திருப்பத்தூர்

ஆலங்காயம்:

திருப்பத்தூர் மாவட்டம், ஆலங்காயம் ஊராட்சி ஒன்றிய அலுவலகம் முன்பு அ.தி.மு.க. சார்பில் கண்டன ஆர்ப்பாட்டம் நடந்தது.

மாவட்ட செயலாளரும், முன்னாள் அமைச்சருமான கே.சி.வீரமணி தலைமை தாங்கினார். வாணி யம்பாடி எம்.எல்.ஏ. கோ.செந்தில்குமார், முன்னாள் எம்.எல். ஏ.க்கள் கோவி. சம்பத்குமார்,கே.ஜி.ரமேஷ் ஆகியோர் முன்னிலை வகித்தனர். பேரூராட்சி செயலாளர் சிவகுமார் வரவேற்றார்.

இந்த ஆர்ப்பாட்டத்தில் வாணியம்பாடி அடுத்த சிக்கனாங்குப்பம் கிராமத்தில் கடந்த மாதம் 27-ந் தேதி அங்குள்ள அரசு உயர்நிலைப் பள்ளி வளாகத்தில் மழை நீர் தேங்கியிருந்த 10 அடி ஆழம் கொண்ட பள்ளத்தில் மோனிகா, ராஜலட்சுமி ஆகிய பள்ளி மாணவிகள் தவறி விழுந்து இறந்தனர்.

இறந்த மாணவிகளின் குடும்பத்திற்கு நிவாரணம் வழங்குவதோடு, பள்ளிகளில் படிக்கும் மாணவர்களின் பாதுகாப்பை உறுதி செய்வ தற்கான நடவடிக்கைகளை மேற்கொள்ள வேண்டும்.

அதேபோல், ஆலங்காயம் பேரூராட்சிப் பகுதியில் செயல்பட்டு வரும் ஊராட்சி ஒன்றிய தொடக்கப் பள்ளி வளாகத்தில் இருந்த 50 ஆண்டுகள் பழமையான தேக்கு மரங்களை வெட்டி கடத்தியவர்கள் மீது நடவடிக்கை எடுக்க வேண்டும் என்பது உள்ளிட்ட பல்வேறு கோரிக்கைகளை வலியுறுத்தி கோஷமிட்டனர்.

இதில் மாவட்ட மகளிரணி செயலாளர் மஞ்சுளாகந்தன், மேற்கு ஒன்றிய துணை செயலாளர் பாரதிதாசன், பேரூராட்சி துணை செயலாளர் சந்தோஷ், முன்னாள் பேரூராட்சி செயலாளர் பாண்டியன் உள்பட பலர் கலந்து கொண்டனர்.

ஜோலார்பேட்டை:

திருப்பத்தூர் மாவட்டம், நாட்டறம்பள்ளி அடுத்த கே.பந்தாரப்பள்ளி பனந்தோப்பு பகுதியை சேர்ந்தவர் பெருமாள். இவரது மகள் ஜீவிதா (வயது 18). இவர் பர்கூர் கலைக்கல்லூரியில் முதலாம் ஆண்டு படித்துவந்தார்.

இவரது தாய் மாமன் கந்திலி கசிநாயக்கன்பட்டி கிராமத்தைச் சேர்ந்த புகைப்படம் எடுக்கும் வேலை செய்து வந்த சரண்ராஜ் (34) என்பவரும் கடந்த 4 ஆண்டுகளாக காதலித்து வந்தனர். இதில் ஜீவிதா சரண்ராஜிடம் கடந்த சில மாதங்களாக பேசவில்லை என கூறப்படுகிறது.

நேற்று மதியம் வீட்டில் இருந்த ஜீவிதாவை, சரண்ராஜ் பணந்தோப்பு பகுதியில் உள்ள அவருக்கு சொந்தமான மற்றொரு வீட்டுக்கு அழைத்து சென்றார். அப்போது ஜீவிதாவுக்கும், சரண்ராஜிக்கும் இடையே தகராறு ஏற்பட்டதாக கூறப்படுகிறது.

