சந்திரயான் 3: நிலவின் தென் துருவத்தில் தடம் பதித்த இந்தியா..! லைவ் அப்டேட்ஸ்

இந்திய ஜனாதிபதி திரவுபதி முர்மு மற்றும் பிரதமர் மோடிக்கு ரஷிய அதிபர் புதின் அனுப்பியுள்ள செய்தியில், இந்தியாவின் சந்திரயான் 3 விண்கலம் தென் துருவத்திற்கு அருகில் நிலவில் வெற்றிகரமாக தரையிறங்கியதற்கு எனது மனமார்ந்த வாழ்த்துக்கள். விண்வெளியை ஆராய்வதில் இது ஒரு நீண்ட முன்னேற்றம். அறிவியல் மற்றும் பொறியியலில் இந்தியா அடைந்துள்ள வியத்தகு முன்னேற்றத்திற்கான சான்றாகும் இது என வாழ்த்தியுள்ளார்.

சந்திரயான் 3 வெற்றி குறித்து இஸ்ரோ குழுவினருக்கு உச்சநீதிமன்ற தலைமை நீதிபதி டி.ஒய்.சந்திரசூட் வாழ்த்து தெரிவித்துள்ளார். மேலும் அவர், "நிலவின் தென் துருவத்தில் தடம் பதித்திருப்பது மற்ற நாடுகளை காட்டிலும் இந்தியாவுக்கு மேலும் பெருமை. இந்த தருணத்தில், ஒரு இந்தியக் குடிமகனாக பெருமைப்படுகிறேன்" என்றார்.

நிலவின் தென் துருவத்தில் லேண்டர் தரையிறங்கும்போது எடுக்கப்பட்ட நிலவின் மேற்பரப்பு படங்களை இஸ்ரோ வெளியிட்டுள்ளது.

சந்திரயான் 3 வெற்றியை பட்டாசு வெடித்து கொண்டாடிய தமிழ்நாடு பட்டாசு உற்பத்தியாளர் சங்கத்தினர். சிவகாசியில் அரைமணி நேரம் இடைவிடாது வான வேடிக்கை பட்டாசுகள் வெடித்து கொண்டாட்டம்.

இஸ்ரோவையும், கிரிக்கெட்டையும் ஒப்பிட்டு மும்பை இந்தியன்ஸ் அணி டுவீட் செய்துள்ளது. அதில், "2019ல் சந்திரயான் 2 திட்டத்திலும், உலகக்கோப்பை தொடரிலும் இந்தியா தோல்வி. சந்திரயான் 3 வெற்றியை தொடர்ந்து உலகக்கோப்பையில் இந்தியா வெற்றிபெறும் என நம்பிக்கை" என குறிப்பிட்டுள்ளது.

நிலவு மற்றும் விண்வெளிக்கான இந்தியாவின் பயணம் பெருமை மற்றும் உறுதிக்கான தருணம். இது 140 கோடி இந்தியர்களுக்கும் இது வரலாற்று சிறப்புமிக்க தருணம்- காங்கிரஸ் அறிக்கை.

இஸ்ரோ விஞ்ஞானிகளால் ஒட்டுமொத்த தேசமும், வெளிநாடுவாழ் இந்திய சமூகமும் பெருமிதம் கொள்கின்றன. இஸ்ரோ குழுவுக்கு வாழ்த்துக்கள்- தமிழக ஆளுநர் ஆர்.என்.ரவி.

ரஷியா, அமெரிக்கா, சீனா என்ற வரிசையில் இனி இந்தியாவை எழுதாமல் கடக்க முடியாது. பூமிக்கும், நிலவுக்கும் விஸ்வரூபம் எடுத்து இந்தியா நிற்கிறது. அந்த நிலாவத்தான் நாம கையில புடிச்சோம் இந்த லோகத்துக்காக..

இது போதாது, நிலா வெறும் துணைக்கோள். நாம் வெற்றி பெற ஒரு விண்ணுலகமே இருக்கிறது. - கவிஞர் வைரமுத்து.

நிலவில் காற்று இல்லாததால் லேண்டர் இறங்கியதும் கிளப்பியுள்ள புழுதி படலம் நிற்க வேண்டும். அதற்கு சில மணி நேரமாகும். இளைஞர்கள் இனி விண்வெளி குறித்து படிப்பதற்கு ஆர்வம் ஏற்படும்- மூத்த விஞ்ஞானி நம்பி நாராயணன்.