளராக பணியாற்றிய இவர், பின்னர் சிறிய மளிகை கடை ஒன்றை தொடங்கினார். ஆரம்பத்தில் மிதிவண்டியில் வீடுவீடாக சென்று பொருட்களை விற்று, அவற்றிற்கு தவணை முறையில் பணம் வசூலித்தார். அதன்பின்னர் படிப்படியாக முன்னேறி 1978-ஆம் ஆண்டு வசந்த் அண்டு கோ என்ற வீட்டு உபயோகப் பொருள் விற்பனைக் கடையைத் தொடங்கினார். அந்நிறுவனத்தின் மூலம் தொழிலதிபராக வெற்றிகண்ட வசந்தகுமார் தமிழ்நாடு, புதுச்சேரி, கேரளா என விரிபடுத்தி தொழில் சாம்ராஜ்யம் படைத்தார்.

இதைத்தொடர்ந்து காங்கிரஸ் கட்சியில் இணைந்த இவர், மாநில துணைத் தலைவராக பதவி வகித்தார். அதுமட்டுமின்றி காங்கிரஸ் கமிட்டியின் செயல் தலைவராகவும் பதவி வகித்தார். அத்துடன் நாங்குநேரி தொகுதியின் எம்.எல்.ஏ.வாக 2006 மற்றும் 2016-ம் ஆண்டு சட்டமன்ற தேர்தலில் வெற்றி பெற்றார். 2019-ம் ஆண்டு பாராளுமன்ற தேர்தலில் கன்னியாகுமரி தொகுதியில் போட்டியிட்ட இவர் வெற்றி பெற்று எம்.பி.யானார்.

சிறந்த தொழிலதிபராக மட்டுமின்றி, சிறந்த அரசியல்வாதியாகவும் எச்.வசந்தகுமார் திகழ்ந்தார்.

இந்நிலையில், கடந்த 2020-ஆம் ஆண்டு ஆகஸ்ட் 28-ஆம் தேதி உடல்நலக்குறைவால் எச்.வசந்தகுமார் காலமானார்.

கன்னியாகுமரி தொகுதி முன்னாள் எம்.பி. எச்.வசந்த குமாரின் 4ஆம் ஆண்டு நினைவு நாளில் அவரது மகன் விஜய் வசந்த் எம்.பி. அஞ்சாலி செலுத்தினர்.

இதைதொடர்ந்து பாராளுமன்ற உறுப்பினர் விஜய் வசந்த் சமூக வலைதளத்தில் கூறியிருப்பதாவது:-

உயிர் தந்தவரின் உயிர் பிரிந்து 4 ஆண்டுகள். மெய் விட்டு சென்றாலும் காலத்தால் அழிக்க முடியாத உங்கள் நினைவுகள் என்றும் பசுமையாய் எங்களுடன். நீங்கா நினைவுகளுடன் தந்தையின் நினைவு நாளில், அவர் வழி நடப்பதே அவருக்கு நான் செய்யும் நன்றி கடன் என்று கூறிகிறார்.

பாராளுமன்ற உறுப்பினர் விஜய் வசந்த் சமூக வலைதளத்தில் கூறியிருப்பதாவது:-

 திருவட்டார் கிழக்கு வட்டார காங்கிரஸ் கமிட்டியின் செயலாளர் ராபின்சன் அவர்களின் தாயார் டாட்டி பாய் அவர்கள் மறைந்த செய்தி அறிந்து அவர்கள் இல்லத்திற்கு சென்று உடலுக்கு மலர் மாலை அணிவித்து இறுதி அஞ்சலி செலுத்தி அவரது குடும்பத்தினருக்கு ஆறுதல் தெரிவித்தேன்.

முத்தமிழ் முருகன் மாநாடு நடைபெற்றதை பற்றி விஜய் வசந்த் எம்.பி.யிடம் செய்தியாளர்கள் கேள்வி எழுப்பினர்.

