நீங்கள் தேடியது "தமிழக எல்லை"

ஈரோடு:

தமிழகத்தில் பாராளுமன்ற தேர்தல் தேதி அறிவிக்கப்பட்டு தேர்தல் நடத்த முறைகள் அமல்படுத்தப்பட்டு உள்ளது.

நீலகிரி பாராளுமன்ற தொகுதிக்குட்பட்ட கர்நாடக எல்லையில் அமைந்துள்ள தாளவாடி பகுதியில் பறக்கும் படை அலுவலர் செல்வன் தலைமையில் சப்-இன்ஸ்பெக்டர் நஞ்சுண்டன் கொண்ட குழுவினர் தமிழக கர்நாடக எல்லை பகுதியான பாரதிபுரம், அருள்வாடி பகுதிலும் அதே போல் தொட்டகாஜனூர், சூசைபுரம்,மெட்டல்வாடி, திகனாரை, மல்லன்குழி, பகுதியில் தீவிர வாகன சோதனையில் ஈடுபட்டு வந்தனர்.

அந்த வழியாக வரும் கார், பஸ், வேன் வாகனங்களை சோதனைக்கு பிறகே அனுமதிக்கப்படுகின்றனர். அந்த வழியாக வரும் வாகன பதிவு எண், செல் நெம்பர் ஆகிய விபரங்களையும் சேகரித்து வருகின்றனர்.

அப்போது தமிழக கர்நாடக எல்லை அருள்வாடி அருகே கர்நாடக பதிவு எண் கொண்ட காரை நிறுத்தி அதிகாரிகள் சோதனை செய்தனர். அதில் 1 லட்சத்து 70 ஆயிரம் ரூபாய் பணம் இருந்தது தெரிய வந்தது.

காரின் உரிமையாளர் சம்பத் கர்நாடக மாநிலம் ஆ‌ஷன் கிராமத்தை சேர்ந்தவர் என்பவர் அருள்வாடி பகுதியில் இருந்து தாளவாடி பகுதிக்கு விதை உருளைக்கிழங்கு பணம் பெற்று செல்வதாக தெரிவித்தார். ஆனால் அதற்கான உரிய ஆவணம் இல்லாததால் அதிகாரிகள் பணத்தை பறிமுதல் செய்தனர்.

பணத்தை சத்தியமங்கலம் தாசில்தார் கார்த்திக்கிடம் ஒப்படைக்கப்படும் என தெரிவித்தனர். உரிய ஆவணத்தை காட்டி பணத்தை பெற்று கொள்ளலாம் எனவும் தெரிவித்தனர்.  #LokSabhaElections2019

ஊத்துக்கோட்டை:

பருவ மழை பொய்த்து போனதால் சென்னைக்கு குடிநீர் வழங்கும் பூண்டி மற்றும் புழல், சோழவரம், செம்பரம்பாக்கம் ஏரிகளின் நீர்மட்டம் மிகவும் குறைந்து உள்ளது. சென்னையில் குடிநீர் வினியோகம் பாதிக்கப்படும் சூழ்நிலை நிலவி வருகிறது.

இதனை கருத்தில் கொண்டு கிருஷ்ணா நதி நீர் பங்கீட்டு திட்டத்தின்படி ஆந்திர மாநிலம் கண்டலேறு அணையில் இருந்து பூண்டி ஏரிக்கு தண்ணீர் திறந்து விடும்படி கடந்த மாதம் ஜதராபாத்தில் நடைபெற்ற கிருஷ்ணா நதி நீர் மேலாண்மை வாரிய கூட்டத்தில் தமிழக பொதுப் பணித்துறையை சேர்ந்த உயர்மட்ட அதிகாரிகள் வேண்டுகோள் விடுத்தனர்.

இதேபோல் தண்ணீர் இன்றி கருகி வரும் நெற்பயிர்களை காப்பாற்ற தெலுங்கு கங்கை திட்டத்தின் கீழ் கிருஷ்ணா நதி கால்வாயில் தண்ணீர் திறந்து விடும்படி விவசாயிகள் ஆந்திர அரசுக்குக்கு கோரிக்கை விடுத்தனர்.

இந்த கோரிக்கையை ஏற்று ஆந்திர அரசு கடந்த 7-ந் தேதி காலை கண்டலேறு அணையிலிருந்து கிருஷ்ணா தண்ணீர் திறந்து விட்டது.

