நீங்கள் தேடியது "ஆயுத பூஜை"

ஊட்டி:

தமிழ்நாடு முழுவதும் நாளை(வியாழக்கிழமை) ஆயுத பூஜை கொண்டாடப்பட உள்ளது. இதை முன்னிட்டு பொதுமக்கள் தங்களது வீடுகள் மற்றும் அன்றாடம் பயன்படுத்தும் உபயோக பொருட்கள், இருசக்கர, நான்கு சக்கர வாகனங்கள் போன்றவற்றை நன்றாக கழுவி சுத்தம் செய்வது வழக்கம். பின்னர் சிறப்பு பூஜை செய்து சாமியை வழிபட்டு, வாகனங்களுக்கு சந்தனம் வைத்து மாலை அணிவிப்பார்கள். இந்த பூஜையில் வாழைக்கன்று, மா இலை, பூக்கள் மற்றும் கரும்பு இடம் பிடிக்கும்.

நீலகிரி மாவட்டம் மலை மாவட்டம் என்பதால், ஆயுத பூஜைக்கு தேவையான கரும்பு, வாழைக்கன்று மற்றும் பூக்களை விளைவிக்க முடியாது. இதனால் ஆண்டுதோறும் சமவெளி பகுதிகளில் இருந்து ஊட்டிக்கு அவை விற்பனைக்கு கொண்டு வரப்படுகிறது. ஊட்டி மலைப்பிரதேசமாக இருப்பதால், கரும்பு, வாழைக்கன்று உள்ளிட்டவைகளை சமவெளி பகுதிகளில் இருந்து ஊட்டிக்கு கொண்டு வர கூடுதல் செலவாகிறது. இந்த நிலையில் நடப்பாண்டில் டீசல், பெட்ரோல் விலை நாளுக்கு நாள் உயர்ந்து கொண்டு செல்வதால், லாரிகளில் பொருட்களை கொண்டு வருவதற்கான வாடகை அதிகரித்து உள்ளது.

இதனால் கடந்த ஆண்டை விட இந்த ஆண்டு கரும்பு விலை மேலும் உயர்ந்து இருக்கிறது. ஊட்டி நகரில் கடந்த ஆண்டு ஒரு கரும்பு ரூ.40 முதல் ரூ.50-க்கு விற்பனை செய்யப்பட்டது. தற்போது ஆயுத பூஜையையொட்டி ஊட்டி நகராட்சி மார்க்கெட்டுக்கு கரும்புகள் விற்பனைக்கு கொண்டு வரப்பட்டு உள்ளன. சேலம் மாவட்டம் சங்ககிரி பகுதியில் இருந்து 4 லாரிகளில் கரும்புகள் ஏற்றப்பட்டு நேற்று ஊட்டிக்கு கொண்டு வந்து இறக்கி வைக்கப்பட்டது. அதன் பின்னர் ஊட்டி நகரின் சுற்றுப்புற பகுதிகளுக்கு சரக்கு வாகனங்களில் கரும்புகள் விற்பனைக்கு எடுத்து செல்லப்பட்டன.

இதுகுறித்து வியாபாரிகள் கூறியதாவது:-

நடப்பாண்டு போதிய அளவு பருவமழை பெய்ததால் கரும்பு வரத்து அதிகரித்து உள்ளது. ஒரு கரும்பு ரூ.50 முதல் ரூ.60 வரைக்கும், ஒரு கட்டு (20 கரும்புகள்) ரூ.800-க்கும் விற்பனை செய்யப்படுகிறது. கடந்த ஆண்டை விட இந்த ஆண்டு பெட்ரோல், டீசல் விலை உயர்வால் ஊட்டியில் கரும்பு விலை உயர்ந்து இருக்கிறது. ஆயுத பூஜையை முன்னிட்டு பொதுமக்கள் கரும்புகள் வாங்க ஆர்வம் காட்டி வருகின்றனர். இதனால் ஊட்டி நகராட்சி மார்க்கெட்டின் உள்பகுதி மற்றும் வெளிப்பகுதியில் கரும்பு விற்பனை களை கட்டி உள்ளது. இவ்வாறு அவர்கள் கூறினர். 

கோவை: ஆயுத பூஜை நாளையும், நாளை மறுநாள் விஜயதசமியும் கொண்டாடப்படுகிறது. இந்த நாளில் கடை, வீடுகள் மற்றும் நிறுவனங்களில் சிறப்பு பூஜைகள் செய்யப்படும். இதனை முன்னிட்டு கோவை பூ மார்க்கெட்டில் நேற்று பூக்கள் வரத்து அதிகரித்து இருந்தது. வாழைக்கன்று, பொரி, கடலை ஆகியவற்றின் விற்பனை இன்று அதிகமாக இருந்தது.

இதனை வாங்கி செல்ல மார்க்கெட் மற்றும் கடை வீதிகளில் மக்கள் கூட்டம் அலைமோதியது. ஆயுத பூஜையையொட்டி கோவையில் பூக்களின் விலை அதிகரித்து உள்ளது.கோவையில் இன்று ஒரு கிலோ அரளிப்பூ ரூ. 400-க்கு விற்பனையானது. செவந்தி பூ ரூ. 200 முதல் 240-க்கும், ரோஜா ரூ. 240-க்கும், சம்பங்கி ரூ. 300-க்கும், ஒரு தாமரை ரூ. 30-க்கும் விற்பனையானது. வாழை இலை ஒரு செட் ரூ. 40-க்கும், பூசணி ஒரு கிலோ ரூ. 30-க்கும், ஒரு தேங்காய் ரூ. 30-க்கும், வெற்றிலை ஒரு கவுலி ரூ. 60-க்கும் விற்பனையானது.