இதில் ஆத்திரமடைந்த சரண்ராஜ் வீட்டின் அறைக்கு ஜீவிதாவை இழுத்து சென்று அவரை கழுத்தறுத்து கொலை செய்துள்ளார். மேலும் யாருக்கும் தெரியாமல் வீட்டை பூட்டி விட்டு சரண்ராஜ் சாவியை வீட்டருகே குளியலறையில் வீசிவிட்டு அங்கிருந்து தலைமறைவானார். வெகுநேரமாகியும் வீட்டிலிருந்து சென்ற மகள் வராததால் சந்தேகமடைந்த பெற்றோர் ஜீவிதாவை பல இடங்களில் சென்று தேடியும் கிடைக்கவில்லை.

இந்நிலையில் உறவினர்கள் சரண்ராஜிக்கு சொந்தமான வீட்டை திறந்து உள்ளே சென்று பார்த்த போது அறையில் கழுத்தறுக்கப்பட்ட நிலையில் ரத்தவெள்ளத்தில் ஜீவிதா பிணமாக கிடந்தார்.

இதனை கண்டு அதிர்ச்சியடைந்த அவர்கள் இதுகுறித்து, அளித்த தகவலின் பேரில், வாணியம்பாடி துணை போலீஸ் சூப்பிரண்டு விஜயகுமார், நாட்டறம்பள்ளி இன்ஸ்பெக்டர் (பொறுப்பு) பழனி மற்றும் போலீசார் சம்பவ இடத்துக்கு விரைந்து சென்று விசாரணை நடத்தினர்.

அப்போது ஜீவிதா உடலுக்கு சரண்ராஜ் எழுதி வைத்திருந்த கடிதத்தை போலீசார் கைப்பற்றினர். இது குறித்து நாட்டறம்பள்ளி போலீசார் வழக்கு பதிவு செய்து சரண்ராஜை தேடி வந்தனர்.

இந்த நிலையில் சரண்ராஜ் வெலக்கல்நத்தம் பகுதியில் உள்ள டீ கடை முன்பு இருப்பதாக மாவட்ட போலீஸ் சூப்பிரண்டு ஆல்பர்ட் ஜானுக்கு தகவல் கிடைத்தது. அதன்பேரில் தனிப்படை போலீசார் வெளக்கல் நத்தம் பகுதிக்கு விரைந்து சென்றனர்.

போலீசார் வருவதை கண்டதும் சரண்ராஜ் தன் கையில் வைத்திருந்த விஷத்தை குடித்தார்.

போலீசார் அவரை கைது செய்து, சிகிச்சைக்காக நாட்டம்பள்ளி அரசு ஆஸ்பத்திரிக்கு கொண்டு சென்று சேர்த்தனர். மேல் சிகிச்சைக்காக கிருஷ்ணகிரி அரசு ஆஸ்பத்திரிக்கு மாற்றம் செய்யப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது.

சரண்ராஜ் செல்போனை பறிமுதல் செய்த போலீசார், அதனை ஆய்வு செய்தனர்.

சரண்ராஜ் தனது செல்போனில், ஜீவிதாவும், நானும் 4 ஆண்டுகளாக காதலித்து வந்தோம். அவரை திருமணம் செய்து கொள்ளலாம் வா என கூறினேன். ஆனால் அவர் மறுத்துவிட்டார்.

எங்களால் திருமணம் செய்து கொள்ள முடியவில்லை. இதனால் நான் ஜீவிதாவை கொலை செய்துவிட்டு, நானும் தற்கொலை செய்து கொள்ள விஷம் குடித்தேன். மனதளவில் நாங்கள் ஏற்கனவே கணவன்-மனைவியாக மாறிவிட்டோம். சாவும் நேரத்தில் கூட நாங்கள் ஒன்றாக இருக்க வேண்டும்.

நான் இறந்த பிறகு எங்களது உடல்களை ஒரே இடத்தில் புதைக்க வேண்டும் என பேசி வீடியோவும் பதிவு செய்திருந்தார்.

இது குறித்து போலீசார் தொடர்ந்து விசாரணை நடத்தி வருகின்றனர். இந்த சம்பவம் அந்த பகுதியில் பெரும் பரபரப்பை ஏற்படுத்தியது.