முதலில் வினாடிக்கு 1000 கனஅடி தண்ணீர் திறந்து விடப்பட்டது. அதன் பின்னர் கூடுதலாக 1000 கனஅடி தண்ணீர் திறக்கப்பட்டு தற்போது வினாடிக்கு 2 ஆயிரம் கனஅடி தண்ணீர் திறக்கப்படுகிறது.

இந்த தண்ணீர் நேற்று மாலை 4.30 மணிக்கு தமிழக எல்லையான ஊத்துக்கோட்டை அருகே உள்ள தாமரைகுப்பம் ஜீரோ பாயிண்டுக்கு வந்து சேர்ந்தது.

பொதுப் பணித்துறை செயற்பொறியாளர் ஹென்றி ஜார்ஜ், உதவி செயற்பொறியாளர் சுப்புராஜ், உதவி பொறியாளர்கள் சண்முகம், சதீஷ்குமார், பழனிகுமார், பிரதீஷ் ஆகியோர் சிறப்பு பூஜைகள் நடத்தி மலர் தூவி தண்ணீரை வரவேற்றனர்.

இந்த நீர் இங்கிருந்து 25 கிலோ மீட்டர் தூரத்தில் உள்ள பூண்டி ஏரிக்கு இன்று இரவு சென்றடைய வாய்ப்பு உள்ளது. இன்று காலை நிலவரப்படி பூண்டி ஏரியை நோக்கி 39 கனஅடி வீதம் தண்ணீர் வந்து கொண்டு இருக்கிறது.

இதன் அளவு படிப்படியாக அதிகரிக்கும். கிருஷ்ணா நதி நீர் வந்து கொண்டிருப்பதால் பூண்டி ஏரியில் நீர்மட்டம் உயர வாய்ப்பு ஏற்பட்டு இருக்கிறது. அதன்பின் இணைப்பு கால்வாய் மூலம் புழல் மற்றும் செம்பரம்பாக்கம் ஏரிகளுக்கு தண்ணீர் திறக்கப்படும்.

இந்த நிலையில் கிருஷ்ணா நதி நீர் தமிழக எல்லை ஜீரோ பாயிண்ட் வந்தடைந்த நிகழ்ச்சியில் கலந்துகொண்ட ஆந்திர பொதுப்பணித்துறை அதிகாரி ஒருவர் கூறும்போது, ‘கிருஷ்ணா நதி பங்கீடு திட்டத்தின் கீழ் ஆந்திர அரசு தமிழகத்துக்கு ஜனவரி முதல் ஏப்ரல் வரை 4 டி.எம்.சி.யும் ஜூலை முதல் அக்டோபர் வரை 8 டி.எம்.சி. என மொத்தம் 12 டிஎம்சி தண்ணீர் வழங்க வேண்டும். அதன்படி முதல் தவணையில் 2 டி.எம்.சி. தண்ணீர் திறந்துவிட வாய்ப்பு உள்ளது’ என்றார்.

சென்னை:

சென்னைக்கு குடிநீர் வழங்கும் பூண்டி, புழல், செம்பரம்பாக்கம், சோழவரம் ஏரிகள் வேகமாக வறண்டு வருகின்றன.

4 ஏரிகளில் மொத்தம் 949 மில்லியன் கனஅடி மட்டுமே தண்ணீர் உள்ளது. (மொத்தம் 11 ஆயிரத்து 257 மில்லியன் கனஅடி நீர் சேமித்து வைக்கலாம்).

இந்த தண்ணீரை வைத்து இன்னும் ஒரு மாதத்துக்கு மட்டுமே சென்னை நகர மக்களின் குடிநீர் தேவையை நிறைவேற்ற முடியும். இந்த நிலையில் கிருஷ்ணா நதி நீர் பங்கீட்டு திட்டத்தின் படி கண்டலேறு அணையில் இருந்து பூண்டி ஏரிக்கு தண்ணீர் திறந்துவிட வேண்டும் என்று தமிழக அதிகாரிகள் தொடர்ந்து வலியுறுத்தி வந்தனர்.

இதேபோல் தண்ணீர் இன்றி கருகி வரும் நெல் பயிர்களை காப்பாற்ற கிருஷ்ணா கால்வாயில் தண்ணீர் திறக்க வேண்டும் என்று ஆந்திர விவசாயிகளும் ஆந்திர அரசுக்கு கோரிக்கை விடுத்தனர்.

