நீங்கள் தேடியது "தயாரிக்கும் பணி"

விருத்தாசலம்:

ஆண்டுதோறும் ஆவணி மாதம் வளர்பிறை சதுர்த்தி நாள் அன்று விநாயகர் சதுர்த்தி கொண்டாடப்படு கிறது. இந்த ஆண்டு விநாயகர் சதுர்த்தி வருகிற 13-ந் தேதி கொண்டாடப்படுகிறது. சதுர்த்தியையொட்டி இந்துக்கள் விநாயகர் சிலைகளை வைத்து வழிபடுவது வழக்கம். இதற்காக விநாயகர் சிலைகள் தயாரிக்கும் பணியில் தொழிலாளர்கள் கடந்த ஒரு மாதமாக மும்முரமாக ஈடுபட்டு வருகின்றனர்.

அந்த வகையில் விருத்தாசலம், மங்கலம்பேட்டை பகுதியில் விநாயகர் சிலைகள் தயாரிக்கும் பணி மும்முரமாக நடந்து வருகிறது. அதன்படி சிவன், பார்வதியுடன் இருப்பது போன்ற விநாயகர், 3 தலையுடன் இருக்கும் விநாயகர், மயில் விநாயகர், அன்ன விநாயகர், மாட்டு வண்டிகளில் அமர்ந்தபடி செல்வது போன்ற விநாயகர், ஐந்துமுக சிங்க விநாயகர், நந்தி விநாயகர், பாகுபலி விநாயகர், மோட்டார் சைக்கிளை ஓட்டிச்செல்வது போன்ற விநாயகர், வலம்புரி விநாயகர், 5 தலை நாகத்துடன் இருக்கும் விநாயகர் உள்ளிட்ட பலவிதமான வடிவங்களில் 2 அடி முதல் 13 அடி உயரம் வரை சிலைகள் தயாரிக்கப்பட்டு வருகிறது. மேலும் தயாரிக்கப்பட்ட விநாயகர் சிலைகளுக்கு பல்வேறு வண்ணங்களில் வர்ணம் பூசும் பணியும் நடந்து வருகிறது.

இதுகுறித்து மங்கலம்பேட்டையை சேர்ந்த விநாயகர் சிலை தயாரிக்கும் தொழிலாளி ஒருவர் கூறுகையில், நாங்கள் களிமண், வண்டல்மண், ஆற்றுமணல், கிழங்கு மாவு கொண்டு இந்த விநாயகர் சிலைகளை தயாரித்து வருகிறோம். இதனை தண்ணீரில் கரைத்தால், நீர் நிலைகள் மாசுபடாது என்றார். 

திண்டுக்கல்:

நாடு முழுவதும் அடுத்த மாதம் (செப்டம்பர்) 13-ந் தேதி விநாயகர் சதுர்த்தி விழா சிறப்பாக கொண்டாடப்பட உள்ளது. இதையொட்டி, பொதுமக்கள் முக்கியமான இடங்களில் விநாயகர் சிலைகளை பிரதிஷ்டை செய்து வழிபடுவார்கள். பின்னர் அதனை ஊர்வலமாக கொண்டு சென்று ஏரி, குளம், ஆறு உள்ளிட்ட நீர்நிலைகளில் கரைப்பது வழக்கம்.

இந்த ஆண்டு திண்டுக்கல் மாவட்டத்தில் சுமார் 1,500 விநாயகர் சிலைகள் வைத்து வழிபட திட்டமிடப்பட்டுள்ளது. இந்து முன்னணி சார்பில் மட்டும் 1,000 சிலைகள் வைக்கப்பட உள்ளது குறிப்பிடத்தக்கது. இதை முன்னிட்டு திண்டுக்கல், நொச்சிஓடைப்பட்டி உள்பட பல்வேறு இடங்களில் விநாயகர் சிலைகள் தயாரிக்கும் பணி மும்முரமாக நடந்து வருகிறது.

