நீங்கள் தேடியது "slug 102691"

நெல்லை:

நெல்லை பகுதியில் பள்ளி-கல்லூரி மாணவர்கள் பலர் போதை பழக்கத்திற்கு உட்பட்டு மோதல்களில் ஈடுபட்டு வந்தனர். இதை தடுக்க சமீபத்தில் நெல்லை பகுதியில் அதிரடி சோதனை நடத்தி ஏராளமான கஞ்சா பறிமுதல் செய்யப்பட்டது.

கஞ்சா வியாபாரிகள் 10-க்கும் மேற்பட்டவர்கள் கைது செய்யப்பட்டு சிறையில் அடைக்கப்பட்டனர்.

இதைத்தொடர்ந்து நெல்லை பகுதியில் ஏராளமாக தடை செய்யப்பட்ட “போதை பாக்கு” உள்ளிட்ட தடை செய்யப்பட்டபுகையிலை பொருட்கள் பதுக்கி வைத்து விற்பனை செய்யப்படுவதாக மாவட்ட சிறப்பு குற்றப்பிரிவு போலீசாருக்கு தகவல்கள் கிடைத்தன.

இதைத்தொடர்ந்து சிறப்பு குற்றப்பிரிவு போலீசார் இன்று காலை நெல்லை பேட்டை அருகே உள்ள திருவேங்கடநாதபுரம் செல்லும் ரோட்டில் சென்றுகொண்டிருந்தனர். அப்போது அந்த வழியே ஒரு லாரி சந்தேகப்படும்படி சென்றது. அப்பகுதியில் உள்ள ஒரு வீட்டு முன்பு லாரி நிறுத்தப்பட்டது. அதில் இருந்து போதை பாக்குகள், புகையிலை பொருட்கள் இறக்கி வைக்கப்பட்டன. இதை நோட்டமிட்ட போலீசார் அந்த வீட்டை சுற்றி வளைத்து அதிரடி சோதனை நடத்தினர்.

அப்போது அங்கு போதை பாக்கு மற்றும் புகையிலை பொருட்கள் குவியல் குவியலாக வைக்கப்பட்டிருப்பதை பார்த்தனர். இதையடுத்து அவற்றை கொண்டு வந்த லாரியை போலீசார் பறிமுதல் செய்தனர். அருகில் நின்ற லாரி டிரைவர் சம்பத்(30), கிளீனர்(28) ஆகிய 2 பேரையும் போலீசார் மடக்கி பிடித்தனர். இதை கவனித்த சிலர் அந்த வீட்டின் பின்பக்க கேட் சுவர் வழியாக தப்பி ஓடிவிட்டனர். உடனே அவர்களை போலீசார் விரட்டினர். போலீசார் சுற்றி வளைத்து மடக்கியதில் நெல்லையைச் சேர்ந்த அன்வர் என்பவர் பிடிபட்டார். அவரிடம் போலீசார் விசாரணை நடத்தி வருகிறார்கள். தொடர்ந்து போலீசார் வீட்டில் சோதனை போட்டனர்.

பெட்டி பெட்டியாக வைக்கப்பட்டிருந்த போதை பாக்குகள் இருந்தது கண்டுபிடிக்கப்பட்டது. பல மூட்டைகளிலும் போதை பாக்குகள் கட்டி வைக்கப்பட்டு இருந்தன. அந்த வீட்டின் அனைத்து அறைகளிலும் போதை பாக்குகள் அடுக்கி வைக்கப்பட்டு இருந்தன. இவற்றின் மொத்த மதிப்பு ரூ.15 லட்சத்திற்கு மேல் இருக்கும் என்று கூறப்படுகிறது.

அனைத்தையும் போலீசார் பறிமுதல் செய்து, சுத்தமல்லி போலீசுக்கு தகவல் கொடுத்தனர். அதன் பேரில் சுத்தமல்லி போலீஸ் இன்ஸ்பெக்டர் குமாரிசித்ரா மற்றும் போலீசார் வழக்குப்பதிவு செய்து அன்வரை உள்ளிட்ட 3 பேரை கைது செய்தனர். தப்பி ஓடிய நெல்லை வியாபாரி ஹனீபா உள்பட சிலரை போலீசார் தேடிவருகிறார்கள்.