இதைத் தொடர்ந்து நேற்று முன்தினம் காலை கண்டலேறு அணையில் இருந்து கிருஷ்ணா கால்வாயில் தண்ணீர் திறக்கப்பட்டது. முதலில் ஆயிரம் கனஅடியாக திறக்கப்பட்ட தண்ணீரின் அளவு பின்னர் 2 ஆயிரம் கனஅடியாக அதிகரிக்கப்பட்டது.

இன்று காலை நிலவரப்படி கிருஷ்ணா தண்ணீர் ஆந்திர மாநிலம் சத்யவேடு அருகே வந்து கொண்டு இருக்கிறது. அங்கிருந்து 25 கிலோ மீட்டர் தூரத்தில் உள்ள தமிழக எல்லையான தாமரைக்குப்பம் ‘ஜீரோ’ பாயிண்டுக்கு இன்று இரவு கிருஷ்ணா நீர் வந்தடையும் என்று எதிர்பார்க்கப்படுகிறது.

அதில் இருந்து 25 கிலோ மீட்டர் தூரத்தில் இருக்கும் பூண்டி ஏரியை தண்ணீர் நாளை காலை சென்றடையும். தொடர்ந்து கிருஷ்ணா கால்வாயில் 2 ஆயிரம் கனஅடி தண்ணீர் வந்து கொண்டு இருக்கிறது.

பூண்டி ஏரியின் மொத்த கொள்ளளவு 3231 மில்லியன் கனஅடி. தற்போது வெறும் 166 மில்லியன் கனஅடி மட்டுமே தண்ணீர் உள்ளது. கடந்த ஆண்டு இதே நாளில் ஏரியில் 1,540 மில்லியன் கனஅடி தண்ணீர் இருந்தது குறிப்பிடத்தக்கது. #Krishnawater

கொழிஞ்சாம்பாறை:

கேரள மாநிலம் வயநாடு, கோழிக்கோடு, பாலக்காடு அட்டப்பாடி ஆகிய வனப்பகுதிகளில் மாவோயிஸ்டு நடமாட்டம் அதிகமாக உள்ள பகுதியாகும்.

மாவோயிஸ்டுகள் அடிக்கடி ஆதிவாசி மக்களிடம் பேச்சுவார்த்தை நடத்துவதும் போலீசார் மீது தாக்குதல், அரசு அலுவலங்ககளை தாக்குவது, வன ஊழியர்களை பிடித்துச்செல்வதுமாக இருந்தனர். அவர்கள் நவீன ரக துப்பாக்கியுடன் போலீசுடன் மோதி வந்தனர்.

இந்நிலையில் கொரில்லா தாக்குதல் நடத்தப்போவதாக பகிரங்கமாக அறிக்கை விடுத்தனர்.

இந்நிலையில் மாவோயிஸ்டு தடுப்பு போலீசார், தண்டர்போல்டு போலீசார் மாவோயிஸ்டுகள் நடமாட்டத்தை இரவு பகலாக கண்காணித்து வந்தனர்.

இந்நிலையில் மாவோயிஸ்டு டேனியஸ் (வயது 30) என்பவர் அட்டப்பாடி அகழி பகுதியில் சுற்றித்திரிவதாக சர்க்கிள் இன்ஸ்பெக்டர் சுஜித் தாசுக்கு தகவல் கிடைத்தது.

இதனையடுத்து போலீசார் இன்று காலை அகழியில் சுற்றித்திரிந்த டேனியசை கைது செய்தனர்.

டேனியசிடம் விசாரணை நடத்த உயர் போலீஸ் அதிகாரிகள் பாலக்காடு விரைந்துள்ளனர். கொரில்லா தாக்குதல் நடத்த இடம் தேர்வு செய்ய வந்தபோது சிக்கினார் என்பது முதல் கட்ட விசாரணையில் தெரியவந்தது. கைது செய்யப்பட்ட மாவோயிஸ்டு டேனியஸ் கோவை புலியகுளத்தை சேர்ந்தவர் என்றும், கொரில்லா தாக்குதலில் சிறப்பு பயிற்சி பெற்றவர் என்றும் அகழி போலீசார் கூறினர். #tamilnews

ஊத்துக்கோட்டை:

சென்னை மக்களின் குடிநீர் தேவையை நிறைவேற்றும் முக்கிய ஏரிகளில் ஒன்று பூண்டி ஏரி.