திருப்பத்தூர்:

திருப்பத்தூர் மாவட்டத்தில் ஆம்பூர் நகருக்கு அருகில் மலையம்பட்டு கிராமத்தில் உள்ள கிழக்குத் தொடர்ச்சி மலையில் அமைந்துள்ள அர்மா மலையில் 8-ம் நூற்றாண்டைச் சேர்ந்த சமண குகை அமைந்துள்ளது.

மாவட்டத்தின் ஒரே பழங்கால குகை

இது இந்த மாவட்டத்தின் ஒரே நினைவுச் சின்னமான பழங்கால குகையாகும்.

இது மலையடிவாரத்தில் இருந்து 100 அடி உயரத்தில் 100 கிரானைட் படிக்கட்டுக ளுடன் அமைந்துள்ளது.

மேலும் இந்தக் குகை பல அறைகளாக பிரிக்கப்பட்டு மண் மற்றும் சுடப்படாத செங்கற்களால் கட்டப்பட்டுள்ளது. இதன் பரப்பளவு 3000 சதுர அடியாக உள்ளது.

இந்தக் குகையின் கூரை மற்றும் சுவர்களில் அழகிய சுவர் ஓவியங்கள் உள்ளன. இந்த ஓவியங்கள் சமண மற்றும் அஸ்ததிக் பாலர்க ளின் கதைகளை சித்தரிப்ப தாக உள்ளது.

பெரும்பாலான ஓவியங்களில் கிளிகள் மற்றும் பலவிதமான பூக்கள் உள்ளன.

சித்தன்னவாசல் குகையை ஒத்து உள்ளது

இது குறித்து தொல்லியல் துறை அதிகாரிகள் கூறியதாவது :-

குகை ஓவியங்கள் புதுக்கோட்டை மாவட்டத்தில் உள்ள சித்தன்னவாசல் குகை ஒத்துள்ளது.

இந்தப் குகை கடந்த சில மாதங்களுக்கு முன்பு ரூ.20 லட்சம் செலவில் தமிழ்நாடு தொல்லியல் துறை மூலம் பராமரிப்பு பணிகள் மேற்கொள்ளப்பட்டது. அப்போது உடைந்த கிரானைட் படிக்கட்டுகள் சரி செய்யப்பட்டன. நினைவு சின்னங்கள் சேத மடையாமல் இருக்க வேலி அமைக்கப்பட்டது.

இதன் வரலாறு பற்றிய அறிவிப்பு பலகைகளும் நிறுவப்பட்டது. மேலும் இது விரைவில் மாநில அரசால் நினைவு சின்ன மாக அறிவிக்கப்படும் என்றனர்.

இந்நிலையில் கலெக்டர் பாஸ்கர பாண்டியன் அப்பகுதியில் ஆய்வு செய்தார்.

அப்போது அவர் கூறியதாவது :-

குகையை பாதுகாக்கும் முயற்சிகள் மேற்கொள்ள ப்பட்டுள்ளது. தற்போது வரை சுவர்களில்உள்ள அமைப்பு மற்றும் சுவரொ வியங்கள் மாறாமல் உள்ளன.

மலையால் மூடப்பட்டி ருக்கும் சரியான பகுதியை மதிப்பிடுவதற்காக மலைப்பகுதியின் விரிவான ஆய்வுக்கு உத்தரவி டப்பட்டுள்ளது.

மேலும் இந்த மலைப்பகுதி அடர்ந்த காப்புக்காடுகளுடன் 74.94 ஹெக்டேர் பரப்பளவில் பரவியுள்ளது என்றார்.

ஆலங்காயம்:

வாணியம்பாடி அருகே உள்ள தமிழக ஆந்திரா எல்லையில் உள்ள மாதகடப்பா மலையில் தேவராஜ்புரம், கொரிபள்ளம், தரைகாடு உள்ளிட்ட மலை பகுதிகளில் திம்மாம்பெட்டை மது விலக்கு போலீசார் ரோந்து பணியில் ஈடுபட்டனர்.

அப்போது கொரிபள்ளம் மலைபகுதியில் கள்ள சாராயம் காய்ச்ச தயாராக வைத்திருந்த 2000 லிட்டர் கள்ள சாராய ஊறல்களை கண்டறிந்து அங்கேயே ஊற்றி அழித்தனர்.

