நீங்கள் தேடியது "slug 102422"

சேலம்:

நாமக்கல் மாவட்டம் அத்தனூர் பகுதியை சேர்ந்தவர் அங்காயி. இவருக்கு கடந்த 5 நாட்களுக்கு முன்பு காய்ச்சல் பாதிப்பு ஏற்பட்டது.

அந்த பகுதியில் உள்ள ஆஸ்பத்திரிகளில் சிகிச்சை பெற்றும் குணமாகவில்லை. இதையடுத்து அங்காயி சேலம் அரசு ஆஸ்பத்திரியில் பன்றி காய்ச்சல் வார்டில் அனுமதிக்கப்பட்டு சிகிச்சை பெற்று வந்தார்.

ஆனால் 2 நாட்களாக சிகிச்சை அளித்தும், அங்காயி உடல்நிலையில் எந்த முன்னேற்றமும் இல்லாமல் இருந்தது. மேலும் நேற்று இரவு முதல் காய்ச்சல் பாதிப்பும் அதிகமானது.

இந்த நிலையில் இன்று காலை அங்காயி சிகிச்சை பலனின்றி பரிதாபமாக உயிரிழந்தார். இதைப்பார்த்த உறவினர்கள் கதறி அழுதனர். மேலும் அத்தனூர் பகுதியில் பரவும் காய்ச்சலை தடுக்க சுகாதாரத் துறையினர் நடவடிக்கை எடுக்க வேண்டும் என்று அந்த பகுதியினர் கோரிக்கை விடுத்து உள்ளனர். #Swineflu #Dengue

கருப்பூர்:

சேலம், சூரமங்கலத்தை அடுத்த சோளம்பள்ளத்தை சேர்ந்தவர் விஜயகுமார் (வயது 32). இவர் திருவாக்கவுண்டனூரில் உள்ள ஒரு கடையில் யு.பி.எஸ் மெக்கானிக்காக வேலை செய்து வருகிறார்.

இந்நிலையில் இன்று காலை 5.30 மணிக்கு வேலையை முடித்துவிட்டு சோளம்பள்ளம் ஜங்சன் அருகே உள்ள தாரமங்கலம் ரோட்டில் தனது வீட்டிற்கு செல்போன் பேசியபடி நடந்து சென்று கொண்டிருந்தார். அப்போது பைக்கில் மின்னல் வேகத்தில் வந்த 2 பேர் விஜயக்குமாரிடம் செல்போனை பறித்துக் கொண்டு தப்பித்து சென்றனர்.

இதனால் அதிர்ச்சி அடைந்த விஜயக்குமார் சூரமங்கலம் போலீசில் புகார் செய்தார். புகாரின் பேரில் இன்ஸ்பெக்டர் செந்தில் குமார் மற்றும் எஸ்.ஐ. கேசவன் தாரமங்கலம் ரோட்டில் துரத்தி சென்று கே.ஆர்.தோப்பூர் அருகே அவர்கள் 2 பேரையும் பிடித்தனர்.

தொடர்ந்து அவர்களிடம் விசாரணை நடத்தியதில் 2 பேரும் தாதகாப்பட்டியை சேர்ந்தவர்கள் என்று தெரிய வந்தது. அவர்கள் ரமேஷ் கண்ணன் (19) மற்றும் 17 வயது சிறுவன் என்பதும் தெரியவந்தது. பின்னர் போலீசார் அவர்களிடம் மோட்டார் சைக்கிள் மற்றும் செல்போனை பறிமுதல் செய்து சிறையில் அடைத்தனர்.

மேலும் இது குறித்து எஸ்.ஐ. கேசவன் கூறும்போது, சமீபகாலமாக செல்போன் திருட்டு சேலத்தில் அதிகளவில் நடைபெறுவதாக புகார்கள் எழுந்துள்ளது.

இதனால் நாங்கள் செல்போன் திருட்டில் ஈடுபடுபவர்களை பிடிக்க தனிப்படை அமைத்துள்ளோம். பொதுமக்கள் ரோட்டில் செல்லும் போதோ அல்லது பஸ்சில் பயணம் செல்லும் போதோ பாதுகாப்பாக செல்போனை பயன்டுத்த வேண்டும் என்றார்.