கிருஷ்ணா நதி நீர் பங்கீடு திட்டத்தின்படி ஆந்திர மாநிலம் கண்டலேறு அணையில் இருந்து கடந்த ஜனவரி 1-ந் தேதி பூண்டி ஏரிக்கு தண்ணீர் திறக்கப்பட்டு 26-ந் தேதி நிறுத்தப்பட்டது. இந்த இடைபட்ட காலத்தில் 2. 253 டி.எம்.சி. தண்ணீர் பூண்டி ஏரிக்கு வந்தடைந்தது.

இந்த நிலையில் நீர்வரத்து இல்லாததாலும், கோடை வெயில் காரணத்தாலும் பூண்டி ஏரியில் தண்ணீர் முற்றிலும் வறண்டு விட்டது.

இதன் காரணமாக மே மாத இறுதியில் புழல் மற்றும் செம்பரம்பாக்கம் ஏரிகளுக்கும், சென்னை குடிநீர் வாரியத்துக்கும் தண்ணீர் திறப்பு முற்றிலுமாக நிறுத்தப்பட்டது.

சென்னைக்கு குடிநீர் வழங்கும் புழல், செம்பரம்பாக்கம், சோழவரம் ஏரிகளின் தண்ணீர் இருப்பு குறைந்து வருவதை கருத்தில் கொண்டு இரண்டாவது தவணையாக ஜூலை மாதத்தில் கண்ட லேறு அணையிலிருந்து தண்ணீர் திறந்து விடும்படி தமிழக பொதுப் பணித்துறை அதிகாரிகள் ஆந்திர அரசுக்கு கடிதம் எழுதினர்.

ஆனால் போதிய தண்ணீர் இருப்பு இல்லாததால் பூண்டி ஏரிக்கு தண்ணீர் திறக்க இயலாது என்று ஆந்திர அதிகாரிகள் தெரிவித்து இருந்தனர்.

இதற்கிடையே இம்மாத முதல் வாரத்தில் ஆந்திராவில் உள்ள கண்டலேறு அணைக்கு தண்ணீர் வழங்கும் ஸ்ரீசைலம் அணை முழுவதுமாக நிரம்பிதால் உபரி நீரை கிருஷ்ணா நதியில் திறந்து விட்டனர்.

இந்த நீர் சோமசிலா அணை வழியாக கண்டலேறு அணைக்கு வந்து கொண்டிருக்கிறது. இதனால் கண்டலேறு அணையின் நீர்மட்டம் படிப்படியாக உயர்ந்து வருகிறது.

இதையடுத்து கண்டலேறு அணையிலிருந்து பூண்டி ஏரிக்கு தண்ணீர் திறந்து விடும்படி தமிழக அதிகாரிகள் கடந்த சில நாட்களுக்கு முன் ஆந்திர அரசுக்கு மீண்டும் கடிதம் எழுதினர். அதன்படி கடந்த 22-ந் தேதி காலை கண்டலேறு அணையிலிருந்து பூண்டி ஏரிக்கு கிருஷ்ணா தண்ணீர் திறந்து விடப்பட்டது.

தொடக்கத்தில் வினாடிக்கு 200 கனஅடி தண்ணீர் திறக்கப்பட்டது. அதன் பின்னர் 300 கனஅடியாக தண்ணீர் திறப்பு அதிகரிக்கப்பட்டது. இரண்டு நாட்களுக்கு முன்னர் தண்ணீர் திறப்பு வினாடிக்கு 350 கனஅடியாக உயர்த்தினர்.

இந்த தண்ணீர் 152 கிலோ மீட்டர் தூரம் பாய்ந்து இன்று காலை தமிழக எல்லையான ஊத்துக்கோட்டை அருகே உள்ள தாமரைகுப்பம் ‘ஜீரோ பாயிண்ட்’ வந்தடைந்தது.

வினாடிக்கு 75 கனஅடி வீதம் தண்ணீர் வந்து கொண்டிருக்கிறது. பொதுப் பணித்துறை செயற்பொறியாளர் மரிய ஹென்ரி ஜார்ஜ், உதவி செயற்பொறியாளர்கள் சுப்புராஜ், அரசு, அதிகாரிகள், உதவி பொறியாளர்கள் பிரதீஷ், பழனிகுமார், சதீஷ், பழனிகுமார், சண்முகம் ஆகியோர் மலர் தூவி கிருஷ்ணா நதி நீரை வரவேற்றனர்.