மேலும் கள்ள சாராயம் காய்ச்சுவதற்க்காக வைக்கப்பட்டிருந்த மூலப்பொருட்களையும் தீயிட்டு கொளுத்தினர். மேலும் போலீசார் வருவதை கண்டு தப்பி ஓடிய கள்ள சாராயம் காய்ச்சும் கும்பலை தேடி வருகின்றனர்.

ஆலங்காயம்:

திருப்பத்தூர் மாவட்டம் வாணியம்பாடி அடுத்த சின்னக்கல்லுப்பள்ளி பகுதியில் அமைந்துள்ள பிரசித்தி பெற்ற திருப்பதி வெங்கடேச பெருமாள் கோவிலில் ஊர் மக்கள் மற்றும் கோவில் நிர்வாகிகள் சார்பில் ஸ்ரீதேவி பூதேவி சமேத திருக்கல்யாண வைபவம் நடைபெற்றது.

கோவிலின் கருவறையில் உள்ள திருப்பதி வெங்கடேச பெருமாளுக்கு சிறப்பு அலங்காரம், அபிஷேகம் செய்யப்பட்டு தீபாராதனை காண்பிக்கப்பட்டது.

இந்த திருக்கல்யாண வைபவத்தில் திருப்பத்தூர் மாவட்டத்தின் வாணியம்பாடி உள்ளிட்ட பல்வேறு பகுதிகளில் இருந்தும் ஏராளமான பக்தர்கள் கலந்து கொண்டு தரிசனம் செய்தனர்.

விழாவில் கலந்துகொண்ட பக்தர்கள் அனைவருக்கும் தாம்பூல பைகள் வழங்கி அன்னதானம் நடைப்பெற்றது.

ஆலங்காயம்:

ஆலங்காயத்தை அடுத்த நிம்மியம் பட்டு கிராமத்தை சேர்ந்தவர் ராஜேஷ். இவரது மகன் யோகன்ராவ் (வயது 2). இந்த குழந்தையை குளிக்க வைப்பதற்காக கடந்த 7-ந்தேதி வெந்நீர் வைத்திருந்தனர்.

அப்போது அங்கு விளையாடிய குழந்தை யோகன்ராவ் பாத்திரத்தை இழுத்ததில் வெந்நீர் கொட்டி படுகாயமடைந்தது.

உடனடியாக சிகிச்சைக்காக பெங்களூரு விக்டோரியா அரசு ஆஸ்பத்திரியல் சேர்த்தனர். அங்கு சிகிச்சை பெற்று வந்த நிலையில் சிகிச்சை பலனின்றி இறந்து விட்டது. இதுகுறித்து ஆலங்காயம் போலீசார் வழக்குப்பதிவு செய்து விசாரணை நடத்தி வருகின்றனர்.

ஆம்பூர்:

ஆம்பூர் பைபாஸ் சாலை அருகே நாகாலம்மன் கோவில் உள்ளது. கடந்த சில நாட்களுக்கு முன்பு இரவு நேரத்தில் 2 நபர்கள் கோவிலுக்குள் புகுந்து உண்டியலை திருட முயற்சி செய்துள்ளனர். திருட முடியாததால் திரும்பி சென்றனர். இந்த காட்சிகள் கோவிலில் பொருத்தப்பட்டிருந்த கண்காணிப்பு கேமராவில் பதிவாகி இருந்தது.

இதுகுறித்து கோவில் நிர்வாகத்தினர் ஆம்பூர் டவுன் போலீசில் புகார் அளித்தனர். அதன் பேரில் போலீசார் வழக்குப்பதிவு செய்து மர்ம நபர்களை தேடி வந்தனர்.

இந்தநிலையில் ஜவகர்லால் நேரு தெருவை சேர்ந்த சரவணன் (வயது 20) மற்றும் இந்திரா நகர் பகுதியை சேர்ந்த 17 வயது சிறுவன் ஆகியோரை போலீசார் கைது செய்தனர். அவர்களில் சிறுவனை வேலூர் சிறுவர் சீர்திருத்த பள்ளிக்கு அனுப்பி வைத்தனர்.