அதில் கூறியிருப்பதாவது:-

இறைவன் முருகனை பற்றி புகழ்வதற்கோ அல்லது பேசுவதற்கோ நாள் கிழமை என்பது கிடையாது. ஒவ்வொரு வழிபாட்டு தளங்களிலும் ஒவ்வொருடைய இறைவன் வழிபாடுகள் இருக்கும்.

அதில் முருக பெருமனை வைத்து ஒரு கூட்டம் நடக்கிறது. எல்லாவற்றையுமே விமர்சனம் செய்வது என்பது தவறான விஷயம் என்பதை பதிவு செய்கிறேன். பழனி கோவிலில் முருகனை பற்றி கருத்தரங்கம் நடை பெற்றது. இதை அரசியல் ஆக்கவேண்டாம் என்று தான் சொல்வேன். இதற்கும் தேர்தலுக்கும் எந்தவித சம்மந்தமும் இல்லை. இது அரசங்கம் நடத்தும் ஒரு நிகழ்ச்சியகவே நான் கருதுகிறேன்.

கேள்வி- முத்தமிழ் முருகன் மாநாடு பற்றி இது ஓட்டுக்கான யுக்தி என்று தமிழசை சொல்கிறார். இதை பற்றி உங்கள் கருத்து என்ன.

பதில்- எல்லாமே ஓட்டுக்கான யுக்தி என்று சொல்ல முடியாது. தமிழக அரசை குறை சொல்வது தவறானது. அது அவர்களுடைய கருத்து சொல்லி இருக்கிறார். ஆனால் தேர்தலுக்கான ஒரு பணியாக கருதவில்லை. இதை இறைவனுக்கு செய்கிற பணியாகவே கருதுகிறேன்.

கேள்வி- தமிழக வெற்றி கழகம் சார்பில் கொடி அறிமுகம் செய்து இருக்கிறார்கள். பல்வேறு விமர்சனங்கள் வைக்கப்பட்டுள்ளன. இதை பற்றி உங்கள் கருத்து?

பதில்- விமர்சனங்கள் இல்லாமல் எதுவும் இல்லை. மக்களும் அரசியல் வட்டராங்களும் பெரும் எதிர்பார்ப்பில் உள்ள தருணத்தில் விமர்சனங்கள் இயற்கையானது. இந்த விமர்சனங்களை தாண்டி வருவது தான் வெற்றிக்கான இலக்கு. வருங்காலங்களில் இந்த விமர்சனங்களை எப்படி கையாளுகிறார் என்பதை பார்ப்போம்.

கேள்வி- பிரதமரின் உக்ரைன் பயணம் எந்த அளவிற்கு சிறப்பு வாய்ந்ததாக அமையும்.

பதில்- உக்ரைனுக்கு பிரதமர் மோடி முதல் முறையாக சென்றார். அங்குள்ள பிரதமரை சந்தித்து பேசியுள்ளார். அதன் நிலைப்பாடு இனிமேல் தான் தெரியும்.

இதனிடையே விஜய் வசந்த் சமூக வலைதளத்தில் பதிவிட்டுள்ள மற்றொரு பதிவு-

கொல்லங்கோடு நகராட்சிக்கு உட்பட்ட பகுதிகளில் நன்றி கூறும் பயணம் நடைபெற்று வருகிறது. வழிநெடுகிலும் அன்பும் ஆதரவும் தந்து கொண்டிருக்கும் பொது மக்களுக்கும், காங்கிரஸ் மற்றும் இந்திய கூட்டணி நிர்வாகிகளுக்கும் நன்றி.

கன்னியாகுமரி மாவட்டம் கிள்ளியூர் சட்டமன்ற தொகுதிக்கு உட்பட்ட ஊரம்பு சந்திப்பில் முன்னாள் பிரதமர் இந்திரா காந்தி சிலைக்கு அம்மாவட்ட காங்கிரஸ் எம்.பி விஜய் வசந்த் மாலை அணிவித்தார்.