பொரி ஒரு பக்கா ரூ. 20-க்கும், பொரி கடலை ஒரு கிலோ ரூ. 100-க்கும், நிலக்கடலை ரூ. 110-க்கும், அவல் ரூ. 40-க்கும் நெல் பொரி ஒரு லிட்டர் ரூ. 10-க்கும், ஆப்பிள் ஒரு கிலோ ரூ. 110-க்கும் சாத்துக்குடி ரூ. 45-க்கும், கொய்யா ரூ. 70-க்கும், ஆரஞ்சு ரூ.60-க்கும், மாதுளை ரூ. 110-க்கும், திராட்சை ரூ. 75-க்கும் விற்பனையானது.

வாழைப்பழம் ஒரு டஜன் ரூ. 60-க்கும், கரும்பு ஒரு கட்டு ரூ. 750-க்கும் விற்பனையானது.

திண்டுக்கல்:

ஆயுத பூஜை நாளை கொண்டாட உள்ளதால் பூக்கள் மற்றும் பூஜை பொருட்களின் விலை கடுமையாக உயர்ந்துள்ளது.

வரத்து அதிகரித்தபோதும் தேவை கூடுதலாக உள்ளதால் அனைத்து பொருட்களின் விலையும் உயர்ந்துள்ளது. இருந்தபோதும் பொதுமக்கள் ஆர்வமுடன் வாங்கி செல்கின்றனர்.

திண்டுக்கல் மார்க்கெட்டுக்கு சுற்றுவட்டார கிராமங்களில் இருந்து பூக்கள் வரத்து உள்ளது. 1 கிலோ மல்லிகை பூ ரூ.300-ல் இருந்து ரூ.600 ஆக உயர்ந்துள்ளது. கனகாம்பரம் ரூ.700, முல்லை ரூ.600, ஜாதிப்பூ ரூ.300, செண்டுமல்லி ரூ.120, காக்கரட்டான் ரூ.700, செவ்வந்தி ரூ.220, சம்பங்கி ரூ.300, அரளி ரூ.400, துளசி ரூ.50 என்ற விலையில் விற்பனையானது.

குறிப்பாக மல்லிகை, சம்பங்கி, துளசி தேவை அதிகரித்துள்ளது. இதற்காக திண்டுக்கல் மார்க்கெட்டுக்கு 10 டன் சம்பங்கி வந்து இறங்கி உள்ளது. நாளை கோவில் உள்ளிட்ட இடங்களில் சிறப்பு பூஜைகள் நடைபெறும் என்பதால் பூ மாலை கட்டும் பணியில் தொழிலாளர்கள் மும்முரமாக ஈடுபட்டுள்ளனர்.

சென்னை:

முதல்-அமைச்சர் எடப்பாடி பழனிசாமி வெளியிட்டுள்ள அறிக்கையில் கூறியிருப்பதாவது:-

நவராத்திரி விழாவையும், வெற்றித் திருநாளாம் விஜயதசமி திருநாளையும் நாடு முழுவதும் மகிழ்ச்சியுடன் கொண்டாடும் இந்த இனிய நாட்களில், தமிழ்நாட்டு மக்கள் அனைவருக்கும் எனது உளமார்ந்த ஆயுத பூஜை மற்றும் விஜயதசமி திருநாள் நல்வாழ்த்துகளை தெரிவித்துக் கொள்கிறேன்.

வாழ்வின் உயர்வுக்கு அடிப்படையான வீரம், கல்வி மற்றும் செல்வம் ஆகியவற்றை அருள வேண்டி, நவராத்திரி எனப்படும் ஒன்பது திருநாட்களின், முதல் மூன்று நாட்கள் வீரமிகு துர்கா தேவியையும், அடுத்த மூன்று நாட்கள் செல்வம் பொழியும் லட்சுமி தேவியையும், நிறைவாக மூன்று நாட்கள் கல்வி தரும் சரஸ்வதி தேவியையும், மக்கள் பக்தியுடன் போற்றி வழிபடுவது நவராத்திரி விழாவின் சிறப்பு அம்சமாகும்.

“செய்யும் தொழிலே தெய்வம்” என்பதை உணர்ந்து, மக்கள் தங்கள் தொழில் சார்ந்த கருவிகளை இறைபொருட்களாக பாவித்து, தொழில் பெருக அதற்கு பூஜை செய்து, வாழ்வில் வளம்பெற தெய்வத்தை வணங்கிடும் நன்னாள் “ஆயுத பூஜை” திருநாளாகும்.

விஜயதசமி திருநாளன்று தொடங்கப்படும் செயல்கள் யாவும் வெற்றி பெறும் என்ற நம்பிக்கையுடன், மக்கள் தங்கள் குழந்தைகளுக்கு முதன்முதலாக கல்வியை தொடங்குதல், புதிய தொழில்களை ஆரம்பித்தல் போன்ற புதிய முயற்சிகளை துவக்கி, விஜயதசமி திருநாளை உற்சாகமாக கொண்டாடி மகிழ்வார்கள்.

ஆயுத பூஜை மற்றும் விஜயதசமி திருநாட்களை மகிழ்ச்சியுடன் கொண்டாடும் இந்த சிறப்புமிக்க திருநாளில், அன்னையின் அருளால் தமிழ்நாட்டு மக்கள் அனைவரும், வாழ்வில் வெற்றி மேல் வெற்றி பெற்று, நலமுடனும், வளமுடனும் வாழ்ந்திட எனது மனமார்ந்த நல்வாழ்த்துகளை மீண்டும் ஒருமுறை உரித்தாக்கிக் கொள்கிறேன்.

இவ்வாறு அவர் கூறியுள்ளார். #ADMK #Edappadipalaniswami #Ayudhapooja