இந்த நீர் 25 கிலோ மிட்டர் தூரத்தில் உள்ள பூண்டி ஏரிக்கு இன்று இரவு சென்றடையும் என்று எதிர்பார்க்கப்படுகிறது. பூண்டி ஏரியில் 3231 மில்லியன் கனஅடி தண்ணீர் சேமித்து வைக்கலாம். இன்று காலை நிலவரப்படி 13 மில்லியன் கனஅடி தண்ணீர் இருப்பு உள்ளது. கண்டலேறு அணை தண்ணீர் வரத்து காரணமாக பூண்டி ஏரியின் நீர்மட்டம் உயர வாய்ப்பு உள்ளது. #Krishnawater

கோவை:

கேரள மாநிலத்தில் ஏற்பட்ட மழை வெள்ள பாதிப்பை தொடர்ந்து அங்கு எலி காய்ச்சல் வேகமாக பரவி வருகிறது. எலி காய்ச்சலுக்கு இதுவரை 29 பேர் பலியாகி உள்ளதாக தெரிவிக்கப்பட்டுள்ளது.

எனவே எலி காய்ச்சல் பாதிப்புடன் கோவைக்கு வரும் நபர்களை கண்டறியவும், காய்ச்சல் பரவாமல் தடுக்கவும் சுகாதாரத்துறை சார்பில் பல்வேறு நடவடிக்கைகள் எடுக்கப்பட்டு வருகிறது.

இது குறித்து மாநகராட்சி சுகாதாரத்துறை அதிகாரி சந்தோஷ்குமார் கூறியதாவது:-

எலி காய்ச்சல் எலிகளின் சிறுநீர் மூலமாக லெப்டோ பைரோசியஸ் என்ற வைரஸ் மூலம் பரவுகிறது. எலி காய்ச்சலை சாதாரண காய்ச்சல் என கவனிக்காமல் விட்டால் உயிரிழப்பை ஏற்படுத்தும்.

இந்த காய்ச்சல் 7 நாள் முதல் 10 நாட்கள் வரை இருக்கும். காய்ச்சல் பாதிப்பு உடையவர்களுக்கு கை, கால் வலி, தலைவலியுடன் கண் சிவப்பாக மாறிவிடும். மேலும் அடிக்கடி வயிற்று வலியுடன் வாந்தியும் ஏற்படும். கவனிக்காமல் விட்டால் கல்லீரல் பாதிப்பு ஏற்பட்டு உயிரிழப்பு ஏற்படும்.

எனவே காய்ச்சல் பாதிப்பு இருந்தால் உடனடியாக ஆஸ்பத்திரிக்கு சென்று சிகிச்சை பெற வேண்டும். சுகாதார துறை சார்பில் அரசு ஆஸ்பத்திரி, ஆரம்ப, துணை சுகாதார நிலையங்களில் சிகிச்சை அளிக்க ஏற்பாடு செய்யப்பட்டுள்ளது. மேலும் தமிழக-கேரள எல்லையில் உள்ள சோதனை சாவடிகளில் முகாம் அமைத்து காய்ச்சல் பாதிப்புடன் கேரளாவில் இருந்து யாராவது வருகிறார்களா? என கண்காணித்து வருகிறோம். இது வரை கோவை மாவட்டத்தில் யாருக்கும் எலி காய்ச்சல் பாதிப்பு இல்லை.

எலி காய்ச்சல் பரவாமல் தடுக்க பொதுமக்கள் சுற்றுபுறத்தை தூய்மையாக வைத்துக்கொள்ள வேண்டும். தண்ணீரை காய்ச்சி குடிக்க வேண்டும். மேற்கண்ட அறிகுறிகளுடன் காய்ச்சல் பாதிப்பு இருந்தால் உடனடியாக ஆஸ்பத்திரிக்கு சென்று சிகிச்சை பெற வேண்டும்.

இவ்வாறு அவர் கூறினார்.

பொள்ளாச்சி:

கனமழை தொடர்வதால் பொள்ளாச்சி வழியாக கேரளாவுக்கு லாரிகள் செல்ல முடியவில்லை.

கேரள மாநிலத்தின் பல்வேறு பகுதிகளில் கன மழை பெய்து வருகிறது. மழை காரணமாக வெள்ள பெருக்கு ஏற்பட்டு உள்ளது. மேலும் நிலச்சரிவும் ஏற்பட்டுள்ளது.