ஜோலார்பேட்டை:

நாட்டறம்பள்ளியை அடுத்த சின்னகூத்தாண்டகுப்பம் பகுதியை சேர்ந்தவர் ஆறுமுகம் (வயது 65). வாணியம்பாடி தனியார் மேல்நிலைப்பள்ளியில் காவலாளியாக பணிபுரிந்து வந்தார்.

இந்தநிலையில் நேற்று மதியம் ஜோலார்பேட்டை- கேத்தாண்டப்பட்டி ரெயில் நிலையங்களுக்கு இடையே தண்டவாளத்தை கடக்க முயன்ற போது அவ்வழியாக வந்த ஏதோ ஒரு ரெயிலில் அடிபட்டு 2 கைகள் மற்றும் கால்கள் துண்டாகி இறந்து கிடந்தார்.

இது குறித்து தகவல் அறிந்ததும் ஜோலார்பேட்டை ரெயில்வே போலீஸ் சப்-இன்ஸ்பெக்டர் சுப்பிரமணி மற்றும் போலீசார் சென்று பிணத்தை கைப்பற்றி பிரேத பரிசோதனைக்காக திருப்பத்தூர் அரசு மருத்துவமனைக்கு அனுப்பி வைத்தனர்.

மேலும் இது குறித்து ரெயில்வே போலீசார் வழக்குப்பதிவு செய்து விசாரணை நடத்தி வருகின்றனர்.

ஆலங்காயம்:

திருப்பத்தூர் மாவட்டம், வாணியம்பாடி அடுத்த கலந்திரா கிராமத்தை சேர்ந்தவர் ஜோதி- லட்சுமி தம்பதியினர் இவர்களுக்கு சுபாஷ் என்ற மகனும், ரோஸி மற்றும் ரீட்டா ஆகிய 2 மகள்கள் உள்ளனர். சுபாஷ் திருமணம் முடிந்து சின்ன கல்லுப்பள்ளி கிராமத்தில் குடும்பத்துடன் வசித்து வருகிறார்.

இதே போல் 2 பெண் பிள்ளைகளும் திருமணம் முடிந்து சேலத்தில் அவரவர் குடும்பத்துடன் வாழ்ந்து வருகின்றனர். தாய் லட்சுமி கடந்த 12 வருடத்திற்கு முன்பும், தந்தை ஜோதி கடந்த 2 வருடங்களுக்கு முன்பு இறந்து விட்ட நிலையில் கலந்திரா கிராமத்தில் இவர்களுக்கு சொந்தமான 57 சென்ட் விவசாய நிலம் மற்றும் வீட்டுமனை உள்ளது. அதனை ரீட்டாவின் சித்தப்பா குடும்பத்தினர் ஆக்கிரமிப்பு செய்துள்ளதாக கூறப்படுகிறது.

இந்நிலையில் கடந்த 6 மாதங்களுக்கு முன்பு மகள் ரீட்டா தங்களுடைய விவசாய நிலம் மற்றும் வீட்டு மனையை அளவீடு செய்து தரக்கோரி ஆன்லைன் மூலம் பதிவு செய்து விட்டு இது வரையில் 8 முறை சேலத்தில் இருந்து வாணியம்பாடி தாசில்தார் ஆபிஸில் உள்ள நில அளவியர் வந்து சென்றுள்ளார்.

வரும் போதெல்லாம் அடுத்த வாரம் என்று சொல்லி அனுப்பி வருவதால் ஆத்திரமடைந்த ரீட்டா மற்றும் அவரது சகோதரி ரோஸி கைகுழந்தையுடன் தாசில்தார் ஆபிஸ் முன் அமர்ந்து 2 மணி நேரத்துக்கும் மேலாக தர்ணா போராட்டத்தில் ஈடுபட்டனர்.

தகவல் அறிந்து சம்பவ இடத்திற்கு வந்த டவுன் போலீசார் மற்றும் தாசில்தார் சாந்தி ஆகியோர் போராட்டத்தில் ஈடுபட்டவர்களிடம் பேச்சுவார்த்தை நடத்தினர். மேலும் விரைந்து நிலத்தை அளவீடு செய்ய நடவடிக்கை எடுப்பதாக உறுதி அளித்ததின் பேரில் போராட்டத்தை கைவிட்டு கலைந்து சென்றனர்.