இதைதொடர்ந்து, காங்கிரஸ், இந்தியா கூட்டணி தலைவர்கள் மற்றும் தொண்டர்களுடன் நன்றி தெரிவிக்கும் பயணத்தை மேற்கொண்டனர்.

அப்போது, எம்.பி விஜய் வசந்த் வாகனத்தில் நன்றி தெரிவித்தபடி ஊர்வலமாக சென்றனர். வழிநெடுகிலும் பொது மக்கள் நின்று வரவேற்றனர்.

இதுதொடர்பாக விஜய் வசந்த் தனது இணையத்தள பக்கத்தில் பகிர்ந்துள்ளார். 

தமிழகத்தில் கடந்த 10ம் மற்றும் 12ம் வகுப்பு பொதுத் தேர்வுகளில் கன்னியாகுமரி மாவட்டத்தில் அதிக மதிப்பெண் பெற்ற மாணவர்களுக்கு வசந்த் & கோ சார்பில் வசந்த் விருதுகள் வழங்கப்பட்டு வருகிறது. 

மாணவர்களை கவுரவிக்கும் விதமாக வழங்கப்பட்டு வரும் இந்த விருதுகள் ஏற்கனவே முதற்கட்டமாக வழங்கப்பட்டது.

இந்நிலையில், பொதுத்தேர்வில் அதிக மதிப்பெண் பெற்ற மாணவர்களை கௌரவிக்கும் விதமாக இன்று இரண்டாம் கட்டமாக கன்னியாகுமரி மாவட்டத்தை சேர்ந்த மாணவர்களுக்கு வசந்த் & கோ சார்ப்பில் "வசந்த் விருதுகள்" வழங்கப்பட்டது.

மாணவர்களுக்கு கன்னியாகுமரி மாவட்ட எம்.பி விஜய் வசந்த் மாணவர்களுக்கு விருதுகள் வழங்கி பாராட்டினார்.

கன்னியாகுமரி:

பாராளுமன்ற உறுப்பினர் விஜய வசந்த் சமூக வலைதளத்தில் கூறியிருப்பதாவது:-

இன்று கிள்ளியூர் சட்டமன்ற தொகுதிக்கு உட்பட்ட பகுதிகளில் பொதுமக்களை சந்தித்து நன்றி தெரிவிக்க வருகிறேன். உங்கள் அன்பையும் ஆதரவையும் எதிர்பார்க்கிறேன்.

பங்குச்சந்தை மோசடிகள் குறித்து பாராளுமன்ற கூட்டுக்குழு விசாரணை நடத்தக்கோரியும், சாதிவாரி கணக்கெடுப்பை நடத்த வலியுறுத்தியும் சென்னை நுங்கம்பாக்கத்தில் உள்ள சாஸ்திரி பவன் எதிரே காங்கிரஸ் கட்சி சார்பில் ஆர்ப்பாட்டம் நடைபெற்றது.

தமிழ்நாடு காங்கிரஸ் தலைவர் செல்வப்பெருந்தகை தலைமையில் நடந்த போராட்டத்தில் தேசிய செயலாளர் ஸ்ரீவெல்ல பிரசாத், தமிழ்நாடு சட்டமன்ற காங்கிரஸ் தலைவர் ராஜேஷ்குமார் மற்றும் ஜோதிமணி, சசிகாந்த் செந்தில், விஜய் வசந்த், டாக்டர் விஷ்ணுபிரசாத், வக்கீல் சுதா உள்ளிட்ட எம் பிக்கள், விளவங்கோடு தொகுதி எம் எல் ஏ தாரகை கத்பர்ட், மாநில துணைத் தலைவர் கோபண்ணா, செயல்தலைவர் மயூரா ஜெயக்குமார், பொதுச்செயலாளர்கள் தளபதி பாஸ்கர், டி.செல்வம், பி.வி.தமிழ்செல்வன், காண்டீபன், மகிளா காங்கிரஸ் மாநில தலைவி ஹசீனா சையத் உள்ளிட்டோர் முன்னிலை வகித்தனர்.

