நீங்கள் தேடியது "அமைச்சர் தங்கமணி"

நாமக்கல்:

முன்னாள் முதல்- அமைச்சர் ஜெயலலிதா பிறந்த நாளை முன்னிட்டு நாமக்கல் நகர அ.தி.மு.க. சார்பில் நாமக்கல் குளக்கரை திடலில் பொதுக்கூட்டம் நடந்தது. இந்த கூட்டத்துக்கு கே.பி.பி.பாஸ்கர் எம்.எல்.ஏ. தலைமை தாங்கினார். பி.ஆர்.சுந்தரம் எம்.பி. முன்னிலை வகித்தார்.

இதில் அமைச்சர் தங்கமணி கலந்து கொண்டு பேசினார். அப்போது அவர் கூறியதாவது:-

வருகிற பாராளுமன்ற தேர்தலில் நாம் பா.ஜனதா மற்றும் பா.ம.க.வுடன் அமைத்து இருக்கும் கூட்டணி வெற்றி கூட்டணி. இந்த கூட்டணி யில் இன்னும் சில கட்சிகள் இணைய உள்ளன. இதை பொறுக்க முடியாமல் பா.ம.க.வின் நிறுவனர் டாக்டர் ராமதாசை தி.மு.க. தலைவர் மு.க.ஸ்டாலின் என்னவெல்லாம் பேசிவருகிறார் என்பதை எல்லோரும் அறிவார்கள்.

நீங்கள் பேச, பேச எங்களின் வாக்கு வங்கி அதிகரிக்கும், உங்களின் கோபத்தின் வெளிப்பாடு எங்களின் வெற்றியை எளிதாக்கும்.

தி.மு.க. தலைவராக இருந்த கருணாநிதி இறந்த பிறகு மு.க.ஸ்டாலின் அந்த பொறுப்புக்கு வந்து உள்ளார். அவர் தலைவரான பிறகு சந்திக்கும் முதல் தேர்தல் இதுவாகும். இதில் தோற்று விட்டால் தொண்டர்கள் நம்மை தலைவராக ஏற்கமாட்டார்கள் என்ற பயத்தில் மு.க.ஸ்டாலின் இந்த அரசு மீது சேற்றை வாரி வீசி வருகிறார்.

காங்கிரஸ் கூட்டணியில் மு.க.ஸ்டாலினை தவிர யாரும் ராகுல்காந்தியை பிரதமர் வேட்பாளர் என அறிவிக்கவில்லை. அவரும் மம்தா பானர்ஜி கூட்டத்தில் வேறு ஒரு கருத்தை சொல்லி வந்து உள்ளார். எனவே வருகிற பாராளுமன்ற தேர்தலில் நிலையான ஆட்சி அமைய பிரதமர் மோடி தலைமையில் மீண்டும் ஆட்சி மலர வேண்டும்.

நமது எதிரி கட்சி தி.மு.க. என்பதை ஜெயலலிதா நமக்கு அடையாளம் காண்பித்து சென்று உள்ளார். இதேபோல் அவர் இருக்கும் போதே டி.டி.வி. தினகரன் குடும்பத்தை விலக்கி வைத்தார். அவர் ஆஸ்பத்திரியில் சிகிச்சை பெறும் வரை சென்னைக்கே வராத டி.டி.வி. தினகரன் தற்போது அ.தி.மு.க.வை காப்பாற்ற போகிறேன் என்று சொல்லி வருகிறார்.

இதை தொண்டர்கள் சிந்தித்து பார்க்க வேண்டும். வருகிற பாராளுமன்ற தேர்தல் எதிரிகளையும், துரோகிகளையும் வீழ்த்தும் தேர்தல் என்பதை எண்ணி தொண்டர்கள் பணியாற்றிட வேண்டும். தமிழகம் மற்றும் புதுச்சேரியில் 40 தொகுதிகளிலும் வெற்றி பெற பாடுபட வேண்டும். எதிரிகளுக்கும், துரோகிகளுக்கும் பாடம் புகட்ட வேண்டும். மத்திய, மாநில அரசுகளின் சாதனைகளை எடுத்து கூறி ஓட்டுகளை சேகரிக்க வேண்டும்.

இவ்வாறு அவர் கூறினார்.

இந்த கூட்டத்தில் நாமக்கல் நகராட்சி முன்னாள் துணை தலைவர் சேகர், மாவட்ட ஊராட்சிக்குழு முன்னாள் கவுன்சிலர் மயில்சுந்தரம், அ.தி.மு.க. பொதுக்குழு உறுப்பினர் கோபிநாத், மாவட்ட பொருளாளர் டி.எல்.எஸ். காளியப்பன், கரையாம்புதூர் மகேஷ்வரன் உள்பட கட்சி நிர்வாகிகள், தொண்டர்கள் திரளாக கலந்து கொண்டனர்.

இதையொட்டி செந்தில் கணேஷ் -ராஜலட்சுமி தம்பதி யினரின் கிராமிய இன்னிசை நிகழ்ச்சியும் நடந்தது.