திண்டுக்கல்- நத்தம் சாலையில் உள்ள நொச்சி ஓடைப்பட்டியில் உள்ள தனியார் சிலை தயாரிப்பு நிறுவனத்தில் விநாயகர் சிலைகள் தயாரிக் கப்பட்டு பல்வேறு இடங் களுக்கு அனுப்பி வைக்கப்பட்டு வருகிறது. தற்போது, சுமார் 100-க்கும் மேற்பட்ட சிலைகள் தயாரித்து வண்ணம் பூசும் பணிகள் தீவிரமாக நடந்து வருகிறது.

இதுகுறித்து அந்த நிறுவன உரிமையாளர் கஜேந்திரனிடம் கேட்டபோது, ‘ஆர்டரின்பேரில் சிலைகள் தயாரித்து அனுப்பி வைக்கிறோம். உயரத்துக்கு ஏற்றாற்போல ரூ.4 ஆயிரத்து 500 முதல் ரூ.20 ஆயிரம் வரை விநாயகர் சிலை உள்ளது. மேலும், மண்பானைகள், அகல்விளக்கு, மண்ணால் செய்யப்பட்ட குடிநீர் பாட்டில் ஆகியவற்றையும் விதவிதமாக தயாரிக்கிறோம். ரசாயனம் கலக்காமல் ஒரு மணி நேரத்தில் நீரில் கரையும் வகையில் விநாயகர் சிலைகளை தயாரித்து விற்பனை செய்கிறோம்’ என்றார். 

நாமக்கல்:

நாடு முழுவதும் விநாயகர் சதுர்த்தி விழா செப்டம்பர் மாதம் 13-ந் தேதி கொண்டாடப்படுகிறது. இதையொட்டி நாமக்கல் மாவட்டத்தின் பல்வேறு இடங்களில் அரசு அனுமதி பெற்று விநாயகர் சிலைகளை வைத்து பக்தர்கள் வழிபாடு நடத்துவது வழக்கம். இதற்கிடையே விநாயகர் சதுர்த்தி விழாவிற்காக விநாயகர் சிலைகள் தயாரிக்கும் பணி மாவட்டத்தில் பல்வேறு பகுதிகளில் தற்போது தொடங்கி மும்முரமாக நடந்து வருகிறது.

அதன் ஒரு பகுதியாக நாமக்கல் டவுன், பரமத்தி ரோட்டில் ஏ.டி.சி. டிப்போ அருகில் சந்தைப்பேட்டை புதூரை சேர்ந்த பிரபாகரன் தலைமையில் 8 பேர் கொண்ட குழுவினர் விநாயகர் சிலைகள் தயாரிக்கும் பணியில் ஈடுபட்டு உள்ளனர். ½ அடி முதல் 3 அடி வரை மண் சிலையாகவும், 3 அடிக்கு மேல் 12 அடி வரை கிழங்குமாவு மற்றும் பேப்பர் கூலை கொண்டும் சிலைகளை தயாரித்து வருகின்றனர்.

மேலும் தண்ணீரில் எளிதில் கரையக்கூடிய வாட்டர் கலர் பெயிண்டை கொண்டு பல வண்ணங்களில் சிலைகளை உருவாக்கி வருகின்றனர். இங்கு மான் விநாயகர், வேட்டை விநாயகர், கருட விநாயகர், சிங்க விநாயகர் என 18 வகையான விநாயகர் சிலைகள் பல வண்ணங்களில் தயாரிக்கப்பட்டு வருகிறது. மண் சிலைகள் குறைந்தபட்சம் 20 ரூபாயில் இருந்து 2 ஆயிரம் ரூபாய் வரையிலும், 3 அடிக்கு மேல் 12 அடி வரை உள்ள சிலைகள் குறைந்தபட்சம் ரூ.3 ஆயிரத்து 500 முதல் ரூ.22 ஆயிரம் வரையிலும் விற்பனை செய்யப்பட்ட உள்ளதாக சிலை தயாரிப்பாளர்கள் தெரிவித்தனர்.