காடையாம்பட்டி:

சேலம் மாவட்டம் காடையாம்பட்டி அருகே உள்ள பொட்டியபுரம் கிராமத்தில் ஊராட்சி ஒன்றிய நடுநிலைப்பள்ளி செயல்பட்டு வருகிறது. இப்பள்ளியில் 135 மாணவ- மாணவிகள் கல்வி பயின்று வருகிறார்கள். இங்கு 8 ஆசிரியை, ஆசிரியர்கள் பணியாற்றி வருகின்றனர்.

நேற்று முன்தினம் மதியம் பள்ளியில் உணவு இடைவேளையின்போது, 8-ம் வகுப்பு மாணவர் ஒருவர், வழக்கம்போல் வீட்டிற்கு உணவு சாப்பிட சென்றுவிட்டு மதியம் தாமதமாக பள்ளிக்கு வந்தார்.

இதனால் வகுப்பு ஆங்கில ஆசிரியை கிரிஜா, அந்த மாணவரை ஏன் தாமதமாக வந்தாய் என கேட்டு கண்டித்துள்ளார். மேலும் பெஞ்ச் மீது ஏறி நிற்குமாறு கூறினார். இதனால் ஆவேசம் அடைந்த அந்த மாணவர் தான் கையில் வைத்திருந்த பிளாஸ்டிக் பொம்மைகளை சுவரில் எறிந்தார். இதில் ஒரு பொம்மை சுவரில் பட்டு எகிறி ஆசிரியை கிரிஜா மீது விழுந்தது. உடனே அவர், பள்ளியில் மற்ற மாணவர்களை போல் ஒழுங்காக இருக்குமாறு கூறி சத்தம் போட்டார்.

இதனால் கோபம் அடைந்த அந்த மாணவர் தேர்வு அட்டை, தன்னுடைய புத்தகப்பை மற்றும் கையில் கிடைத்த பொருட்களை ஆசிரியை மீது வீசியெறிந்து தாக்குதல் நடத்தினார். மேலும் ஆசிரியையை ஆபாசமாக திட்டியதாகவும் கூறப்படுகிறது.

இது குறித்து கிரிஜா, தலைமை ஆசிரியை புவனேஸ்வரியிடம் சென்று மாணவர் இப்படி செய்வதற்கு எல்லாம் நீங்கள் தான் காரணம் எனக் கூறி குற்றம் சாட்டினார்.

இதற்கிடையே மாணவர் பள்ளியில் நடந்த வி‌ஷயத்தை தனது பெற்றோரிடம் தெரிவித்தார். பெற்றோரும் பள்ளிக்கு வந்து எங்களது மகனை நீங்கள் எப்படி? பெஞ்ச் மீது ஏறி நிற்க சொல்லலாம் என கூறி வாக்குவாதத்தில் ஈடுபட்டனர்.

அதற்கு ஆங்கில ஆசிரியை கிரிஜா எல்லா பிள்ளைகளும் முன் கூட்டியே வகுப்பறைக்கு வந்து விடுகிறார்கள். உங்கள் மகன் மட்டும்தான் தினமும் தாமதமாக வருகிறான் என்று கூறினார். அதன் பிறகு தான் பெற்றோர் அங்கிருந்து கலைந்து சென்றனர்.

இந்த வி‌ஷயம் நேற்று மாலையில் தான் வெளியே தெரியவந்தது. உடனடியாக வட்டார கல்வி அலுவலர் அன்புலி பள்ளிக்கு நேரில் சென்று விசாரணை நடத்தினார். அங்கு ஊர் மக்களும் திரண்டனர். அவர்கள் பள்ளி தலைமை ஆசிரியை புவனேஸ்வரியையும், ஆங்கில ஆசிரியை கிரிஜாவையும் இடமாறுதல் செய்ய வேண்டும். இந்த 2 ஆசிரியைகளின் பனிப்போர் தான் பிரச்சினைக்கு காரணம். இவர்களின் மோதலால் தங்களது குழந்தைகளின் கல்வி பாதிக்கப்படுவதாக கூறி கல்வி அதிகாரியிடம் முறையிட்டனர்.

அப்போது கல்வி அதிகாரி கூறுகையில், இப்போதைக்கு இடமாறுதல் எதுவும் அளிக்க முடியாது. சம்பந்தப்பட்ட மாணவர், தனது வகுப்பு ஆசிரியை மீது தாக்குதல் நடத்தியிருக்கக் கூடாது. இனிமேல் இவ்வாறு செயல்பட்டால் மாணவன் மீது ஒழுங்கு நடவடிக்கை எடுக்கப்படும் என எச்சரிக்கை விடுத்தார்.