இதனால் கேரள மாநிலத்திற்கு லாரி உள்ளிட்ட கனரக வாகனங்கள் செல்ல தடை விதிக்கப்பட்டு இருக்கிறது. கோவை மாவட்டம் பொள்ளாச்சியில் இருந்து கேரள மாநிலம் பாலக்காடு வழியாக திருச்சூர் உள்ளிட்ட கேரளாவின் பிற மாவட்டங்களுக்கு லாரி உள்ளிட்ட கனரக வாகனங்கள் செல்ல தடை விதிக்கப்பட்டு உள்ளது.

இதனால் பொள்ளாச்சி பகுதியில் இருந்து காய்கறி, மஞ்சி, தேங்காய் மற்றும் கட்டுமான பொருட்கள் கொண்டு செல்லப்பட்ட லாரிகளை நடுப்புணி, கோபாலபுரம், செமனாம்பதி, மீனாட்சிபுரம் உள்ளிட்ட எல்லை பகுதி சோதனை சாவடியிலே கேரள அதிகாரிகள் தடுத்து நிறுத்தி தமிழகத்திற்கு திருப்பி அனுப்பினர்.

இதனால் லாரிகள் ரோட்டின் இரு புறமும் அணி வகுத்து நிற்கின்றன. டிரைவர்கள், கிளீனர்கள் அவதியடைந்துள்ளனர். அவர்கள் லாரிகளில் சமையல் செய்து சாப்பிட்டு வருகின்றனர். பாலக்காடு வழியாக தலச்சேரி, காசர் கோடு, கண்ணூர் செல்லும் லாரிகள் மட்டும் குறிப்பிட்ட நேர இடைவெளியில் 10 லாரிகளாக அனுமதிக்கப்பட்டு வருகின்றன.

பொள்ளாச்சியை அடுத்துள்ள ஆழியாறு அணையில் இருந்து திறக்கப்படும் தண்ணீர் கேரள மற்றும் தமிழக எல்லையில் கோபாலபுரம் அருகே உள்ள முலத்தரா தடுப்பணை வழியாக கேரளாவுக்கு செல்கிறது.

இந்த தடுப்பணையின் தடுப்பு சுவர் கடந்த 9-ந் தேதியன்று உடைந்தது. இந்த நிலையில் தற்போது ஆழியாறில் இருந்து அதிக பட்சமாக தண்ணீர் திறந்து விடப்பட்டு உள்ளது. இதனால் ஆழியாற்றில் வெள்ள பெருக்கு ஏற்பட்டு தண்ணீர் கரை புரண்டு ஓடுகிறது.

வெள்ளத்திற்கு தாக்கு பிடிக்க முடியாக மூலத்தரா தடுப்பு அணையின் இரு பக்கத்திலும் நேற்று மீண்டும் உடைப்பு ஏற்பட்டது. அணையில் ஆங்காங்கே தண்ணீரை தடுப்பதற்காக ஏற்படுத்தப்பட்ட மணல் மூட்டைகள் மற்றும் கான்கிரீட் சுவர்கள் அடித்து செல்லப்பட்டது.

பொள்ளாச்சியில் இன்று காலையும் மழை பெய்தது. #tamilnews

தர்மபுரி:

கேரளாவிலும், கர்நாடகத்தின் கடலோர மாவட்டங்களிலும் வெளுத்து வாங்கிய தென்மேற்கு பருவ மழை, தற்போது சற்று குறைந்து இருக் கிறது.

கர்நாடகத்தில் காவிரி நீர்ப்பிடிப்பு பகுதிகளில் தொடர்ந்து பெய்து வரும் மழையின் காரணமாக மண்டியா மாவட்டத்தில் உள்ள கே.ஆர்.எஸ். (கிருஷ்ணராஜசாகர்), குடகு மாவட்டத்தில் உள்ள ஹாரங்கி, ஹாசன் மாவட்டத்தில் உள்ள ஹேமாவதி மற்றும் மைசூரு மாவட்டத்தில் உள்ள கபினி அணைகள் வேகமாக நிரம்பி வருகின்றன.

124.80 அடி உயரம் கொண்ட கே.ஆர்.எஸ். அணையில் நேற்று மாலை நிலவரப்படி 98.20 அடி தண்ணீர் உள்ளது. (கடந்த ஆண்டு இதே நாளில் 67.78 அடி தண்ணீர் இருந்தது). அணைக்கு வினாடிக்கு 31,037 கனஅடி வீதம் தண்ணீர் வந்து கொண்டிருக்கிறது. அணையில் இருந்து வினாடிக்கு 437 கனஅடி வீதம் தண்ணீர் திறந்து விடப்பட்டு வருகிறது.