முன்னதாக ரூ.2 கோடியே 70 லட்சம் செலவில் அமைக் கப்பட்டு உள்ள நாமக்கல் ரெயில் நிலைய சாலையை அமைச்சர் தங்கமணி பொதுமக்கள் பயன்பாட்டுக்கு திறந்து வைத்தார்.

இதேபோல் நாமக்கல் குளக்கரை திடலில் சட்டமன்ற உறுப்பினர் மேம்பாட்டு நிதியில் இருந்து ரூ.20 லட்சம் மதிப்பீட்டில் உருவாக்கப்பட்டு உள்ள எம்.ஜி.ஆர். பூங்காவையும் திறந்து வைத்து பார்வையிட்டார். #admk #parliamentelection

குடியாத்தம்:

தமிழகத்தில் குடியாத்தம் சட்டமன்ற தொகுதி உள்பட 18 சட்டமன்ற தொகுதி உறுப்பினர்கள் தகுதி நீக்கம் செய்யப்பட்டனர். இதனை தொடர்ந்து காலியாக உள்ள தொகுதிகளில் இடைத்தேர்தல் களப்பணிகளை அ.தி.மு.க.வினர் மேற்கொண்டு வருகின்றனர்.

குடியாத்தம் சட்டமன்ற தொகுதியில் பூத்கமிட்டி அமைப்பது, வாக்காளர் பட்டியல் சரிபார்ப்பு மற்றும் நிர்வாகிகள் ஆலோசனை என களப்பணிகள் நடைபெற்று வருகிறது.

இந்த பணிகளை குடியாத்தம் சட்டமன்ற தொகுதி பொறுப்பாளர்களான மின்சாரத்துறை அமைச்சர் பி.தங்கமணி, பத்திரப்பதிவுத்துறை அமைச்சர் கே.சி.வீரமணி, இந்துசமய அறநிலையத்துறை அமைச்சர் சேவூர் ராமச்சந்திரன், தூசி மோகன் எம்.எல்.ஏ. ஆகியோர் ஆய்வு மேற்கொண்டனர்.

அதைத் தொடர்ந்து அமைச்சர் பி.தங்கமணி நிருபர்களிடம் கூறியதாவது:-

கஜா புயலால் பாதிப்பு ஏற்பட்ட அனைத்து மாவட்டங்களிலும் உள்ள வீடுகளுக்கு மின்இணைப்பு கொடுக்கப்பட்டுள்ளது. விவசாயத்திற்கு படிப்படியாக கொடுக்கும் பணி நடைபெற்று வருகிறது. அ.தி.மு.க.வுக்கு டி.டி.வி.தினகரனை தவிர யார் வேண்டுமானாலும் வரலாம் என முதல்-அமைச்சர் ஏற்கனவே கூறியிருக்கிறார்.

அ.தி.மு.க., எம்.ஜி.ஆர், ஜெயலலிதாவின் இயக்கம். இந்த இயக்கத்தில் நாங்கள் யாரையும் இழுத்து சேர்க்கவில்லை. கழகத்தில் தானாக வந்து சேர்ந்து கொண்டிருந்தனர். பொதுமக்கள் ஆதரவு இருக்கிறது. முதல்-அமைச்சர், துணை முதல்-அமைச்சர் சிறப்பாக நிர்வாகத்தை கொண்டிருக்கின்றனர். அதனை பார்த்து தற்போது வரை கழகத்தில் 1½ கோடி உறுப்பினர்கள் சேர்ந்து இருக்கின்றனர்.

மற்ற கட்சிகளில் இருந்து அழைத்து வந்து கட்சியில் சேர்க்க வேண்டிய அவசியம் அ.தி.மு.க.விற்கு இல்லை. இங்கு அனைவரும் வந்து சேரலாம் என்பது எங்கள் நோக்கம்.

முன்னாள் அமைச்சர் செந்தில்பாலாஜி அ.தி.மு.க.வில் சேர முயற்சி செய்தார். நாளை தி.மு.க. ஆட்சிக்கு வரவில்லை என்றால் வேறு கட்சிக்கு சென்று விடுவார்.

தேர்தல் வரும்போது கூட்டணி குறித்து தலைமை முடிவு செய்யும். கஜா புயலால் ஏற்பட்ட பாதிப்பிற்கு தேவையான நிதியை பெற முதல்-அமைச்சரும், துணை முதல்-அமைச்சரும், பாராளுமன்ற உறுப்பினர்களும் மத்திய அரசை தொடர்ந்து கேட்டு வருகிறோம். விரைவில் மத்திய அரசிடம் இருந்து தேவையான நிதி கிடைக்கும். இடைத்தேர்தலுக்காக கட்சியினர் தீவிர களப்பணியில் ஈடுபட்டு வருகின்றனர். இடைத்தேர்தலில் அனைத்து தொகுதிகளிலும் அ.தி.மு.க. வேட்பாளர்கள் வெற்றி பெறுவார்கள்.

இவ்வாறு அவர் கூறினார். #Thangamani