ஆலங்காயம்:

கர்நாடக மாநில எல்லையான அத்திப்பள்ளியில் பட்டாசு கடையில் ஏற்பட்ட பயங்கர வெடி விபத்தில் 16 பேர் பலியானார்கள். உயிரிழந்தவர்களின் குடும்பத்திற்கு ரூ.3 லட்சம் நிவாரணம் வழங்குவதாக தமிழக அரசு அறிவித்திருந்தது.

இந்த நிலையில் தனியார் மருத்துவமனையில் சிகிச்சை பெற்று வந்த வாணியம்பாடி அடுத்த வெள்ளக்குட்டை கிராமத்தை சேர்ந்த தினேஷ்குமார் சிகிச்சை பலனின்றி பரிதாபமாக இறந்தார்.

இதை தொடர்ந்து திருப்பத்தூர் மாவட்ட கலெக்டர் பாஸ்கர பாண்டியன் உயிரிழந்த தினேஷ்குமாரின் குடும்பத்தினரை நேரில் சந்தித்து ஆறுதல் கூறினார்.

பின்னர் முதல் அமைச்சர் நிவாரண நிதி ரூ.3 லட்சத்திற்கான காசோலையை உயிரிழந்த தினேஷ்குமாரின் தயார் தனலட்சுமியிடம் வழங்கினார். அப்போது சப் கலெக்டர் பிரேமலதா, தாசில்தார் சாந்தி உள்ளிட்டோர் உடன் இருந்தனர்.

ஜோலார்பேட்டை:

ஜோலார்பேட்டை போலீஸ் சப் இன்ஸ்பெக்டர் ராஜ்குமார் மற்றும் போலீசார் நேற்று ஜோலார்பேட்டை மற்றும் அதனை சுற்றியுள்ள பல்வேறு பகுதிகளில் ரோந்து பணி ஈடுபட்டுக் கொண்டிருந்தனர்.

அப்போது பால்னாங்குப்பம் பகுதியில் பெட்டி கடையில் அரசு தடை செய்யப்பட்ட குட்கா போன்ற போதை பாக்கெட்டுகளை மறைத்து வைத்து விற்பனை செய்வதாக போலீசாருக்கு தகவல் கிடைத்தது.

போலீசார் சம்பவ இடத்திற்கு சென்று சோதனை செய்தனர். அப்போது போதை பொருட்கள் விற்பனை செய்தது தெரியவந்தது. இதனையடுத்து போலீசர் பெட்டிகடை உரிமையாளர் ராஜா (வயது 54) என்பவரை கைது செய்து விசாரணை நடத்தி வருகின்றனர்.

மேலும் கடையில் இருந்த போதை பொருட்களை போலீசார் பறிமுதல் செய்தனர்.

ஜோலார்பேட்டை:

நாட்டறம்பள்ளி அடுத்த ஜங்கலாபுரம் பகுதியைச் சேர்ந்தவர் பொற்கொடி இவர் மகளிர் குழு தலைவியாக செயல்பட்டு வருகிறார்.

இவரது குழுவில் சங்கீதா என்பவர் தனது உறவினர் நிவேதா என்பவருக்கு கடன் தொகை பெற்று கொடுத்து உள்ளார் இதனால் சங்கீதா கடன் தொகை தாமதமாக கட்டுவதாலும் இறுதி தவணை தொகை செலுத்த வேண்டும் என கேட்கும் போது தகராறு ஏற்பட்டது.

மகளிர் குழு தலைவி பொற்கொடி மற்றும் 4 உறுப்பினர்கள் சங்கீதாவிடம் நிலுவைத் தொகை கேட்கும் போது தகராறு ஏற்பட்டு தகாத வார்த்தைகளால் திட்டி இரு தரப்பினரும் கையால் தாக்கிக் கொண்டனர்.

நாட்டறம்பள்ளி போலீசார் இரு தரப்பை சேர்ந்த 8 பேர் மீது வழக்கு பதிவு செய்து விசாரணை நடத்தி வருகின்றனர்.