ஆர்ப்பாட்டத்தில் செல்வப்பெருந்தகை பேசியதாவது:-

அமெரிக்க ஆராய்ச்சி நிறுவனமான ஹிண்டன்பர்க் பங்குச்சந்தை மோசடியை ஆதாரத்துடன் தொடர்ந்து அம்பலப்படுத்தி வருகிறது. பாராளுமன்ற தேர்தலுக்கு முன்பும், பின்பும் பங்குச்சந்தை செயற்கையான ஏற்ற, இறக்கத்துடன் காணப்பட்டது. இதனால் ரூ,35 லட்சம் கோடி இழப்பு ஏற்பட்டது. இதன் பின்புலத்தில் செபியின் தலைவர் மாதபி பூரி புச் இருந்து, அதானி நிறுவனங்களின் பங்குகளை செயற்கையான முறையில் ஏற்ற, இறக்கம் காணச் செய்தார்.

இது குறித்து பாராளுமன்ற கூட்டுக்குழு விசாரணை கோரி ராகுல்காந்தி வலியுறுத்தி வருகிறார். ஆனால், மத்திய அரசு மறுத்து வருகிறது. அதுபோல சமூக நீதி மீது நம்பிக்கை இல்லாத பாஜக அரசு சாதிவாரி மக்கள் தொகை கணக்கெடுப்பை நடத்தவில்லை.

இவ்வாறு அவர் பேசினார்.

நாகர்கோவில்:

குமரி மாவட்டத்தில் கடந்த சில நாட்களாக சாரல் மழை பெய்து வருகிறது. ஒரு சில இடங்களில் கனமழை கொட்டி தீர்த்து வருகிறது. இந்த நிலையில் மேலும் 2 நாட்களுக்கு மழை பெய்யும் என்று வானிலை மையம் எச்சரிக்கை விடுத்துள்ளது. நேற்று மலையோர பகுதியான பாலமோர் பகுதியில் கன மழை கொட்டி தீர்த்தது.

நேற்று மாலை பெய்ய தொடங்கிய மழை இடைவிடாமல் பெய்து கொண்டே இருந்தது. இரவும் கனமழை கொட்டியதால் அங்கு வெள்ளம் பெருக்கெடுத்து ஓடியது. பாலமோரில் அதிகபட்சமாக 70.4 மில்லி மீட்டர் மழை பதிவாகியுள்ளது.

நாகர்கோவில், தக்கலை, குளச்சல், கோழிப்போர் விளை, குழித்துறை, ஆணைக்கிடங்கு, முள்ளங்கினாவிளை பகுதிகளிலும் விட்டுவிட்டு மழை பெய்து கொண்டே இருந்தது. மலையோர பகுதிகளில் கொட்டிய மழையின் காரணமாக பேச்சிப்பாறை அணைக்கு வரக்கூடிய நீர்வரத்து கணிசமாக உயர்ந்துள்ளது. இதையடுத்து அணையில் இருந்து வெளியேற்றப்பட்ட உபரி நீரின் அளவும் அதிகரிக்கப்பட்டுள்ளது. அணையில் இருந்து கூடுதல் தண்ணீர் வெளியேற்றப்படுவதால் கோதையாற்றில் வெள்ளம் கரைபுரண்டு ஓடுகிறது.