பள்ளியில் நடந்த சம்பவம் குறித்து ஓமலூர் போலீசாரிடம் கேட்டபோது, தலைமை ஆசிரியை புவனேஸ்வரிக்கும், ஆங்கில ஆசிரியை கிரிஜாவுக்கும் இடையே வகுப்புகள் நடத்துவது தொடர்பாக பிரச்சினை இருந்து வந்தது. அதுமட்டுமின்றி ஆசிரியர்கள் இரு கோஷ்டிகளாக செயல்பட்டு வருகின்றனர். அவ்வப்போது 2 பேரும் மோதிக் கொள்வார்கள். அதன் எதிரொலியாக மாணவர்கள் இதுபோன்ற செயல்களில் ஈடுபடுவதாக விசாரணையில் எங்களுக்கு தெரியவந்தது. சம்பந்தப்பட்டவர்கள் மீது கல்விதுறை தான் நடவடிக்கை எடுக்க வேண்டும். எங்களுக்கு இதில் சம்பந்தமில்லை என கூறி கைவிரித்து விட்டனர்.

சேலம்:

சேலம் அருகே உள்ள சேலத்தாம்பட்டி பகுதியை சேர்ந்தவர் சடையப்பன். இவரது மனைவி ஜம்பு . இவர் நேற்று லீ-பஜார் மார்க்கெட்டில் பொருட்கள் வாங்குவதற்கு பணத்தை எடுத்துக் கொண்டு பஸ்சில் வந்து இறங்கினார். லீ பஜாரில் பொருட்கள் வாங்கிவிட்டு திரும்பும்போது கழுத்தில் கிடந்த 5 பவுன் தங்க சங்கிலியை காணவில்லை. இதனால் ஜம்பு அதிர்ச்சி அடைந்தார்.

யாரோ நைசாக நகையை திருடி உள்ளனர் என்பது தெரியவந்தது. இதன் மதிப்பு சுமார் ரூ.1 லட்சம் இருக்கும் என போலீசார் தரப்பில் கூறப்படுகிறது. இந்த சம்பவம் குறித்து பள்ளப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.

காங்கயம்:

சேலம் மாவட்டம் மேட்டூரை சேர்ந்தவர் சதிஷ்குமார் (28).இவரது மனைவி மணிமேகலை. இவர்களுக்கு திருமணமாகி 3 வருடம் ஆகிறது.

இவர்கள் திருப்பூர் மாவட்டம் ஊத்துக்குளி அருகே உள்ள கூனம்பட்டியில் தங்கி கூலி வேலைக்கு சென்று வந்தனர். கணவன்-மனைவிக்கிடைேய தகராறு இருந்து வந்தது.

இதில் மனம் உடைந்த சதிஷ்குமார் வீட்டில் யாரும் இல்லாத நேரத்தில் தனது வேட்டியில் தூக்கு போட்டு தற்கொலை செய்து கொண்டார்.

இது குறித்து ஊத்துக்குளி போலீசில் புகார் செய்யப்பட்டது. போலீசார் சம்பவ இடத்திற்கு விரைந்து சென்று சதிஷ் குமார் உடலை மீட்டு திருப்பூர் அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர். இது குறித்து விசாரணை நடத்தி வருகிறார்கள்.

நாகர்கோவில்:

இந்திய கம்யூனிஸ்டு கட்சியின் மூத்த தலைவர் நல்லக்கண்ணு இன்று நாகர்கோவிலில் நிருபர்களுக்கு பேட்டி அளித்தார். அவர் கூறியதாவது:-

புழல் ஜெயிலில் கைதிகள் அறையில் பயன்படுத்தப்பட்ட டி.வி.க்கள் பறிமுதல் செய்யப்பட்டுள்ளது. போலீசார் துணை இல்லாமல் ஜெயிலுக்குள் டி.வி. கொண்டு செல்ல முடியாது. இதில் சம்பந்தப்பட்ட அனைவர் மீதும் நடவடிக்கை எடுக்க வேண்டும்.

தற்போது தமிழகம் முழுவதும் ஜெயில்களில் போலீசார் சோதனை மேற்கொண்டு வருகிறார்கள். இந்த சோதனை காலம் கடந்து நடத்தப்படும் நடவடிக்கை ஆகும்.