அணைக்கு வரும் நீரின் அளவு இதேபோன்று தொடர்ந்து நீடித்தால் இன்னும் 10 நாட்களில் அணை நிரம்பி விடும் என்று அணையின் என்ஜினீயர்கள் எதிர்பார்க்கிறார்கள். கே.ஆர்.எஸ். அணை நிரம்ப இன்னும் 26.60 அடியே பாக்கி உள்ளது.

கடல் மட்டத்தில் இருந்து 2,922 அடி உயரம் கொண்ட ஹேமாவதி அணையில் 2,827.16 அடி உயரத்துக்கு தண்ணீர் உள்ளது. இந்த அணைக்கு வினாடிக்கு 19,242 கனஅடி தண்ணீர் வந்து கொண்டு இருக்கிறது.

இதேபோல் கடல் மட்டத்தில் இருந்து 2,859 அடி உயரம் கொண்ட ஹாரங்கி அணையின் நீர்மட்டம் 2,827.08 அடியாக உள்ளது. இந்த அணைக்கு வினாடிக்கு 2,000 கனஅடி நீர் வந்து கொண்டு இருக்கிறது. இந்த இரு அணைகளும் விரைவில் நிரம்பி விடும் என எதிர்பார்க்கப்படுகிறது.

இந்த அணைகளில் இருந்து திறந்து விடப்படும் தண்ணீர் கே.ஆர்.எஸ். அணைக்கு வந்து சேரும்.

கடல் மட்டத்தில் இருந்து 2,284 அடி உயரம் கொண்ட கபினி அணையின் நீர்மட்டம் நேற்று மாலை நிலவரப்படி 2,282 அடியாக இருந்தது. இன்னும் 2 அடி நிரம்பினால் அணை முழுகொள்ளளவை எட்டிவிடும்.

கபினி அணைக்கு நேற்று முன்தினம் வினாடிக்கு 36,650 கனஅடி தண்ணீர் வந்து கொண்டு இருந்தது. இதனால் பாதுகாப்பு கருதி அணையில் இருந்து நேற்று முன்தினம் வினாடிக்கு 35 ஆயிரம் கனஅடி தண்ணீர் திறந்துவிடப்பட்டது. நேற்று நீர் வரத்து வினாடிக்கு 25 ஆயிரம் அடியாக குறைந்ததால், திறந்து விடப்படும் நீரின் அளவு வினாடிக்கு 20 ஆயிரம் அடியாக குறைக்கப்பட்டது.

கபினி அணையில் இருந்து திறந்து விடப்பட்ட தண்ணீர் தமிழக-கர்நாடக எல்லையான பிலிகுண்டுலுவை நேற்று இரவு வந்து அடைந்தது. அந்த இடத்தில்தான், கர்நாடகம் காவிரியில் தமிழகத்துக்கு திறந்து விடும் தண்ணீர் அளவிடப்படுகிறது. எனவே அந்த இடத்தில் மத்திய நீர்வளத்துறை அதிகாரிகள், தமிழகத்துக்கு வந்து சேர்ந்த நீரின் அளவை கணக்கிட்டனர்.

இந்த தண்ணீர் ஒகேனக் கல்லை கடந்து விரைவில் மேட்டூர் அணையை வந்து சேரும் என்று எதிர்பார்க்கப்படுகிறது.

120 அடி உயரம் கொண்ட மேட்டூர் அணையின் நீர்மட்டம் நேற்று மாலை நிலவரப்படி 39.96 அடியாக இருந்தது. அணைக்கு வினாடிக்கு 616 கனஅடி தண்ணீர் வந்து கொண்டு இருந்தது.

கபினி அணையில் இருந்து திறந்து விடப்பட்ட தண்ணீர் மேட்டூரை வந்து சேரும் போது, அணையின் நீர்மட்டம் வேகமாக உயர வாய்ப்பு உள்ளது.

மேலும் கே.ஆர்.எஸ். அணை விரைவில் நிரம்பும் பட்சத்தில் அதில் இருந்து கூடுதல் தண்ணீர் காவிரியில் திறந்துவிடப்படும் என்பதால், மேட்டூர் அணைக்கு நீர்வரத்து மேலும் அதிகரிக்கும்.