கோதையாற்றில் ஏற்பட்ட வெள்ளப்பெருக்கு காரணமாக மோதிரமலை-குற்றியாறு தரைப்பாலத்தை மூழ்கடித்து தண்ணீர் சென்றது. ஏற்கனவே அந்த பகுதியில் பழைய பாலத்தை மாற்றிவிட்டு புதிய பாலம் கட்டுமான பணி நடைபெற்று வருவதால் அங்கு தற்காலிக பாலம் அமைக்கப்பட்டு இருந்தது. அந்த தற்காலிக பாலத்தை காட்டாற்று வெள்ளம் இழுத்துச் சென்றது.

தற்காலிக பாலத்தை காட்டாற்று வெள்ளம் இழுத்துச் சென்றதால் குற்றியாருக்கு சென்ற பஸ் திரும்பி வெளியே வர முடியாத நிலை ஏற்பட்டது. கிழவி ஆறு, தச்சைமலை உள்பட 12 மலையோர கிராமங்களில் போக்குவரத்து பாதிக்கப்பட்டதால் பள்ளி மாணவ-மாணவிகள், தொழிலாளர்கள் கடும் அவதிக்கு ஆளாகியுள்ளனர்.

தற்காலிக பாலத்தை சீரமைத்தால் மட்டுமே கிராம மக்கள் வெளியே செல்லும் நிலை ஏற்பட்டுள்ளது. மேலும் குற்றியாறில் நிறுத்தப்பட்டுள்ள பஸ் பாதுகாப்பான இடத்தில் நிறுத்தி வைக்கப்பட்டுள்ளது. திற்பரப்பு அருவி பகுதியில் விட்டு விட்டு பெய்து வரும் மழையால் ரம்யமான சூழல் நிலவுகிறது.

அருவியில் தண்ணீர் ஆர்ப்பரித்துக் கொட்டி வருவதால் இன்று 4-வது நாளாக அருவியில் குளிப்பதற்கு தடை விதிக்கப்பட்டுள்ளது. மாவட்டம் முழுவதும் விட்டுவிட்டு சாரல் மழை பெய்து வருவதால் இதமான குளிர் காற்று வீசுகிறது. பேச்சிப்பாறை அணை நீர்மட்டம் இன்று காலை 44.42 அடியாக இருந்தது. அணைக்கு 1346 கன அடி தண்ணீர் வந்து கொண்டிருக்கிறது. அணையிலிருந்து 579 கன அடி தண்ணீர் வெளியேற்றப்படுகிறது. உபரி நீராக 753 கன அடி தண்ணீர் வெளியேற்றப்பட்டு வருகிறது.

பெருஞ்சாணி அணை நீர்மட்டம் 69.05 அடியாக உள்ளது. அணைக்கு 605 கன அடி தண்ணீர் வந்து கொண்டிருக்கிறது. அணையில் இருந்து 510 கன அடி தண்ணீர் வெளியேற்றப்படுகிறது. சிற்றார்1-நீர்மட்டம் 13.87 அடியாக உள்ளது. அணைக்கு 180 கன அடி தண்ணீர் வந்து கொண்டிருக்கிறது. அணையில் இருந்து 150 கன அடி தண்ணீர் வெளியேற்றப்படுகிறது.

மாவட்ட முழுவதும் பெய்த மழை அளவு மில்லி மீட்டரில் வருமாறு:- பேச்சிப்பாறை 48.2, பெருஞ்சாணி 15.4, கன்னிமார் 7.2, கொட்டாரம் 3.4, மயிலாடி 2.4, நாகர்கோவில் 8.2, ஆரல்வாய்மொழி 8.2, பூதப்பாண்டி 15.2, முக்கடல் 17.6, பாலமோர் 70.4, தக்கலை 13.2, குளச்சல் 2, இரணியல் 8.4, அடையாமடை 12, குருந்தன் கோடு 10.4, கோழிப்போர்விளை 8.2, மாம்பழத்துறையாறு 24, களியல் 10.2, குழித்துறை 2.4, புத்தன்அணை 12.6, சுருளோடு 25.2, அடையாமடை 26.6, திற்பரப்பு 21.3, முள்ளங்கினாவிளை 7.4.