தமிழகம் முழுவதும் மின்சார தட்டுப்பாடு இல்லாமல் இருப்பதாக கூறி வருகிறார்கள். ஆனால் மின்சாரம் தட்டுப்பாடு உள்ளது. இதை சரி செய்ய அரசு நடவடிக்கை எடுக்க வில்லை. அரசு மின்சார வாரியத்தை தனியார் மயமாக்க முயற்சி செய்து வருகிறது.

ராஜீவ்காந்தி கொலை வழக்கில் ஜெயிலில் அடைக்கப்பட்டுள்ள பேரறிவாளன், நளினி உள்பட 7 பேரை விடுதலை செய்ய வேண்டும் என்று சட்டமன்றத்தில் தீர்மானம் நிறைவேற்றியது மட்டுமின்றி அமைச்சரவையிலும் தீர்மானம் நிறைவேற்றப்பட்டு கவர்னருக்கு அனுப்பி வைக்கப்பட்டுள்ளது.

27 ஆண்டுகள் அவர்கள் சிறையில் இருக்கிறார்கள். அவர்களை விடுதலை செய்வதில் சட்ட சிக்கலும் இல்லை. மக்கள் ஆதரவும் அளித்துள்ளனர். எனவே அவர்களை தாமதம் இல்லாமல் உடனே விடுதலை செய்ய வேண்டும்.

தமிழக அமைச்சர்கள் அனைவர் மீதும் குற்றச்சாட்டுக்கள் இருக்கிறது. குட்கா விவகாரத்தில் அமைச்சர் விஜயபாஸ்கர் உள்பட இதில் சம்பந்தப்பட்ட அனைவர் மீதும் வழக்குப்பதிவு செய்து நடவடிக்கை எடுக்க வேண்டும். விஜயபாஸ்கர் உடனடியாக ராஜினாமா செய்ய வேண்டும். தமிழக அரசு தனது பொறுப்பை தட்டிக்கழிக்கிறது.

ஆட்சியை தக்க வைக்க வேண்டும், வரும் தேர்தலை அதிகாரத்துடன் எதிர்கொள்ள வேண்டும் என்பதை மனதில் கொண்டே அவர்கள் செயல் படுகிறார்கள். மக்களை பற்றி கவலைப்பட வில்லை. ஜனநாயக விரோத ஆட்சி நடந்து கொண்டு இருக்கிறது.

அ.தி.மு.க. அரசு பாரதிய ஜனதாவின் கை பொம்மையாக உள்ளது. எச். ராஜா உள்பட ஆளுங்கட்சியைச் சேர்ந்தவர்கள் வரைமுறை இல்லாமல் பேசுகிறார்கள். அவர்கள் மீது எந்த நடவடிக்கையும் எடுக்கப்படவில்லை. தூத்துக்குடிக்கு தமிழக பாரதிய ஜனதா தலைவர் தமிழிசை சவுந்தரராஜன் விமானத்தில் வந்தபோது, அதே விமானத்தில் வந்த மாணவி சோபியா பாரதிய ஜனதாவுக்கு எதிராக கோ‌ஷமிட்டதால் அவர் கைது செய்யப்பட்டும், அவரது பாஸ்போர்ட்டும் பறிமுதல் செய்யப்பட்டுள்ளது.

தூத்துக்குடியில் நடந்த துப்பாக்கி சூட்டில் 15 பேர் சுட்டுக்கொல்லப்பட்டனர். சம்பந்தப்பட்ட போலீஸ்காரர்கள் மீது எந்தவித நடவடிக்கை எடுக்கப்பட வில்லை.

குமரி மாவட்டத்தில் ஒகி புயல் தாக்கிய பிறகு தமிழக முதல்-அமைச்சர் எடப்பாடி பழனிச்சாமியும், பிரதமர் மோடியும் காலம் கடந்து வந்தே இங்கு பார்வையிட்டனர். அப்போது அவர்கள் அளித்த வாக்குறுதிகள் இன்னும் நிறைவேற்றப்படவில்லை. மீனவர்களுக்கு, விவசாயிகளுக்கு, மலை வாழ் மக்களுக்கு இன்னும் நிவாரணம் கிடைக்கவில்லை.

நாகர்கோவிலில் தற்போது 20 நாட்களுக்கு ஒருமுறை குடிநீர் வழங்கப்பட்டு வருகிறது. மக்களுக்கான அடிப்படை வசதி பற்றி அரசு கவலைப்படவில்லை.

இவ்வாறு அவர் கூறினார். #TNPrisons #Nallakannu