நெல்லை:

நெல்லையை அடுத்த தாழையூத்து காமராஜ் நகர் வடக்கு தெருவை சேர்ந்தவர் முத்துராமன். கூலித் தொழிலாளி. இவரது மகன் முத்துச் செல்வம் (12). இவன் அதே பகுதி சங்கர் நகரில் உள்ள பள்ளியில் 7-ம் வகுப்பு படித்து வந்தான்.

முத்து செல்வம் தினமும் பள்ளிக்கு சைக்கிளில் சென்று வருவது வழக்கம். இன்று காலையும் வழக்கம் போல் சைக்கிளில் புறப்பட்டு சென்ற அவன் நான்கு வழிச் சாலையை கடக்க முயன்றான். அப்போது அந்த வழியாக வேகமாக வந்த வேன் அவன் மீது மோதியது.

இதில் தூக்கி வீசப்பட்ட முத்துச்செல்வத்திற்க்கு தலையில் பலத்த காயம் ஏற்பட்டு ரத்தம் கொட்டியது. ரத்த வெள்ளத்தில் மிதந்த அவனை அப்பகுதியில் நின்றவர்கள் மீட்டு சிகிச்சைக்காக நெல்லை அரசு மருத்துவ மனைக்கு கொண்டு சென்றனர். ஆனால் வழியிலேயே மாணவன் முத்துசெல்வம் பரிதாபமாக இற‌ந்தான்.

இந்த விபத்து குறித்து தாழையூத்து போலீசார் வழக்குப்பதிவு செய்து விசாரணை நடத்தி வருகின்றனர்.

நெல்லை:

நெல்லை மாவட்டம் களக்காடு அருகேயுள்ள புதூர் நடுத்தெருவை சேர்ந்தவர் பால்பாண்டி. இவரது மகன் ராம்குமார் (வயது25). இவர் கோவையில் உள்ள ஒரு தனியார் நிறுவனத்தில் ஊழியராக வேலை பார்த்து வந்தார். இந்நிலையில் நேற்று விடுப்பு எடுத்துக்கொண்டு கோவை-நாகர்கோவில் எக்ஸ்பிரசில் நெல்லைக்கு புறப்பட்டு வந்தார்.

இன்று அதிகாலை அந்த ரெயில் நெல்லை தச்சநல்லூர் ரெயில்வே மேம்பாலம் அருகே வந்து கொண்டிருந்தது. அப்போது ரெயில் பெட்டியின் வாசலில் நின்று கொண்டு வேடிக்கை பார்த்தபடி வந்த ராம்குமார் திடீரென ரெயிலில் இருந்து தவறி கீழே விழுந்தார்.இதில் ரெயில் சக்கரத்தில் சிக்கிய அவர் படுகாயம் அடைந்து சம்பவ இடத்திலேயே பலியானார்.

இந்நிலையில் இன்று காலை சென்னையில் இருந்து வந்த நெல்லை எக்ஸ்பிரஸ் அதே தண்டவாளத்தில் வந்து கொண்டிருந்தது. தண்டவாளத்தின் நடுவே ஒருவர் இறந்து கிடப்பதை பார்த்த ரெயில் என்ஜின் டிரைவர் ரெயிலை நிறுத்தினார். தண்டவாளத்தில் வாலிபர் பிணம் கிடப்பது குறித்து நெல்லை சந்திப்பு ரெயில்வே போலீசாருக்கு தகவல் தெரிவிக்கப்பட்டது.

இதையடுத்து சம்பவ இடத்திற்கு ரெயில்வே இன்ஸ்பெக்டர் அருள்ஜெயபால், சப்-இன்ஸ்பெக்டர் சரவணன் ராஜன் மற்றும் போலீசார் வந்தனர். அவர்கள் வாலிபர் ராம்குமாரின் உடலை தண்டவாளத்தில் இருந்து மீட்டனர். இதையடுத்து நெல்லை எக்ஸ்பிரஸ் அங்கிருந்து புறப்பட்டு சென்றது. ராம்குமார் மரணம் குறித்து ரெயில்வே போலீசார் வழக்குப்பதிந்து விசாரணை நடத்தி வருகின்றனர்.